Author: Ayesha Rehmani

عراقی حکومت نے اعلان کیا ہے کہ امریکی فوج 30 ستمبر تک عراقی کردستان سے مکمل انخلا کرے گی۔

عراقی حکومت کے مطابق کردستان سے امریکی فوجی سازوسامان اور اہلکاروں کی منتقلی جاری ہے کردستان میں امریکی فوجی اڈے عراقی سکیورٹی فورسز کے حوالے کیے جائیں گے،امریکی اور عراقی حکام کے درمیان انخلا کے طریقۂ کار اور فوجی سازوسامان کی منتقلی سے متعلق رابطے جاری ہیں۔

امریکی فورسز نے اربیل کے علاقے میں موجود فوجی سازوسامان اور فضائی دفاعی نظام کی منتقلی شروع کر دی ہے، بعض اہلکاروں اور دیگر عسکری وسائل کو بھی مرحلہ وار منتقل کیا جا رہا ہے یہ پیشرفت امریکا اور عراق کے درمیان ستمبر 2024 میں طے پانے والے مرحلہ وار سکیورٹی منتقلی کے منصوبے کا حصہ ہے۔

عراقی حکومت کا کہنا ہے کہ امریکی اور دیگر اتحادی ممالک کے ساتھ تعاون مکمل طور پر ختم نہیں ہوگا بلکہ فضائی دفاع، انٹیلی جنس اور انسداد دہشت گردی سمیت مختلف شعبوں میں دوطرفہ سکیورٹی تعاون جاری رہے گا،اس منصوبے کے تحت عراق میں داعش کے خلاف امریکی قیادت میں فوجی مشن کو ختم کرکے دونوں ممالک کے درمیان طویل المدتی دوطرفہ سکیورٹی تعاون کی جانب منتقل ہونا تھا-

امریکی صدر ڈونلڈ ٹرمپ نے دعویٰ کیا ہے کہ امریکی فوج نے بارودی سرنگیں صاف کرتے ہوئے آبنائے ہرمز کا کنٹرول حاصل کر لیا ہے۔

صدر ٹرمپ نے اوول آفس میں صحافیوں سے گفتگو کرتے ہوئے کہا کہ اس وقت آبنائے ہرمز کا کنٹرول صرف امریکی بحریہ کے پاس ہے، ہماری ناکہ بندی ناقابل تسخیر رہی ہےیہ فولادی دیوار کی مانند ہے اور ہم صرف ان لوگوں کو داخل ہونے دیتے ہیں جنہیں ہم اجازت دینا چاہتے ہیں، صورتحال کچھ پیچیدہ ہے کیونکہ ایران کبھی کبھار آبی گزرگاہ میں بارودی سرنگیں بچھا دیتا ہے، ہم ان بارودی سرنگوں کا سراغ لگا لیتے ہیں۔

ٹرمپ نے ایران کے ساتھ مذاکرات کے بعد آئندہ کے لائحہ عمل کے بارے میں کچھ بتانے سے گریز کرتے ہوئے کہا کہ امریکا ایران کے خلاف کارروائی تیز کر سکتا ہے امریکا ایران سے پہنچائے گئے نقصانات کا ہرجانہ طلب کرنے جا رہا ہے ایران سے اُن تمام لوگوں کے لیے ہرجانے کا مطالبہ کر رہے ہیں، جنہیں متعدد تنازعات میں ہلاک یا زخمی کیا گیا۔

دوسری جانب ایرانی پارلیمنٹ کے ڈپٹی اسپیکر علی نیکزاد کا کہنا ہے کہ ایران کی جوابی کارروائیوں کے نتیجے میں امریکا سمجھ چکا ہے کہ آبنائے ہرمز کو فوجی طاقت سے نہیں کھولا جا سکتا، ایران نے دوست ملک اور عمان پر بھی واضح کر دیا ہے کہ آبنائے ہرمز میں جس راستے پر دونوں ملکوں کا اتفاق ہو گا، اس کے علاوہ کسی بھی راستے کو ایران تسلیم نہیں کرے گا۔

بھارتی کرکٹ ٹیم کے سابق کپتان اور بھارتی کرکٹ کنٹرول بورڈ (بی سی سی آئی) کے سابق صدر سارو گنگولی اور ان کی اہلیہ ڈونا گنگولی کو مبینہ طور پر جان سے مارنے کی دھمکیاں ملنے کا انکشاف ہوا ہے –

بھارتی میڈیا کے مطابق گنگولی خاندان کو گزشتہ کئی ماہ سے نامعلوم افراد کی جانب سے دھمکی آمیز اور قابلِ اعتراض خطوط موصول ہو رہے تھے، تاہم ابتدا میں انہیں کسی شخص کی ذاتی ناراضی یا مداح کی حد سے بڑھی ہوئی جذباتی کیفیت قرار دے کر نظر انداز کیا جاتا رہا،حالیہ دنوں میں موصول ہونے والے دو خطوط میں سارو گنگولی اور ان کی اہلیہ ڈونا گنگولی کے خلاف نہ صرف توہین آمیز زبان استعمال کی گئی بلکہ انہیں اور ان کے ساتھ کام کرنے والے افراد کو سنگین نتائج کی دھمکیاں بھی دی گئیں۔

معاملے کی سنگینی کے پیشِ نظر گنگولی کے ذاتی معاون اور خاندان کی جانب سے کولکتہ کے تھاکرپکور پولیس اسٹیشن میں تحریری شکایت درج کرائی گئی جبکہ ریاستی حکومت کے سیکیورٹی محکمے کو بھی صورتحال سے آگاہ کردیا گیا ہے،شکایت میں پولیس سے مطالبہ کیا گیا ہے کہ دھمکی آمیز خطوط بھیجنے والے شخص کی شناخت کرکے اس کے خلاف کارروائی کی جائے اور سارو گنگولی، ڈونا گنگولی سمیت ان کے عملے کی سیکیورٹی یقینی بنانے کے لیے فوری اقدامات کیے جائیں۔

ابتدائی پولیس تحقیقات کے مطابق یہ خطوط کورئیر کے ذریعے گنگولی کی رہائش گاہ پر بھیجے گئے پیکٹ پر بھیجنے والے کا نام ’ارون کمار‘ درج تھا، جسے بیلگھریا کا رہائشی بتایا گیا ہے،تفتیش کاروں نے خط میں درج فون نمبر کا بھی سراغ لگایا، جو ’Truecaller‘ پر بھی ارون کمار کے نام سے ظاہر ہوا تاہم پولیس اس پہلو سے بھی تحقیقات کررہی ہے کہ آیا خطوط واقعی اسی شخص نے بھیجے یا کسی اور نے اس کی شناخت استعمال کرتے ہوئے گنگولی خاندان کو دھمکیاں دیں۔

پولیس حکام نے گنگولی کے ذاتی معاون کو یقین دہانی کرائی ہے کہ معاملے کی مکمل تحقیقات کی جارہی ہیں اور سابق بھارتی کپتان اور ان کے اہل خانہ کی حفاظت کے لیے تمام ضروری اقدامات کیے جائیں گے،سارو گنگولی کی اہم عوامی حیثیت کے باعث ریاستی سیکیورٹی محکمہ بھی دھمکی کا جائزہ لے رہا ہے اور اس بات پر غور کیا جارہا ہے کہ آیا انہیں اضافی سیکیورٹی فراہم کرنے کی ضرورت ہے۔

یورپ ایک بار پھر شدید گرمی کی لہر کی لپیٹ میں، برطانیہ اور فرانس میں شدید گرمی کے انتباہات جاری کر دیے گئے ہیں۔

رپورٹس کے مطابق برطانیہ اور فرانس کے بعض علاقوں میں رواں ہفتے درجہ حرارت 30 ڈگری سینٹی گریڈ سے تجاوز کرکے وسطِ 30 ڈگری تک پہنچنے کا امکان ہے۔ برطانیہ میں یہ رواں سال گرمی کی پانچویں لہر ہوگی۔

شدید گرمی اور خشک موسم کے باعث برطانیہ میں پانی کے استعمال پر پابندیاں عائد کی گئی ہیں اور بعض علاقوں میں باغات اور فصلوں کو پانی دینے پر بھی پابندیاں نافذ ہیں، ملک میں 2 کروڑ 70 لاکھ سے زائد افراد پانی کے استعمال کی پابندیوں کی زد میں ہیں۔

فرانس میں بھی خشک سالی کی صورتحال سنگین ہوگئی ہے اور ملک کے قریباً 70 فیصد حصے میں پانی کے استعمال پر پابندیاں عائد کی گئی ہیں ان پابندیوں میں باغات کو پانی دینے، سوئمنگ پول بھرنے، گاڑیاں دھونے اور فصلوں کو آبپاشی فراہم کرنے پر مختلف نوعیت کی پابندیاں شامل ہیں۔

اسپین کے محکمہ موسمیات کے مطابق جولائی 2026 ملک میں 1961 کے بعد ریکارڈ کیے گئے گرم ترین جولائی کے مہینوں میں شامل رہا، جبکہ اسپین کے مرکزی علاقے میں جولائی اس لحاظ سے خشک ترین رہا کہ گزشتہ ماہ صرف 4.3 ملی میٹر بارش ریکارڈ کی گئی، جو معمول کی بارش کا صرف 26 فیصد ہے،شدید گرمی اور خشک سالی کے باعث اسپین اور یونان کے مختلف علاقوں میں جنگلات کی آگ بھی بھڑک اٹھی ہےاسپین کے جنوبی علاقے اندلس میں جنگلات کی آگ کے باعث قریباً 500 افراد کو محفوظ مقامات پر منتقل کیا گیا ہے۔

دوسری جانب جرمنی میں شدید گرمی اور کم بارش کے باعث دریائے رائن میں پانی کی سطح خطرناک حد تک کم ہوگئی ہے، جس سے تجارتی جہاز رانی متاثر ہونے کا خدشہ ظاہر کیا گیا ہے۔

ماہرین کے مطابق موسمیاتی تبدیلی کے باعث یورپ دنیا کا تیزی سے گرم ہونے والا براعظم بن چکا ہے اور سوئٹزرلینڈ، آسٹریا اور ہنگری میں بھی آنے والے دنوں میں درجہ حرارت میں اضافے کی پیش گوئی کی گئی ہے۔