سندھ کے سینئر وزیر شرجیل میمن نے کہا ہے کہ آزاد کشمیر میں 2024 کے انتخابات کی روایت کو دہرایا گیا،آزاد کشمیر میں فارم 47 پلس کی حکومت بن رہی ہے-
آزاد کشمیر کے صدر چوہدری یاسین کے ہمراہ پریس کانفرنس کرتے ہوئے شرجیل میمن،نے کہا کہ آزاد کشمیر کے انتخابات میں عوامی مینڈیٹ پر ڈاکہ ڈالا گیا ،ترجیح ن لیگ کو نہیں انتخابات کو دی جائے ، پیپلز پارٹی آخری مرحلے تک میدان خالی نہیں چھوڑے گی ، چاہے کتنے بھی گٹھ جوڑ ہوں ہم مقابلہ کریں گے،پوری دنیا نے دیکھا کہ پیپلز پارٹی کو ہرانے کے لیے ن لیگ، وفاقی حکومت اور پنجاب حکومت کا گٹھ جوڑ تھا ، الیکشن کمیشن شروع سے ن لیگ کے ساتھ پارٹی بنا ہوا تھا، چیف الیکشن کمشنر ن لیگ کی بی ٹیم بنے ہوئے تھے۔
ان کا کہنا تھا کہ وہ فارم 47 کی حکومت تھی ، یہ فارم 47 پلس کی حکومت بن رہی ہے ، آج وفاقی وزراء کی پریس کانفرنس میں تکبر نظر آ رہا تھا ، ہمارا لب و لہجہ بدتمیزی والا نہیں ہو گا ،ہم دلیل کے ذریعہ اپنی بات کریں گے 27 جولائی کو میرپور ڈویژن میں الیکشن ہوا ، اس کی بیشتر شکایات الیکشن کمیشن کو تحریری دی گئیں مگر کوئی ایکشن نہیں ہوا۔
اس موقع پر چوہدری یاسین نے کہا کہ میں دو حلقوں سے انتخاب لڑ رہا تھا ، صبح سے ہی شکایات مل رہی تھیں کہ پولنگ روک دی گئی ہے ، میں نے الیکشن کمیش حکام سے رابطہ کیا ،40 پولنگ اسٹیشنز میں 85 سے 99 فیصد تک ووٹ ڈالے گئے ، رات کو ووٹ ڈالتے رہے اور صبح نتائج کا اعلان کیا پری پول دھاندلی پہلے دن سے شروع کی گئی ، پنجاب پولیس کے لوگوں نے خود ووٹ ڈالے اور ہمارے لوگوں کو مارا۔
