Author: Khalid Mehmood Khalid

فلسطین وکشمیر سمیت یمن ، لبنان اور افغانستان و عراق جیسے مسائل کے حل کے لئے مشترکہ جد وجہد ضروری ہے ۔ ان خیالات کا اظہار تیرہ ممالک کے اراکین پارلیمنٹ بشمول پاکستان سے سینیٹر مشاہد حسین، روس سے سرگئی بابورین، ایران سے امیر حسین عبداللہیان، جنوبی افریقا سے نکوسی مینڈیلا، فلسطین سے ھدی نعیم ،ترکی سے حسن توران، ملائیشیا سے سید ابراھیم، عراق سے حامد عباس موسوی، افغانستان سے سینیٹر مولوی عبداللہ قرلق، لبنان سے سیف ابراہیم موسی، شام سے ڈاکٹر نضال عمار، بحرین سے سابق رکن پارلیمنٹ ڈاکٹر جلال فیروز اور یمن سے وزیر تعلیم یحیٰ بدرالدین الحوثی نے فلسطین فاءونڈیشن پاکستان کے زیر اہتمام منگل اور بدھ کی درمیانی شب منعقدہ بین الاقوامی کانفرنس ’’عالمی صہیونزم کے مقابلہ میں عالمی مزاحمت کی تشکیل‘‘ سے ویڈیو لنک کے ذریعہ سے خطاب کیا ۔ کانفرنس کی میزبانی فلسطین فاءونڈیشن پاکستان کے مرکزی سیکرٹی جنرل صابر ابو مریم نے کی ۔ مقررین نے فلسطین فاءونڈیشن پاکستان کی جانب سے اراکین پارلیمنٹ کی عالمی آن لائن کانفرنس کے اقدام کو سراہتے ہوئے کہا کہ فلسطین اور کشمیر کے مسائل کا حل ناگزیر ہے ۔
کانفرنس سے خطاب کرتے ہوئے پاکستان کے سینیٹر مشاہد حسین سید نے کہا کہ پاکستان مظلوم انسانیت کے ساتھ کھڑا ہے اورسر فہرست مظلوم فلسطینی اور کشمیری عوام کی حمایت ہے ۔ روس کے سابق رکن پارلیمنٹ اور صدارتی امید وار سرگئی بابورین نے کہا کہ اسرائیل نسل پرستی کا گڑھ اور خون چوسنے والی جونک ہے ۔ ان کاکہنا تھا کہ فلسطین پر اسرائیل کا ناجائز قیام سے لے کر فلسطینیوں کی آزادی کے راستے میں سب سے بڑی رکاوٹ عالمی صہیونزم اور صہیونی تحریک ہے ۔ ایران کے اسپیکر پارلیمنٹ کے مشیر امیر حسین عبد اللہیان نے کہا کہ ایران فلسطین و کشمیر سمیت تمام مظلوموں کا حامی ہے ،عرب امارات اور اسرائیل تعلقات کا معاہدہ خطے کے امن کو سبوتاژ کرنے کی امریکی سازش ہے ۔ شہدائے فلسطین وکشمیر اور شہید القدس جنرل قاسم سلیمانی کی قربانیاں رائیگاں نہیں جائیں گے ۔ ترکی کے رکن پارلیمنٹ نے کہا کہ فلسطین وکشمیر سمیت یمن اور عراق و شام جیسے مسائل پر اقوام متحدہ کی خاموشی ایک مجرمہ فعل ہے اور اقوام متحدہ اپنا کردار ادا نہیں کر رہی لہذا یہ ایک بے وقعت ادارہ ہے ۔ فلسطین سے حما س کی رکن پارلیمنٹ ھدیٰ نعیم کاکہنا تھا کہ فلسطینی اپنے حق کی جنگ لڑ رہے ہیں اور کسی بھی عرب ملک کی جانب سے اسرائیل کے ساتھ تعلقات قائم کرنا فلسطینیوں کی خواہشات اور امنگوں کی عکاسی نہیں کرتا اور نہ ہی فلسطینی عوام کی جد وجہد کو روک سکتا ہے ۔ یمن سے انصار اللہ کے رکن پارلیمنٹ اور وزیر تعلیم یحیٰ بدر الدین حوثی نے کہا کہ فلسطین وکشمیر میں جاری ظلم اور بربریت کی شدید مذمت کرتے ہیں ہم اپنے کشمیری بھائیوں کے ساتھ ہیں ۔ ۔ ملائیشیا کے رکن پارلیمنٹ سید ابراہیم نے کہا کہ مسئلہ فلسطین اور کشمیر کے حل کے بغیر دنیا میں امن قائم نہیں ہو سکتا ۔ لبنان سے حزب اللہ کے رکن پارلیمنٹ ابراہیم موسوی کاکہنا تھا کہ فلسطین وکشمیر میں ظلم و ستم کو روکنے کے لئے تمام ممالک کے اراکین پارلیمنٹ بھرپور کردا ادا کریں ۔ حزب اللہ فلسطین وکشمیر سمیت دیگر مظلوم اقوام کو تنہا نہیں چھوڑے گی ۔ ۔ عراقی حشد الشعبی سے تعلق رکھنے والے رکن پارلیمنٹ حامد عباس موسوی کاکہنا تھا کہ فلسطینی عوام اور مسلمان اقوام کوعرب اور اسرائیل تعلقات اور قبلہ اول بیت المقدس پر اسرائیلی تسلط کے لئے امریکی سرپرستی میں نئی صہیونی لہر کا سامنا ہے ۔ بحرین کے سابق رکن پارلیمنٹ ڈاکٹر جلال فیروز نے کہا کہ بحرینی عوام اور اراکین پارلیمنٹ حکمرانوں کے اسرائیل کے ساتھ تعلقات کے خلاف ہیں ۔ افغانستان سے سینیٹر مولوی عبد اللہ قرلق نے خطاب کرتے ہوئے کہا کہ مسئلہ فلسطین اور کشمیر سمیت عراق اور یمن جیسے مسائل کو حل کرنے کے لئے امت مسلمہ کو متحد ہونا پڑے گا ۔ افغانستان مظلوم اقوام کی حمایت کرتا ہے ۔ جنوبی افریقہ کے انقلابی رہنما نیلسن مینڈیلا کے پوتے اوررکن پارلیمنٹ نکوسی مینڈیلاکاکہنا تھا فلسطین فاءونڈیشن پاکستان کو خراج تحسین پیش کرتا ہوں کہ فلسطین، کشمیر، لبنان، یمن اور عراق سمیت جنوبی افریقا کے مسائل پر اہم کانفرنس کا انعقاد کیا ہے ۔
کانفرنس کے اختتام پر مشترکہ طور پر پیش کی جانے والی قرار داد میں دنیا بھر سے اراکین پارلیمنٹ کا فورم تشکیل دینے اور عالمی صہیونی سازشوں کو ناکام بنانے اور مقابلہ کرنے کے لئے مشترکہ جد وجہد جاری رکھنے کا عزم اور اتفاق کیا گیا ۔

آزاد جموں و کشمیر کے صدر سردار مسعود خان نے کہا ہے کہ مقبوضہ جموں و کشمیر میں قابض بھارتی فوج کے ہاتھوں خوفناک جرائم اور آخری مرحلہ میں داخل ہونے والی نسل کشی کا شکار کشمیریوں کی طرف سے ایک زور دار عوامی تحریک کے امکان کو رد نہیں کیا جا سکتا ہے۔ یہ کشمیریوں کی اندرونی تحریک ہو سکتی ہے جس میں پاکستان کا کوئی کردار نہیں ہو گا۔ مقبوضہ جموں و کشمیر کے عوام میں اب یہ احساس زور پکڑ رہا ہے کہ گُھٹ گُھٹ کر زندگی گزارنا شاہد اب ممکن نہیں رہا کیونکہ وہ سمجھتے ہیں کہ ظلم سے لڑتے لڑتے جو اس دنیا سے چلے گئے وہ تو گئے لیکن جو زندہ ہیں وہ بھی زندہ درگور ہیں اور اب اُن کے لیے اپنی وطن کو دشمن کے قبضہ سے دوبارہ حاصل کرنے کے سوا کوئی اور راستہ نہیں بچا ہے۔افواج پاکستان کے مجلہ ہلال کے انگریزی ایڈیشنل میں چھپنے والے اپنے ایک خصوصی مضمون میں صدر سردار مسعود خان نے لکھا ہے کہ آنے والے دنوں میں ہمیں حالات کا رُخ موڑنے کے لیے اپنی صفوں کا از سر نو جائزہ لینا ہو گا اور مقبوضہ جموں و کشمیر میں جاری تحریک آزادی کو ایک بین الاقوامی تحریک میں تبدیل کرنے کے لیے کثیر الجہتی عالمی فورمز کی بے حسی سے مایوس ہو کر بیٹھنے کے بجائے ان فورمز کے دروازوں پر دستک دینے کا سلسلہ اُس وقت تک جاری رکھنا ہوگا جب تک وہ اپنے دروازے کھول کر ہماری بات سننے کے لیے تیار نہ ہو جائیں۔ ہمیں اقوام متحدہ کی سلامتی کونسل پر مسلسل زور دیتے رہنا چاہئے کہ وہ اپنی قرار دادوں پر عملدرآمد کرنے کے لیے حالات کو سازگار بنائے یا اقوام متحدہ کے چارٹر کے باب چھ اور سات کے تحت مسئلہ کشمیر کو حل کرنے کے لیے مشاورت کا نیا سلسلہ شروع کرے۔ ہمیں بین الاقوامی سطح پر موجود اس تاثر کو ختم کرنا ہو گا کہ مسئلہ کشمیر علاقائی تنازعہ ہے یادو ملکوں کے درمیان لین دین کا کوئی معاملہ ہے۔ یہ مسئلہ ایک کروڑ چالیس لاکھ انسانوں کی قسمت کا معاملہ ہے جنہوں نے اپنی منزل کا تعین کرنا ہے۔ اس مقصد کے لیے ہمیں دنیا کی ایسی با اثر پارلیمانز تک پہنچ کر ان کے ساتھ کام کرنا ہو گا جن کا اثر اور وزن اقوام متحدہ کی سلامتی کونسل اس کے حقوق انسانی کونسل اور بین الاقوامی سول سوسائٹی محسوس کرے۔ صدر آزاد کشمیر نے کہا کہ ہمارے پاس دس ملین اوورسیز کشمیریوں اور پاکستانیوں کی طاقت اور اُن کا تیزی سے پھیلتا ہوا نیٹ ورک ہے اور جو نہ صرف اپنے سیاسی و معاشی اثر و سوخ سے عالمی رائے عامہ کو تشکیل دینے کی طاقت رکھتے ہیں بلکہ وہ حق و انصاف کی حمایت اور کشمیریوں کے حق خود ارادیت کی طرف مائل بھی ہیں۔ اس لیے ہمیں اس طاقت کو کشمیر کاز کے لیے استعمال کرنے میں کسی قسم کی ہچکچاہٹ کا مظاہرہ نہیں کرنا چاہیے۔ صدر آزا د کشمیر نے اپنے مضمون میں تحریر کیا ہے کہ ہمیں بھارت کے کشمیر سے متعلق جھوٹے بیانیہ کے غبارہ سے ہوا نکا لنے کے لیے حق اور سچ پر مبنی اپنا بیانیہ بین الاقوامی برادری کے سامنے رکھنا ہو گا اور ہماری کوششیں صرف روایتی اور نئی ابلاغی ذرائع تک محدود نہیں ہونی چاہیے بلکہ ہمیں نئی ٹیکنالوجیز کی پورٹلز اور اُن اداروں تک بھی پہنچنا چاہیے جہاں تنقیدی سوچ پرورش پاتی ہے۔ صدر ریاست نے تجویز کیا کہ ہمیں قیادت اور سیادت نوجوان مرد و خواتین کو منتقل کرنی چاہیے جو پہلے ہی مقبوضہ جموں و کشمیر میں خون کا نذرانہ پیش کر رہے ہیں اور اُنہیں سیاسی و سفارتی مہم کا حصہ بنانے کی ضرورت ہے۔ اُنہوں نے کہا کہ جب ہم مقبوضہ جموں و کشمیر میں بھارتی مظالم کی بات کرتے ہیں تو اس کا ہر گز یہ مطلب نہیں کہ اِن مظالم کے ذمہ دار بھارت کے ایک ارب تیس کروڑ عوام ہیں کیونکہ ہمیں معلوم ہے کہ بھارت میں ایسے پسماندہ اور کچلے طبقات بھی ہیں جن کی اپنی زندگیاں اشرافیہ اور استعماری سوچ رکھنے والوں کے رحم و کرم پر ہیں۔ اُنہوں نے کہا کہ بھارت کے دو سو پچاس ملین دلتوں کو کمتر انسان سمجھا جاتا ہے جبکہ بیس کروڑ مسلمانوں کو بھارت چھوڑنے پر مجبور کیا جار ہا ہے اور اِسی طر ح سکھوں، عیسائیوں، قبائلیوں اور معاشی تاریک وطن کو بے ریاستی کے خطرے کا سامنا ہے۔ ان پسماندہ طبقات کی اکثریت بھارت کی مقبوضہ کشمیر میں ظالمانہ پالیسیوں کی حمایت نہیں کرتی۔ صدر سردار مسعود خان نے یہ بھی تجویز کیا کہ پاکستان کو سیاسی لحاظ سے مستحکم اور معاشی اعتبار سے مضبوط بنایا جائے اور اس مقصد کے لیے قلیل المیعاد اور طویل المعیاد منصوبہ بندی کی ضرورت ہے۔ اُنہوں نے کہا کہ بھارت کی بی جے پی۔ آرایس ایس حکومت نے بھارت کے سیکولرازم کا نمائشی نقاب اُتار کر اپنے تمام ہمسائیوں خاص طور پر پاکستان اور مقبوضہ جموں و کشمیر کے عوام کے خلاف کثیر المحاذی جنگ چھیڑ دی ہے۔ اب بھارت میں باقی جو کچھ بچا ہے وہ جنگجو ئی، تشدد، نفرت، تفاوت اور استثنیٰ کے علاوہ کچھ نہیں ہے۔ اس زہریلہ مرکب کا سب سے زیادہ شکار ہندوستانی عوام ہوں گے لیکن اس سے پہلے ہندو توا کی تباہ کن طاقت زنجیروں میں جکڑی کشمیری قوم کو تباہ کر چکی ہو گی۔ ایسی تباہی کو روکنے کے لیے ہر ممکن کوشش کرنی ہو گی۔ صدر آزاد کشمیر نے کہا کہ مقبوضہ کشمیر کے بہادر عوام کا یہ عزم ہے کہ تمام تر حیوانیت کے باوجود وہ ہندوستان سے آزادی حاصل کریں گے کیونکہ یہ تاریخ کا فیصلہ ہے۔