Author: ممتاز حیدر

لاہور کے علاقے کوٹ لکھپت میں واقع پیکو روڈ پر ایک گھر کے کچن میں گیس سلنڈر دھماکے کے نتیجے میں خوفناک آگ بھڑک اٹھی، جس کے باعث خواتین اور بچوں سمیت پانچ افراد جھلس کر زخمی ہوگئے۔

واقعے کے بعد علاقے میں خوف و ہراس پھیل گیا جبکہ ریسکیو ٹیموں نے بروقت کارروائی کرتے ہوئے متاثرین کو طبی امداد فراہم کی۔ترجمان ریسکیو 1122 کے مطابق دھماکا اچانک کچن میں موجود گیس سلنڈر پھٹنے سے ہوا، جس کے فوراً بعد آگ نے کچن اور قریبی حصوں کو اپنی لپیٹ میں لے لیا۔ اطلاع ملتے ہی ریسکیو 1122 کی فائر فائٹنگ اور ایمبولینس ٹیمیں موقع پر پہنچ گئیں اور آگ پر قابو پا کر گھر میں پھنسے افراد کو باہر نکالا۔ریسکیو حکام کے مطابق آگ لگنے کے نتیجے میں 40 سالہ عظمیٰ بی بی، 22 سالہ فضا بی بی، 22 سالہ زوہا، 14 سالہ کوتابا اور 45 سالہ عظمت جھلس کر زخمی ہوئے۔ تمام زخمیوں کو ابتدائی طبی امداد کے بعد فوری طور پر قریبی اسپتال منتقل کردیا گیا جہاں ان کا علاج جاری ہے۔ بعض زخمیوں کی حالت تشویشناک بتائی جا رہی ہے۔

ریسکیو حکام نے شہریوں سے اپیل کی ہے کہ گھریلو گیس سلنڈرز کے استعمال میں احتیاط برتیں، معیاری سلنڈر اور ریگولیٹر استعمال کریں اور گیس لیکیج کی صورت میں فوری طور پر متعلقہ اداروں کو اطلاع دیں۔

دہشت گردی کے خدشات کے پیش نظر سی ٹی ڈی کی مختلف شہروں میں کارروائیاں جاری ہیں، حکام کے مطابق ایک ہفتے میں 49 دہشت گرد گرفتار کیے گئے جبکہ لاہور سے بھارتی خفیہ ایجنسی کا ایجنٹ پکڑا گیا۔

حکام کے مطابق گرفتار بھارتی ایجنٹ سے بارودی مواد، اسلحہ اور اہم عمارتوں کے نقشے برآمد ہوئے جبکہ دہشتگردوں سے دھماکا خیز مواد، خودکش جیکٹ بنانے کا سامان برآمد کرلیا گیا۔حکام کا کہنا ہے کہ ایک ماہ کے دوران 6131 کومبنگ آپریشنز کے دوران 599 مشتبہ افراد گرفتار کیے گئے، کارروائیاں لاہور، راولپنڈی، جہلم، ٹوبہ ٹیک سنگھ، حافظ آباد، چکوال، گوجرانوالہ، ڈی جی خان اور فیصل آباد میں کی گئیں۔حکام نے بتایا کہ دہشت گرد مختلف مقامات پر کارروائی کرکے عوام میں خوف وہراس پھیلانا چاہتے تھے، کومبنگ آپریشنز میں 2 لاکھ 43 ہزار 546 افراد سے پوچھ گچھ کی گئی۔

باغی ٹی وی سے شہرت حاصل کرنے والے، پاکستان میں کم عمری میں سب سے زیادہ پارلیمنٹیرینز کے انٹرویوز کرنے والے معروف نوجوان صحافی اور اینکر پرسن زین العابدین شاہ لندن سے پاکستان آئے،ان کی پاکستان آمد کے موقع پر لاہور کے معروف کیفیو کیفے جیل روڈ میں ایک پرتکلف ڈنر کا اہتمام کیا گیا۔

تقریب کا اہتمام معروف بزنس مین اور زین العابدین شاہ کے قریبی دوست عبداللہ نے کیا، جبکہ گیسٹ کوآرڈینیشن کے فرائض معروف اینکر پرسن اور قاسم علی شاہ فاؤنڈیشن سے وابستہ اے آر ماڈھا نے انجام دیے۔دیار عشق کی اقرا ء پارس بھی منتظمین میں شامل تھیں جو معزز مہمانوں کے استقبال سے لے کر آخر تک تقریب میں متحرک رہیں، اس موقع پر ملکی میڈیا کے نامور اور ابھرتے ہوئے صحافیوں نے شرکت کر کے تقریب کو چار چاند لگا دیے،زین العابدین شاہ نے اپنے صحافتی سفر کا آغاز لاہور سے کیا اور بعد ازاں لندن منتقل ہوئے، تاہم بیرونِ ملک قیام کے باوجود وہ صحافت سے مسلسل وابستہ رہے۔ اس وقت وہ لندن میں ایک نجی چینل کے مارننگ شو کی میزبانی کے فرائض انجام دے رہے ہیں اور بین الاقوامی سطح پر پاکستانی صحافت کا نام روشن کر رہے ہیں۔

زین العابدین شاہ کے اعزاز میں منعقدہ تقریب میں سینئر صحافی و اینکر پرسن عمر دراز گوندل، محمد شعیب،حمزہ علی، میمونہ چیمہ، شاکر اعوان، شہزاد روشن گیلانی، سلمان خان،عظیم بٹ، اعظم اعظم، ڈاکٹر ثمر عباس، احتشام اللہ بحلیم، فرحان خان، تحریم قاضی، اومان، چوہدری نعمان، نبیل رشید، احسن ظفر، راشد اکرم، اقرا آغا، خرم ملک, میاں طیب سولہری،مزمل حسین سیالوی، طارق بن نواز ،توقیر کھرل،ذیشان المانی،رانا مزمل حسین،رائے حیدر کھرل،احسن قاسم،سمیت میڈیا سے وابستہ دیگر نمایاں شخصیات نے شرکت کی۔

تقریب کے دوران باغی ٹی وی کی 14ویں سالگرہ کے موقع پر زین العابدین شاہ کی شاندار صحافتی خدمات اور بہترین کارکردگی کے اعتراف میں ایڈیٹر باغی ٹی وی ممتاز اعوان کی جانب سے انہیں اعزازی ایوارڈ بھی پیش کیا گیا،

اس موقع پر زین العابدین شاہ نے مختصر خطاب کرتے ہوئے کہا کہ ان کا صحافتی سفر باغی ٹی وی سے شروع ہوا اور آج بھی اسی ادارے سے جڑا ہوا ہے۔ انہوں نے کہا کہ لندن میں دوستوں کی کمی شدت سے محسوس ہوتی ہے، لیکن پاکستان میں چند روز کے لیے آمد پر، خاص طور پر لاہور میں جس محبت اور خلوص کے ساتھ دوستوں نے استقبال کیا، وہ ان کے لیے باعثِ فخر اور خوشی ہے۔ انہوں نے تقریب کے منتظمین اور تمام شرکاء کا تہہ دل سے شکریہ ادا کیا۔تقریب کے اختتام پرشرکا کے لئے پرتکلف کھانے کا انتظام کیا گیا تھا، فوٹو سیشن کے ساتھ ساتھ کیک بھی کاٹا گیا،