Author: ممتاز حیدر

افغان طالبان رجیم کی سرپرستی میں دہشت گردی اور خطے کی بگڑتی ہوئی سکیورٹی صورتحال کے پیشِ نظر برطانوی حکومت نے افغانستان کے لیے ٹریول الرٹ جاری کر دیا ہے۔

افغان طالبان رجیم کی سرپرستی میں دہشت گرد تنظیموں اور خطہ کی بگڑتی سیکیورٹی صورتحال نے عالمی برادری کو خبردارکردیا۔ افغان طالبان رجیم کو نہ صرف خطے بلکہ عالمی امن کے لیے بھی خطرہ قرار دیا جا رہا ہے۔برطانوی دفترِ خارجہ نے افغانستان کی بدترین سیکیورٹی صورتحال کے باعث برطانوی شہریوں کو خبردار کرتے ہوئے سفر نہ کرنے کی سخت ہدایات جاری کی ہیں۔ افغان جریدے خاما پریس کے مطابق برطانوی حکومت نے پرتشدد واقعات میں مسلسل اضافے اور ملک گیر خطرات کے پیشِ نظر یہ اقدام اُٹھایا ہے۔برطانوی دفترِ خارجہ کی جاری کردہ سفری ہدایات میں کہا گیا ہے کہ متعدد سرحدی گزرگاہیں بند ہونے کے باعث سفر انتہائی خطرناک ہو چکا ہے، جبکہ برطانوی شہریوں کو افغانستان میں گرفتاری اور طویل قید کا سامنا بھی ہو سکتا ہے۔ برطانوی حکام نے افغانستان جانے کے خواہشمند شہریوں کو ممکنہ خطرات کا لازمی جائزہ لینے کا انتباہ دیا ہے۔

برطانوی وزارتِ خارجہ نے افغانستان میں موجود برطانوی شہریوں کو فوری انخلاء کی ہدایات بھی جاری کر دی ہیں۔ مغربی حکام کے مطابق افغان طالبان رجیم کے اقتدار میں آنے کے بعد مخدوش سیکیورٹی صورتحال، محدود نقل و حرکت اور سفارتی رسائی نہ ہونے کے باعث سیکیورٹی الرٹ جاری کیا گیا ہے۔ افغان طالبان رجیم کی سرپرستی میں فتنہ الخوارج خطے میں عدم استحکام اور سیکیورٹی خدشات کے باعث عالمی سلامتی کے لیے ایک سنگین چیلنج بن چکے ہیں۔

بھارتی ریاست منی پور میں علیحدگی پسند تنظیمیں زور پکڑنے لگی ہیں، جہاں اقلیتیں وزیراعظم نریندر مودی کی ایماء پر ہندوتوا کی ریاستی درندگی سے بیزار دکھائی دیتی ہیں۔

مودی کے جابرانہ نظام اور ہندوتوا کے شرپسند عناصر کے جاری ظلم و بربریت کے خلاف کوکی زو کمیونٹی کے مطالبات سامنے آ گئے ہیں،بھارتی جریدے اکھرول ٹائمز کے مطابق مظلوم کوکی قبائل نے بھارتی جبر و ستم کے خلاف منی پور میں الگ انتظامی ڈھانچے کو مسائل کا واحد حل قرار دے دیا ہے۔ آمرانہ طرزِ عمل سے چلنے والی بھارتی ریاست منی پور میں کوکی زو کمیونٹی نے باقاعدہ طور پر علیحدہ انتظامی ڈھانچے کا مطالبہ کر دیا ہے،کوکی زو کمیونٹی کا کہنا ہے کہ انہوں نے جبری نقل مکانی کے ساتھ ساتھ شدید جانی و مالی نقصانات برداشت کیے ہیں، جبکہ حریت پسند تحریکیں کوکی نیشنل آرگنائزیشن اور یونائیٹڈ پیپلز فرنٹ نے بھی علیحدگی کے مطالبے کی حمایت کر دی ہے۔ کمیونٹی کے مطابق طویل ظلم و استبداد کے بعد بی جے پی کی حمایت یافتہ ہندو میتی کمیونٹی کے ساتھ انضمام ممکن نہیں رہا۔

بی بی سی کے مطابق منی پور میں مئی 2023 سے اب تک نسلی فسادات کے نتیجے میں ہزاروں افراد لقمۂ اجل بن چکے ہیں۔ سفاکیت اور بربریت کے بعد بھارت کی اقلیتی ریاستیں علیحدگی کا فیصلہ کر کے برسرِ پیکار ہیں، جبکہ ہندوتوا راج کے خلاف حریت پسند تحریکیں اس حد تک مضبوط ہو چکی ہیں کہ انہیں دبانا ناممکن ہو گیا ہے۔

آسٹریلیا میں فائرنگ میں ہلاک ہونے والے 15 افراد میں سے چند کی آخری رسومات بدھ کے روز ادا کر دی گئی۔ اسی روز پولیس نے مبینہ حملہ آوروں میں سے ایک کے خلاف قتل اور دہشت گردی کے سنگین الزامات بھی عائد کیے۔

سڈنی کے علاقے بانڈی میں واقع چاباد آف بانڈی کے باہر رقت آمیز مناظر دیکھنے میں آئے، جہاں بڑی تعداد میں لوگوں نے مقتول ربی ایلی شلینجر کو خراجِ عقیدت پیش کیا۔ ربی شلینجر اتوار کے روز ہونے والے اس خونریز حملے میں مارے گئے، جو یہودی خاندانوں کو ہنوکہ کی پہلی رات مناتے ہوئے نشانہ بنانے کے لیے کیا گیا تھا۔
ربی شلینجر کے اہلِ خانہ اور عزیز و اقارب آبدیدہ تھے جب ان کا تابوت، جس پر سنہری اسٹار آف ڈیوڈ بنا ہوا سیاہ مخملی غلاف چڑھا تھا، عبادت گاہ میں لایا گیا۔41 سالہ ربی ایلی شلینجر بانڈی بیچ پر منعقد ہونے والے “ہنوکہ بائے دی سی” پروگرام کے منتظم تھے اور چاباد آف بانڈی میں اسسٹنٹ ربی کے طور پر خدمات انجام دے رہے تھے۔ وہ پانچ بچوں کے والد تھے، جن میں ان کا سب سے چھوٹا بیٹا صرف دو ماہ کا ہے۔

انہیں مقامی طور پر “بانڈی ربی” کے نام سے جانا جاتا تھا اور وہ یہودی برادری میں ایک نہایت محبوب اور مخلص مذہبی رہنما سمجھے جاتے تھے۔ عالمی یہودی تنظیم چاباد کے مطابق، ربی شلینجر نے بانڈی کی یہودی برادری میں مذہبی زندگی کو فروغ دینے کے لیے انتھک محنت کی۔تدفینی تقریب کے دوران ان کے سسر، ربی یہورام اُلمان، اپنے جذبات پر قابو نہ رکھ سکے۔ انہوں نے روتے ہوئے کہا “وہ بہترین شوہر، بہترین باپ اور بہترین بیٹا تھا۔ آج میں جو کچھ بھی کہوں گا، وہ اس کی عظمت کو بیان کرنے کے لیے ناکافی ہے۔ تم میرے بیٹے، میرے دوست اور میرے رازدار تھے۔ تمہارے بغیر ایک دن کا تصور بھی ممکن نہیں۔”

آسٹریلوی وزیرِاعظم انتھونی البانیز نے تدفین سے قبل میڈیا سے گفتگو کرتے ہوئے کہا “ربی شلینجر کو نہ صرف ان کے خاندان بلکہ پوری کمیونٹی میں بے حد محبت حاصل تھی۔ اس دکھ کی گھڑی میں تمام آسٹریلوی عوام کے دل اور دعائیں متاثرہ خاندانوں کے ساتھ ہیں۔”

بدھ کے روز دیگر متاثرین ریوین موریسن (62)، پیٹر میگھر اور ربی یعقوب لیویٹن (39) کی تدفین بھی مقرر تھی۔

دوسری جانب ربی شلینجر کی تدفین کے چند گھنٹوں بعد پولیس نے بتایا کہ 24 سالہ نوید اکرم پر مجموعی طور پر 59 الزامات عائد کیے گئے ہیں، جن میں 15 افراد کے قتل،40 افراد کو قتل کرنے کی کوشش،دہشت گردی کی کارروائی انجام دینے جیسے سنگین الزامات شامل ہیں۔نوید اکرم کے والد ساجد اکرم (50) کو پولیس نے موقع پر گولی مار کر ہلاک کر دیا تھا، جبکہ نوید اکرم زخمی حالت میں اسپتال منتقل کیا گیا۔ نیو ساؤتھ ویلز کے پولیس کمشنر مال لینن کے مطابق، نوید اکرم کو منگل کے روز کوما سے ہوش آیا اور جیسے ہی وہ بیان دینے کے قابل ہوگا، اس کے خلاف قانونی کارروائی مکمل کی جائے گی۔

حکام کے مطابق، حملہ آور داعش (اسلامک اسٹیٹ) کے نظریے سے متاثر تھے، اور انسدادِ دہشت گردی کے حکام کا ماننا ہے کہ دونوں نے گزشتہ ماہ جنوبی فلپائن میں عسکری طرز کی تربیت حاصل کی، جو شدت پسند سرگرمیوں کے لیے بدنام علاقہ ہے۔ساجد اکرم ایک لائسنس یافتہ اسلحہ بردار تھا، جس کے بعد آسٹریلیا کے سخت اسلحہ قوانین پر بھی سوالات اٹھنے لگے ہیں۔

یہ واقعہ ایسے وقت پیش آیا ہے جب آسٹریلیا میں یہودی مخالف حملوں میں اضافہ دیکھا جا رہا ہے، جن میں عبادت گاہوں اور یہودی املاک کو نذرِ آتش کرنا اور توڑ پھوڑ شامل ہے۔ یہودی رہنما برسوں سے حکومت سے اس مسئلے پر سخت اقدامات کا مطالبہ کر رہے تھے۔وزیرِاعظم البانیز نے کہا کہ وہ معاشرے سے یہود دشمنی کے مکمل خاتمے کے لیے قانون سازی پر نظرِ ثانی کے لیے تیار ہیں اور نفرت انگیز تقاریر کے قوانین کو مزید سخت کیا جا سکتا ہے۔

نیو ساؤتھ ویلز ہیلتھ کے مطابق، حملے میں زخمی ہونے والے 21 افراد تاحال اسپتال میں زیرِ علاج ہیں، جن میں سے ایک کی حالت نازک ہے۔زخمیوں میں 22 سالہ نو آموز پولیس اہلکار جیک ہیبرٹ بھی شامل ہیں، جن کے سر اور کندھے میں گولیاں لگیں اور ایک آنکھ کی بینائی ضائع ہو گئی۔ ان کے خاندان کے مطابق، جیک نے شدید زخمی ہونے کے باوجود دوسروں کی حفاظت اور مدد جاری رکھی۔اس کے علاوہ، متعدد عام شہریوں کی بہادری کو بھی سراہا جا رہا ہے۔ ڈیش کیم ویڈیو میں نظر آنے والا ساٹھ سالہ جوڑا بورس اور صوفیہ گورمین، جو ایک مشتبہ حملہ آور سے الجھ پڑے اور اس سے بندوق چھیننے کی کوشش کی، اس دوران جان کی بازی ہار گئے۔ وزیرِاعظم البانیز نے انہیں “آسٹریلوی ہیرو” قرار دیا۔