Author: ممتاز حیدر

وزیراعظم محمد شہبازشریف سے پاکستان میں برطانوی ہائی کمشنر محترمہ جین میریٹ نے آج وزیراعظم ہاؤس میں ملاقات کی۔

ملاقات کے دوران وزیر اعظم نے کنگ چارلس سوئم اور وزیر اعظم کیئر سٹارمر کے لیے اپنی نیک خواہشات کا اظہار کیا اور کہا کہ وہ اس سال کے اواخر میں برطانیہ کی قیادت کے ساتھ اپنی ملاقات کے منتظر ہیں۔ انہوں نے برطانوی حکومت کی جانب سے پی آئی اے کی پروازوں کی بحالی کے حالیہ فیصلے کا خیرمقدم کیا۔ وزیر اعظم نے کہا کہ اس مثبت پیشرفت سے برطانوی پاکستانی کمیونٹی کو درپیش مشکلات کو دور کرنے کے ساتھ ساتھ لوگوں کے درمیان تبادلے کو بڑھانے میں بھی مدد ملے گی۔ انہوں نے اس سلسلے میں ہائی کمشنر کے مثبت کردار کو خاص طور پر سراہا۔

وزیراعظم نے پاکستان اور برطانیہ کے درمیان دوطرفہ تعاون کی مثبت رفتار پر اطمینان کا اظہار کرتے ہوئے کہا کہ دونوں ممالک کے درمیان حال ہی میں ہونے والے تجارتی مذاکرات دونوں فریقین کے لیے باہمی طور پر فائدہ مند ثابت ہوں گے۔ انہوں نے کہا کہ پاکستان اقوام متحدہ کی سلامتی کونسل میں بھی برطانیہ کے ساتھ قریبی تعاون کر رہا ہے، جس کی اس وقت پاکستان کے پاس صدارت ہے۔

ملاقات میں جنوبی ایشیا اور مشرق وسطیٰ کی علاقائی صورتحال پر بھی تبادلہ خیال کیا گیا۔ وزیراعظم نے پاک بھارت کشیدگی میں کمی کے لیے برطانیہ کے کردار کو سراہتے ہوئے اس بات کا اعادہ کیا کہ پاکستان بھارت کے ساتھ تمام تصفیہ طلب مسائل پر بامعنی مذاکرات کے لیے تیار ہے۔

برطانوی ہائی کمشنر نے وزیراعظم کو اپنے حالیہ دورہ لندن کے بارے میں بتایا جہاں انہوں نے پاکستان اور برطانیہ کے درمیان تعلقات کو بڑھانے کے حوالے سے وسیع مشاورت کی۔برطانوی ہائی کمشنر نے وزیر اعظم کے وژن اور قیادت میں گزشتہ ڈیڑھ سال میں حکومت کی معاشی کارکردگی کو سراہا جس سے تمام اہم میکرو اکنامک اشاریوں میں نمایاں بہتری آئی۔ ملاقات میں برطانوی ہائی کمشنر نے وزیراعظم کے ساتھ جنوبی ایشیا اور مشرق وسطیٰ میں ہونے والی علاقائی پیش رفت پر برطانیہ کے نقطہ نظر کے حوالے سے گفتگو کی۔

اسلام آباد: پبلک اکاؤنٹس کمیٹی (پی اے سی) کا اجلاس چیئرمین جنید اکبر کی صدارت میں منعقد ہوا جس میں شوگر انڈسٹری سے متعلق مختلف اہم امور پر تفصیلی غور و خوض کیا گیا۔ اجلاس میں سیکریٹری فوڈ نے بریفنگ دی کہ سیزن کے آغاز میں ملک میں 1.3 ملین ٹن چینی کا ذخیرہ موجود تھا۔

اجلاس کے دوران معین پیرزادہ نے بتایا کہ شوگر ایڈوائزری بورڈ میں صارفین کی نمائندگی موجود نہیں ہے، جس پر ارکان نے سخت تحفظات کا اظہار کیا اور کہا کہ صارفین کی آواز کو بھی بورڈ میں شامل کیا جانا چاہیے تاکہ منصفانہ فیصلے کیے جا سکیں۔چیئرمین پی اے سی جنید اکبر نے کہا کہ چند شوگر ملز مالکان کو پہلے ہی چینی برآمد کرنے کی اجازت دی گئی تھی، تاہم کمیٹی نے اس معاملے پر مزید شفافیت کا مطالبہ کیا اور شوگر ملز مالکان کی تفصیلات طلب کر لیں۔سیکریٹری فوڈ سیکیورٹی کے ریمارکس پر ارکان نے تشویش ظاہر کی اور پوچھا کہ چینی برآمد کرنے کی اجازت کس نے دی؟ اور کس کس ملک کو چینی برآمد کی گئی تھی؟ اس حوالے سے مکمل تفصیلات جلد پیش کرنے کی ہدایت دی گئی۔

کمیٹی نے اس بات پر زور دیا کہ چینی کی برآمدات کا مقصد کاشتکاروں کو تحفظ دینا تھا تاکہ ان کے مفادات کا تحفظ کیا جا سکے، لیکن اس عمل میں کچھ ابہامات موجود ہیں جنہیں دور کرنا ضروری ہے۔پی اے سی نے چینی کے اس معاملے کو آئندہ ہفتے تک مؤخر کرتے ہوئے متعلقہ حکام کو ہدایت دی کہ تمام دستاویزات اور تفصیلات فراہم کی جائیں تاکہ شفاف تحقیقات کی جا سکیں۔

اسلام آباد: تحریک انصاف کے سینئر رہنما سلمان اکرم راجہ نے کہا ہے کہ ابھی یہ کہنا قبل از وقت ہے کہ سابق وزیر خارجہ اور پارٹی کے سینئر رہنما شاہ محمود قریشی پارٹی کی قیادت سنبھالیں گے۔

اسلام آباد ہائی کورٹ کے باہر میڈیا سے گفتگو کرتے ہوئے انہوں نے کہا کہ شاہ محمود قریشی کے خلاف ابھی بھی 8 سے 9 مقدمات زیر سماعت ہیں اور وہ ابھی مکمل طور پر آزاد نہیں ہوئے۔سلمان اکرم راجہ نے مزید کہا کہ ابھی صورتحال واضح نہیں ہے، ہمیں دیکھنا ہوگا کہ پارٹی کے فیصلہ ساز اور منصوبہ ساز کیا حکمت عملی اپناتے ہیں۔ انہوں نے زور دے کر کہا کہ پورے ملک کو یہ بات سمجھنی چاہیے کہ موجودہ نظام انصاف اب انصاف کا نظام نہیں رہا۔

انہوں نے کہا، "ہم اپنی جدوجہد جاری رکھیں گے اور عدلیہ کی آزادی کے لیے آواز بلند کرتے رہیں گے۔ آج پورا نظام کنٹرول میں ہے جو کہ عوام کے لیے بڑا چیلنج ہے۔ زندہ قومیں ایسے حالات کا جواب دیتی ہیں۔”