Baaghi TV

Author: ممتاز حیدر

  • لاہور ہائی کورٹ کے جسٹس اسجد جاوید گھرال کی گاڑی کو موٹروے پر حادثہ

    لاہور ہائی کورٹ کے جسٹس اسجد جاوید گھرال کی گاڑی کو موٹروے پر حادثہ

    لاہور: لاہور ہائی کورٹ کے معزز جج، جسٹس اسجد جاوید گھرال کی گاڑی کو موٹروے پر ایک شدید حادثہ پیش آیا ہے۔ حادثے کے فوری بعد جسٹس اسجد جاوید کو فوری طور پر سمندری تحصیل ہیڈ کوارٹر ہسپتال منتقل کیا گیا جہاں ان کو ابتدائی طبی امداد فراہم کی گئی۔

    حادثے کی نوعیت اور اس کی وجوہات کی تفتیش جاری ہے،ابتدائی طبی معائنے کے بعد، جسٹس اسجد جاوید گھرال کو لاہور کے معروف سروسز ہسپتال منتقل کیا جا رہا ہے جہاں ان کا مزید معائنہ اور علاج کیا جائے گا۔ متعلقہ حکام نے تصدیق کی ہے کہ جسٹس اسجد جاوید کی حالت خطرے سے باہر ہے اور وہ محفوظ ہیں۔جسٹس اسجد جاوید گھرال کے خاندان کے افراد، خاص طور پر بیٹے رحمن اسجد نے میڈیا سے گفتگو کرتے ہوئے بتایا کہ والد کی طبیعت بہتر ہے اور وہ جلد صحتیاب ہو جائیں گے۔

  • ایف سی کو ملک بھر میں کام کرنے کا اختیار مل گیا

    ایف سی کو ملک بھر میں کام کرنے کا اختیار مل گیا

    وفاقی حکومت نے فرنٹیئر کانسٹیبلری (ایف سی) کو ملک بھر میں کام کرنے کا بااختیار بنا دیا ہے۔ لا اینڈ جسٹس ڈویژن کی جانب سے جاری کردہ اعلامیے کے مطابق صدر مملکت نے فرنٹیئر کانسٹیبلری ری آرگنائزیشن آرڈیننس 2025 جاری کر دیا ہے، جس کے تحت فرنٹیئر کانسٹیبلری کا نام بدل کر فیڈرل کانسٹیبلری رکھا جائے گا۔

    اعلامیہ میں بتایا گیا ہے کہ آرڈیننس کے مطابق فیڈرل کانسٹیبلری کی ساخت اور قوانین وضع کیے جائیں گے، جس میں ہر ڈویژن میں ایک ونگ کمانڈر تعینات کیا جائے گا۔ اس کے علاوہ، ایف سی کو چاروں صوبوں، اسلام آباد، آزاد جموں و کشمیر اور گلگت بلتستان میں بھی کام کرنے کا اختیار حاصل ہو گا۔آرڈیننس کے تحت، فیڈرل کانسٹیبلری کا دائرہ اختیار اب صرف قبائلی علاقوں تک محدود نہیں بلکہ پورے ملک میں پھیل جائے گا۔ یہ فیصلہ ایف سی ایکٹ 1915 میں ترامیم کے بعد لیا گیا ہے تاکہ ادارے کو جدید تقاضوں کے مطابق فعال بنایا جا سکے۔ اب ایف سی ملک کے تمام صوبوں اور وفاقی علاقوں میں داخلی سلامتی، قانون نافذ کرنے اور امن و امان کے قیام کے لیے کام کرے گی۔

    آرڈیننس میں واضح کیا گیا ہے کہ ایف سی کے سربراہ یعنی انسپکٹر جنرل (آئی جی) کی تقرری وفاقی حکومت کرے گی۔ ہر ڈویژن میں تعینات ونگ کمانڈر کا رینک ڈپٹی انسپکٹر جنرل کے برابر ہوگا۔ وفاقی حکومت کو اختیار حاصل ہوگا کہ وہ وفاقی ریزرو فورس کے تحت اضافی اہلکار بھی بھرتی کر سکے تاکہ ضرورت پڑنے پر فوری طور پر مدد فراہم کی جا سکے۔فیڈرل کانسٹیبلری کی بنیادی ذمہ داریوں میں ملک بھر میں فسادات اور ہنگامی صورتحال کا کنٹرول، داخلی سکیورٹی کو یقینی بنانا، دہشت گردی کے خلاف مؤثر کارروائیاں، اور اہم تنصیبات کا تحفظ شامل ہے۔ اس کے علاوہ ایف سی کی دو بڑی ڈویژنز قائم کی جائیں گی: ایک سکیورٹی ڈویژن اور دوسری فیڈرل ریزرو ڈویژن۔

    فیڈرل کانسٹیبلری کی تنظیم نو کے تحت، بھرتی کے لیے ملک بھر میں دفاتر قائم کیے جائیں گے۔ نئی کمانڈ اور آپریشنل ذمہ داریاں پولیس سروس آف پاکستان کے تجربہ کار افسران سنبھالیں گے تاکہ ادارے کی کارکردگی میں بہتری اور شفافیت لائی جا سکے۔

  • نوجوان پر تشدد کیس میں نامزد سلمان فاروقی پر مقدمہ ختم

    نوجوان پر تشدد کیس میں نامزد سلمان فاروقی پر مقدمہ ختم

    کراچی کی جوڈیشل مجسٹریٹ جنوبی کی عدالت میں ڈیفنس علاقے میں نوجوان پر تشدد کے کیس کی سماعت کے دوران پولیس نے عدالت کو آگاہ کیا کہ تشدد کے مقدمے میں نامزد ملزم سلمان فاروقی کے خلاف مقدمہ ختم کر دیا گیا ہے۔

    سماعت کے دوران پولیس نے عدالت میں رپورٹ جمع کرواتے ہوئے بتایا کہ متاثرہ نوجوان دھیرج عرف دھن راج نے ملزمان کے خلاف کسی قسم کی کارروائی کی خواہش ظاہر نہیں کی اور اپنے حلفیہ بیان میں واضح کیا کہ ملزمان نے نہ تو اس سے اور نہ ہی اس کی بہنوں سے کوئی بدتمیزی کی ہے۔ پولیس رپورٹ میں مزید بتایا گیا کہ مدعی کے بیان کی بنیاد پر جان سے مارنے کی دھمکی اور دیگر الزامات کو بھی ختم کر دیا گیا ہے۔عدالت نے پولیس کی رپورٹ کو ریکارڈ کا حصہ بنا کر سماعت کو ملتوی کر دیا۔

    گزشتہ ماہ ڈیفنس کے علاقے خیابان اتحاد میں ایک موٹرسائیکل سوار نوجوان کو اس کی بہنوں کے سامنے مبینہ طور پر تشدد کا نشانہ بنایا گیا تھا۔ اس واقعے کی ویڈیو سوشل میڈیا پر وائرل ہوئی جس میں دکھایا گیا کہ موٹرسائیکل سوار نوجوان اور کار سوار سلمان فاروقی کے درمیان ٹکراؤ کے بعد سلمان فاروقی نے نوجوان پر تشدد کیا۔واقعے کے دوران نوجوان کی بہنیں بھی وہاں موجود تھیں اور انہوں نے سلمان فاروقی سے اپنے بھائی کو چھوڑنے کی درخواست کی، تاہم ملزم نے انہیں نہیں روکا۔ویڈیو کی وائرل ہونے کے بعد پولیس نے سلمان فاروقی اور اس کے ساتھی اویس ہاشمی کے خلاف مقدمہ درج کیا تھا۔

  • چوہدری حمیدالحسن گجر مرکزی مسلم لیگ وسطی پنجاب کے صدر منتخب،استقبالیہ تقریب کا انعقاد

    چوہدری حمیدالحسن گجر مرکزی مسلم لیگ وسطی پنجاب کے صدر منتخب،استقبالیہ تقریب کا انعقاد

    پاکستان مرکزی مسلم لیگ کے ڈپٹی سیکرٹری جنرل، حافظ خالد خالد نیک کی رہائش گاہ گجر ہاؤس جوہر ٹاؤن (حلقہ پی پی 162) میں چوہدری حمیدالحسن گجر کو وسطی پنجاب کا صدر منتخب ہونے پر ان کے اعزاز میں استقبالیہ تقریب کا انعقاد کیا گیا،

    تقریب میں مرکزی مسلم لیگ کے جوائنٹ سیکرٹری قاری محمد یعقوب شیخ، مزمل اقبال ہاشمی، انجنئیر عادل خلیق، ناصر محمود گھمن، شفاقت تتلہ، عمار یاسر، چوہدری شوکت، شیخ صداقت، صلاح الدین غزنوی، چوہدری خادم گجر، معاذ اشتیاق، حافظ اشفاق، عمران شامی، عبداللہ خالد، علی حیدر عباس، حافظ عبدالوہاب گجر سمیت حلقہ پی پی 162 کے دیگر معزز دوست احباب نے بھرپور شرکت کی۔اس موقع پر مرکزی مسلم لیگ کے رہنماؤں کی جانب سے چوہدری حمیدالحسن گجر کو مرکزی مسلم لیگ وسطی پنجاب کا صدرمنتخب ہونے پر مبارکباد دی گئی،شرکاء نے اپنے خیالات کا اظہار کرتے ہوئے چوہدری حمیدالحسن گجر کی قیادت پر بھرپور اعتماد کا اظہار کیا اور امید ظاہر کی کہ وہ وسطی پنجاب میں مرکزی مسلم لیگ کو مزید فعال اور منظم بنائیں گے،حافظ خالد نیک گجر نے تمام مہمانوں کا شکریہ ادا کرتے ہوئے کہا کہ پاکستان مرکزی مسلم لیگ کی مقبولیت میں روز بروز اضافہ ہو رہا ہے،مرکزی مسلم لیگ خدمت کی سیاست کر رہی ہے، ہمیں پاکستان کو درپیش مسائل کا شعور عوام میں بیدار کرنااور اتحاد کی ایک عظیم مثال قائم کر نی ہے،جس نظریئے پر پاکستان بنا تھا اسی نظریئے پر قوم کو دوبارہ متحدکیا جا سکتا ہے.

  • کوہ پیمائی کے دوران حادثہ، پولش کوہ پیما والڈیمار کووالوسکی کو ریسکیو کرلیا گیا

    کوہ پیمائی کے دوران حادثہ، پولش کوہ پیما والڈیمار کووالوسکی کو ریسکیو کرلیا گیا

    دنیا کی 12ویں بلند ترین چوٹی براڈ پیک (بلندی: 8,051 میٹر) پر کوہ پیمائی کے دوران ایک سنسنی خیز واقعہ پیش آیا جب پولش کوہ پیما والڈیمار کووالوسکی برفانی ڈھلوان پر چڑھائی کرتے ہوئے پھسل گئے۔ اس حادثے کے نتیجے میں ان کا پاؤں شدید زخمی ہو گیا اور ٹوٹ گیا۔

    واقعہ اس وقت پیش آیا جب والڈیمار کووالوسکی چوٹی کی سخت برفانی صورت حال میں چڑھائی کر رہے تھے۔ پھسلنے کی وجہ سے ان کی چوٹ سنگین نوعیت کی تھی جس کے باعث انہیں فوری طبی امداد کی ضرورت تھی۔ کوہ پیمائی کی مشکل اور خطرناک جگہ ہونے کے باعث امدادی کاروائی ایک بڑا چیلنج تھی۔ریسکیو ٹیم نے فوری طور پر اپنی کارروائی شروع کی اور خطرناک برفانی اور پتھریلے راستوں سے گزر کر زخمی کوہ پیما تک پہنچ گئی۔ انہیں تقریباً 6,500 میٹر کی بلندی سے بحفاظت کیمپ ون تک منتقل کیا گیا جہاں ابتدائی طبی امداد فراہم کی گئی۔ ریسکیو ٹیم کی بروقت اور پیشہ ورانہ کاوشوں کی بدولت والڈیمار کووالوسکی کی جان بچانے میں کامیابی حاصل ہوئی۔

    اب زخمی کوہ پیما کو موسم کی بہتری کے بعد سکردو منتقل کیا جائے گا جہاں انہیں مزید طبی سہولیات فراہم کی جائیں گی۔ علاقائی حکام اور ریسکیو ٹیم نے اس کامیاب مشن پر اطمینان کا اظہار کرتے ہوئے کہا ہے کہ وہ مستقبل میں بھی کوہ پیماؤں کی حفاظت کے لیے ہر ممکن مدد فراہم کریں گے۔

    براڈ پیک، جو اپنے شدید موسم اور مشکل چڑھائی کی وجہ سے دنیا کی مشکل چوٹیوں میں شمار ہوتی ہے، پر اس حادثے نے ایک بار پھر کوہ پیمائی کی جان لیوا نوعیت کو اجاگر کیا ہے۔

  • وزیراعلیٰ مریم نواز کا اپنی چھت اپنا گھر منصوبے کی رفتار مزید تیز کرنے کا حکم

    وزیراعلیٰ مریم نواز کا اپنی چھت اپنا گھر منصوبے کی رفتار مزید تیز کرنے کا حکم

    وزیراعلیٰ پنجاب مریم نواز شریف کی زیر صدارت “اپنی چھت اپنا گھر” منصوبے پر اہم اجلاس ہوا،

    وزیر اعلی مریم نواز شریف کو منصوبے کی موجودہ صورتحال پر تفصیلی بریفنگ دی گئی،51 ہزار سے زائد خاندانوں کا خواب حقیقت بن گیا،وزیراعلیٰ مریم نواز شریف نے اپنی چھت اپنا گھر منصوبے کی رفتار مزید تیز کرنے کا حکم دیا،بریفنگ میں بتایا گیا کہ اپنی چھت اپنا گھر پروگرام کے پلیٹ فارم سے 51 ہزار نو سو گیارہ نادار خاندانوں کو قرضہ فراہم کیا جا چکا ہے۔اپنی چھت اپنا گھر پروگرام کے تحت اب تک 60 ارب 50 کروڑ روپے کی خطیر رقم تقسیم کی جا چکی ہے-45,178 گھر زیر تعمیر ہیں جبکہ 6,160 گھر مکمل ہو چکے ہیں-

    وزیراعلیٰ پنجاب مریم نواز کاکہنا تھا کہ ہر فیصلے کامقصد عوام کی ترقی،تحفظ اور سہولت ہے یہی قائد محمد نواز شریف کا ویژن ہےاور میرا عہد-جس دن ایک غریب کے سر پر چھت آ جاتی ہے اس دن ریاست کامیاب ہو جاتی ہے-روایتی سیاست کا دروازہ بند کیا، اور خدمت کا در کھول دیا-اپنی چھت اپنا گھر محض اینٹوں اور دیواروں کا منصوبہ نہیں نادار افراد کے لئے نئی زندگی کا آغاز ہے-پاکستان میں پہلی بار ہوا ہے کہ اتنے بڑے پیمانے پر غریب اور بے گھر خاندانوں کیلئے عملی اقدامات ہو رہے ہیں۔میری دن رات کوشش ہے کہ پنجاب کا کوئی شہری بغیر چھت کے نہ رہے-

  • اوکاڑہ میں آسمانی بجلی گرنے کا المناک واقعہ، 2 افراد جاں بحق

    اوکاڑہ میں آسمانی بجلی گرنے کا المناک واقعہ، 2 افراد جاں بحق

    اوکاڑہ کے علاقے حویلی لکھا میں آسمانی بجلی گرنے سے دو افراد جان کی بازی ہار گئے۔ ریسکیو حکام کے مطابق واقعہ اس وقت پیش آیا جب جاں بحق افراد اور ایک زخمی لڑکی کھیتوں میں کام کر رہے تھے۔مقامی ذرائع کے مطابق، حادثہ اتنا شدید تھا کہ ایک نوجوان اور ایک خاتون موقع پر ہی جاں بحق ہوگئے جبکہ ایک لڑکی شدید زخمی حالت میں قریبی ہسپتال منتقل کی گئی ہے۔ ریسکیو ٹیم نے موقع پر پہنچ کر زخمی کو فوری طبی امداد کے لیے اسپتال پہنچایا۔

    حویلی لکھا کے رہائشیوں نے بتایا کہ آسمان پر گرج چمک کے دوران اچانک بجلی گرتی ہوئی ان کے نزدیک کھیتوں میں موجود افراد کو جاں بحق کر دیا۔ حکام نے بتایا کہ موسمی حالات کے پیش نظر کسانوں کو خاص احتیاط برتنے کی ہدایت دی گئی ہے تاکہ ایسے واقعات سے بچا جا سکے۔

  • ضلع قلعہ عبداللہ سے اغوا کیے گئے 2 افراد کی لاشیں برآمد

    ضلع قلعہ عبداللہ سے اغوا کیے گئے 2 افراد کی لاشیں برآمد

    بلوچستان کے ضلع قلعہ عبداللہ سے گزشتہ رات اغوا کیے گئے دو افراد کی لاشیں ملنے کا افسوسناک واقعہ سامنے آیا ہے۔ لیویز حکام کے مطابق دونوں لاشیں گلستان بازار کے نزدیک کاریز کے علاقے سے بازیاب ہوئی ہیں۔

    حکام نے بتایا ہے کہ لاشیں ملنے والے دونوں افراد آپس میں کزن تھے جنہیں گزشتہ شب اغوا کیا گیا تھا۔ اغوا کے فوری بعد دونوں کو شدید تشدد کا نشانہ بنایا گیا اور قتل کر دیا گیا۔ تشدد کے نشانات سے ظاہر ہوتا ہے کہ قاتلوں نے بہت بے رحمی سے ان کا قتل کیا ہے۔لیویز حکام کا کہنا ہے کہ اس واردات کی بنیادی وجہ دو گروپوں کے درمیان دیرینہ دشمنی اور جھگڑے ہیں، جنہوں نے اس خونریز واقعے کو جنم دیا۔ فی الحال واقعے کی مزید تحقیقات جاری ہیں تاکہ قاتلوں کو جلد از جلد قانون کے کٹہرے میں لایا جا سکے۔

  • نیشنل سائبر کرائم انویسٹی گیشن ایجنسی کا غیر ملکی کال سنٹر پر چھاپہ

    نیشنل سائبر کرائم انویسٹی گیشن ایجنسی کا غیر ملکی کال سنٹر پر چھاپہ

    اسلام آباد: نیشنل سائبر کرائم انویسٹی گیشن ایجنسی (این سی آئی اے) نے سیکٹر جی-10 مرکز میں ایک غیر قانونی کال سینٹر کے خلاف کارروائی کرتے ہوئے اہم کامیابی حاصل کی ہے۔ اس غیر قانونی کال سینٹر میں پانچ غیر ملکی باشندے اور 60 سے زائد پاکستانی لڑکے اور لڑکیاں کام کر رہے تھے۔

    این سی آئی اے کی ٹیم نے چھاپہ مار کر کارروائی کے دوران تمام پانچوں غیر ملکی باشندوں کو گرفتار کر لیا ہے، جو غیر قانونی طور پر کال سینٹر چلا رہے تھے۔ اس کال سینٹر کے ذریعے مختلف فراڈ اور دیگر غیر قانونی سرگرمیاں انجام دی جا رہی تھیں۔گرفتار افراد کی مدد کرنے والے اور انہیں سہولتیں و سیکیورٹی فراہم کرنے والے دیگر عناصر کے خلاف بھی این سی آئی اے نے مزید قانونی کارروائیاں شروع کر دی ہیں تاکہ اس غیر قانونی نیٹ ورک کو مکمل طور پر ختم کیا جا سکے۔

    این سی آئی اے کی جانب سے جاری بیان میں کہا گیا ہے کہ ادارہ سائبر کرائم کے خلاف مربوط حکمت عملی کے تحت اس طرح کے غیر قانونی کاروبار کا مکمل خاتمہ کرے گا تاکہ عوام کو تحفظ فراہم کیا جا سکے اور سائبر جرائم کی روک تھام کی جا سکے۔

  • سیالکوٹ،شاہد ریاض باغی ٹی وی کے ڈویژنل ،خرم میرضلعی بیوروچیف مقرر

    سیالکوٹ،شاہد ریاض باغی ٹی وی کے ڈویژنل ،خرم میرضلعی بیوروچیف مقرر

    سیالکوٹ: باغی ٹی وی نے سیالکوٹ میں اپنے نمائندوں کی نئی تقرریوں کا اعلان کر دیا ہے۔ یہ فیصلہ باغی ٹی وی کے ایک اہم اجلاس کے بعد کیا گیا جس کا انعقاد اقبال منزل، سیالکوٹ میں ہوا۔ اجلاس میں ایڈیٹر باغی ٹی وی ممتاز اعوان، شاہد ریاض، خرم میر اور دیگر عہدیداران نے شرکت کی۔

    اجلاس کے دوران مختلف امور پر غور و خوض کے بعد یہ فیصلہ کیا گیا کہ سیالکوٹ میں باغی ٹی وی کے بیوروچیف شاہد ریاض اب ڈویژنل بیوروچیف کے طور پر خدمات انجام دیں گے۔ اسی طرح خرم میر کو سیالکوٹ کا ضلعی بیوروچیف مقرر کیا گیا ہے، جو ضلع کی سطح پر رپورٹنگ اور دیگر خبری سرگرمیوں کی ذمہ داری سنبھالیں گے۔

    اجلاس کے دوران سینئر صحافی اور اینکر پرسن، سی ای او باغی ٹی وی مبشر لقمان کو ان کی شاندار خدمات اور صحافت میں نمایاں کردار پر بھرپور خراج تحسین پیش کیا گیا،مبشر لقمان نے اپنی صحافتی خدمات کے ذریعے معاشرتی مسائل کو اجاگر کرنے اور عوام کی آواز بننے میں نمایاں کردار ادا کیا ہے، جسے اجلاس میں سراہا گیا۔

    اسی موقع پر انچارج نمائندگان باغی ٹی وی ڈاکٹر غلام مصطفیٰ بڈانی کو بھی ان کی محنت اور نمائندگان کی ذمہ داریوں کو بہتر انداز میں نبھانے پر داد دی گئی۔ ڈاکٹر غلام مصطفیٰ بڈانی نے اس موقع پر نمائندگان کی نئی تقرریوں کے نوٹیفکیشنز جاری کیے، جو ادارے کی ترقی اور کارکنوں کی کارکردگی کو مزید بہتر بنانے میں مددگار ثابت ہوں گے۔ شاہد ریاض کا کہنا تھا کہ ڈاکٹر غلام مصطفیٰ بڈانی باغی ٹی وی کی ٹیم کو ایک گھر کی طرح پیارومحبت سے چلا رہے ہیں،ڈاکٹر غلام مصطفیٰ بڈانی کی باغی ٹی وی کیلئے خدمات قابل قدر ہیں،

    ممتاز اعوان نے اس موقع پر کہا کہ سیالکوٹ کی رپورٹنگ کو مزید بہتر اور مربوط بنانے کے لیے یہ تقرریاں کی گئی ہیں تاکہ عوام تک درست اور بروقت خبریں پہنچائی جا سکیں۔ انہوں نے کہا کہ شاہد ریاض اور خرم میر کی مہارت اور تجربہ اس شعبے میں باغی ٹی وی کے کام کو مزید مستحکم کرے گا۔

    شاہد ریاض نے کہا کہ انہیں ڈویژنل بیوروچیف بنانے پر فخر ہے اور وہ اپنی تمام تر توانائیاں باغی ٹی وی کی ترقی اور سیالکوٹ کی خبریں موثر انداز میں پیش کرنے کے لیے صرف کریں گے۔خرم میر نے بھی کہا کہ ضلعی بیوروچیف کے طور پر وہ مقامی سطح پر خبری ذرائع کو فعال اور بااثر بنانے کے لیے بھرپور کوشش کریں گے تاکہ عوام کی حقیقی آواز میڈیا تک پہنچ سکے۔

    اجلاس میں آل پاکستان رائیٹرز ویلفیئر ایسوسی ایشن کے بانی صدر ایم ایم علی کی قیادت میں اپووا وفد نے بھی شرکت کی،اپووا وفد نے باغی ٹی وی کی صحافتی خدمات پر باغی ٹی وی کی ٹیم کو خراج تحسین پیش کیا، اپووا وفد میں حافظ محمد زاہد،سفیان علی فاروقی،اسلم سیال،ثوبیہ راجپوت،قرۃ العین خالد،فاکہہ قمر،مہر اشتیاق،توصیف ملک سمیت شامل تھے،

    اجلاس میں شاہد ریاض اور خرم میر کو صحافتی خدمات کے اعتراف میں شیلڈ بھی پیش کی گئیں.