Author: ممتاز حیدر

پیپلز پارٹی کے چیئرمین بلاول بھٹو زرداری نے کہا کہ خوشی ہے اس بجٹ کو سپورٹ کر رہے ہیں، حکومت نے ہمارے تمام مطالبات مانے اس لیے ہم نے بجٹ کی حمایت کی۔

قومی اسمبلی کے اجلاس میں اظہار خیال کرتے ہوئے بلاول بھٹو کا مزید کہنا تھا کہ حکومت نے بے نظیرانکم سپورٹ پروگرام میں 20 فیصد اضافہ کیا،پی ٹی آئی دور میں بے نظیرانکم سپورٹ پروگرام کی مد میں رقم کم کی گئی،حکومت نے سولر سے متعلق ہمارے مطالبات کو مانا اس لیے ہم نے سپورٹ کیا،سولر کے ٹیکس میں کمی کی گئی،کل ہمارے حکومت نے مطالبات مانے، ہم حکومت کو خراج تحسین پیش کرتے ہیں، ایف بی آر کو گرفتاری کا اختیار دینے سے متعلق ہمارے مطالبات مانے گئے، ایف بی آر کی گرفتاری کو قابل ضمانت قرار دیا، جو ترامیم پیپلز پارٹی بجٹ میں چاہ رہی تھی وہ حکومت نے مان لئے ہیں ،اس لئے ہم اس بجٹ کو منظور کریں گے

وزارتِ صحت کے تمباکو کنٹرول سیل کے سابق تکنیکی سربراہ، ڈاکٹر ضیاء الدین اسلام نے انسداد منشیات کے عالمی دن کے موقع پر منشیات کے پھیلاؤ پر تشویش کا اظہار کرتے ہوئے کہا ہے کہ نشہ آور اشیاء خصوصاً تمباکو اور دیگر منشیات کا زہر ہمارے معاشرے میں خطرناک حد تک پھیلتا جا رہا ہے، جو بالخصوص تعلیمی اداروں میں نوجوان نسل کو متاثر کر رہا ہے۔

ڈاکٹر ضیاء الدین اسلام کا کہنا تھا کہ نوجوان ہمارا مستقبل ہیں، اور اگر وہ نشے جیسی لعنت میں مبتلا ہو گئے تو ملک کی ترقی کا خواب شرمندۂ تعبیر نہیں ہو سکتا،یہ وقت کا تقاضا ہے کہ ہم طلبا کو تمباکو نوشی اور منشیات کے طویل المدتی مضر اثرات سے آگاہ کریں، تاکہ وہ ذہنی دباؤ یا کسی اور پریشانی میں مبتلا ہوکر غلط فیصلے نہ کریں۔ڈاکٹر ضیاء الدین اسلام نے زور دیا کہ نوجوانوں کو مثبت، تعمیری اور صحت مند سرگرمیوں کی طرف راغب کرنا وقت کی اہم ضرورت ہے۔ انہوں نے والدین، اساتذہ، پالیسی سازوں اور سول سوسائٹی سے اپیل کی کہ وہ ایک مشترکہ قومی حکمتِ عملی کے تحت اس سماجی ناسور کے خلاف متحد ہو جائیں،انہوں نے اس یقین کا اظہار کیا کہ اگر ہم سب مل کر اپنا کردار ادا کریں تو تمباکو نوشی اور منشیات کے خلاف جنگ جیتی جا سکتی ہے اور ہم ایک صحت مند، باوقار اور باشعور معاشرہ تشکیل دینے میں کامیاب ہو سکتے ہیں۔

انہوں نے حکومت سے مطالبہ کیا کہ تمباکو مصنوعات پر ٹیکس مزید بڑھائے تاکہ نوجوانوں کی رسائی ان تک محدود ہو جائے۔انسدادِ تمباکو و منشیات قوانین پر سختی سے عملدرآمد کروایا جائے، خاص طور پر تعلیمی اداروں کے ارد گرد تمباکو مصنوعات کی فروخت پر مکمل پابندی عائد کی جائے اور ہر ضلع میں ٹاسک فورس تشکیل دی جائے جو منشیات کی روک تھام کے لیے مؤثر اقدامات کرے۔

قومی اسمبلی میں وفاقی بجٹ 26-2025ء کی شق وار منظوری کا عمل جاری ہے۔

قومی اسمبلی اجلاس اسپیکر ایاز صادق کی زیر صدارت جاری ہے، اجلاس میں وزیراعظم شہباز شریف سمیت اراکین اسمبلی شریک ہیں، دوران اجلاس کاربن لیوی سے متعلق اپوزیشن کی تمام ترامیم مسترد کردی گئی ہیں جبکہ وزیر خزانہ کی ترمیم منظور کرلی گئی،قومی اسمبلی میں بیرسٹر گوہر، عالیہ کامران، نثار جٹ، زرتاج گل، شاہدہ اختر کی طرف سے ایوان میں بجٹ پر ترامیم پیش کی گئیں تاہم انہیں مسترد کردیا گیا۔

وزیراعظم شہباز شریف نےاپوزیشن بینچز میں جاکر چیئرمین پی ٹی آئی بیرسٹر گوہر اور سابق سپیکر قومی اسمبلی اسد قیصر سے مصافحہ کیا،

قبل ازیں وزیراعظم محمد شہباز شریف سے ارکان قومی اسمبلی راجا اسامہ سرور، احسان الحق باجوہ، وسیم قادر، شیخ آفتاب احمد، اظہر خان لغاری اور تہمینہ دولتانہ کی ملاقات ہوئی،ملاقات میں شرکاء نے وزیراعظم کو آئندہ سال کا بجٹ قومی اسمبلی میں پیش کرنے پر مبارکباد پیش کی اور اس کی منظوری کے لیے اپنی مکمل حمایت کا اظہار کیا،ملاقات میں وزیر برائے پارلیمانی امور یونٹ رانا مبشر اقبال، وزیر مملکت برائے پاور عبد الرحمن کانجو اور معاون خصوصی طلحہ برکی بھی شامل تھے۔

وزیر اعظم شہباز شریف نے وفاقی کابینہ کے اجلاس سے خطاب کرتے ہوئے کہا ہے کہ اسرائیل کے ساتھ حالیہ جنگ میں پاکستان نے مستقل، دو ٹوک اور بھرپور انداز میں ایران کا ساتھ دیا۔ وزیر اعظم نے کہا کہ ایران کی جرات مندی اور دفاعی حکمت عملی قابل تعریف ہے، اور پاکستان ایران کے ساتھ مکمل یکجہتی کا مظاہرہ کرتا ہے۔

وزیر اعظم نے بجٹ پر گفتگو کرتے ہوئے وزیر خزانہ کا خصوصی شکریہ ادا کیا اور کہا کہ "بجٹ کی تیاری میں بڑی محنت کی گئی، جس پر وزیر خزانہ اور ان کی ٹیم مبارکباد کی مستحق ہے۔ نائب وزیر اعظم اور اتحادی جماعتوں نے بجٹ کی تشکیل میں جس سنجیدگی اور تعاون کا مظاہرہ کیا، وہ قابل ستائش ہے۔”انہوں نے سابق صدر آصف علی زرداری اور پیپلز پارٹی کے چیئرمین بلاول بھٹو زرداری کا بھی خصوصی شکریہ ادا کیا جنہوں نے بجٹ کی تیاری اور منظوری کے عمل میں بھرپور کردار ادا کیا۔

وزیر اعظم شہباز شریف نے کہا کہ "ایرانی قوم نے جس جرات اور بہادری کا مظاہرہ کیا، وہ مثالی ہے۔ ایران نے اسرائیلی جارحیت کا بھرپور جواب دیا اور یہ جنگ باوقار انداز میں بند ہوئی۔” انہوں نے انکشاف کیا کہ ایرانی قیادت نے صدر آصف زرداری، وزیر اعظم شہباز شریف اور چیف آف آرمی اسٹاف جنرل عاصم منیر کا نام لے کر شکریہ ادا کیا۔وزیر اعظم نے کہا کہ "امریکی صدر نے فیلڈ مارشل کی کھلے دل سے تعریف کی، جب کہ سابق امریکی صدر ڈونلڈ ٹرمپ بھی جنرل عاصم منیر کی قیادت اور صلاحیتوں کے معترف ہیں۔” ان کا کہنا تھا کہ یہ پاکستان کے لیے ایک بڑا اعزاز ہے کہ اس کی عسکری قیادت کو عالمی سطح پر سراہا جا رہا ہے۔