Author: ممتاز حیدر

وزیراعظم محمد شہباز شریف نے زرعی خودکفالت کے حصول کے لئے زراعت کے شعبہ کو جدید خطوط پر استوار کرنے ،نوجوانوں کی صلاحیتوں اور تجربہ کار ماہرین سے رہنمائی کی اہمیت پر زور دیتے ہوئے کہا ہے کہ پاکستان کو اللہ تعالیٰ نے زرخیز زمین، قابل زرعی ماہرین، محنتی کسانوں سے نوازا ہے ، زرعی شعبہ میں آگے بڑھنے کیلئے متعلقہ فریقین کی آراء اور تجاویز کا جائزہ لے کر مربوط حکمت عملی کے ذریعے ان سے استفادہ کیا جائے گا، زرعی گھریلو صنعتوں، چھوٹے و درمیانے حجم کے کاروبار اور سٹوریج کی سہولیات کو فروغ دے کر زرعی شعبہ کو بھرپور انداز میں ترقی دی جا سکتی ہے .

انہوں نے یہ بات ملک میں زرعی شعبے کی بحالی، جدت اور پائیدار ترقی کے اہداف کے تحت نوجوان زرعی ماہرین، سائنسدانوں، محققین، کاروباری شخصیات اور برآمدکنندگان پر مشتمل اعلیٰ سطحی مشاورتی اجلاس سے خطاب کرتے ہوئے کہی۔ وزیراعظم کی زیر صدارت اجلاس میں قومی زرعی پالیسی کو عصری تقاضوں سے ہم آہنگ کرنے، نوجوان صلاحیتوں کو بروئے کار لانے، اور تجربہ کار ماہرین کی رہنمائی سے ایک مربوط لائحہ عمل کی تشکیل پر غور کیا گیا۔اجلاس میں وفاقی وزیر توانائی ڈاکٹر مصدق ملک، وزیر مملکت برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ، وفاقی وزیر اطلاعات و نشریات عطااللہ تارڑ سمیت متعدد ماہرین اور متعلقہ اسٹیک ہولڈرز نے شرکت کی۔

وزیراعظم نے کہا کہ آج کے اجلاس میں ہم نےزراعت کو بہتر بنانے ترقی دینے کیلئے تجاویز کا جائزہ لینا ہے، پاکستان ایک زرعی ملک ہے ، پاکستان کو اللہ تعالیٰ نے زرخیز زمین، قابل زرعی ماہرین، محنتی کسانوں سے نوازا ہے۔ انہوں نے کہا کہ پاکستان ایک زمانے میں کپاس، گندم سمیت دیگر اجناس میں خود کفیل تھا لیکن اب گندم کی ہماری فی ایکڑ پیداوار ترقی یافتہ ممالک کے مقابلہ میں کم ہے، ہم کپاس درآمد کر رہے ہیں ۔ انہوں نے کہا کہ ملک کی 65 فیصد آبادی دیہی علاقوں میں رہتی ہے، سوچنے کی بات یہ ہے کہ دیہی علاقوں میں اس آبادی کے بہتر طرز زندگی اور نوجوانوں کی صلاحیتوں کو دیہی علاقوں میں بروئے کار لانے کیلئے کیا اقدامات اٹھائے گئے؟۔ وزیراعظم نے کہا کہ پاکستان میں نجی سطح پر زرعی مشینری بنانے کیلئے کچھ ادارے کام کر رہے ہیں ، ایک زمانے میں کامن ہارویسٹر ز باہر سے آتے تھےاور ایک دو اداروں نے ’’ڈیلیشن پروگرام‘‘ بھی شروع کیا، چھوٹے کاشتکاروں کی سہولت کیلئے سروسز کمپنیاں بنائی گئی تھیں تاہم ان کی منظم انداز میں سرپرستی نہیں کی گئی ۔ وزیراعظم نے کہا کہ اللہ تعالیٰ نے ہمیں بے پناہ مواقع اور صلاحیتوں سے نوازا ہے لیکن زراعت کے شعبہ میں جو ترقی کرنی چاہئے تھی وہ بالکل نہیں ہوئی، قرب و جوار اور دنیا کے دیگر ممالک نے اس حوالہ سے بہت ترقی کی اور آگے نکل گئے، ہم قوم کے قیمتی وقت کا ضیاع کرتے رہے۔ وزیراعظم نے کہا کہ آج کے مشاورتی اجلاس کا مقصد یہ ہے کہ اس شعبہ میں آگے بڑھنے کیلئے متعلقہ فریقین کی آراء اور تجاویز کو بغور سنا جائے او ر ان سے استفادہ کیا جائے ۔ انہوں نے کہا کہ پاکستان میں زراعت کے حوالہ سے گھریلو صنعت اور ایس ایم ایز میں بے پناہ صلاحیت موجود ہے۔ انہوں نے کہا کہ آف سیزن اجناس کی سٹوریج کا خاطر خواہ انتظام نہیں اور ان کی ویلیو ایڈیشن کیلئے چھوٹے پلانٹس نہیں لگائے گئے جہاں دیہی علاقوں میں ہمارے نوجوان کام شروع کرکے روزگار کے مواقع مہیا کرتے اور اسے برآمد کرتے ، اس شعبہ پر بھی توجہ مرکوز کرنے کی ضرورت ہے۔ اجلاس کے دوران شرکاء نے زرعی ترقی کے لئے چند کلیدی شعبوں کی نشاندہی کی جن میں جامع اصلاحات اور سائنسی بنیادوں پر حکمت عملی اپنانے کی ضرورت پر زور دیا۔زرعی ڈیجیٹلائزیشن اور مصنوعی ذہانت کے اطلاق کے تحت دیہی علاقوں میں سمارٹ فون اور انٹرنیٹ کی دستیابی بہتر بنانے، کسانوں کا مرکزی ڈیٹابیس تشکیل دینے، اور زرعی ان پٹس کی ترسیل کے لئے بلاک چین اور کیو آر کوڈ سسٹمز متعارف کرانے کی تجاویز پیش کی گئیں۔تحقیق و ترقی کے میدان میں مٹی کی زرخیزی اور صحت پر توجہ مرکوز کرنے، جدید سائنسی طریقوں کے ذریعے غذائیت سے بھرپور پیداوار کے فروغ، اور کسانوں کی استعداد کار میں اضافے کے لئے نجی و سرکاری شراکت داری سے تربیتی پروگرامز کے آغاز پر اتفاق کیا گیا۔زرعی بنیادی ڈھانچے اور مشینی زراعت کے فروغ کے ضمن میں موجودہ منڈیوں کی بہتری، نئی مارکیٹ انفراسٹرکچر کی تعمیر اور جدید زرعی آلات کی دستیابی کو یقینی بنانے پر زور دیا گیا تاکہ پیداوار میں اضافہ ممکن ہو۔زرعی مالیات تک مؤثر رسائی کے لئے ملکی و غیر ملکی سرمایہ کاری کے فروغ، زرعی قرضہ جات کی آسان فراہمی، اور مالیاتی اداروں کے کردار کو مزید فعال بنانے کی ضرورت پر روشنی ڈالی گئی۔قانونی و انتظامی اصلاحات کے سلسلے میں حکومت کے کردار کا ازسرنو تعین، شفاف ریگولیٹری ڈھانچے کی تشکیل، اور پالیسی سازی میں ماہرین، کسانوں اور متعلقہ فریقین کی شمولیت پر زور دیا گیا تاکہ دیرپا اور مؤثر نتائج حاصل کئے جا سکیں۔اجلاس میں اس اہم پہلو کا بھی جائزہ لیا گیا کہ پاکستان میں فی ایکڑ زرعی پیداوار دیگر ممالک کے مقابلے میں کم ہے۔ ماہرین نے پانی کے غیر مؤثر استعمال، ناقص بیج، زمین کی غیر معیاری تیاری، اور کھادوں کے غیر سائنسی استعمال کو اس کمی کی بنیادی وجوہات قرار دیا۔شرکاء نے متفقہ طور پر اس امر کی نشاندہی کی کہ پانی کا مؤثر استعمال، معیاری بیجوں کی دستیابی، اور جدید زرعی تحقیق کی روشنی میں توسیعی خدمات کے فروغ سے زرعی پیداوار میں نمایاں بہتری ممکن ہے۔

اجلاس کے اختتام پر شرکاء نے اس عزم کا اظہار کیا کہ نوجوانوں کو قومی زرعی ترقی کا حصہ بنانے، سائنسی تحقیق کو ترجیح دینے، اور مشترکہ کوششوں سے پاکستان کو زرعی خودکفالت کی راہ پر گامزن کرنے کے لئے ٹھوس اقدامات کئے جائیں گے۔اجلاس کے اختتام پروزیرِ اعظم نے ہدایت کی کہ پانچوں شعبوں پر ورکنگ کمیٹیاں فوری تشکیل دی جائیں اور دو ہفتوں میں قابلِ عمل سفارشات پیش کریں۔

پاکستان اور قطر کے درمیان انسداد منشیات کے حوالے سے ایک نئی پیش رفت سامنے آئی ہے، جس میں دونوں ممالک نے مشترکہ حکمت عملی کی ضرورت پر اتفاق کیا ہے۔ یہ اہم پیش رفت حالیہ جی سی سی کانفرنس کے تسلسل میں سامنے آئی ہے، جس کے دوران پاکستان کی جانب سے انسداد منشیات کی روک تھام کے لیے مزید تعاون کی راہیں کھولی گئیں۔

پاکستان کی اینٹی نارکوٹکس فورس (اے این ایف) اور قطر کے درمیان اس اہم مسئلے پر بات چیت کی گئی۔ قطری جنرل ڈائریکٹوریٹ آف ڈرگز کے اعلیٰ سطحی وفد کو اے این ایف ہیڈکوارٹرز میں تفصیلی بریفنگ دی گئی۔ بریفنگ کے دوران دونوں ممالک نے ایک دوسرے کے ساتھ انسداد منشیات کے معاملات پر تعاون بڑھانے کی اہمیت پر زور دیا۔دونوں ممالک نے باہمی دلچسپی کے امور پر تفصیلی مذاکرات کیے، جن میں انسداد منشیات کی حکمت عملی کو مزید مستحکم کرنے، انٹیلیجنس معلومات کے تبادلے، اور آپریشنل تعاون کو بڑھانے پر اتفاق کیا گیا۔ اس کے علاوہ، قطر نے پاکستان کی تکنیکی استعداد کو بڑھانے میں مدد دینے کا عہد کیا ہے، تاکہ پاکستان کو اس کے موجودہ چیلنجز کا مقابلہ کرنے میں مزید معاونت مل سکے۔

اس ضمن میں قطری وفد نے اسلام آباد انٹرنیشنل ایئرپورٹ کا دورہ بھی کیا، تاکہ پاکستان کی انسداد منشیات کی کوششوں کو مزید مستحکم کیا جا سکے۔ اس دورے کے دوران قطری مندوبین نے پاکستانی حکام کے ساتھ مل کر مختلف آپریشنل اور تکنیکی معاملات پر تبادلہ خیال کیا۔پاکستان کی جانب سے حالیہ کانفرنس کا انعقاد منشیات کی روک تھام کے لیے طویل المدتی شراکت داری کی جانب ایک اہم قدم ثابت ہو رہا ہے۔ اس تعاون کے نتیجے میں دونوں ممالک کے درمیان انسداد منشیات کے حوالے سے مستقبل میں مزید مضبوط روابط کی توقع کی جا رہی ہے۔

پیپلز پارٹی کی رہنما، رکن قومی اسمبلی سحر کامران نے کہا ہے کہ پنجاب میں‌گندم کی امداد صرف ان کسانوں کو دی جائے گی جن کے پاس کسان کارڈ ہیں۔ پنجاب حکومت کے اعداد و شمار کے مطابق، صرف 5 لاکھ 50 ہزار کسان کارڈز جاری کیے گئے ہیں۔اگر 15 ارب روپے کی کو ان کسانوں میں تقسیم کیا جائے، تو ہر کسان کو تقریباً 27,000 روپے حاصل ہوں گے

سحر کامران کا مزید کہنا تھا کہ صدر مملکت آصف علی زرداری نے پارلیمنٹ کے مشترکہ اجلاس سے خطاب کرتے ہوئے نہروں کے یک طرفہ اور متنازعہ منصوبوں کو مسترد کیا اور قومی وسائل کی منصفانہ تقسیم کی تلقین کی۔ پاکستان پیپلز پارٹی عوام کے حقوق کی محافظ ہے۔ ہم سندھ کے پانی کے حق پر ہرگز کوئی سمجھوتہ نہیں کریں گے۔ وفاقی حکومت ہمارے ووٹوں کی بدولت قائم ہے۔ ہم نے جمہوریت، آئین اور پارلیمنٹ کی سربلندی کے لیے اسے سہارا دیا ہے، لیکن اسے ہماری کمزوری نہ سمجھا جائے۔ پانی ہمارے لیے زندگی اور موت کا مسئلہ ہے۔ تین صوبوں میں خشک سالی کا خدشہ ہے، لیکن اشرافیہ کو نوازنے کے لیے حکومت کسان دشمن پالیسیوں پر گامزن ہے۔ ایک سوچی سمجھی حکمت عملی سے اشتعال انگیز بیانات کے ذریعے سندھ میں انتشار پھیلانے کی کوشش کی جا رہی ہے۔ریگستان کو آباد کرنے کے لیے زرخیز کھیتوں کو بنجر کرنا کاشتکاروں کا معاشی قتل ہے۔