Author: ممتاز حیدر

بھارت میں کرناٹک کے بیلگاوی ضلع کے خانہ پور تعلقہ میں ایک بزرگ جوڑے نے سائبر فراڈ کا شکار ہونے اور مبینہ طور پر ہراسانی کے بعد خودکشی کرلی،

دیوجیرون سانتن نازرتھ (82) اور ان کی اہلیہ فلاویانہ (79)، جو خانہ پور کے بیڈی گاؤں کے رہائشی تھے اور ان کی کوئی اولاد نہیں تھی، اس افسوسناک واقعے کا شکار ہوئے۔پولیس کے مطابق، دیوجیرون نے ایک دو صفحات پر مشتمل خودکشی کا نوٹ چھوڑا، جس میں انہوں نے اپنی زندگی ختم کرنے کے فیصلے کی وضاحت کی اور کسی کو بھی مورد الزام نہ ٹھہرانے کی گزارش کی۔ انہوں نے لکھا کہ وہ کسی کے رحم و کرم پر جینے کے بجائے مرنا پسند کریں گے۔یہ واقعہ جمعرات کے روز اس وقت سامنے آیا جب پڑوسیوں نے فلاویانہ کو بستر پر مردہ پایا، جبکہ دیوجیرون کی لاش ان کے گھر کے زیر زمین پانی کے ٹینک میں ملی۔

پولیس کے مطابق، دیوجیرون، جو مہاراشٹر حکومت کے سیکریٹریٹ کے ایک ریٹائرڈ ملازم تھے، نے اپنی گردن پر چاقو سے وار کر کے خودکشی کی، جبکہ ان کے کلائی پر بھی زخموں کے نشانات پائے گئے۔ابتدائی تحقیقات میں شبہ ظاہر کیا جا رہا ہے کہ فلاویانہ نے زہر پی کر اپنی جان دی، تاہم حتمی تصدیق پوسٹ مارٹم رپورٹ کے بعد ممکن ہوگی۔

خودکشی نوٹ میں دیوجیرون نے دو افراد، سومت بررا اور انیل یادو، کے نام درج کیے ہیں۔ انہوں نے لکھا کہ بررا نے خود کو دہلی کے محکمہ ٹیلی کام کا افسر ظاہر کیا اور دعویٰ کیا کہ ان کے نام پر ایک جعلی سم کارڈ لیا گیا ہے، جو ہراسانی اور غیر قانونی اشتہارات کے لیے استعمال ہو رہا ہے۔بعد میں بررا نے کال کو انیل یادو کے حوالے کر دیا، جس نے خود کو کرائم برانچ کا افسر بتایا اور دیوجیرون سے ان کی جائیداد اور مالی تفصیلات طلب کیں۔ اس کے بعد، یادو نے قانونی کارروائی کی دھمکی دیتے ہوئے دیوجیرون کو 50 لاکھ روپے کی منتقلی پر مجبور کر دیا۔پولیس کا کہنا ہے کہ ڈیجیٹل لین دین کے ریکارڈ سے تصدیق ہوئی ہے کہ دیوجیرون نے مذکورہ رقم دھوکہ بازوں کو منتقل کی تھی، لیکن وہ مزید رقم کا تقاضا کرتے رہے۔خودکشی نوٹ میں دیوجیرون نے لکھا کہ انہوں نے 7.15 لاکھ روپے کا سونے کے عوض قرض لیا تھا، جس کا سود 4 جون کو ادا کرنا تھا۔ انہوں نے ہدایت دی کہ یہ رقم ادا کر دی جائے اور باقی ماندہ سونا فروخت کر کے جو بھی رقم حاصل ہو، وہ ان مذکورہ افراد کو دے دی جائے۔مزید برآں، انہوں نے اپنے دوستوں سے قرض لینے کا بھی ذکر کیا اور درخواست کی کہ ان کی بیوی کے سونے کے کنگن اور بالیاں بیچ کر وہ قرض چکایا جائے۔

دیوجیرون نے نوٹ میں لکھا،”اب میں 82 سال کا ہو گیا ہوں اور میری بیوی 79 سال کی ہے۔ ہمارا کوئی سہارا نہیں ہے۔ ہم کسی کے رحم و کرم پر زندگی نہیں گزارنا چاہتے، اس لیے یہ فیصلہ کیا ہے۔”انہوں نے اپنی خواہش کا اظہار کیا کہ ان کی لاشیں طبی تحقیق کے لیے کسی میڈیکل انسٹی ٹیوٹ کو عطیہ کر دی جائیں۔پولیس نے خودکشی نوٹ، دیوجیرون کا موبائل فون، اور وہ چاقو جس سے انہوں نے خود کو زخمی کیا، اپنی تحویل میں لے لیا ہے۔

بیلگاوی کے سپرنٹنڈنٹ آف پولیس بھیم شنکر گولیڈ کے مطابق، "ہم نے خودکشی نوٹ اور ابتدائی تحقیقات کی بنیاد پر مذکورہ دو افراد کے خلاف خودکشی پر مجبور کرنے اور سائبر دھوکہ دہی کے تحت مقدمہ درج کر لیا ہے۔ مزید تحقیقات جاری ہیں۔”

تلنگانہ کے ضلع کومرام بھیم آصف آباد میں ایک مرد نے دو خواتین سے ایک ہی وقت میں شادی کی۔

گمنور گاؤں کے رہائشی سوریا دیو نے کہا کہ وہ لال دیوی اور جھلکاری دیوی سے محبت کرتا تھا، اور اسی وجہ سے اس نے ان دونوں سے ایک ہی تقریب میں شادی کرنے کا فیصلہ کیا۔دلہا نے دونوں دلہنوں کے نام ایک ہی شادی کے دعوت نامے پر چھاپے اور ایک شاندار جشن کا انعقاد کیا۔ ایک ویڈیو میں دکھایا گیا ہے کہ دونوں خواتین مرد کے ہاتھ کو پکڑے ہوئے ہیں، جب کہ تینوں خاندان، رشتہ داروں اور گاؤں والوں کی موجودگی میں رسومات ادا کر رہے ہیں۔ پس منظر میں ‘ڈھول’ کی آواز سنی جا سکتی ہے۔ذرائع کے مطابق، سوریا دیو کی لال دیوی اور جھلکاری دیوی سے محبت ہو گئی تھی اور تینوں نے ایک ساتھ رہنے کا فیصلہ کیا۔ گاؤں کے بزرگ ابتدا میں ہچکچاہٹ کا شکار تھے لیکن آخرکار انہوں نے ان کی شادی کے لیے مدد فراہم کی۔

بھارتی قانون کے مطابق ہندوؤں کے لیے پالیگیمی یعنی ایک سے زیادہ بیویوں کی شادی غیر قانونی ہے۔
یہ پہلا موقع نہیں ہے جب اس قسم کا واقعہ پیش آیا ہو۔ 2021 میں تلنگانہ کے ضلع عادل آباد میں بھی ایک مرد نے دونوں خواتین سے ایک ہی ‘مندپ’ میں شادی کی تھی۔ یہ تقریب تمام تینوں خاندانوں کی رضا مندی سے ہوئی تھی۔ اسی طرح 2022 میں جھارکھنڈ کے لوہردگا میں بھی ایک شخص نے اپنی دونوں گرل فرینڈز سے شادی کی تھی۔

مدھیہ پردیش پولیس کی ایک خاتون کانسٹبل کو فوجی افسر نے شادی کا وعدہ کرکے جنسی زیادتی کا نشانہ بنایا۔ یہ واقعہ 2012 کا ہے جس کی بنیاد پر فوجی افسر کے خلاف مقدمہ درج کیا گیا ہے۔

پولیس کے مطابق، 48 سالہ کرنل وارن پرتاپ سنگھ، جو اس وقت ہلدوانی، اترکھنڈ میں تعینات ہیں، کے خلاف جمعرات کو بھارتیہ نیایا سنہیتا کی دفعہ 69 (جھوٹے وعدے یا دھوکہ دہی کے ذریعے جنسی تعلق قائم کرنا) اور دفعہ 351(2) (مجرمانہ دھمکی) کے تحت مقدمہ درج کیا گیا۔ یہ مقدمہ 42 سالہ خاتون کانسٹبل کی شکایت پر درج کیا گیا۔مقدمے کے مطابق، ملزم نے متاثرہ خاتون کو دھمکیاں دی تھیں کہ اگر وہ اس کے خلاف پولیس میں شکایت کرے گی تو اس کو نقصان پہنچایا جائے گا۔بھوپال پولیس کی ویمن سیکورٹی اسسٹنٹ کمشنر ندی سدھنا کا کہنا تھا کہ ملزم بھارتی فوج میں کرنل ہیں اور ان کی یونٹ کو اس کیس کی اطلاع دے دی گئی ہے۔ "اگر وہ تحقیقات کے لیے آتے ہیں تو کوئی بات نہیں، ورنہ گرفتاری کے عمل کو مکمل کیا جائے گا”،

پولیس افسر نے بتایا کہ ملزم کا خاتون کے ساتھ جسمانی تعلق قائم کرنا اور شادی کا جھانسہ دینا، بعد میں اس وعدے سے منحرف ہونا، ریپ کے زمرے میں آتا ہے۔شکایت کے مطابق، مدھیہ پردیش پولیس کی کانسٹبل خاتون نے 2012 میں سنگھ سے ملاقات کی تھی، جب اس نے خود کو اکیلا ظاہر کیا تھا اور اسے بتایا تھا کہ وہ فوج کے کینٹین میں کام کرتا ہے۔ ملزم نے 25 دسمبر 2012 کو خاتون کو اپنے گھر بلایا اور اسے شادی کا وعدہ کرتے ہوئے جسمانی تعلق قائم کیا۔خاتون نے شکایت میں بتایا کہ 2013 میں اسے یہ معلوم ہوا کہ ملزم پہلے سے شادی شدہ ہے۔ جب اس نے سنگھ سے اس کی شادی کے بارے میں سوال کیا تو اس نے کہا کہ وہ اپنی بیوی کو طلاق دینے والا ہے۔ اس کے بعد وہ مسلسل شادی کے وعدے کو ٹالتا رہا اور مختلف بہانے بناتا رہا جیسے کہ اس کے والدین بیمار ہیں۔24 فروری 2025 کو خاتون کو یہ پتہ چلا کہ فوجی افسر کے ساتھ دیگر خواتین کے بھی تعلقات ہیں جن سے اس نے شادی کا وعدہ کیا تھا۔ جب کانسٹبل نے سنگھ سے اس کے تعلقات کے بارے میں سوال کیا، تو وہ جھگڑا کرنے لگا اور کہا کہ اب وہ اس سے شادی نہیں کرے گا۔ایف آئی آر میں متاثرہ خاتون نے کہا، "وارن نے مجھے کہا کہ اگر میں شکایت درج کراؤں گی تو وہ مجھے مار ڈالے گا اور پھانسی دے دے گا۔