Author: News Editor

لاہور:پی ٹی آئی پارلیمانی پارٹی کا اجلاس، اراکین کا عمران خان پر مکمل اعتماد کا اظہار کیا گیا ہے ، اس سلسلے میں مزید معلوم ہوا ہے کہ جمعرات کو پاکستان تحریک انصاف (پی ٹی آئی) کی پارلیمانی پارٹی کا اجلاس ہوا جس میں اراکین نے سابق وزیراعظم عمران خان کی قیادت پر مکمل اعتماد کا اظہار کیا۔

میڈیا ذرائع کے مطابق پاکستان تحریک انصاف کی پارلیمانی پارٹی کے اجلاس میں کل 176 اراکین پنجاب اسمبلی نے شرکت کی، ایک خاتون رکن صوبائی اسمبلی اپنے بیٹے کی بیماری کے باعث اجلاس میں شریک نہ ہو سکیں۔

اجلاس میں پارلیمانی پارٹی نے سابق وزیراعظم عمران خان کی قیادت پر مکمل اعتماد کا اظہار کیا، پارلیمانی پارٹی نے چیئرمین تحریک انصاف کے تمام فیصلے تسلیم کرنے کا بھی اعلان کیا۔پی ٹی آئی پارلیمانی پارٹی نے پنجاب میں چودھری پرویز الہٰی کی مکمل حمایت کا اعادہ کرتے ہوئے کہا کہ اگر اعتماد کا ووٹ لینے کی ضرورت محسوس ہوئی تو اراکین پرویز الہٰی کے حق میں ووٹ ڈالیں گے۔

اس موقع پر ترجمان پنجاب حکومت مسرت جمشید چیمہ نے کہا کہ ہم نے اپنی پاور شو کر دی ہے اب ن لیگ کی پریشانی کی باری ہے، اراکین کا اپنے لیڈر پر اعتماد اس امر کا اظہار ہے کہ عمران خان کی قیادت میں پارٹی متحد ہے۔

کلرسیداں:کلرسیداں سے 57 سالہ شخص مبینہ طور پر اغواء، اغواء کاروں کا 01 کروڑ تاوان کا مطالبہ،عدم ادائیگی پر جان سے مارنے کی دھمکی۔مغوی کے بھائی کی مدعیت میں کلرسیداں پولیس نے مقدمہ درج کرلیا۔ذرائع کے مطابق کلرسیداں کے علاقے میرگالہ منگرال سر صوبہ شاہ کے رہائشی سلطان محمد داؤد نے کلرسیداں پولیس کو درخواست دی کہ17 دسمبر بروز ہفتہ میرا چھوٹا بھائی چنگیز اختر بعمر 57 سال نے مجھے بتایا کہ خرم ولد ارشاد ساکن ڈھوک مغلاں میرگالہ منگرال کلرسیداں کے پاس جارہا ہوں۔

درخواست میں کہا گیا ہے کہ اس کے پاس ہماری زمین کا ٹھیکہ ہے۔کہ ٹھیکہ مکمل ہونے والا ہے وہ ہماری زمین واپس کردے۔پہلے بھی 2/3 مرتبہ اس کو کہہ چکا ہوں مگر وہ نہ مان رہا ہے۔اگر آج بھی نہ مانا تو اسکو وکیل کے ذریعے نوٹس بھجواوں گا۔جو دن گیارہ بجے گیا اور آج تک واپس نہ آیا ہے۔آج 20 دسمبر کو بھائی کے موبائل سے میرےموبائل پر ایک نامعلوم شخص نے میرے بھائی چنگیز اختر کی بات کروائی،تو اس نے بتایا کہ مجھے اغواء کر لیا گیا ہے۔اور یہ لوگ "01 کروڑ” روپیہ مانگ رہے ہیں،نہیں تو مجھے گولی مارکر جان سے مار دیں گے۔پھر موبائل بند ہوگیا۔کچھ دیر بعد دوبارہ بھائی نے کال کی اور کہا کہ میرے دوسرے نمبر پر 500 روپے کا لوڈ کروا دو۔ جو میں نے لوڈ کروا دیا۔پھر موبائل بند ہوگیا۔جو اب تک بند مل رہا ہے۔

میرے بھائی چنگیز اختر کو تاوان لینے کی نیت سے اغواء کرلیا گیا ہے۔ملزمان کے خلاف کاروائی کرتے ہوئے بھائی کو بازیاب کروایا جائے۔کلرسیداں پولیس نے کیس کے حالات واقعات کو مدنظر رکھتے ہوئے واقعہ کا مقدمہ درج کرکے مغوی کی بازیابی کے لیے کوششیں شروع کردیں۔ ادھر کلرسیداں پولیس کے ذمہ دار ذرائع کے مطابق مغوی کے موبائل سم سی ڈی آر کے لیے آئی ٹی لیب راولپنڈی پولیس سے معاونت طلب کرلی گئی ہے۔جبکہ مغوی کی زمین ٹھیکے پر لینے والے خرم ولد ارشاد نامی شخص کو دائرہ تفتیش میں لانے کے لیے کوششیں جاری ہیں جو تاحال دستیاب نہ ہوا۔ کلر سیداں پولیس مغوی کی بازیابی کیلئے تمام جدید ٹیکنالوجی اور ہرممکن وسائل کو بروئے کار لاکر مغوی چنگیز اختر کی محفوظ بازیابی کو یقینی بنائے گی۔