Author: News Editor

ماسکو:روس کے شہر کوسٹروما میں واقع ایک ریسٹورینٹ میں آگ لگنے سے 13 افراد ہلاک ہوگئے۔بین الاقوامی میڈیا رپورٹس کے مطابق روس کے شہر کوسٹروما میں جمعے اور ہفتے کی درمیانی رات ایک ریسٹورینٹ میں آگ بھڑک اٹھی۔

آگ اس قدر شدید تھی کہ اس نے دیکھتے ہی دیکھتے پورے ریسٹورینٹ کو لپیٹ میں لے لیا۔

مقای ذرائع ابلاغ کا کہنا ہے کہ جس وقت واقعہ پیش آیا اس وقت ریسٹورینٹ میں 280 زائد افراد موجود تھے۔ 250 کے لگ بھگ افراد کو بحفاظت نکال لیا گیا لیکن درجنوں آگ میں جھلس گئے۔

مقامی حکامنے واقعے میں 13 افراد کے ہپلاک ہونے کی تصدیق کردی ہے جب کہ کئی کو اسپتال میں طبی امداد فراہم کی جارہی ہے۔

ادھر روس نے یوکرین کے پر بمباری کرنے کا الزام عائد کرکے دنیا بھر میں اناج سپلائی کرنے کے عالمی معاہدے پر عمل درآمد سے انکار کردیا۔

عالمی خبر رساں ادارے کے مطابق روس نے یوکرین پر بحیرہ اسود میں ڈرون حملے میں روسی جنگی جہاز تباہ کرنے کا الزام عائد کرتے ہوئے کہا کہ اس علاقے سے دنیا بھر کو اناج سپلائی کی جانی تھی۔

روس نے ڈرون حملے کو جواز بناکر دنیا بھر کو یوکرین اور روس سے اناج کی سپائی کے معاہدے پر عمل کرنے سے انکار کردیا۔ یہ معاہدہ ترکیہ کی ثالثی میں طے پایا تھا اور اقوام متحدہ بھی شامل ہوئی تھی۔

روس نے جوابی کارروائی میں یوکرین کے دارالحکومت پر میزائل برسائے جن میں سے اکثر کو یوکرین فضائیہ نے فضا میں ہی تباہ کرنے کا دعویٰ کیا ہے۔

یوکرین نے بحیرہ اسود میں ڈرون حملے کے روس کے دعوے کو مسترد کرتے ہوئے کہا کہ معاہدے پر مکمل عمل درآمد کررہے ہیں اور اناج سپلائی کرنے کے راستے میں کوئی حملہ نہیں کیا۔

کینیا:مشرقی افریقا میں خشک سالی کے باعث ہزاروں جانور ہلاک ہوگئے ہیں۔بین الاقوامی میڈیا رہورٹس کے مطابق افریقا کے کئی ممالک ان دنوں شدید خشک سالی کا سامنا کررہے ہیں اور اسے کئی دہائیوں کے دوران آنے والی بدترین خشک سالی کہا جارہا ہے۔

خشک سالی کے باعث نایاب اور معدومی کا سامنا کرنے والے ہزاروں جانور بھی لقمہ اجل بنے ہیں۔ صرف کینیا میں گزشتہ 2 برسوں کے دوران انتہائی کم بارشوں کے باعث لاکھوں افراد نے نقل مکانی کی ہے جب کہ جنگلی حیات پر بھی شدید منفی اثرات مرتب ہوئے ہیں۔

رپورٹس کے مطابق کینیا میں امبوسیلی، تساوو اور لائکیپیا-سمبورو کے علاقے خشک سالی سے سب سے زیادہ متاثر ہوئے ہیں۔ ان ہی علاقوں میں جنگلی حیات کے تحفظ کے لئے پارکس اور دیگر مراکز واقع ہیں۔

کینیا میں جنگلی حیات کے تحفظ کے سرکاری ادارے اور بین الاقوامی تنظیموں نے گزشتہ 9 ماہ کے دوران خشک سالی کے باعث ہلاک ہونے والے جانوروں کے اعداد و شمار مرتب کئے ہیں۔ ہلاک ہونے والے جانوروں میں معدومی کا شکار جنگلی حیات کی کئی اقسام بھی شامل ہیں۔

بین الاقوامی تنظیموں کے مطابق رواں برس کے ابتدائی 9 ماہ کے دوران خشک سالی سے میں 205 ہاتھی، 512 جنگلی بھینسے، 381 عام زیبرا، 49 گریوی زیبرا اور 12 زرافے ہلاک ہوئے ہیں، دیگر چھوٹے جنگلی جانور اور چوپایئ اس کے علاوہ ہیں۔

موجودہ حالات کے پیش نظر جنگلی حیات کے تحفظ کے لئے کام کرنے والے اداروں نے جنگلی حیات کی فوری فضائی مردم شماری کا مطالبہ کیا ہے تاکہ وہاں جنگلی جانوروں پر خشک سالی کے اثرات کا وسیع پیمانے پر جائزہ لیا جاسکے۔

جنگلی حیات کے ماہرین نے متاثرہ علاقوں میں فوری طور پر پانی اور نمک کی فراہمی کی سفارش کی ہے۔