Author: صدف ابرار

حکومت نے آئندہ 15 دنوں کیلئے پیٹرولیم مصنوعات کی قیمتوں میں اضافہ کر دیا۔وزارت خزانہ نے پٹرول، ڈیزل کی قیمت بڑھانےکانوٹی فکیشن جاری کردیا جس کے مطابق پیٹرول کی قیمت میں 9 روپے 99 پیسے فی لیٹر اضافہ کیا گیا جس کے بعد پیٹرول کی نئی قیمت 275 روپے 60 پیسے فی لیٹر ہوگی۔ہائی اسپیڈ ڈیزل کی قیمت میں 6 روپے 18 پیسے فی لیٹر اضافہ کیا گیا اور نئی قیمت 283 روپے 63 پیسے فی لیٹر ہو گئی۔پیٹرولیم مصنوعات کی قیمتوں میں اضافے کا اطلاق رات 12 بجے سے ہو گا۔

جماعت اسلامی کے سابق امیر سراج الحق نے حکومت کی جانب سے سیاسی جماعت پر پابندی کے فیصلے کو غیر سنجیدہ قرار دیتے ہوئے اس پر شدید تنقید کی ہے۔ لاہور سے جاری اپنے بیان میں، سراج الحق نے کہا کہ پی ٹی آئی پر پابندی لگانے کا فیصلہ مارشل لا کی راہ ہموار کرے گا۔انہوں نے مزید کہا کہ تاریخ گواہ ہے کہ سیاسی جماعتوں پر پابندی کا حربہ نہ ماضی میں کارگر ثابت ہوا ہے اور نہ ہی مستقبل میں کامیاب ہوسکتا ہے۔ سراج الحق نے زور دیا کہ سیاسی مسائل کا حل جمہوری طریقوں سے نکالنا چاہیے اور پابندیوں سے بچنا چاہیے۔ ان کے مطابق، سیاسی جماعتوں پر پابندیاں جمہوری عمل کو نقصان پہنچاتی ہیں اور عوام کے حقوق کو محدود کرتی ہیں۔سراج الحق نے حکومت سے مطالبہ کیا کہ وہ اس فیصلے پر نظرثانی کرے اور ملک میں جمہوری اقدار کو فروغ دینے کے لئے مثبت اقدامات اٹھائے۔

محکمہ موسمیات کے مطابق ملک کے بیشتر علاقوں میں منگل کے روز موسم گرم اور مرطوب رہے گا جبکہ خیبرپختونخوا میں بارش کا امکان ہے۔ اسلام آباد اور گرد و نواح میں دن کے اوقات میں موسم گرم اور مرطوب رہے گا، صبح کے اوقات میں چند مقامات پر آندھی، جھکڑ چلنے اور گرج چمک کے ساتھ بارش کی توقع ہے۔رپورٹ کے مطابق بالائی خیبر پختونخوا اور زیریں سندھ میں آندھی، جھکڑ چلنے، گرج چمک کے ساتھ بارش بھی متوقع ہے، گلگت بلتستان اور کشمیر میں بھی چند مقامات پر آندھی اور گرج چمک کے ساتھ بارش کی پیشگوئی کی گئی ہے۔
خیبر پختونخوا کے بیشتر میدانی اضلاع میں موسم گرم اور مرطوب رہے گا، دیر، سوات، چترال، کوہستان، شانگلہ، بونیر، بٹگرام میں آندھی اور گرج چمک کے ساتھ بارش کا امکان ہے، ایبٹ آباد، مانسہرہ، ہری پور، خیبر، مہمند، باجوڑ، مردان اور پشاور میں بھی بارش کی پیشگوئی کی گئی ہے۔محکمہ موسمیات کے مطابق پنجاب کے بیشتر اضلاع میں بھی موسم گرم اور مرطوب رہے گا، بلوچستان میں ژوب اور قلعہ سیف اللہ میں گرج چمک کے ساتھ بارش کا امکان ہے، سندھ کے بیشتر اضلاع میں موسم گرم اورمرطوب رہے گا۔رپورٹ کے مطابق تھرپارکر، عمرکوٹ ، مٹھی، میرپور خاص اور سانگھڑ میں بارش کا امکان ہے، کشمیر اور گلگت بلتستان میں مطلع جزوی ابرآلود رہنے اور چند مقا مات پر تیز ہواؤٔں کے ساتھ بارش کا امکان ہے۔

پاکستان تحریک انصاف (پی ٹی آئی) پر ممکنہ پابندی کے معاملے پر سیاسی محاذ آرائی تیز ہو گئی ہے۔ پی ٹی آئی کے رہنما احمد اویس نے حکومت پر الزام لگایا ہے کہ وہ اہم معاملات سے توجہ ہٹانے کے لیے یہ مسئلہ اٹھا رہی ہے۔احمد اویس نے کہا، "یہ ہمارے ایم این ایز کو خوفزدہ کرنے کی کوشش ہے۔ نو مئی کے واقعات کو سوا سال ہو گیا، لیکن ابھی تک ٹرائل مکمل نہیں ہوا۔”انہوں نے یاد دلایا کہ تحریک انصاف تین کروڑ لوگوں کے ووٹ لے کر آئی ہے اور سوال کیا کہ پابندی کا معاملہ پہلے کیوں نہیں اٹھایا گیا۔
دوسری جانب، حکومتی حلقوں سے تعلق رکھنے والے میاں جاوید لطیف نے کہا کہ تحریک انصاف میں ایسی چیزیں موجود ہیں جو پابندی کا سبب بن سکتی ہیں۔ انہوں نے سائفر کے معاملے کو پاکستان کے راز سے انحراف قرار دیا۔لطیف نے مزید کہا، "پارٹی پر پابندی لگانے کا فیصلہ عدالت نے کرنا ہے۔ پاکستان مخالف قوتیں ان کو فنڈ دے رہی ہیں۔ دہشت گرد جماعتوں پر پابندی ہونی چاہیے۔” حکومت اور اپوزیشن کے درمیان کشیدگی بڑھنے کا امکان ہے، جبکہ عدالتی فیصلے کا انتظار کیا جا رہا ہے۔یہ معاملہ پاکستان کی سیاسی صورتحال کو مزید پیچیدہ بنا سکتا ہے، خاصکر جب ملک پہلے ہی معاشی چیلنجز اور سیاسی عدم استحکام کا شکار ہے

وزیراعظم شہباز شریف نے گزشتہ تین دنوں میں تیسری مرتبہ پاکستان مسلم لیگ (ن) کے سربراہ نواز شریف سے ملاقات کی۔ یہ ملاقات چھانگلہ گلی میں واقع نواز شریف کی رہائش گاہ پر ہوئی، جس میں وزیر اعلیٰ پنجاب مریم نواز بھی شریک تھیں۔قابل اعتماد ذرائع کے مطابق، اس ملاقات میں ملک کی موجودہ سیاسی صورتحال پر تفصیلی تبادلہ خیال کیا گیا۔ نواز شریف نے وزیراعظم کو تمام قانونی، آئینی اور سیاسی اختیارات استعمال کرنے کا مشورہ دیا۔وزیراعظم نے سابق صدر آصف علی زرداری اور دیگر اتحادی جماعتوں کے ساتھ ہونے والی مشاورت سے نواز شریف کو آگاہ کیا۔ ملاقات میں پاکستان تحریک انصاف (پی ٹی آئی) پر عائد کی جانے والی مبینہ پابندی سمیت دیگر اہم فیصلوں پر بھی غور کیا گیا۔
ذرائع کا کہنا ہے کہ اس مشاورتی عمل میں کیے گئے تمام فیصلوں سے پارٹی کے سینیر رہنماؤں کو بھی اعتماد میں لیا گیا ہے۔ یہ بھی فیصلہ کیا گیا کہ محرم کے بعد وفاقی کابینہ کا اجلاس طلب کیا جائے گا اور پارلیمان کا اجلاس بھی معمول سے قبل بلایا جائے گا۔سیاسی مبصرین کا خیال ہے کہ یہ ملاقاتیں آنے والے دنوں میں ہونے والے اہم سیاسی فیصلوں کی نشاندہی کرتی ہیں۔ حکومت کی جانب سے اٹھائے جانے والے اقدامات ملک کی سیاسی سمت کا تعین کر سکتے ہیں۔حکومتی ذرائع کا کہنا ہے کہ یہ مشاورتی عمل ملک میں سیاسی استحکام لانے کے لیے ضروری ہے، جبکہ اپوزیشن کا موقف ہے کہ یہ ملاقاتیں ان کے خلاف سازش کا حصہ ہیں۔ آنے والے دنوں میں سیاسی سرگرمیاں تیز ہونے کا امکان ہے

صدر آصف علی زرداری کو 7 ممالک کے سفراء نے سفارتی اسناد پیش کر دیں، جن میں زمبابوے، تاجکستان، روانڈا، ارجنٹائن، میانمار، کمبوڈیا اور بوٹسوانا کے سفراشامل ہیں،بعد ازاں ، سفراء نے صدر مملکت سے الگ الگ ملاقاتیں بھی کیں۔اس موقع پر صدر مملکت آصف زرداری کا کہنا تھا کہ پاکستان میں سرمایہ کاری کے وسیع مواقع موجود ہیں ، دوست ممالک پاکستان کے سرمایہ کاری دوست ماحول سے فائدہ اٹھائیں، غیر ملکی سرمایہ کار پاکستان کے زراعت، لائیو سٹاک، انفارمیشن ٹیکنالوجی، توانائی اور کان کنی کے شعبوں میں سرمایہ کاری کے مواقع تلاش کریں، پاکستان تمام دوست ممالک کے ساتھ تجارت، سرمایہ کاری اور ثقافت سمیت مختلف شعبوں میں تعاون کو وسعت دینا چاہتا ہے، پاکستان اقتصادی تعاون بڑھانے، دوست ممالک کے ساتھ تجارتی حجم کو بھرپور صلاحیت کے مطابق بڑھانے کو خصوصی اہمیت دیتا ہے۔صدر مملکت نے اقتصادی اور تجارتی تعلقات کے فروغ کیلئے کاروباری برادریوں کے مابین رابطے بڑھانے پر زور بھی دیا۔صدر آصف علی زرداری نے سفراء کو پاکستان میں بطور سفیر تعینات ہونے پر مبارکباد دی اور کہا امید ہے کہ نامزد سفراء باہمی طور پر فائدہ مند تعاون مزید بہتر بنانے میں اپنا کردار ادا کریں گے۔اس سے قبل سفراء کو ایوان ِصدر پہنچنے پر پاکستان کی مسلح افواج کے چاق و چوبند دستے نے گارڈ آف آنر پیش کیا۔

پاکستان پیپلز پارٹی کے سینئر رہنماؤں نے تحریک انصاف پر پابندی کے فیصلے کی مخالفت کر دی۔ذرائع کے مطابق پیپلز پارٹی کے سینئر رہنماؤں نے قیادت کو کھل کر فیصلے کی مخالفت کرنے کی تجویز دی، پیپلز پارٹی کے بعض رہنماؤں نے عطا تارڑ کے اتحادیوں کو اعتماد میں لینے کے بیان پر تعجب کا اظہار کیا۔پیپلز پارٹی کے سینئر رہنماؤں نے موقف اختیار کیا کہ پیپلزپارٹی کو اعتماد میں لینے کا علم نہیں، ہماری جماعت حکومت کے فیصلے کو سپورٹ نہیں کرتی۔ذرائع کے مطابق پیپلز پارٹی کے سینئر رہنما فرحت اللہ بابر نے کھل کر پابندی کے فیصلے کی مخالفت کی۔دوسری جانب
پیپلزپارٹی کے سینیئر رہنما سید خورشید شاہ نے اپنے ایک بیان میں کہاکہ حکومت نے ہمیں اس فیصلے پر اعتماد میں نہیں لیا۔انہوں نے کہاکہ یہ عدالتوں کے فیصلے ہیں، اب دیکھتے ہیں عدالت کیا فیصلہ کرتی ہے۔سیّد خورشید شاہ نے کہاکہ ہمیں سیاست کرنی چاہیے ان چیزوں سے مسئلے حل نہیں ہوں گے۔ اس وقت ملک کے جو حالات ہیں سب کو مل کر بیٹھنا چاہیے۔واضح رہے کہ حکومت نے پاکستان تحریک انصاف پر پابندی لگانے کے علاوہ سابق صدر عارف علوی، عمران خان اور قاسم سوری کے خلاف آرٹیکل 6 کی کارروائی چلانے کا فیصلہ کیا ہے