Author: صدف ابرار

پاکستان کی حکومت نے ملک میں غیر قانونی طور پر رہنے والے غیر ملکیوں کو واپس بھیجنے کا آپریشن روک دیا۔ کچھ دن پہلے، اقوام متحدہ کے ایک اہم شخص، فلپو گرانڈی، پاکستان آئے تھے۔ وہ مہاجرین کے لیے کام کرتے ہیں۔ انہوں نے تین دن پاکستان میں گزارے۔ اس دوران، وہ پشاور اور ہری پور گئے، جہاں انہوں نے افغان مہاجرین سے ملاقات کی۔فلپو نے پاکستان کے وزیر اعظم شہباز شریف اور دیگر اہم لوگوں سے بھی بات کی۔ انہوں نے حکومت سے کہا کہ وہ اس آپریشن کو کچھ وقت کے لیے روک دیں۔ انہوں نے یہ بھی کہا کہ وہ افغانستان کی حکومت اور دنیا کے دوسرے ممالک کے ساتھ مل کر کوئی حل نکالیں گے۔
حکومت نے فلپو کی بات مان لی۔ انہوں نے کہا کہ وہ اس سال کے آخر تک انتظار کریں گے۔ اس دوران، وہ امید کر رہے ہیں کہ سب مل کر کوئی ایسا راستہ نکال لیں گے جو سب کے لیے اچھا ہو۔ اس موقع پر اقوام متحدہ کے ہائی کمشنر کو پاکستان میں مقیم غیر ملکیوں کے خلاف عارضی بنیادوں پر آپریشن روکنے کی یقین دہانی کروائی گئی تھی، فلپو گرانڈی نے رواں برس کے اختتام تک افغان عبوری حکومت اور عالمی معاون اداروں کے درمیان مذاکرات کی یقین دہانی کروائی تھی۔ واضح رہے کہ اس آپریشن کے دوران 3 جولائی تک پاکستان سے 6 لاکھ غیر قانونی مقیم غیر ملکیوں کو واپس بھیجا جا چکا ہے جن میں بڑی تعداد افغان باشندوں کی ہے۔

بانی پی ٹی آئی عمران خان اور بشری بی بی کی عدت کیس میں سزا کے خلاف اپیلوں کے کیس میں خاور مانیکا کے وکیل زاہد آصف نے جج افضل مجوکا کی عدالت میں 2 درخواستیں دائر کردی ہیں۔بشریٰ بی بی کے سابق شوہر خاور مانیکا نے ڈسٹرکٹ اینڈ سیشن کورٹ اسلام آباد میں طبی و شرعی رائے لینےکے لیے درخواستیں دائر کردیں۔ دونوں درخواستوں پر 11 جولائی کو سماعت ہوگی۔ دوسری طرف عدت نکاح کیس میں سزا کے خلاف اپیلوں پر سماعت کے دوران عدالت نے خاور مانیکا کے وکلاء سے طلاق نامہ پر تاریخ ٹمپرنگ پر جواب مانگ لیا ہے۔ایک درخواست میڈیکل بورڈ کے ذریعے میڈیکل رائے لینے کیلئے دائر کی گئی جب کہ دوسری درخواست عدت کے معاملے پر اسلامی نظریاتی کونسل اور اسلامی سکالرز کی رائے لینے سے متعلق ہے۔درخواستوں میں اسلامی نظریاتی کونسل، میڈیکل بورڈ، وفاقی شرعی عدالت سے رائے لینے کی استدعا کی۔ جج افضل مجوکا نے خاور مانیکا کے وکیل کی درخواستوں پر فریقین کو نوٹسز جاری کر دیے۔دوسری طرف بانی پی ٹی آئی اور بشری بی بی کے خلاف عدت نکاح کیس میں سزا کے خلاف اپیلوں پر بشری بی بی کے وکیل سلمان صفدر نے دلائل مکمل کرلیے ہیں۔ عدالت نے خاور مانیکا کے وکلاء سے طلاق نامہ پر تاریخ ٹمپرنگ پر جواب مانگ لیا ہے۔

’سابقہ شوہر نہیں بتا سکتا کہ عدت اور خاتون کی ماہواری کے 3 سائیکل کب مکمل ہوئے‘
اپیلوں پر سماعت ایڈیشنل سیشن جج افضل مجوکا نے کی، بشری بی بی کی جانب سے خدیجہ صدیقی نے دلائل کا آغاز کرتے ہوئے کہا کہ سابقہ شوہر کسی صورت نہیں بتا سکتا کہ عدت اور خاتون کی ماہواری کے تین سائیکل کب مکمل ہوئے جرم تب بنتا ہے، جب ثابت ہو کہ عدت میں شادی ہوئی، اپریل 2017 میں زبانی طلاق دی، بشریٰ بی بی اپنی عدت گزار کر اپنی والدہ کے گھر گئیں۔خدیجہ صدیقی ایڈووکیٹ کی جانب سے مختلف عدالتی فیصلوں کا حوالہ پیش کیا گیا، انھوں نے کہا کہ فراڈ ہمیشہ دو کے درمیان ہوتا ہے، یہاں پر نہیں بتایا گیا کہ کس کے ساتھ فراڈ ہوا۔
خدیجہ صدیقی کے دلائل مکمل ہونے کے بعد بشریٰ بی بی کی جانب سے بیرسٹر سلمان صفدر نے دلائل دیتے ہوئے کہا کہ دو تین دن کے اندر ٹرائل مکمل کرلیا ، ایسے زبردستی ٹرائل ہوا جیسے کوئی گینگ ریپ کا کیس ہو، عدت کے دورانیہ کے ذکر کو چھوڑ کر بھی اس کیس میں سے بری کرایا جا سکتا ہے، دو ہزار دن چپ رہنے پر آپ نظر کرم کریں تو میرے موکل بری ہوسکتے ہیں دو الزامات میں سے ایک ختم ہوجاتا تو مطلب آدھا کیس ختم ہوجاتا ہے۔سلمان صفدر نے کہا کہ ٹمپرنگ والے ڈاکومنٹ کے مطابق طلاق کے اڑتالیس دن بنتے ہیں، دوسری جانب اصل دستاویز پیش نہیں کی گئیں، عون چوہدری کو منصوبے کے تحت گواہ بنایا گیا۔اس دوران وکیل زینب عمیر نے بشری بی بی کا بیان پڑھ کر سنایا عدالت نے خاور مانیکا کے وکلاء سے طلاق نامہ پر تاریخ کی ٹمپرنگ پر جواب مانگتے ہوئے ہدایت کی کہ آپ نے دلائل میں جواب دینا ہے کہ گواہوں کے بیانات ملزمان کو کیوں نہیں دیے گئے جبکہ شہادتوں سے متعلق بھی جواب آپ نے دینا ہے، اس دوران بشریٰ بی بی کے وکیل سلمان صفدر نے اپنے دلائل مکمل کرلیے کیس کی مزید سماعت جمعرات ساڑھے 9 بجےتک ملتوی کردی گئی۔

نیلم ویلی شاہراہ دیولیاں کے مقام پر جیپ حادثے کا شکار ہوگئی جس کے نتیجے میں 14 افراد جاں بحق ہوگئے۔ریسکیو حکام کے مطابق جیپ گہری کھائی میں گرنے سے ڈرائیور سمیت 14 افراد موقع پر دم توڑ گئے، جاں بحق ہونے والوں میں 6 مرد، 4 خواتین اور 3 بچے شامل ہیں۔پولیس پنجگراں کا بتانا ہے کہ واقعے کی اطلاع ملتے ہی ریسکیو ٹیمیں موقع پر روانہ کردی گئیں جبکہ حادثے کی زد میں آکر مقامی افراد بھی زخمی ہوئے ہیں۔ریسکیو کی جانب سے جاں بحق افراد کی لاشیں اور زخمیوں کو طبی امداد کیلئے ہسپتال منتقل کیا جارہا ہے۔ریسکیو ذرائع نے بتایا ہے کہ بارش کی وجہ سے امدادی کاموں میں مشکلات کا سامنا کرنا پڑرہا ہے، مقامی افراد اپنی مدد آپ کے تحت لوگوں کو نکال رہے ہیں۔

پاکستان تحریکِ انصاف (پی ٹی آئی) کے رہنما علی محمد خان کا کہنا ہے کہ آج پرویز خٹک گواہی دینے آئے، اس پر بہت افسوس ہوا۔علی محمد خان نے بتایا کہ بانیٔ پی ٹی آئی نے وکلاء کو ہدایات کی ہیں کہ کارکنان کے کیسز میں حاضری یقینی بنائیں، امید ہے کہ سپریم کورٹ سے ہمیں انصاف ملے گا۔انہوں نے کہا کہ چیف جسٹس پاکساتن اور 13 ججز کے سامنے ہے کہ پی ٹی آئی کو مجبور کیا گیا کہ وہ سنی اتحاد کونسل میں جائے، ملک کی سب سے بڑی جماعت کو مجبور کیا گیا کہ وہ آزاد الیکشن لڑے۔راولپنڈی میں پی ٹی آئی رہنما علی محمد خان نے میڈیا سے گفتگو میں کہا کہ پرویز خٹک کو بانیٔ پی ٹی آئی نے عزت دی اور خیبر پختون خوا کا وزیرِ اعلیٰ بنایا۔
ان کا کہنا ہے کہ ہم خٹک صاحب کے ساتھ تب تک تھے جب تک وہ بانیٔ پی ٹی آئی کے ساتھ تھے۔پی ٹی آئی رہنما نے کہا کہ ہماری پارٹی توڑ دی گئی، لیڈر کو گرفتار کیا گیا پھر بھی 178 سیٹیں جیتے، مریم نواز، شہباز شریف، نواز شریف، خواجہ آصف یہ سب اپنی سیٹیں ہارگئے ۔علی محمد خان نے اس موقع پر مطالبہ کیا ہے کہ ہمارے کارکنان کو رہا کیا جائے اور خواتین کی سیٹیں واپس کی جائیں۔

فوجی عدالتوں میں سویلینز کا ٹرائل کالعدم قرار دینے کیخلاف کیس میں سپریم کورٹ نے 8 جولائی کی سماعت کا تحریری حکمنامہ جاری کر دیا ۔حکمنامہ میں کہا گیا ہے کہ زیر حراست ملزمان کے اہلخانہ نے ملاقاتیں نہ ہونے کی شکایت کی،عدالت کو بتایا گیا کہ ملزمان کیساتھ برا سلوک کیا جارہا ہے،اٹارنی جنرل نے یقین دہانی کرائی کہ ملزمان سے اہلخانہ کی ملاقات کرائی جائے گی۔اٹارنی جنرل ملزمان سے ملاقات سمیت گھر سے لایا ہوا کھانا فراہم کرنے سے متعلق آگاہ کریں گے، خیبرپختونخوا حکومت کی اپیل واپس لینے کی بنیاد پر نمٹائی جاتی ہے۔
سپریم کورٹ کیس کی کارروائی براہ راست نشر کرنے سے متعلق درخواست بھی واپس لینے پر نمٹا دی گئی، جواد ایس خواجہ کے وکیل خواجہ احمد حسین نے کہا ان کو بنچ پر اعتراض نہیں،لاہور ہائیکورٹ بار اور بار ایسوسی ایشن کو کیس میں فریق بنانے پر دو ججز کا اختلاف سامنے آیا۔حکمنامے میں جسٹس شاہد وحید اور جسٹس شاہد بلال کے اختلافی نوٹ شامل ہیں،لاہور ہائیکورٹ بار اور بار ایسوسی ایشن کی فریق بننے کی درخواست منظور کی جاتی ہے،پانچ دو کے تناسب سے فریق بننے کی درخواست منظور کی گئی،سپریم کورٹ کیس کی آئندہ سماعت 11 جولائی کو ہوگی۔