Author: صدف ابرار

سعودی ولی عہد شہزادہ محمد بن سلمان بن عبدالعزیز سے وزیراعظم شہبازشریف کی ملاقات کے بعد کا مشترکہ اعلامیہ جاری کر دیا گیا ہے۔جاری کردہ اعلامیہ میں کہا گیا شہزادہ محمد بن سلمان سے شہبازشریف نے الصفاء پیلس مکہ المکرمہ میں باضابطہ ملاقات کی، سعودی ولی عہد نے وزیراعظم کو منصب سنبھالنے پر مبارکباد دی اور نیک خواہشات کا اظہار کیا۔ اعلامیہ کے مطابق وزیراعظم نے سعودی عرب کی غیر متزلزل حمایت اور مہمان نوازی پر سعودی ولی عہد کا شکریہ ادا کیا، وزیراعظم نے دوطرفہ تعلقات اور اقتصادی تعاون کو فروغ دینے کے لئے پاکستان کے عزم کا اعادہ کیا۔ملاقات میں ہونے والی بات چیت کا محور دونوں ممالک کے درمیان برادرانہ تعلقات کو مزید مضبوط بنانے اور مختلف شعبوں میں تعاون کو بڑھانے کے راستے تلاش کرنا تھا۔ ملاقات میں پاکستان کی معیشت میں سعودی عرب کے تعاون کو سراہا گیا، دونوں ممالک کے درمیان کاروبار اور سرمایہ کاری کے حوالے سے تعاون بڑھانے کے باہمی عزم کا بھی اظہار کیا گیا۔دونوں رہنماؤں نے پاکستان میں 5 ارب ڈالر مالیت کے نئے سعودی سرمایہ کاری پیکیج کے پہلے فیز کو جلد از جلد پایہ تکمیل تک پہنچانے کے عزم کا اعادہ کیا، دونوں رہنماؤں نے غزہ کی تشویشناک صورتحال سمیت باہمی دلچسپی کی علاقائی اور عالمی پیش رفت پر بھی تبادلہ خیال کیا۔

اسلام آباد غوری ٹاؤن فیز فور میں نامعلوم افراد نے تین افراد کے گلے کاٹ دیے، پولیس کے مطابق زخمیوں میں والد اور اسکے دو کمسن بچے شامل ہیں۔پولیس کے مطابق تینوں کو تشویش ناک حالت میں پولی کلینک اسپتال منتقل کر دیا گیا۔زخمیوں کی شناخت 55 سالہ شہرون ،07 سالہ آریان اورد 10 سالہ بچی ادا کے نام سے ہوئی۔پولیس کا مزید کہنا ہے کہ تینوں زخمی آپریشن تھیٹر میں ہیں ان سے بات چیت کے بعد ہی اصل واقعہ معلوم ہو گا، تاہم گلا کاٹنے والے ملزمان کا پتہ نہیں چل سکا ہے۔ جبکہ پولیس نے مختلف پہلوؤں سے کارروائی کا آغاز کر دیا ہے۔

انسپکٹر جنرل (آئی جی) کی غیر موجودگی میں اسلام آباد پولیس کو انتظامی مشکلات کا سامنا ہے، اس بات کا اظہار چیف کمشنر آفس نے وزارت داخلہ کو لکھے خط میں کیا۔
نئے آئی جی اسلام آباد کی تعیناتی سے متعلق خط ایڈیشنل کمشنر رانا محمد وقاص کی جانب سے لکھا گیا، جس میں کہا گیا کہ نئے آئی جی کی تعیناتی کے بعد اکبر ناصر اپنے عہدے کا چارج چھوڑ چکے ہیں، نئے تعینات ہونے والے آئی جی علی ناصر رضوی نے تاحال عہدے کا چارج نہیں سنبھالا۔ خط میں کہا گیا کہ آئی جی کی غیر موجودگی میں اسلام آباد پولیس کو انتظامی مشکلات کا سامنا ہے، صورتحال کے پیش نظر سینئر ترین افسر حسن رضا خان کو قائم مقام آئی جی تعینات کیا جائے۔ خط کے متن میں کہا گیا کہ حسن رضا خان بطور ڈی آئی جی ہیڈ کوارٹرز اسلام آباد پولیس میں خدمات سر انجام دے رہے ہیں۔

سابق وزیر اعظم اور پاکستان مسلم لیگ (ن) کے سابق رہنما شاہد خاقان عباسی نے نئی سیاسی جماعت رجسٹر کرانے کے لیے الیکشن کمیشن سے رجوع کرلیا۔سابق وزیراعظم شاہدخاقان عباسی نے سیاسی جماعت کی رجسٹریشن کے لیےکوائف الیکشن کمیشن میں جمع کرادیے۔اس موقع پر شاہد خاقان عباسی کا کہنا تھا کہ سیاسی جماعت کی رجسٹریشن کے لیے الیکشن کمیشن کو مطلوبہ دستاویزات فراہم کردی ہیں، الیکشن ایکٹ 2017 کے مطابق سیاسی جماعت رجسٹر کرارہے ہیں۔شاہد خاقان عباسی نے مزید کہا کہ آئندہ انتخابات میں نئی سیاسی جماعت کے تحت الیکشن میں حصہ لیں گے،
دوسری جانب سابق وزیرخزانہ مفتاح اسماعیل کا نجی ٹی وی کے پروگرام میں گفتگو کرتے ہوئے کہنا تھاکہ عید کے بعد نئی جماعت کا اعلان کریں گے۔ ہم سمجھتے ہیں کہ 3بڑی جماعتوں میں عوام کے مسائل حل کرنے کی اہلیت نہیں۔سیاست دان عوام کے مسائل اور ان کے حل کیلئے کوئی بات نہیں کر رہے۔ بہت سے قریبی دوست او سیاستدان نئی جماعت میں شامل ہونے کیلئےرابطے میں ہیں۔حاجی لشکری رئیسانی،خواجہ محمد ہوتی اور دیگر لوگوں سے رابطے ہیں۔بہت سے لوگوں کے نام ابھی نہیں بتا سکتا۔مفتاح اسماعیل کاکہنا تھاکہ مہنگائی میں بے پناہ اضافہ ہوا ہے،ریاست اپنی ذمہ داری پوری نہیں کر رہی۔ کسی بھی حکومت نے برآمدات میں اضافہ نہیں کیا۔اسٹیبلشمنٹ کی حمایت ضروری نہیں سمجھتے۔ ہم اسٹیبلشمنٹ کے ساتھ مل کر کام کرینگے ان کیلئے نہیں۔ تنقید برائے تنقید نہیں کرینگے نہ ذاتیات کی سیاست کریں گے۔پیپلزپارٹی سندھ میں کام نہیں کر سکی، سندھ کے اسکولوں کی حالت اب تر ہے۔سابق وزیرخزانہ کاکہنا تھا کہ پارٹی صدر کی ٹرم کی مدت 3 سال مقرر کی جائے گی۔ پارٹی پر کسی ایک خاندان کی اجارہ داری نہیں ہوگی۔ ہمارا ایک ایجنڈا ہے جس پر لوگوں سے بات کریں گے ۔

سعودی عرب میں شوال کا چاند نظر نہیں آیا جس کے باعث بدھ کو عید ہوگی۔سعودی عرب میں شوال کا چاند دیکھنے کیلئے اجلاس ہوئے۔ اس کے علاوہ سعودی سپریم کورٹ نے شہریوں سے بھی چاند دیکھنے کی اپیل کی تھی تاہم مملکت میں کہیں سے بھی چاند دیکھنے کی شہادت نہیں ملی۔چاند نظر نہ آنے کے بعد 10 اپریل بروز بدھ کو یکم شوال 1445 ہجری ہوگی۔خیال رہے کہ ماہرین فلکیات نے سعودی عرب میں عید الفطر بدھ کو ہونےکا امکان ظاہر کیا تھا۔خلیجی ریاستوں متحدہ عرب امارات اور قطر میں بھی شوال کا چاند نظر نہیں آیا۔متحدہ عرب امارات میں بھی چاند دیکھنے کیلئے اجلاس ہوا تاہم پورے ملک میں کہیں سے بھی چاند نظر آنے کی شہادت موصول نہیں ہوئی۔بعدازاں کمیٹی نے اعلان کیا کہ متحدہ عرب امارات میں کل 30 واں روزہ رکھا جائے گا اور 10 اپریل بروز بدھ کو عید ہوگی۔دوسری جانب قطر میں بھی چاند نظر نہیں آیا جس کے بعد وہاں بدھ کو عید منائی جائے گی۔اُدھر افغانستان میں بھی شوال کا چاند دیکھنے کیلئے رویت ہلال کمیٹی کا اجلاس ہوا تاہم کہیں سے بھی چاند نظر آنے کی شہادت نہیں ملی جس کے بعد بدھ کو عید کا اعلان کیا گیا ہے۔ اس کے علاوہ لندن اور آسٹریلیا میں بھی بدھ کو عید الفطر منائی جائے گی۔

وزیراعلیٰ سندھ نے آئی جی جیل خانہ جات کی درخواست پر سندھ کی جیلوں میں قید سزا یافتہ قیدیوں کی سزا میں 120 دنوں کی خصوصی معافی کی منظوری دے دی ۔جیل خانہ جات قوانین 2019 کے رول 788 کے تحت قیدیوں 120 دن کی سزائیں معاف کی جاسکتی ہے۔سزا معافی کا اطلاق قتل، جاسوسی، بغاوت، ریاست مخالف سرگرمی، دہشت گردانہ سرگرمی کے سزا یافتہ قیدیوں پر نہیں ہوگا۔زنا ، اغوا/اغوا ،ڈکیتی ، غیر ملکی ایکٹ 1946 کے تحت سزا یافہ ، منشیات کے جرائم میں ملوث قیدی بھی معافی کے حقدار نہیں ۔آئی جی جیل خانہ جات کے مراسلہ کے مطابق قیدیوں کی سزا معافی کا خصوصی اختیار وزیراعلیٰ کے پاس ہے۔