Author: صدف ابرار

سکھ حریت پسند رہنما گرپت ونت سنگھ پنو نے بیرون ملک مقیم سکھ شہریوں پر بھارتی قاتلانہ حملوں سے متعلق اہم انکشافات کردیے۔جیو نیوز کے پروگرام میں گرپت ونت سنگھ پنو نے کہا کہ سکھ رہنماؤں پر حملوں میں کوئی تھرڈ پارٹی نہیں بلکہ ’را‘ براہ راست ملوث ہے۔انہوں نے کہا کہ بھارتی وزیراعظم نریندر مودی کی اجازت کے بغیر سکھ رہنماؤں پر حملے نہیں ہوسکتے۔گرپت ونت سنگھ پنو نے کہا کہ سکھ بھارتی پنجاب کو پُرامن طور پر بھارت سے آزاد کروانا چاہتے ہیں اس لیے نریندر مودی کی حکومت انہیں نشانہ بنارہی ہے۔سکھ حریت پسند رہنما نے مزید کہا کہ خالصتان کی تحریک مقبول تحریک ہے، اگر مقبول نہ ہوتی تو نریندر مودی ہمیں نشانہ نہ بناتا۔ دوسری جانب جیو نیوز اور جنگ لندن کے رپورٹر مرتضیٰ علی شاہ بھارتی خفیہ ایجنسی ’را‘ کی ہٹ لسٹ پر آگئے۔مرتضیٰ علی شاہ سکھوں کی خالصتان تحریک کی کوریج کے باعث ’را‘ کی ہٹ لسٹ میں آئے ہیں۔برطانیہ کی سکھ فیڈریشن دبندرجیت سنگھ نے سکھ چینل کو انٹرویو میں انکشاف کیا کہ میٹرپولیٹن پولیس بھی مرتضیٰ علی شاہ کی زندگی کو لاحق خطرات سے باخبر ہے۔لندن میں جیو اور جنگ کے رپورٹر نے برطانیہ کے ساتھ کینیڈا، سوئٹزرلینڈ اور اٹلی میں ہونے والی ریفرنڈم کی کوریج کی۔واضح رہے کہ گزشتہ سال بھارت میں مرتضیٰ علی شاہ کا سوشل میڈیا اکاؤنٹ بند کردیا گیا تھا۔

فیڈرل بورڈ آف ریونیو (ایف بی آر) نے پانچ صنعتی شعبوں میں ٹریک اینڈ ٹریس سسٹم کے نفاذ میں تاخیر پر انکوائری شروع کردی ہے۔ ایف بی آر کے چیئرمین نے تمام چیف کمشنرز کو ہدایت کی ہے کہ وہ تمباکو، ٹیکسٹائل اور چینی مارکیٹوں میں فروخت ہونے والی اشیاء پر ٹیکس اسٹیمپ کے ذریعے ٹیکس لگانے کی رپورٹ دیں۔ذرائع نے انکشاف کیا کہ ایف بی آر نے تمام فیلڈ فارمیشنز کو اپنے افسران اور عملے کو مختلف مارکیٹوں اور بازاروں کے دورے کرنے کی ہدایات جاری کی ہیں، خاص طور پر اشیا پر ٹیکس سٹیمپ کی جانچ پڑتال پر زور دیا گیا ہے ، خاص طور پر تمباکو، کھاد اور چینی کی فروخت ہونے والی اشیا میں ٹیکس مہروں کو چیک کیا جائے۔یہ اقدام ٹریک اینڈ ٹریس سسٹم کی کارکردگی سے متعلق خدشات کے درمیان سامنے آیا ہے، جس کا مقصد ٹیکس کے عمل کو ہموار کرنا اور ان شعبوں میں غیر قانونی تجارتی طریقوں کو روکنا تھا۔ ایف بی آر کی جانچ پڑتال ٹیکس کے فریم ورک کے اندر شفافیت اور جوابدہی کو یقینی بنانے کے لیے حکومت کے عزم کی نشاندہی کرتی ہے، خاص طور پر قومی معیشت کے لیے اہم صنعتوں میں۔تحقیقات ایف بی آر کے ٹریک اینڈ ٹریس سسٹم کے نفاذ میں کسی بھی خامی کو دور کرنے کے عزم کی نشاندہی کرتی ہے، جس کا مقصد ریونیو اکٹھا کرنا اور مارکیٹ میں منصفانہ مسابقت کو فروغ دینا ہے۔ یہ پیشرفت متذکرہ صنعتی شعبوں کے اسٹیک ہولڈرز کے لیے اہم اثرات مرتب کرنے کے لیے تیار ہے، کیونکہ وہ ٹیکس کے طریقہ کار سے متعلق ایف بی آر کی انکوائری کے نتائج کا انتظار کر رہے ہیں۔
ذرائع نے بتایا کہ چیف کمشنرز ٹیکس مہروں کی تصدیق اور غیر تصدیق کی رپورٹ پیر تک جمع کرانے کی ہدایت کی ہے ، ایف بی آر نے 5 صنعتی شعبوں بشمول چینی، فرٹیلائرز، سیمنٹ، تمباکو اور مشروبات میں ٹیکس چوری روکنے کے لیے ملک بھر میں آئی آر ای این اسکوڈ تعینات کیے تھے اور ان کو انفورسمینٹ بہتر کرنے کے لیے بڑی لگژری گاڑیاں بھی دی گئیں۔ذرائع کا کہنا ہے کہ آئی آر ای این ٹیمیں ٹیکس مہروں کی انفورسمینٹ میں ناکام رہی ہیں جس کے سبب مارکیٹ میں ان صنعتی شعبوں کی نان ڈیوٹی پیڈ اشیا فروخت میں فروخت ہو رہی ہیں۔ذرائع نے بتایا کہ متعدد فیکٹری مالکان نے ایف بی آر کی جانب سے ٹیکس سٹمپس لگانے میں تاخیر حربہ استعمال کیے ہیں ،اس کے باوجود ایف بی آر حکام ٹس سے مس نہ ہوئے۔ذرائع نے انکشاف کیا کہ ایف بی آر کی جانب سے سیمنٹ کے مالکان کو اجازت دی گئی کہ وہ اپنی مرضی کے آٹو اپلی کیٹرز سے متعلقہ آلات لگا سکتے ہیں حالانکہ ٹریک اینڈ ٹریس لگانے والی کمپنی نے سیمنٹ مالکان کو کچھ اور الات تجویز کیے تھے ۔

پاکستان تحریک انصاف (پی ٹی آئی) کے رہنما لطیف کھوسہ کا کہنا ہے کہ وثوق سے کہتا ہوں کہ اپریل میں ہی بانی پی ٹی آئی باہر آجائیں گے، کوئی اسے ڈیل کہے گا تو یہ کم ظرفی والی بات ہوگی۔نجی ٹی وی کے پروگرام میں گفتگو کرتے ہوئے لطیف کھوسہ نے کہا کہ بانی پی ٹی آئی نام لے کر اس لیے تنقید کر رہے ہیں کہ مداخلت بند ہونا چاہیے، عدالتیں کہہ رہی ہیں کہ مداخلت ہو رہی ہے، کیا یہ کم بات ہے۔ لطیف کھوسہ نے کہا کہ بانی پی ٹی آئی انتقام کی سیاست پر یقین نہیں رکھتے، آئین کی بالادستی چاہتے ہیں۔پی ٹی آئی رہنما نے یہ بھی کہا کہ سائفر کیس میں عدالت کہہ چکی ہے کہ کدھر ہے سائفر۔لطیف کھوسہ نے مزید کہا کہ عدت کا مقدمہ شرمناک مقدمہ ہے۔

عالمی بینک کی ایک حالیہ رپورٹ کے مطابق رواں مالی سال کےپاکستان میں بجلی اور گیس کی قیمتوں میں اضافے کی وجہ سے ملک میں مہنگائی کی سطح پانچ دہائیوں کی بلند ترین سطح پر پہنچ گئی ہے۔پہلے چھ ماہ میں مہنگائی 1974 کے بعد اپنی بلند ترین سطح پر پہنچ گئی ہے جس کی بنیادی وجہ بجلی اور گیس کی قیمتوں میں اضافہ ہے۔رپورٹ میں روشنی ڈالی گئی ہے کہ مالی سال کی پہلی ششماہی کے دوران شہری علاقوں میں توانائی کی قیمتوں میں 50 فیصد اضافہ ہوا۔ بجلی اور گیس کی قیمتوں میں اضافے سے پیداواری لاگت میں نمایاں اضافہ ہوا ہے جس کے نتیجے میں شہری علاقوں میں توانائی کی افراط زر کی شرح 50.6 فیصد ہے۔تقابلی طور پر گزشتہ سال کی اسی مدت کے دوران توانائی کی افراط زر 40.6 فیصد رہی۔ پاکستان میں رواں مالی سال کے پہلے چھ ماہ میں مہنگائی کی اوسط شرح 28.8 فیصد رہی جب کہ گزشتہ سال اسی عرصے کے دوران یہ شرح 25 فیصد تھی۔
رپورٹ میں روپے کی شرح مبادلہ کے استحکام، پیداواری لاگت میں اضافے اور عالمی منڈی میں قیمتوں پر نیچے کی طرف دباؤ کے باوجود مہنگائی کی شرح میں مسلسل اضافہ ہونے کی وجہ مہنگائی کے دباؤ کو بھی قرار دیا گیا ہے۔مہنگائی میں اضافے نے پاکستانی شہریوں کے لیے زندگی گزارنے کی لاگت کو نمایاں طور پر متاثر کیا ہے، معاشی چیلنجوں کو بڑھایا ہے اور گھریلو بجٹ پر دباؤ ڈالا ہے۔ معاشی استحکام کو یقینی بناتے ہوئے اور کمزور آبادی پر پڑنے والے اثرات کو کم کرتے ہوئے ضروری سہولیات کی بڑھتی ہوئی قیمتوں سے نمٹنے کے لیے حکومت کو بڑھتے ہوئے دباؤ کا سامنا ہے۔مہنگائی پر قابو پانے اور قیمتوں میں استحکام لانے کی کوششیں شہریوں کی فلاح و بہبود اور پاکستان میں معاشی ترقی کو برقرار رکھنے کے لیے انتہائی اہم ہیں۔

عیدالفطر کا چاند دیکھنے کےلیے مرکزی رویت ہلال کمیٹی کا اجلاس 9 اپریل کو ہوگا، چیئرمین رویت ہلال کمیٹی مولانا عبدالخبیر آزاد کی زیر صدارت اجلاس اسلام آباد میں ہوگا۔
رویت ہلال کمیٹی ممبران، محکمہ موسمیات، سپارکو، سائنس ٹیکنالوجی حکام شریک ہوں گے۔ اجلاس وزارت مذہبی امور کوہسار کمپلیکس کی عمارت میں ہوگا۔زونل رویت ہلال کمیٹیوں کے اجلاس مقررہ مقامات پر ہوں گے، اجلاس میں شوال کا چاند دیکھنے کی شہادتیں وصول کی جائیں گی، چیئرمین مرکزی رویت ہلال کمیٹی شوال کا چاند نظر آنے یہ نہ آنے کا اعلان کریں گے۔محکمہ موسمیات کی پیش گوئی کے مطابق عید الفطر کا چاند نظر آنے کا قوی امکان ہے۔ذرائع محکمہ موسمیات کا کہنا ہے کہ 9 اپریل کو ملک کے اکثر حصوں میں مطلع صاف ہوگا، انسانی آنکھ سے نظر آنے کےلیے چاند کی عمر بھی پوری ہے۔