Author: صدف ابرار

پی ٹی آئی کے رہنما حماد اظہر نے سوشل میڈیا پلیٹ فارم ایکس پر اہم پیغام جاری کر دیا ہے، جس میں انہوں نے تحریک انصاف کے تنظیمی عہدوں سے استعفی دینے کا اعلان کیا۔حماد اظہر نے اپنے پیغام میں بتایا کہ وہ تحریک انصاف پنجاب کی صدارت اور جنرل سیکرٹری کے عہدوں سے استعفی دینے جا رہے ہیں، اور انہوں نے پارٹی قیادت کو بھی اپنا استعفی پیش کر دیا ہے۔اس کے علاوہ، حماد اظہر نے اپنے پیغام میں یہ بھی بیان کیا کہ وہ بطور کارکن کام کرتے رہیں گے ،حماد اظہر کا اس استعفی کا اعلان تحریک انصاف کی سیاسی میدان میں بڑے نقصان کا سبب بن سکتا ہے ۔ ان کا انتہائی معاونت گزشتہ دنوں میں پنجاب کی سیاست میں اہم کردار ادا کر رہا تھا۔

آئی ایس پی آر کے مطابق سیکورٹی فورسز نےشمالی وزیرستان میں انٹیلی جنس بیسد آپریشن کیا۔ شدید فائرنگ کے تبادلے میں 2دہشتگرد مارے گئے جبکہ 2زخمی ہوئے۔ ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد ہوا،۔ دہشت گرد علاقے میں دہشت گردی کی متعدد کارروائیوں میں ملوث تھے۔پاک فوج کے ترجمان کے مطابق علاقے میں کسی دوسرے دہشت گرد کے خاتمے کے لئے سینی ٹائزیشن آپریشن کیا گیا۔سیکیورٹی فورسز ملک سے دہشت گردی کی لعنت کو ختم کرنے کے لئے پرعزم ہیں۔

وفاقی وزیر داخلہ محسن نقوی کے زیر صدارت اہم اجلاس منعقد کیا گیا ہے ، وزیر داخلہ محسن نقوی نے نیشنل کاونٹر ٹررازم اتھارٹی (نیکٹا) ہیڈ کوارٹر کا دورہ کیا جہاں وفاقی وزیرداخلہ کی زیر صدارت اہم اجلاس میں متعدد بڑے فیصلے کیے گئے۔ اجلاس میں سربراہ نیکٹا رائے طاہر نے وفاقی وزیر داخلہ کو تفصیلی بریفنگ دی، اجلاس میں سیکرٹری داخلہ آفتاب اکبر درانی اور اعلی حکام نے بھی شرکت کی۔اجلاس میں دہشتگردی کے خلاف جنگ میں نیکٹا کو فرنٹ فٹ پر لڑانے کا فیصلہ کیا گیا۔

نیشنل ایکشن پلان کی کوآرڈینیشن کمیٹی کا اجلاس بھی اگلے ہفتے طلب کیا گیا ہے جس کی صدارت وفاقی وزیرِ داخلہ کریں گے۔اس موقع پر وزیر داخلہ محسن نقوی نے کہا کہ نیکٹا کی جدید خطوط پر تنظیم نو کی جائے گی۔ وزیر داخلہ محسن نقوی نے ہدایت کی کہ دہشتگردی کے واقعات کے خلاف پیشگی ایکشن لے کر دہشتگردوں اور ان کے سہولت کاروں کا خاتمہ کیا جائے۔
وزیر داخلہ نے تمام صوبائی سی ٹی ڈیز کی استعدادکار کے متعلق تفصیلی رپورٹ بھی طلب کر لی اور کہا کہ اب عملی اقدامات کرنا ہوں گے، کسی دہشت گرد تنظیم کو معافی نہیں ملے گی۔انہوں نے مزید کہا کہ انتہا پسند نظریہ کے خلاف پاکستانی قومی بیانیہ کی بڑے پیمانے پر ترویج کرنا ہوگی، ساتھ ہی ہدایت کی کہ دہشتگردی اور انتہا پسندی کے خلاف جامع حکمت عملی ترتیب دی جائے اور نیشنل ایکشن پلان پر مکمل عملدرآمد کیا جائے۔

صدر آصف علی زرداری نے پاکستان میں جاپان کے سفیر مٹسوہیرو واڈا سے ملاقات کی، ملاقات میں تجارت، سرمایہ کاری، معیشت، ثقافت اور عوامی روابط کے شعبوں میں تعلقات بڑھانے پر زور دیا۔ صدر مملکت نے کہا کہ پاکستان میں مقیم جاپانی آٹوموبائل کمپنیوں کو پاکستان سے اپنی مصنوعات برآمد کرنے کے لیے پیداوار میں اضافہ کرنا چاہیے۔ انہوں نے کہا کہ جاپانی بینکوں کی بھی حوصلہ افزائی کی جانی چاہیے کہ وہ پاکستان میں اپنا کام شروع کریں۔صدر مملکت نے کہا کہ پاکستان اور جاپان کے مابین دوطرفہ تعاون کے دائرہ کار کو مزید وسعت دینے کی ضرورت ہے، پاکستان ایک بہت بڑی مارکیٹ ہے، جاپانی کاروباری ادارے مختلف شعبوں میں سرمایہ کاری کرکے معاشی مواقع سے فائدہ اٹھائیں۔اس موقع پر جاپانی سفیر نے کہا کہ پاکستان ایک سٹریٹجک محل وقوع اور بہت بڑی آبادی کا حامل ملک ہے اور جاپانی کمپنیاں ان ممکنہ شعبوں میں دلچسپی رکھتی ہیں۔ انہوں نے دونوں ممالک کے باہمی فائدے کے لیے موجودہ دوطرفہ تعاون کو مزید مضبوط بنانے پر زور دیا۔

وزیراعظم شہبازشریف سے برطانوی ہائی کمشنر جین میریٹ نے ملاقات کی۔وزیراعظم ہاؤس آمد پر وزیراعظم شہبازشریف نے برطانوی ہائی کمشنر جی میریٹ کا استقبال کیا، برطانوی ہائی کمشنر جین میریٹ کی وزیراعظم شہباز شریف سے ملاقات میں دوطرفہ تعلقات اور باہمی دلچسپی کے امور پر تبادلہ خیال ہوا۔شہبازشریف اور برطانوی ہائی کمشنر نے ملکی معاشی صورتحال اور ترقیاتی منصوبوں سے متعلق بھی گفتگو کی۔

سیکیورٹی فورسز نے بی ایل اے دہشتگردوں کی گوادر پورٹ اتھارٹی (جی پی اے) کمپلیکس گوادر پر حملے کی کوشش ناکام بنادی گئی ہے۔ ذرائع کا کہنا ہے کہ دہشت گردوں نے گوادر کمپلیکس میں گھسنے کی کوشش کی جو فورسز نے بروقت کارروائی سے ناکام بنادی۔سیکورٹی فورسز کی مؤثر جوابی کارروائی میں بی ایل اے کے تمام 8 دہشتگرد حملہ آور مارے گئے۔دوسری جانب پولیس حکام نے بتایا تھا کہ گوادر میں گوادر پورٹ اتھارٹی کمپلیکس پر نامعلوم افراد نے فائرنگ کی ہے۔ پولیس حکام نے بتایا تھا کہ فائرنگ کا سلسلہ شروع ہونے سے قبل ایک دھماکا ہوا تھا۔ عینی شاہدین کا کہنا تھا کہ کمپلیکس میں فائرنگ کے بعد دھماکوں کی بھی آوازیں سنی گئیں۔ واضح رہے کہ گوادر پورٹ اتھارٹی کمپلیکس میں پاسپورٹ آفس، الیکشن کمیشن آفس سمیت دیگر سرکاری اداروں کے دفاتر ہیں۔