Author: صدف ابرار

بلوچستان کے علاقے ”مچھ“ میں سیکیورٹی فورسز کے کلئیرنس آپریشن کے دوران مزید 12 دہشت گرد جہنم واصل کر دئے،سیکیورٹی فورسز کی بروقت کاروائیوں نے ان حملوں کو ناکام بنایا جس کے نتیجے میں دہشت گرد بھاگنے پر مجبور ہوگئے۔دہشت گردوں کے خلاف 30 جنوری کو کیے گئے آپریشن کے دوران 9 دہشت گرد جہنم واصل ہوئے، آج سیکیورٹی فورسز کے کلئیرنس آپریشن کے دوران مزید 12 دہشت گردوں کو جہنم واصل کیا گیا، کلئیرنس آپریشن کے دوران اب تک مجموعی طور پر 21 دہشت گرد جہنم واصل ہوچکے ہیں۔ ”مچھ“ حملے میں مارے جانے والے دہشت گردوں کی تصاویر منظرِ عام پر آگئیں
اس سے قبل بلوچستان کے علاقے ”مچھ“ میں دہشت گردوں کے بزدلانہ حملہ میں مارے جانے والے دہشت گردوں کی تصاویر منظرِعام پر آئی تھیں،دہشت گردوں کے خلاف علاقے میں کلئیرنس آپریشن جاری ہے، آخری دہشت گرد کے خاتمے کی سیکیورٹی کو یقینی بنانے تک سیکیورٹی فورسز کا کلئیرنس آپریشن جاری رہے گا۔پاک فوج کے بہادر جوانوں کا حوصلہ دہشت گردی کے خلاف جنگ میں ہمارے عزم کو مزید مضبوط کر تا ہے۔مچھ حملے کی ذمہ داری بھارتی سپانسرڈ کالعدم تنظیم بلوچستان لبریشن آرمی نے قبول کی تھی، اس حملے میں 9 دہشت گردوں کو جہنم واصل اور 3 دہشت گردوں کو زخمی حالت میں گرفتار کیا گیا، تصاویر میں دہشت گردوں کو مختلف جگہوں پرچھپتے دیکھا جا سکتا ہے۔مچھ حملے میں سیکیورٹی فورسز کی بروقت کارروائی سے اس حملے کو ناکام بنایا گیا، لاپتہ افرادکا راگ الاپنے والے ملک دشمن عناصر اگر اس وقت اپنی آنکھوں سے بغض کی پٹی اتارکردیکھیں تو مچھ حملے میں مارے جانے والے بہت سے دہشتگرد حقیقت میں لاپتہ افراد ہیں۔

اوگرا نے ایل پی جی کی فی کلو قیمت میں ایک روپے17پیسے اضافہ کردیاگیا۔ نوٹیفکیشن کے مطابق ایل پی جی کا گھریلو سلنڈر 13 روپے 76 پیسے مہنگا کردیاگیا اور ایل پی جی کی نئی فی کلو قیمت257 روپے 60 پیسے مقرر کردی گئی ہے نوٹیفکیشن کے مطابق ایل پی جی کے گھریلو سلنڈر کی نئی قیمت 3 ہزار 40 روپے ہوگئی جبکہ نئی قیمتوں کا اطلاق فروری 2024 کے لیے ہوگا۔

بانی پی ٹی آئی کی رہائش گاہ سب جیل قرار دیا گیا جہاں بشریٰ بی بی کو ڈیالہ جیل سے منتقل کر دیا گیا، احتساب عدالت سے توشہ خانہ ریفرنس میں عمران خان کے ساتھ سزا کا سامنا کرنے والی سابق خاتون اول بشریٰ بی بی کو اڈیالہ جیل سے بنی گالہ منتقل کردیا گیا جبکہ بانی پی ٹی آئی عمران خان کی بنی گالا میں رہائش گاہ کو سب جیل قرار دے دیا گیا۔ذرائع کا کہنا ہے کہ بشریٰ بی بی کو بنی گالہ میں نظر بند رکھا جائے گا، بشریٰ بی بی کو سخت سیکیورٹی میں اڈیالہ جیل سے بنی گالا منتقل کیا گیا۔ضلعی انتظامیہ نے بنی گالا رہائش گاہ کو سب جیل قرار دینے کا نوٹیفکیشن بھی جاری کر دیا، ریزیڈنشل کمپاؤنڈ خان ہاؤس بنی گالا کو 31 جنوری سے تاحکم ثانی سب جیل قرار دیا گیا ہے۔
دہشت گردوں کی اڈیالہ جیل پرحملے کی دھمکی کے بعد سابق خاتون اول بشریٰ بی بی کی اڈیالہ جیل سے بنی گالہ منتقلی کو وفاقی انتظامیہ کے فیصلے سے مشروط کیا گیا تھا۔
ذرائع کے مطابق اڈیالہ جیل انتظامیہ کو نامعلوم نمبر سے دھمکی آمیز کال جیل کے آفیشنل نمبر موصول ہوئی تھی، نامعلوم کالر کی جانب سے اڈیالہ جیل پر آئندہ تین روز میں حملے کی دھمکی دی گئی، جیل انتظامیہ کی جانب سے راولپنڈی پولیس کو گزشتہ رات خط لکھا گیا تھا۔
ذرائع کے مطابق جیل کے اندر کالعدم دہشت گرد تنظیم کے قیدی بھی موجود ہیں، اڈیالہ جیل میں بانی پی ٹی آئی، شاہ محمود قریشی،شیخ رشید، فواد چودھری اور پرویز الٰہی بھی قید ہیں۔

آرمی چیف جنرل سید عاصم منیر، نشانِ امتیاز (ملٹری) کی زیر صدارت 262ویں کور کمانڈرز کانفرنس ہوئی ہے،کانفرنس کے شرکاء نے مسلح افواج کے افسران، جوانوں، قانون نافذ کرنے والے اداروں اور شہریوں سمیت شہداء کی عظیم قربانیوں کو زبردست خراجِ تحسین پیش کیا، جنہوں نے ملک میں امن و استحکام کو یقینی بنانے کے لئے اپنی جانوں کا نذرانہ پیش کیا،آرمی چیف جنرل سید عاصم منیر نے اس عزم کا اظہار کیا کہ پاکستان کو غیر مستحکم کرنے کے لیے دشمن قوتوں کے اشارے پر کام کرنے والے تمام دہشتگردوں، ان کے سہولت کاروں اور ان کی حوصلہ افزائی کرنے والے عناصر کے خلاف ریاست مکمل طاقت کے ساتھ نمٹے گی پاکستان کی خودمختاری اورعلاقائی سا لمیت مقدس اور ناقابل تسخیر ہے“ آرمی چیف نے کہا کہ پاکستان تمام ریاستوں کے ساتھ پرامن بقائے باہمی پر یقین رکھتا ہے،
اور ملکی خودمختاری،قومی عزت اور پاکستانی عوام کی امنگوں پر کبھی کوئی سمجھوتہ نہیں کیا جائے گا.کانفرنس کے شرکاء کو بھارت کی جانب سے ماورائے علاقائی اور ماورائے عدالت قتل، ریاستی سرپرستی میں جاری دہشت گردی اور بھارت کی پاکستانی شہریوں کو نشانہ بنانے کی گھناؤنی مہم کے بارے میں بھی بریفنگ دی گئی
فورم نے اتفاق کیا کہ بھارت کی جانب سے بین الاقوامی قوانین کی کھلم کھلا خلاف ورزی اور اس کا اصل چہرہ دنیا کے سامنے بے نقاب کیا جائے گا، عالمی برادری پہلے ہی بھارت کے مجرمانہ رویے اور دنیا بھر میں قتل و غارت گری کے لیے ریاستی طاقت کے استعمال پر شدید تحفظات کا اظہار کر چکی ہے شرکاء کانفرنس نے فورم نے فلسطین اور غزہ کے عوام کی حمایت کا اعادہ کرتے ہوئے تنازعہ کے انتہائی منفی اثرات اورخطے میں پھیلاؤ کے امکانات کا بھی جائزہ لیا،اور فلسطین میں فوری جنگ بندی اور جاری تنازعہ کے پرامن حل کی فوری ضرورت کو متفقہ طور پر تسلیم کیا، کانفرنس کے شرکاء نے مقبوضہ جموں و کشمیر میں کشمیریوں کے حق خود ارادیت کے لیے پاکستان کی حمایت کے عزم کا اعادہ کیا اور کہا کہ پاکستان اپنے کشمیری بھائیوں اور بہنوں کی بین الاقوامی قوانین اور اقوام متحدہ کی قراردادوں کے مطابق انصاف کی فراہمی تک اخلاقی، سیاسی او ر سفارتی حمایت جاری رکھے گا،
کانفرنس میں موجود شرکاء نے عام انتخابات 2024 کے پرامن انعقاد میں الیکشن کمیشن آف پاکستان کی معاونت کے لیے پاکستان آرمی کی تعیناتی پر بھی تبادلہ خیال کیا
اور عزم کیا کہ پاک فوج آئینی مینڈیٹ اور الیکشن کمیشن آف پاکستان کے تحت تفویض کردہ ہدایات کے مطابق فرائض سرانجام دے گی، کسی کو بھی سیاسی سرگرمی کے نام پر تشدد کرنے کی،اور آزادانہ اور منصفانہ انتخابات کے جمہوری عمل کو سبوتاژ کرنے کی اجازت نہیں دی جائے گی،
فورم نے اسمگلنگ، ذخیرہ اندوزی، منی لانڈرنگ، بجلی چوری اور غیر قانونی تارکین وطن سمیت غیر قانونی سرگرمیوں اور مجرمانہ مافیاز کے خلاف اٹھائے گئے اقدامات کو سراہاشرکاء کانفرنس نے اس طرح کے اقدامات اور ان کے معیشت اور عوام کی فلاح و بہبود پر مثبت اثرات کو بغیر کسی رکاوٹ کے جاری رکھنے کی ضرورت پر زور دیا“
فورم کو فارمیشنز کی آپریشنل تیاریوں پر بھی بریفنگ دی گئی آرمی چیف نے فارمیشنز کمانڈرز کو پیشہ ورانہ مہارت کے معیارکو برقرار رکھنے، تربیت کے دوران بہترین کارکردگی اور فوجی جوانوں کے مورال اور بہبود پر زور دیا .

پاکستان کے عوام ہمارے ساتھ ہیں، 8 فروری کوعوام نکلیں اور جس کو چاہیں گے ووٹ دیں گے، میں نے پہلے بھی الیکشن لڑے ہیں اس سے پہلے اتنا جذبہ نہیں دیکھا، ہم بلٹ سے نہیں بیلیٹ سے بدلہ لیں گے اور حکومت میں آئیں گے، ہم نے پر امن راستے کا انتخاب کیا ہے ۔علی محمد خان نے ووٹرز کو پر امن رہنے کی اپیل کی اور کہا کہ عوام 8 فروری کو اس کا جواب دیں گے، سابق چیئرمین پی ٹی آئی اس ملک کے وزیراعظم تھے، کہیں کوئی لیول پلیئنگ فیلڈ نہیں ہے ۔پاکستان تحریک انصاف کے رہنما علی محمد خان نے نجی ٹی وی چینل کے پروگرام میں گفتگو کرتے ہوئے کہا ہے کہ سبی میں تحریک انصاف کے جلسے پر دھماکا ہوا ہے، جس میں 4 کارکنوں کے جاں بحق ہوئے، یہ جو مرضی کر لیں ہماری جدوجہد نہیں رکے گی۔انہوں نے کہا کہ ہم لوگ پھر بھی الیکشن مہم چلارہے ہیں،انہوں نے کہا کہ سابق چیئرمین پی ٹی آئی کے وکلاء کےساتھ سخت رویہ اختیار کیا گیا، 18گواہان کو ایک ہی دن میں پیش کیا گیا، ہم عدالت کا احترام کرتے ہیں، لیکن ہم سائفر کیس کے فیصلے کیخلاف ہائیکورٹ سے رجوع کریں گے اور ہمیں امید ہے یہ کیس ایک دن بھی اعلیٰ عدالت میں نہیں ٹک سکے گا۔
علی محمد خان نے کہا کہ جماعت ختم نہیں ہوئی، ہم نے حلف نامہ جمع کروایا ہے، ہم جلد انٹراپارٹی انتخابات کی طرف جا رہے ہیں اور ہمارا نشان ہمیں واپس مل جائے گا۔ اگر کوئی ممبر پارٹی سے جائے گا تو وہ الیکشن کمیشن کو جمع حلف نامے کیخلاف جائے گا۔پی ٹی آئی کے رہنما نے کہا کہ یہ ہمارا بھی ملک ہے اور آئین ہمیں الیکشن لڑنے کا حق دیتا ہے، الیکشن سے پہلے ہم سے بلے کا نشان چھین کر مضحکہ خیر نشانات دئیے گئے ہیں ۔ پاکستان تحریک انصاف کے رہنما نے کہا کہ جو بھی جماعت حکومت میں ہے اس کا رابطہ مقتدر حلقوں کے ساتھ ہونا چاہیے، کسی ڈیل کیلئے نہیں بلکہ ملک کیلئے رابطہ ہونا چاہیے، ملک کی بڑی جماعت کا بھی مقتدر حلقوں سے رابطہ ہونا چاہیے۔

الیکشن کمیشن نے عام انتخابات کے دوران پولنگ سٹیشن میں موبائل فون لے جانے پر پابندی عائد کردی ہے۔ اس بارے میں الیکشن کمیشن نے چاروں صوبائی الیکشن کمشنرز کو مراسلے ارسال کردیے ہیں کہ عام انتخابات کے دوران پولنگ سٹیشن میں موبائل فون لے جانے پر پابندی ہوگی۔ مراسلے کے مطابق قومی اسمبلی اور صوبائی اسمبلیوں کے انتخابات 8 فروری کو منعقد کیے جائیں گے۔ الیکشن کمیشن کا کہنا ہےکہ پولنگ کے دوران پولنگ سٹیشن کے اندر موبائل فون لے جانے پر سختی سے پابندی ہوگی اور پریذائیڈنگ افسر کے علاوہ تمام انتخابی عملہ پولنگ کے دوران موبائل فون بند رکھے گا۔

خیبر پختونخوا اور بلوچستان میں امن و امان کی صورتحال,الیکشن کمیشن کا اجلاس طلب
دوسری جانب خیبر پختونخوا اور بلوچستان میں امن و امان کی صورتحال پر الیکشن کمیشن نے کل اجلاس طلب کرلیا۔ترجمان الیکشن کمیشن کا کہنا ہے کہ الیکشن کمیشن نے یکم فروری کو دن 3 بجے اجلاس بلایا ہے۔الیکشن کمیشن کے اجلاس میں وزیر داخلہ، سیکریٹری داخلہ، خیبر پختونخوا، بلوچستان کے چیف سیکریٹریز شریک ہوں گے۔ترجمان الیکشن کمیشن کا یہ بھی کہنا ہے کہ اجلاس میں آئی جی، انٹیلی جنس ایجنسیوں کے نمائندوں کو بھی مدعو کیا گیا ہے۔

بلوچستان میں فائرنگ،دستی بم حملہ، الیکشن کمیشن کا نوٹس،کاروائی کی ہدایت
علاوہ ازیں ترجمان الیکشن کمیشن کا کہنا ہے کہ میڈیا اور مانیٹرنگ ٹیموں کی رپورٹس کے مطابق بلوچستان کے ضلع قلعہ عبداللہ میں سیاسی جماعت کے قافلے پر فائرنگ کے نتیجے میں ایک شخص کے جان بحق ہونے والے اور ضلع کیچ میں حلقہ پی بی 25 کے امیدوار کے گھر کے باہر دستی بم سے حملے کے واقعات کا نوٹس لیتے ہوئے الیکشن کمیشن نے چیف سیکرٹری اور آئی جی بلوچستان سے فوری رپورٹس طلب کی ہیں اور ہدایت کی ھے ان واقعات میں ملوث افراد کے خلاف فوری کاروائی کی جائے