Author: صدف ابرار

پاکستان تحریک انصاف کے بانی رہنما اکبر ایس بابر نے پی ٹی آئی کے انٹراپارٹی الیکشن کرانے کا اعلان کردیا اور کہا کہ لوگوں نے پارلیمنٹ میں سیٹیں لینے کے لیے پارٹی کو نقصان پہنچایا، نئے انٹرا پارٹی انتخابات خود کرائیں گے۔اسلام آباد میں پاکستان تحریک انصاف کے بانی رہنماﺅں اور کارکنوں نے قومی کانفرنس کی، کانفرنس میں پی ٹی آئی کے مسائل اور بحران کا جائزہ لیا گیا۔قومی کانفرنس میں کہا گیا کہ قرار داد کی صورت میں لائحہ عمل سامنے لارہے ہیں جو الیکشن کمیشن میں دیں گے۔
کانفرنس میں قرارداد منظور کی گئی جس میں کہا گیا کہ تحریک انصاف کے تمام فنڈز منجمند کیے جائیں، بینکوں کو خط لکھیں گے، انٹرا پارٹی انتخابات کالعدم ہیں، پی ٹی آئی میں اب کوئی عہدیدار نہیں، عہدے ساتھ نہ لکھیں جائیں، انٹرا پارٹی انتخابات کالعدم ہونے کے بعد نئے انٹرا پارٹی الیکشن کو یکسر مسترد کردیا، نئے انٹرا پارٹی انتخابات کرانے پر بلے کا نشان لینے کی درزخواست دیں گے۔
پی ٹی آئی کے بانی رکن اکبرایس بابر کا کہنا تھا کہ بانی ارکان نئے انٹرا پارٹی انتخابات خود کرائیں گے، انٹرا پارٹی کے لیے نیا الیکشن کمیشن تشکیل دیا جائے گا، پی ٹی آئی صوبائی اور مرکزی کمیٹیاں بنائی جائیں گی۔اکبرایس بابر نے کہا کہ انٹرا پارٹی الیکشن میں کئی ماہ لگ سکتے ہیں، لوگوں نے پارلیمنٹ میں سیٹیں لینے کے لیے پارٹی کو نقصان پہنچایا، اب انٹرا پارٹی سمیت دیگر فیصلے الیکشن کمیشن کرے گا، ہم پی ٹی آئی ورکرز کی پارٹی بنائیں گے۔ان کا مزید کہنا تھا کہ پی ٹی آئی میں قیادت کا فقدان ہے ،قیادت کے حوالے سے خلا کو پر کرنا ہے، ہم ساری پی ٹی آئی کو ساتھ لے کر چلیں گے، ہماری پارٹی میں جمہوریت کی بنیاد کمزور ہے ہم مضبوط کریں گے، 8 لاکھ رجسٹرڈ رکن تھے تو انٹرا پارٹی الیکشن میں صرف 2 درجن لوگ کیوں تھے۔

وفاقی دارلحکومت اسلام آباد میں عام انتخابات پر امن و امان برقرار رکھنے کےلیے اسلام آباد انتظامیہ کے اقدامات سامنے آ گئے ۔ دارالحکومت میں آتش بازی کے سامان کی خرید و فروخت پر پابندی عائد کردی۔ نوٹیفکیشن میں کہا گیا کہ بارودی مواد کے استعمال سے اسٹون کرشنگ سمیت اسپیکر اور ساؤنڈ سسٹم کے بےجا استعمال اور فرقہ واریت پر مبنی تقاریر پر بھی پابندی عائد ہوگی، دارالحکومت کے ریڈ زون سمیت دو اہم شاہراہوں یعنی سری نگر ہائی وے اور جناح ایونیو پر جلسے جلوس پر پابندی عائد کرتے ہوئے دفعہ 144 نافذ کردی گئی۔نوٹیفکیشن کے مطابق ریڈ زون میں کسی بھی قسم کے عوامی اجتماع پر مکمل پابندی عائد کر دی گئی ہے، اسی طرح تھرڈ ایونیو، یونیورسٹی روڈ ، اتا ترک ایونیو، نیو شاہراہ سہر وردی، کنونشن سینٹر اور سری نگر ہائی وے پر 5 سے زائد افراد جمع نہیں ہوسکیں گے۔انتظامیہ کی جانب سے جاری نوٹیفکیشن کے مطابق اسلام آباد میں دفعہ 144 نافذ کردی گئی ہے، اسلحہ کی نمائش پر بھی پابندی عائد ہوگی۔نوٹیفکیشن میں مزید کہا گیا ہے کہ ریڈ زون، کشمیر ہائی وے اور جناح ایونیو پر جلسے، جلوس اور ریلیوں پر پابندی عائد کردی گئی ہے۔شہر میں پوسٹرز اور بینرز پر قرآنی آیات اور مقدس کلمات کی چھپائی پر بھی پابندی عائد کردی گئی ہے جبکہ وال چاکنگ، پمفلٹ کی تقسیم پر بھی پابندی ہوگی۔

خصوصی سرمایہ کاری کونسل ایس آئی ایف سی کی8 ویں ایگزیکٹو کمیٹی کا اجلاس منعقد ہوا،خصوصی سرمایہ کاری کی سہولت کونسل کی 8ویں ایگزیکٹو کمیٹی کا دوسرا سیشن باقی وزارتوں کے ایجنڈا پوائنٹس پر غور کرنے کے لیے 25 جنوری 2024ء کو بلایا گیا تھا، اجلاس کی صدارت وزیر برائے منصوبہ بندی، ترقی اور خصوصی اقدامات نے کی
اجلاس میں متعلقہ وفاقی و صوبائی وزراء اور اعلیٰ سطحی سرکاری حکام کی بھی شرکت کی،متعلقہ وزارتوں نے خصوصی سرمایہ کاری سہولت ایس آئی ایف سی کے تحت سیکٹورل پراجیکٹس اور پالیسی سطح کےاقدامات پر پیشرفت پیش کی اور مستقبل کی کاوشوں کو آگے بڑھانے کے لیے تفصیلی لائحہ عمل پیش کیا گیا،
کمیٹی نے سرمایہ کاروں کے اعتماد کو بڑھانے کیلئے تنازعات کے حل کے فریم ورک کو مضبوط بنانے کے لیے جاری کوششوں کا جائزہ لیا جو ایک اہم پالیسی سطح کا اقدام ہے.کمیٹی نے انسانی وسائل کی ترقی اور میگا انفراسٹرکچر پراجیکٹس میں سرمایہ کاری کی کوششوں کا بھی جائزہ لیا گیا کمیٹی نے مختلف سٹیک ہولڈرز کو ہدایت کی کہ وہ بین الاقوامی معیارکے مطابق بہتررابطہ سازی، ضروری سروسز اور اچھی تربیت یافتہ لیبر فورس کے ذریعے سرمایہ کاروں کو سازگار ماحول فراہم کرنے کے لیے مختلف اقدامات کو تیز کریں ،آخر میں کمیٹی نے مختلف شعبوں کے پہلوؤں پر اتفاق رائے پیدا کرنے کے لیے مکمل بحث کی اور سرمایہ کاری کے ماحول کو مزید بہتر بنانے کے لیے مختلف پالیسی سطح کے اقدامات کی سفارش کی،

نگران وزیرداخلہ گوہراعجاز کی زیرصدارت اجلاس ہوا ،آئی جی اسلام آباد سےتھانوں کی رپورٹ طلب کرلی ۔ نگران وزیرداخلہ گوہراعجاز نے اسلام آباد کے24 تھانوں کی اپ گریڈیشن کاحکم دیدیا۔ گوہراعجاز نے اسلام آباد میں سستے بازاروں کی رپورٹ بھی طلب کرلی ۔اسلام آباد میں مہنگائی کو کم کرنے کیلئے انتظامیہ کو متحرک کرنے کا بھی حکم دیدیا۔ اس کے لئے انہوں نے سستا بازار ہفتے میں 5 دن لگانے پر غور کرنے کا بھی فیصلہ کر لیا ،
نگران وزیرداخلہ گوہراعجاز کا کہنا تھا کہ اسلام آباد کے تمام تھانوں کا دورہ کروں گا ۔اسلام آباد کے 24 تھانوں کو اپ گریڈ کیا جائے گا۔ اسلام آباد کے تھانے ملک کے دیگر شہروں کیلئے ماڈل نظر آنے چاہئیں۔شہریوں کو 24گھنٹے سہولیات دی جائیں گی۔چیف کمشنر اسلام آباد سے وفاقی دارالحکومت میں دستیاب سہولتوں پر رپورٹ طلب کرلی۔گوہراعجازکاکہنا ہے کہ اسلام آباد انتظامیہ ناجائز منافع خوروں کے خلاف کارروائی کرے۔ اسلام آباد کے شہریوں کیلئے یوٹیلیٹی سٹورز پورے ہفتے کھلے رہیں گے۔

پمز ہسپتال کی لیڈی ڈاکٹر نوجوان کو لے کر مبینہ طور پر فرار ہو گئی، پولیس نے نوجوان کے اغواء کا مقدمہ نامعلوم لیڈی ڈاکٹر کے خلاف درج کر لیا ، ایف آئی آر کے مطابق
آزاد کشمیر کا رہائشی بلال میڈسن لینے کزن کے ہمراہ پمز ہسپتال آیا تھا، پمز ہسپتال کی لیڈی ڈاکٹر الگ سے بات کرنے کے بہانے بلال کو ہسپتال کے گیٹ پر لے گئی ، ایف آئی آر کے مطابق آدھا گھنٹہ گفتگو کے بعد نامعلوم کار سوار کی مدد سے بلال کو اغواء کرکے فرار ہوگئی، کراچی کمپنی پولیس نے اغواء کی دفعات کے تحت مقدمہ درج کرکے نوجوان کی تلاش شروع کر دی ، پولیس کے مطابق اغواء ہونے والا بائیس سالہ نوجوان بلال آزاد کشمیر کا رہائشی تھا،پولیس نے بتایا کہ نوجوان غیر ملکی کمپنی میں بطور ڈرلر آپریٹر کام کرتا تھا ، واقعہ کے متعلق تحقیقات جاری ہیں نوجوان کا سراغ لگا لیا جائے گا ،