Author: صدف ابرار

پاک ایران کشیدگی کے درمیان حالات معمول پر لانے کے حوالے سے اہم پیشرفت ہوئی ہے، ایرانی وزیر خارجہ 29 جنوری کو پاکستان کا دورہ کریں گے۔ وزارت خارجہ کے ذرائع کا کہنا ہے کہ دونوں ممالک کےسفراء 26 جنوری کو اپنےعہدوں پر واپس پہنچ جائیں گے۔ایران اور پاکستان نے اپنے اپنے سفیروں کو واپس لوٹانے پر اتفاق کرلیا۔اسلامی جمہوریہ پاکستان اور اسلامی جمہوریہ ایران نے مشترکہ پریس اعلامیہ جاری کیا ہے۔ترجمان دفترخارجہ کے مطابق پاکستان اور ایران کے وزراء خارجہ کے درمیان ٹیلیفونک رابطہ ہوا ہے جس میں دونوں ممالک نے اپنے اپنے سفیروں کو واپس لوٹانے کر اتفاق کیاہے۔پاکستان اور ایران کے سفیر 26 جنوری تک اپنے اپنے عہدوں پر واپس لوٹ جائیں گے۔ دفتر خارجہ کے ترجمان کی جانب سے جاری بیان میں یہ بھی کہا گیا ہے کہ نگران وزیر خارجہ جلیل عباس جیلانی کی دعوت پر ایرانی وزیر خارجہ حسین عامر عبدالہیان 29 جنوری کو پاکستان کا دورہ کریں گے،حکومتی ذرائع کے مطابق وزیراعظم نے وزارت خارجہ کو کابینہ اور قومی سلامتی کمیٹی کے فیصلوں کی روشنی میں ایران سے تعلقات کی بحالی کا مشن سونپا ہے۔قومی سلامتی کمیٹی اور وفاقی کابینہ کے فیصلوں سے ایرانی حکومت کو آگاہ بھی کردیا گیا ہے۔رابطوں اور سفارتی تعلقات کی مکمل بحالی کےلئے جلیل عباس جیلانی کو ٹاسک دیا گیا ہے۔دونوں ممالک کے دفاع، داخلہ اور خارجہ امور کے اعلیٰ افسران کی کمیٹی بنے گی۔تعلقات کی بحالی کی پیش کش ایران کی طرف سے کی گئی تھی جس کا پاکستان نے مثبت جواب دیا اور دونوں ممالک نے سفیروں کو دوبارہ تعینات کرنے کا فیصلہ کیا۔
واضح رہے کہ ایرانی سیکیورٹی فورسز نے پاکستانی فضائی حدود کی خلاف ورزی کرتے ہوئے بلوچستان کی سرحد سے منسلک علاقے پنجگور میں میزائل داغے تھے جس کے نتیجے میں 2 بچے جاں بحق ہوگئے تھے۔

پاکستان کی بھارتی شہر ایودھیا میں مسمار کی گئی بابری مسجد کے مقام پر رام مندر کی تعمیر کی مذمت کرتے ہے ، ترجمان دفتر خارجہ نے اپنے ایک بیان میں صدیوں پرانی مسجد کو 6 دسمبر 1992 کو بھارتی انتہا پسندوں کے ایک ہجوم نے منہدم کر دیا تھا، ترجمان دفتر خارجہ کی جانب سے کہا گیا کہ بھارتی اعلیٰ عدلیہ کی جانب سے اس گھناؤنے فعل کے ذمہ دار مجرموں کو بری کرنا اور مسجد کی جگہ پر مندر بنانے کی اجازت دینا افسوسناک ہے،یہ عمل بھارتی مسلمانوں کی سماجی، اقتصادی اور سیاسی پسماندگی کے لیے جاری کوششوں کا ایک اہم پہلو ہیں، ترجمان دفتر خارجہ نے مزید کہا کہ منہدم مسجد کی جگہ پر بنایا گیا مندر آنے والے وقتوں کے لیے بھارت کی جمہوریت کے چہرے پر دھبہ بنے گا، اور بھارت میں مساجد کی بڑھتی ہوئی فہرست ہے جن کی بے حرمتی کے اسی طرح کے خطرے کا سامنا ہے، ترجمان دفتر خارجہ نے کہا ہے کہ بھارت میں ’ہندوتوا‘ نظریے کی بڑھتی لہر مذہبی ہم آہنگی اور علاقائی امن کے لیے سنگین خطرہ ہے، ترجمان دفتر خارجہ نے اس بات پر زور دیا کہ اقوام متحدہ اور دیگر متعلقہ بین الاقوامی اداروں کو بھارت میں اسلامی ثقافتی مقامات کو انتہا پسند گروہوں سے بچانے کے لیے اپنا کردار ادا کرنا چاہیے. عالمی برادری بھارت میں بڑھتے ہوئے اسلامو فوبیا، نفرت انگیز تقاریر اور نفرت انگیز جرائم کا نوٹس لے، ترجمان دفتر خارجہ نے اپنے جاری بیان میں کہا ہے کہ پاکستان بھارتی حکومت پر زور دیتا ہے کہ وہ مسلمانوں اور ان کے مقدس مقامات سمیت مذہبی اقلیتوں کی حفاظت اور حفاظت کو یقینی بنائے.

عمران خان نے صرف اور صرف بلے کو بچانے کی خاطر چئیرمین شپ سے استعفا دیا، اور ہمیں کہا کہ آپ جا کر الیکشن کروائیں تاکہ کسی کو کوئی بہانہ نہ ملے۔ لیکن ہم موجوں سے نبرد آزما ہیں، ہمیں ہروایا گیا ہے ہم ہارے نہیں ہیں۔ پاکستان تحریک انصاف (پی ٹی آئی) کے چیئرمین بیرسٹر گوہر علی خان کہتے ہیں کہ انتخابی عمل کے آغاز کے باوجود پی ٹی آئی کے خلاف ریاستی انتقامی کاروائیوں میں نرمی دکھائی نہیں دے رہی ہے۔ بیرسٹر گوہر علی خان نے کہا کہ مقتدر حلقوں کو ادراک ہونا چاہئے کہ اب بہت ہوگیا، ہمیں ایسی جگہ نہ لے جائیں جہاں سے واپسی ممکن نہ ہوسکے۔اگر سرکار، عدلیہ اور الیکشن کمیشن آسانی پیدا کریں گے تو آگے بڑھ سکیں گے۔سپریم کورٹ کے فیصلے پر نظر ثانی دائر کرنے کے حوالے سے سوال پر انہوں نے کہا کہ قانونی طور پر آرٹیکل 188 کے مطابق ہمارے پاس 30 دن کا وقت ہے، سپریم کورٹ نے ابھی تفصیلی فیصلہ جاری نہیں کیا، 30 دن کے اندر اندر اگر تفصیلی فیصلہ آجاتا ہے تو ہم نظر ثانی دائر کریں گے۔ انہوں نے کہا کہ عمران خان نے فوج کے ساتھ کوئی جھگڑا نہیں کیا، یہ ایک غلط فہمی ہے جو ہم دور کرنے کی کوشش کر رہے ہیں۔ الیکشن کے بعد پی ٹی آئی کا کوئی ارادہ نہیں کہ وہ سولو فلائٹ لے گی، بلکہ ہماری کوشش یہی ہے کہ سب کے ساتھ مل کر ملک کی بہتری کیلئے سوچیں گے۔ ہم اگر کسی کے ساتھ بیٹھیں گے تو اپنے بیانیے کو مدنظر رکھتے ہوئے بات کریں گے، نہ کے ان کی وکٹ پر کھیلیں۔انہوں نے شکوہ کیا کہ ہماری پٹیشن کو تین کے بجائے پانج ججز کو سننا چاہیے تھا۔مستقبل کی حکمت عملی کے حوالے سے انہوں نے کہا کہ اب سیز فائر ہونا چاہیے، مستقبل کی طرف بڑھنا چاہیے۔فوج سے بات کرنے کے مینڈیٹ پر بیرسٹر گوہر کا کہنا تھا کہ نہ میرے پاس مینڈیٹ ہے نہ میں بات کرتا ہوں، نہ میرے پاس کوئی اپروچ ہے، میں سمجھتا ہوں ذاتی طور پر بھی اور پارٹی بھی سمجھتی ہے، ہم نے کئی مرتبہ بیانات بھی دیئے، خان صاحب کی طرف سے بھی اسٹیٹمنٹ آئی ہے کہ آزاد اور منصفانہ انتخابات کرانے کیلئے ہم سب سے ساتھ بات کرنے کو تیار ہیں۔ان کا کہنا تھا کہ 860 حلقوں میں سے 815 پر ہمارے امیدوار ہیں، ہم انتخابات میں کسی کے ساتھ اتحاد کیے بغیر آگے بڑھیں گے۔ ہم نے سبق سیکھ لیا کہ یہ چھوڑتے نہیں اور ہم ہار مانتے نہیں اور جو ہار نہیں مانتے جیت انہی کی ہوتی ہے۔ ہمیں امید ہے کہ اللہ کے فضل اور عوام کی طاقت سے ہم جیتیں گے۔

پاکستان اور ایران کے درمیان تعلقات معمول پر آنے کے بعد فلائٹ آپریشن اسی روٹ سے بحال کرنے کا فیصلہ کیا گیا ہے،ایوی ایشن ذرائع کے مطابق ایران کی مہان ایئر لائن کی پرواز تہران سے لاہور ایئرپورٹ لینڈ کر گئی، پرواز میں تہران سے 100 سے زائد مسافروں کو لاہور ایئرپورٹ پہنچایا گیا ہے ،پاک ایران کشیدگی کے باعث دونوں ملکوں کے درمیان پروازیں معطل تھیں۔خیال رہے کہ گزشتہ دنوں ایران نے پاکستان کی فضائی حدود کی خلاف ورزی کرتے ہوئے بلوچستان کے علاقے پنگجور میں ایک چھوٹے سے گاؤں پر میزائل حملےکیے جس میں 2 بچیاں شہید اور 3 زخمی ہوگئیں۔پاکستان نے ایران کے سفیر کو ملک بدر اور اپنے تہران میں تعینات سفیر کو واپس بلا لیا تھا۔پاکستان نے اگلی صبح ہی ایران کے حملوں کا بھرپور جواب دیتے ہوئے سیستان میں دہشت گردوں کے ٹھکانوں کو نشانہ بنایا جس میں متعدد دہشت گردوں کی ہلاک کردیا گیاتھا۔ تاہم دو روز قبل پاکستان نے ایران کے ساتھ کشیدگی ختم اور سفارتی تعلقات بحال کرنے کا فیصلہ کیا تھا۔