Author: صدف ابرار

شہر قائد کراچی کی فضائی آلودگی انتہائی مضرِ صحت ہے، ایئر کوالٹی انڈیکس کے مطابق آج کراچی آلودگی کے اعتبار سے دنیا کے آلودہ ترین شہروں کی فہرست میں تیسرے نمبر پر ہے۔ایئر کوالٹی انڈیکس کے مطابق کراچی کی فضاؤں میں آلودہ ذرات کی مقدار 213 پرٹیکیولیٹ میٹرز ریکارڈ کی گئی ہے۔لاہور دنیا بھر میں آلودگی کے لحاظ سے پانچویں نمبر پر ہے۔ ایئر کوالٹی انڈیکس کے مطابق لاہور کی فضاؤں میں آلودہ ذرات کی مقدار 178 پرٹیکیولیٹ میٹرز ہے۔ آلودہ ترین شہروں کی فہرست میں بنگلا دیش کا دارالحکومت ڈھاکا پہلے نمبر پر ہے۔ایئر کوالٹی انڈیکس کے مطابق ڈھاکا کا ایئر کوالٹی انڈیکس 304 ریکارڈ کیا گیا ہے۔درجہ بندی کے مطابق 151 سے 200 درجے تک آلودگی مضر صحت ہے جبکہ 201 سے 300 درجے تک آلودگی انتہائی مضرِ صحت ہوتی ہے۔ایئر کوالٹی انڈیکس کے مطابق 301 سے زائد درجہ خطرناک آلودگی کو ظاہر کرتا ہے۔

انٹرنیشنل مانیٹری فنڈ (آئی ایم ایف) کی جانب سے جاری کردہ رپورٹ کے مطابق پاکستان نے گیس کی قیمتوں میں ششماہی بنیادوں پر ردوبدل کرنے، ٹیکسٹائل اور لیدر سیکٹر پر سیلز ٹیکس بڑھانے اور چینی پر 5 روپے فی کلو فیڈرل ایکسائز ڈیوٹی لگانے کی یقین دہانی کروائی ہے۔ دستاویزات کے مطابق پاکستان نے آئی ایم ایف کو کہا ہے کہ رواں مالی سال پینشن اور سرکاری ملازمین کی تنخواہوں میں اضافہ نہیں کریں گے، وفاقی ترقیاتی بجٹ میں ترجیحات بہتر بناکر 61 ارب روپے کی بچت بھی کی جائے گی۔ قدرتی آفات کے علاوہ کوئی سپلیمنٹری گرانٹ جاری نہ کرنے کا وعدہ بھی کیا گیا ہے۔ رپورٹ کے مطابق نگران حکومت نے توانائی کے شعبے میں دو سال میں سبسڈی ختم کرنے کا پلان آئی ایم ایف کو دیدیا ہے۔پنجاب، سندھ اور خٰبرپختونخوا میں ٹیوب ویلز پر حکومتی سبسڈی آئندہ مالی سال سے ختم کی جائے گی۔
اس کے ساتھ ساتھ آئی ایم ایف کو متعدد سیکٹرز میں سیلز ٹیکس، ایڈوانس انکم ٹیکس، ود ہولڈنگ ٹیکس اور فیڈرل ایکسائز ڈیوٹی لگانے کی یقین دہانی بھی کروائی گئی ہے۔
آئی ایم ایف دستاویز کے مطابق حکومت نے کہا ہے کہ توانائی کی قیمتوں کو بروقت بڑھا کر سبسڈی کا بوجھ کم سے کم کرنے کی کوشش کی جائے گی اور اگر ٹیکس وصولیوں کا ہدف حاصل ہوتا ہوا نہ محسوس ہوا تو اقدامات اٹھائیں گے۔دستاویزات کے مطابق ایف بی آر نے آئی ایم ایف کو کہا ہے کہ ریٹیلز، پراپرٹی، تعمیرات اور ڈیجیٹل مارکیٹس جیسے شعبوں سے پورا ٹیکس وصول کریں گے، اسی طرح ٹیکسٹائل اور لیدر کے شعبوں کیلئے سیلز ٹیکس پندرہ فیصد سے بڑھا کر اٹھارہ فیصد کریں گے، ماہانہ آٹھ ارب روپے وصولی کیلئے چینی پر پانچ روپے فی کلو فیڈرل ایکسائز ڈیوٹی لگائیں گے اور مشینری کی درآمد، ایک فیصد، صنعتی خام مال کی درآمد پر ایک فیصد ایڈوانس انکم ٹیکس لگائیں گے۔ اسکے علاوہ کنٹریکٹس، سروسز، سپلائی پر ایک فیصد ود ہولڈنگ ٹیکس، کمرشل امپورٹرز پر بھی ایک فیصد ٹیکس عائد کریں گے اور نان فائلزر کو فائلز بنانے کیلئے ڈور ٹو ڈور مہم بھی شروع کریں گے۔دوسرے مرحلے میں ٹیوب ویلز پر ایک چوتھائی کراس سبسڈی ختم کرنے کا ارادہ ہے، بلوچستان میں بھی ٹیوب ویلز پر سبسڈی ختم کرنے کے مختلف آپشنز پر کام کیا جارہا ہے اور فرٹیلائزر سیکٹر کو گیس پر دی جانے والی کراس سبسڈی مارچ تک ختم کردی جائے گی۔دستاویزات میں مزید بتایا گیا کہ پاور جنریشن لاگت پورا کرانے کیلئے مقامی گیس اور درآمدی آر ایل این جی کی قیمتیں برابر کی جائیں گی۔ڈسکوز کا انتظامی کنٹرول نجی شعبے کو دینے کیلئے ٹرانزیکشن ایڈوائزر اپریل تک تعینات ہوجائے گا، سب سے زیادہ نقصان کرنے والے پچیس سو فیڈرز پر آزادانہ مانیٹرنگ سسٹم متعارف کرانے کی ضرورت ہے۔جبکہ ایکسپورٹ کو دی جانے والی کراس سبسڈی ختم کرکے نان ایکسپورٹ انڈسٹری کے برابر کی جائیں گی۔رپورٹ کے مطابق سال میں گیس کا سرکلر ڈیٹ چار سو اکیس ارب روپے اضافے سے دوہزا چوراسی ارب روپے ہوگیا ہے۔گیس کی قیمتوں میں ششماہی بنیادوں پر ردروبدل کرنے کو فریم ورک پر عملدرآمد کو یقینی بنایا جائے گا، اس کے لیے اوگرا پندرہ فروری تک گیس کی قیمتوں میں ردوبدل کا نوٹیفکیشن جاری کرے گا۔

وفاقی دارلحکومت اسلام آباد میں گزشتہ رات سے شدید دھند چھائی ہو ئی ہے جسکی وجہ سے اسلام آباد کا فلائٹ شیڈول متاثر ہوا ہے، مختلف ایئر پورٹس کی 19 پروازیں منسوخ اور 2 پروازیں متبادل ایئر پورٹس پر منتقل کی گئیں۔ پی آئی اے کی اسلام آباد سے دوحہ پی کے 287 اور دبئی پی کے 233 کو منسوخ کر دیا گیا جبکہ ابوظہبی، مسقط اور شارجہ سے اسلام آباد کی پروازیں پی کے 262، 292 اور 181 بھی منسوخ کر دی گئیں۔ایوی ایشن ذرائع کے مطابق دبئی سے اسلام آباد کے لیے پی آئی اے کی پرواز پی کے 234 کراچی اتار لی گئی جبکہ پی آئی اے کی العین سے اسلام آباد کی پرواز پی کے 144 کی پشاور میں لینڈنگ کی گئی۔اسلام آباد سے کوئٹہ کے لیے ای آر 540، 541 اور گلگت کے لیے پی کے 601، 602 بھی منسوخ کر دی گئی ہیں۔کراچی سے اسلام آباد کے لیے ای آر 504، لاہور کے لیے ای آر 522، 523 اور پشاور کے لیے ای آر 551 کو منسوخ کیا گیا ہے۔جدہ سے سعودی ایئر کی لاہور کے لیے پرواز ایس وی 738 اور ایس وی 739 بھی منسوخ کر دی گئی ہے جبکہ پی آئی اے کی دبئی سے لاہور پی کے 236 اور شارجہ سے ملتان پی کے 294 کو بھی منسوخ کیا گیا ہے۔

وزارت انفارمیشن ٹیکنالوجی اور ٹیلی کمیونیکیشن کی جانب سے موبائل فون فنانسنگ اسکیم کے متوقع آغاز کو دھچکا لگا ہے۔ وفاقی حکومت نے دوبارہ جائزہ لینے کے لیے پالیسی مسودہ واپس لے لیا ہے۔ اس وقت وزارت قانون کی جانب سے زیر غور اس پالیسی کو آنے والے دنوں میں وفاقی کابینہ میں پیش کیا جائے گا۔ اگر منظوری مل جاتی ہے تو توقع ہے کہ یہ اسکیم اس ماہ کے آخر یا اگلے مہینے کے اوائل میں شروع کی جائے گی۔حکومت نے وزارت انفارمیشن ٹیکنالوجی کو ہدایت کی ہے کہ وہ وزارت قانون کی جانب سے مکمل جانچ پڑتال کے بعد پالیسی کو دوبارہ جمع کرائے۔
رواں ماہ کے اوائل میں وزارت آئی ٹی اینڈ ٹیلی کام نے موبائل فونز قسط پر دینے کی پالیسی منظوری کے لیے وفاقی کابینہ میں پیش کی تھی۔ ذرائع نے انکشاف کیا کہ وفاقی حکومت کی منظوری ملنے کے بعد وزارت آئی ٹی اینڈ ٹیلی کام نے پالیسی ہدایات جاری کرنے کا ارادہ کیا۔ جس سے سیل فون فنانسنگ پروگرام کے آغاز کی راہ ہموار ہوگی۔اقساط پر موبائل فونز کی پہل کا مقصد شہریوں کو بااختیار بنانا ہے، خاص طور پر محدود مالی وسائل کے حامل افراد کو بلا سود اقساط کے منصوبوں کے ذریعے موبائل فون رکھنے کا موقع فراہم کرنا ہے۔ حکومت تیزی سے بدلتے ہوئے تکنیکی منظر نامے میں رسائی اور استطاعت کو فروغ دینے پر توجہ مرکوز کیے ہوئے ہے۔
یہ پالیسی کم آمدنی والے افراد کی مدد کرنے کے لئے اس بات کو یقینی بناتی ہے کہ انہیں ضروری ٹیکنالوجی تک رسائی حاصل ہو۔ یہ اقدام ایک جامع ڈیجیٹل منظر نامہ تخلیق کرنے کے وژن کے ساتھ مطابقت رکھتا ہے جو آبادی کی ضروریات کو پورا کرتا ہے۔

پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے پاناما ایک حقیقت ہے جس کا آج تک جواب نہیں دیا گیا، یہ خان صاحب کا بنایا ہوا نہیں تھا۔ پاناما ایک انٹرنیشنل ایشو تھا، لیکن یہ لوگ جیل سے نکل کر انہیں اپارٹمنٹ میں رہنے لگے جس کا پاناما میں الزام تھا۔نجی ٹی وی کے ساتھ گفتگو کرتے ہوئے بلاول بھٹو نے کہا کہ ہم سے بھی انتخابی نشان چھینا گیا تھا، قانون میں لکھا ہوا ہے کہ انٹراپارٹی الیکشن ہوں، میں نہیں چاہوں گا کہ کسی سیاسی جماعت سے انتخابی نشان چھینا جائے، کہ ن لیگ کے ساتھ مل کر حکومت نہیں بنائیں گے۔ بلاول بھٹو زرداری نے عام انتخابات 2024ء کے بعد حکومت سازی کی پارٹی پالیسی بیان کردی۔
اُن کا کہنا تھا کہ ہم نے ن لیگ کی محبت میں نہیں پاکستان اور جمہوریت کے لیے فیصلے لیے، ہمیں ن لیگ کی ضرورت نہیں پڑے گی آزاد امیدواروں کے ساتھ ملکر حکومت بنائیں گے۔پی پی چیئرمین نے کہا کہ کس نے کہا کہ پیپلز پارٹی ن لیگ کے ساتھ اتحادی حکومت میں آئے گی، دسمبر سے خیبر پختونخوا، پنجاب اور سندھ میں مہم چلا رہا ہوں۔انہوں نے کہا کہ چاروں صوبوں سے اچھا رسپانس مل رہا ہے الیکشن میں سرپرائز دیں گے، عوام کی اکثریت نواز شریف کو چوتھی مرتبہ وزیراعظم نہیں دیکھنا چاہتی۔بلاول بھٹو زرداری نے کہا کہ ہم کبھی تشدد یا غیر جمہوری راستہ نہیں اپنایا، ہمارے فیصلے پر تنقید ہوسکتی ہے لیکن ہماری نیت غلط نہیں تھی،پی پی چیئرمین نے کہا کہ اگست میں آئی ایم ایف ڈیل بڑی مشکل سے حاصل کی، اسی وقت سیلاب اور پنجاب میں ضمنی الیکشن آرہے تھے، پی ایم ایل این کی سوچ تھی کہ سیاسی فائدہ ہوگا اور یہ ضمنی الیکشن جیت جائیں، ان کے فیصلے سے معیشت کا نقصان ہوا اور یہ ضمنی الیکشن بھی ہارے۔ان کا کہنا تھا کہ پھر آخر میں شہباز شریف وزیر خزانہ کو پاکستان میں چھوڑ کر آئی ایم ایف کے ساتھ معاملات طے کیے، یہ ان کا سیاسی فیصلہ تھا جس کا نقصان اب ان کو اٹھانا پڑ رہا ہے۔