Author: صدف ابرار

اگست میں آئی ایم ایف کے پروگرام سے ہم ڈیفالٹ سے بچ گئے تھے، نواز شریف نے وزیر خزانہ کو تبدیل کرکے ملک کو ڈیفالٹ کے خطرے میں ڈال دیا تھا۔
نجی ٹی وی سے گفتگو کرتے ہوئے بلاول بھٹو نے کہا کہ کہ نواز شریف کو معیشت بہتر کرنے کا طریقہ معلوم تھا تو 18 ماہ کیوں خاموش رہے، اتنا خفیہ راز تھا کہ نواز شریف نے اپنے بھائی سے بھی شیئر نہیں کیا۔بلاول بھٹو نے کہا کہ پیپلز پارٹی کا ہمیشہ مؤقف رہا لاڈلا ازم کی سیاست ختم کرکے طاقت کا سرچشمہ عوام کو مانیں، میاں صاحب یہ تاثر دے رہے ہیں کہ وہ چوتھی بار لاڈلا بننے آئے ہیں، میاں صاحب یہ تاثر دے رہے ہیں کہ ماضی کی طرح دو تہائی اکثریت ملنے والی ہے۔ پی پی پی چیئرمین نے کہا کہ زمینی حقائق اور نواز شریف کی توقعات میں زمین آسمان کا فرق ہے، نواز شریف 1997 اور 2013 جیسی توقع رکھ کر الیکشن لڑ رہے ہیں تو ان کی غلط فہمی ہوگی۔
انہوں نے کہا کہ ہم سمجھے تھے الیکشن میں تین پارٹیوں کا مقابلہ ہوگا، اب الیکشن میں مقابلہ صرف پیپلز پارٹی اور مسلم لیگ ن میں ہوگا، ملک بھر میں ن مخالف ووٹ ن لیگ کے ووٹ سے بہت زیادہ ہے، امید ہے عوام ساتھ دیں گے اور حکومت ہم بنائیں گے۔

اسلام آباد ہائیکورٹ نے غیر شرعی نکاح کیس کے خلاف پاکستان تحریک انصاف کے سابق چیئرمین عمران خان کی بھی درخواست چیف جسٹس کو بھجوا دی جبکہ ڈسٹرکٹ اینڈ سیشن کورٹ نے سابق وزیراعظم کی بیٹوں سے فون پر بات کرانے کی درخواست منظور کی جبکہ وکلاء صفائی کی بشریٰ بی بی پر فرد جرم عائد کرنے سے متعلق درخواست مسترد کردی۔درخواست میں مؤقف اختیار کیا گیا تھا کہ ٹرائل کورٹ عدت میں نکاح کی کمپلینٹ پر 25 نومبر سے غیر قانونی طور پر عدالتی کاروائی چلا رہی ہے۔اسلام آباد ہائی کورٹ کے جسٹس طارق محمود جہانگیری نے خاور مانیکا سے طلاق کے بعد عدت میں بشری بی بی سے غیر شرعی نکاح کیس کے خلاف سابق چیئرمین پی ٹی آئی عمران خان کی درخواست پر سماعت کی۔ وکلاء صفائی عثمان گل اور دیگر عدالت میں پیش ہوئے جبکہ خاور مانیکا کے وکیل راجہ رضوان عباسی کے جونیئر بھی عدالت پہنچے۔وکیل صفائی عثمان گل نے دلائل دیتے ہوئے کہا کہ بشریٰ بی بی کی عدم موجودگی میں فرد جرم عائد کی گئی، فرد جرم دوبارہ بھی عائد نہیں کی جاسکتی، اس مرحلے پر دوران عدت نکاح کیس کی سماعت نہیں کی جاسکتی۔عثمان گل نے مزید کہا کہ عدالت کے 16جنوری کےحکم کو اسلام آباد ہائیکورٹ میں چیلنج کیا ہے، شادی اس عدالت کی حدود میں نہیں ہوئی لہٰذا عدالت کیس نہیں سکتی۔ جج قدرت اللّٰہ نے ریمارکس دیے کہ اسلام آباد ہائیکورٹ سے کوئی فیصلہ آتا ہے تو دیکھ لیتے ہیں۔
ڈسٹرکٹ اینڈ سیشن کورٹ اسلام آباد نے کیس کی مزید سماعت کل (19 جنوری) تک کیلئے ملتوی کردی۔درخواست میں استدعا کی گئی تھی کہ ٹرائل کورٹ کے 11 دسمبر اور 9 جنوری کے آرڈرز کو کاالعدم قرار دیا جائے۔بعدازاں عدالت عالیہ نے اسی نوعیت کا کیس چیف جسٹس کی عدالت میں ہونے کے باعث فائل چیف جسٹس کو بھجوا دی۔عدالت نے گزشتہ روز بشریٰ بی بی کی درخواست بھی اسی نوعیت کے معاملے پر بینچ ون میں پہلے سے زیر التواء ہونے کے باعث چیف جسٹس کو بھجوادی تھی۔

لیول پلیئنگ فیلڈ کے حوالے سے ہم نے پٹیشن واپس لےلی ہے مگر پھر بھی بلے کے نشان پر ریویو میں جائیں گے۔ نجی پروگرام میں گفتگو کرتے ہوئے بیرسٹر گوہر نے کہا کہ میں اب بھی پاکستان تحریک انصاف کا چیئرمین ہوں، سپریم کورٹ کے فیصلے سے بے تحاشہ مایوسی ہوئی، ایک سیاسی جماعت سے انتخابی نشان لینا پارٹی ختم کرنے کے مترادف ہے، سپریم کورٹ کے فیصلے نے جمہوریت کو دیوار سے لگادیا، کیا لیول پلیئنگ فیلڈ مانگیں۔
بیرسٹرگوہر نے یہ بھی کہا کہ ہمارے پہلے الیکشن 2017 میں ہوئے پارٹی آئین 2019 میں آیا، نومبر 2020 میں پی ٹی آئی کے انٹراپارٹی الیکشن کروانے تھے، کورونا کی وجہ سے کسی جماعت نے انٹرا پارٹی الیکشن نہیں کروایا تھا، الیکشن کمیشن نے سب کو کہا کہ 13 جون 2022 کو الیکشن کروائیں، ہم نے 8 جون 2022 کو انٹراپارٹی الیکشن کروائے۔پی ٹی آئی رہنما نے کہا کہ رجیم چینج کے بعد پی ٹی آئی کو دیوار سے لگایا گیا تھا، کئی امیدواروں کو نشان دینے کے مطالبے پر کہا گیا کہ آپ تو کاغذات نامزدگی واپس لے چکے ہیں۔انہوں نے یہ بھی کہا کہ الیکشن کمیشن نے 13ستمبر 2023 کو عدالت میں ہمارے حق میں فیصلہ اناؤنس کیا تھا، 18 اکتوبر اور 31 اکتوبر کو ہم نے درخواست دی ہر تاریخ پر کمیشن نے کہا کہ، الیکشن کمیشن کا آرڈر آیا تو وہ ہمارے خلاف تھا ہمیں حیرانی ہوئی، آرڈر کے بعد ہم ہائیکورٹ آئے الیکشن کمیشن نے جواب دیا یہ میٹر آف ریکارڈ ہے، تردید نہیں کی، ہم نے 29 کو اعلان کیا کہ 2 تاریخ کو انٹراپارٹی الیکشن ہوں گے۔
بیرسٹر گوہر نے مزید کہا کہ میڈیا پر آیا کہ ہم نے نیا چیف الیکشن کمشنر تعینات کیا، تمام میڈیا پر یہ خبریں آئیں اور یہ سارا ثبوت ہے، نامزدگی فارم میں لکھا ہے کہ اگر فیس لی ہے تو مارک کریں، ہم ان کو کہہ رہے ہیں کہ فیس لی نہیں، اگر فیس لی تو رسید ساتھ لگاؤں، کسی پارٹی نے ایسے شفاف الیکشن نہیں کروائے جیسے ہم نے کروائے، مجھے بانی پی ٹی آئی نے نامزد کیا تھا اس لیے مقابلے میں کوئی نہیں آیا۔انہوں نے یہ بھی کہا کہ آج میں اڈیالہ جیل گیا مجھ سے پین اور کاغذ تک لے لیا گیا، میں نے ایک دن ٹشو پر پوائنٹس لکھے، ہم تو ججوں کو یہ نہیں کہتے کہ آپ پر اعتماد نہیں، مریم نواز ایک لاڈلے کی بیٹی ہے اس لیے ایسی زبان استعمال کرتی ہیں۔

مہنگائی کے مارے عوام کے لئے اچھی خبر ، پیٹرول کی قیمت میں 8 روپے فی لیٹر کمی کا فیصلہ کیا گیا ہے۔وزارت خزانہ نے پیٹرولیم مصنوعات کی کی قیمتوں میں رد و بدل کا اعلان کردیا ، پٹرول کی قیمت میں کمی عالمی منڈی میں تیل کی قیمتوں میں گزشتہ کچھ عرصے میں زبردست کمی آنے کی وجہ سے کی گئی جبکہ رواں برس کے اغاز میں مجموعی طور پر تیل کی قیمتیں نیچے انے کی پیش گوئی کی گئی ہے۔ جنوری کے پہلے دو ہفتوں میں خام تیل برینٹ کی قیمت 75 ڈالر فی بیرل کے آس پاس رہی۔
حالیہ ہفتوں میں ڈالر کے مقابلے میں روپے کی قدر بھی بڑھی ہے۔یکم جنوری سے اب تک خام تیل کی قیمت میں ڈیڑھ ڈالر کی کمی ہوئی ہے جب کہ روپے کی قدر میں تین روپے کی بہتری آئی ہے۔آئل اینڈ گیس اتھارٹی اوگرا نے پیٹرولیم قیمتوں کا تخمینہ تیار کر لیا ہے جس کے مطابق پیٹرول کی قیمت فروخت میں 5.5 روپے فی لیٹر کمی کا امکان ہے۔ مٹی کے تیل کے نرخ میں3.29اور لائٹ ڈیزلکے نرخ میں1.75روپے فی لیٹر کمی متو قع ہے۔البتہ ڈیزل کی قیمت میں کمی کا امکان نہیں۔

الیکشن کمیشن نے ملک بھر میں آٹھ فروری کو شیڈول عام انتخابات کیلئے جاری انتخابی نشانات کے حوالے سے دو ٹوک موقف اختیار کیا کہ آزاد امیدواروں میں سے جسے جو انتخابی نشان مل گیا ، وہ اب تبدیل نہیں ہوسکے گا ۔ الیکشن کمیشن کے مطابق ریٹرننگ آفیسروں کی جانب سے انتخابی نشان جاری کیے جاچکے ہیں،سیاسی جماعتوں کیلئے 146،آزاد امیدواروں کیلئے 177 نشان مختص ہیں۔ای سی پی نے بیلٹ پیپرز کی چھپائی کے لئے کوائف پرنٹنگ کارپوریشن کو بھیج دیئے ہیں ۔بیلٹ پیپرز کی چھپائی کے لئےساڑھے 18 ہزار کوائف پرنٹنگ کارپوریشن کو ارسال کیے گئے ہیں۔ الیکشن کمیشن کے مطابق بیلٹ پیپرز کی پرنٹنگ شروع ہوچکی ہے،لہٰذاآزاد امیدوار اب انتخابی نشان تبدیل نہیں کرواسکیں گے۔ واضح رہے کہ پی ٹی آئی کا انتخابی نشان بلا چھن جانے کے بعدپی ٹی آئی امیدواروں کو بوٹ، بوتل، ویل چیئر، لیپ ٹاپ، بکری، کُھسّہ، توا، زبان، سبز مرچ، باجا، فرائی پین اور بینگن جیسے نشان الاٹ کیے گئے ہیں جبکہ پارٹی چیئرمین بیرسٹر گوہر کو چینک کا انتخابی نشان الاٹ کیا گیا۔ ان نشانات پر پی ٹی ائی امیدواروں کو تحفظات ہیں جبکہ ان کا کہنا ہے کہ ایسے نشانات سے ہم کیسے انتخابی مہم چلائیں گے.