Author: صدف ابرار

راولپنڈی کی احتساب عدالت نے توشہ خانہ ریفرنس اور 190 ملین پاؤنڈ ریفرنس میں بانی پی ٹی آئی کی درخواست ضمانت مسترد کردی۔ راولپنڈی میں احتساب عدالت کے جج محمد بشیر نے محفوظ فیصلہ سنادیا۔ توشہ خانہ ریفرنس میں سماعت11 جنوری تک ملتوی کردی گئی۔ نیب حکام 11 جنوری کو توشہ خانہ ریفرنس میں 12 گواہان کو پیش کریں گے۔ دوسری جانب ذرائع کا کہنا ہے کہ نیب بانی پی ٹی آئی اور بشریٰ بی بی کیخلاف 20 گواہ پیش کرے گا۔ تحائف کا پرائیویٹ طور پر تخمینہ لگانے والے صہیب عباسی بطور وعدہ معاف گواہ پیش ہوں گے۔دوسری جانب 190 ملین پاؤنڈ ریفرنس میں فردِ جرم کےلیے 17 جنوری کی تاریخ مقرر کردی گئی ہے۔گواہان کی فہرست میں ایک اور وعدہ معاف گواہ بھی شامل ہے۔ سابق وزیراعظم کے ملٹری سیکریٹری اور ڈپٹی ایم ایس بھی گواہان میں شامل ہیں۔ ڈپٹی قونصلیٹ جنرل دبئی رحیم اللّٰہ، توشہ خانہ کے سیکشن افسران بھی گواہی دیں گے۔پی ایم آفس کے اسسٹنٹ سیکریٹری پروٹوکول زاہد سرفراز بھی نیب کے گواہ ہوں گے۔

وزارت مذہبی امور نے سرکاری اسپانسر شپ اسکیم کے تحت 21 ہزار سے زائد حج کوٹہ سعودی عرب کو واپس کرنے کی تیاریاں شروع کردیں جبکہ دوسری طرف سرکاری حج اسکیم کے تحت قرعہ اندازی سے محروم رہنے والے 5 ہزار 600 عازمین حج کے لیے حکومت کی طرف سے ڈالرز دینے سے انکار کے بعد انہیں حج پر نہیں بھجوایا جائے گا۔ذرائع کے مطابق وزارت مذہبی امورکو سرکاری اسپانسر شپ حج سکیم میں 25 ہزار کے کوٹے پر صرف 4 ہزار درخواستیں موصول ہوئیں، 21 ہزار سے زائد خالی رہ جانے والا کوٹہ سعودی عرب کو واپس کیا جائے گا۔دوسری طرف آئندہ برس کے لئے حج قرعہ اندازی میں ناکام رہنے والے 5ہزار 633 درخواست دہندہ کو بچ جانے والے کوٹہ پر ایڈجسٹ کرنے کی بجائے رقم واپس کر دی گئی۔وزارت مذہبی امور کے ذرائع کا کہنا ہے کہ اسپانسرشپ اسکیم میں کم درخواستوں کی وجہ سے توقع سے کم ڈالر موصول ہوئے ہیں۔وزارت مذہبی امور نے حکومت سے رابطہ کیا کہ بچ جانے والے کوٹہ میں ناکام درخواست گزاروں کو ایڈجسٹ کردیا جائے لیکن حکومت نے پہلے سے مختص ڈالرز کے علاوہ مزید ڈالرز دینے سے انکار کردیا جس کی وجہ سے کوٹہ واپس کرنے کا فیصلہ کیا گیا ہے۔وزارت کو ریگولر حج سکیم میں 63 ہزار 805کے کوٹہ پر 69 ہزار 438 درخواستیں موصول ہوئی تھیں، اس پر قرعہ اندازی میں رہ جانے والے 5633 درخواست گزاروں کو ان کی جمع کرائی گئیں رقوم جو 6ارب روپے بنتی تھیں واپس کردی گئی تھیں۔

سابق وفاقی وزیر اطلاعات و نشریات فواد چودھری کو الیکشن ٹربیونل میں پیش کر دیا گیا۔ الیکشن ٹربیونل کے جسٹس چوہدری عبدالعزیز نے فواد چودھری کو آج طلب کر رکھا تھا، عدالت طلبی کے بعد فواد چودھری کی الیکشن ٹربیونل میں حاضری لگائی گئی، فواد چودھری کو سخت سیکیورٹی حصار میں الیکشن ٹربیونل میں پیش کیا گیا۔ے واضح رہے کہ فواد چودھری کے حلقہ این اے 60 اور 61 سے کاغذات نامزدگی مسترد ہونے کے خلاف اپیل خارج ہوئی تھی۔دوران سماعت ریٹرننگ آفیسر (آر او) کے فیصلے کو برقرار رکھتے ہوئے فواد چوہدری کو الیکشن لڑنے کے لیے نااہل قرار دیا گیا۔الیکشن ٹربیونل کے جج چوہدری عبدالعزیز نے فواد چوہدری کی اپیل خارج کر دی۔احتساب عدالت میں فواد چوہدری کی پیشی کے موقع پر صحافی نے فواد چوہدری سے بانی پی ٹی آئی کے غیر جریدے میں لکھے گئے کالم سے متعلق سوال کیا۔ کہ کیا بانی پی ٹی آئی دی اکانومسٹ میں کالم لکھنے کی بات درست ہے؟اس پر سابق وفاقی وزیر نے کہا کہ مجھے کنفرم نہیں ہے لیکن ہوسکتا ہے کہ دوران سماعت انہوں نے اپنے وکلاء کو کالم کے نوٹس دے دیے ہوں، یقیناً انہوں نے لکھوایا ہوگا۔اس موقع پر فواد چوہدری نے کہا کہ بانی پی ٹی آئی نے الیکشن کمیشن کے حکام کو کوئی دھمکی نہیں دی۔

نجی ٹی پر الیکشن کمیشن کے حوالے سے غلط معلومات نشر کرنے پر نگران وزیر اطلاعات مرتضی سولنگی نے کہا ہے کہ میڈیا حقائق کی جانچ پڑتال کیلئے انتخابات سے متعلق خبروں پر الیکشن کمیشن کا موقف لے۔سوشل میڈیا پلیٹ فارم ایکس پر ایک پوسٹ میں انہوں نے کہا کہ میڈیا کو چاہیے کہ وہ حقائق پیش کرے اورکسی بھی شک و شبے کی صورت میں اسے الیکشن کمیشن سے خبر کی تصدیق کرنی چاہیے۔

حقائق پر چلیں۔اگر شبہ ہو تو تصدیق کریں۔ انتخابات سے متعلق تمام خبروں پر الیکشن کمیشن کا موقف ضرور معلوم کریں۔
شکریہ۔ pic.twitter.com/I7v7E5nTE8

— Murtaza Solangi (@murtazasolangi) January 8, 2024

بیان میں کہا گیا کہ حقیقت یہ ہے کہ پولنگ سٹیشنوں کی حتمی فہرست انتخابات سے پندرہ روز قبل شائع کی جاتی ہے جس کے بعد ووٹر اپنے بلاک کوڈ، حلقہ نمبر، پولنگ سٹیشن اور دیگر معلومات حاصل کرسکتے ہیں۔ الیکشن کمیشن نے کہا کہ اس وقت حلقوں کے پولنگ سٹیشنز کی ابتدائی فہرست شائع کردی گئی ہے اور ووٹرز اس حوالے سے اپنے اعتراضات اور تجاویز ڈسٹرک ریٹرننگ افسر کو جمعرات تک جمع کراسکتے ہیں۔ڈسٹرک ریٹرننگ افسر اس ماہ کی سترہ تاریخ تک معاملہ کا فیصلہ کریں گے۔بیان میں مزید کہا گیا کہ پولنگ سٹیشنوں کی حتمی فہرست انتخابات سے پندرہ روز قبل شائع کی جائے گی۔ ووٹرز کے کوائف حتمی فہرستوں کے شائع ہونے کے بعد ایس ایم ایس سروس 8300 پر دستیاب ہونگے۔الیکشن کمیشن نے کہا کہ پوسٹل بیلٹ کے ذریعے ووٹ ڈالنے کے خواہشمند افراد متعلقہ ضلعی الیکشن کمشنرز کے دفاتر سے انتخابی فہرستوں کے بارے میں معلومات لے سکتے ہیں۔