پاکستان نے امریکی محکمہ خارجہ کی طرف سے "خصوصی تشویش کا ملک” قرار دینے کو مسترد کر دیا ہے۔ ترجمان دفتر خارجہ کے مطابق خصوصی تشویش کا ملک قرار دینے کی بات پر شدید مایوسی ہوئی ہے ۔ پاکستان میں بین المذاہب ہم آہنگی کی بھرپور روایت ہے پاکستان نے آئین کے مطابق مذہبی آزادی کو فروغ دینے اور اقلیتوں کے حقوق کے تحفظ کے لیے وسیع پیمانے پر اقدامات کیے ہیں۔ ترجمان کے مطابق پاکستان اس بات پر پختہ یقین رکھتا ہے کہ مذہبی عدم برداشت، زینو فوبیا اور اسلامو فوبیا کا مقابلہ باہمی افہام و تفہیم اور جتماعی کوششوں کے ذریعے کیا جا سکتا ہے اسی جذبے کے ساتھ پاکستان نے دو طرفہ طور پر امریکہ کے ساتھ رابطہ قائم کیا ہے پاکستان امریکی محکمہ خارجہ کی جانب سے نامزدگی کے بارے میں اپنے تحفظات سے امریکہ کو آگاہ کر رہا ہے۔ پاکستان نے امریکی محکمہ خارجہ کی جانب سے مذہبی آزادی کی خلاف ورزی کرنے والے بھارت کو ایک بار پھر نامزد فہرست سے خارج کرنے پر اظہار تشویش کرتے ہوئے کہا کہ ہم اس بات پر یقین رکھتے ہیں کہ اس طرح کے امتیازی، یکطرفہ اقدامات نقصان دہ ہیں ایسے اقدامات عالمی سطح پر مذہبی آزادی کو آگے بڑھانے کے ہمارے مشترکہ مقصد کو نقصان پہنچاتے ہیں۔
Author: صدف ابرار
-
بدامنی کا علاج ملک میں مضبوط حکومت کا قیام ہے، سراج الحق
امیر جماعت اسلامی سراج الحق نے کہا ہے کہ جن پارٹیوں کے اندر جمہوریت نہیں وہ ملک میں جمہوری استحکام نہیں چاہتیں، بعض سیاسی پارٹیاں بھی الیکشن ملتوی کرنے کی خواہش رکھتی ہیں۔ کہ بعض سیاسی پارٹیاں الیکشن نتائج سے متعلق بھی این آر او کے انتظار میں ہیں۔امیر جماعت اسلامی نے کہا کہ دہشت گردی کے خاتمہ کے لیے مضبوط اور مستحکم حکومت کا قیام ضروری ہے، عدلیہ وقار کی بحالی کے لیے آئین و قانون کی بالادستی یقینی بنائے۔سراج الحق نے کہا کہ ملک کی عدالتوں میں کمزور کے لیے انصاف نہیں، جماعت اسلامی اقتدار میں آ کر قرآن و سنت کی بالادستی کو یقینی بنائے گی۔ ان خیالات کا اظہار انھوں نے ثمرباغ دیرپائن میں اپنے حلقہ انتخاب این اے 6 میں انتخابی دفتر کے افتتاح کے موقع پر تقریب سے خطاب کرتے ہوئے کیا۔ جماعت اسلامی سے حلقہ پی کے 16 اور 17 کے امیدواران اعزاز الملک افکاری اور سعید گُل بھی اس موقع پر موجود تھے۔امیر جماعت اسلامی سراج الحق نے مزید کہا کہ ملک کی معاشی ترقی کیلئے تمام سیاسی جماعتوں کو لانگ ٹرم منصوبے پر اتفاق رائے پیدا کرنا ہوگا، جماعت اسلامی ہر شعبے میں اصلاحات چاہتی ہے، اقتدار میں آ کر غیرترقیاتی اخراجات کم کرکے تعلیم اور روزگار پر خرچ کریں گے، تعلیم کے بغیر کوئی قوم ترقی نہیں کرسکتی، روزگار کی فراہمی ریاست کی ذمہ داری ہے۔
-
آئی پی پی اور ن لیگ کے درمیان سیٹ ایڈجسٹمنٹ پر اتفاق
پاکستان مسلم لیگ (ن) اور استحکام پاکستان پارٹی (آئی پی پی) کے درمیان سیٹ ایڈجسٹمنٹ ہو گئی ، آئی پی پی کو قومی کی 7 اور صوبائی اسمبلی کی 11 سیٹیں دیے جانے کا امکان ہے۔ اس نے قومی کی 13 اور صوبائی اسمبلی کی 22 سیٹوں کا مطالبہ کیا تھا۔علیم خان کو این اے 117 اور عون چوہدری کو این 128 لاہور میں ایڈجسٹ کیا جائے گا۔جہانگیر ترین کو لودھراں کے بجائے این اے 149 ملتان سے ایڈجسٹ کیا جائے گا۔نعمان لنگڑیال کو ساہیوال اور انجینئر گل اصغر کو خوشاب، عامر کیانی کو اسلام آباد اور غلام سرور خان کو راولپنڈی سے ایڈجسٹ کیا جائے گا۔دوسری جانب آئی پی پی کی فردوس عاشق اعوان، ہمایوں اختر اور رانا نذیر ایڈجسٹ نہیں ہوں گے۔
فیصل آباد سے فرخ حبیب اور ساہی وال سے نوریز شکور کو بھی ایڈجسٹ نہیں کیا جائے گا۔ -
مرغی کے گوشت کی قیمت میں تین دن کے دوران 54 روپے کا اضافہ
ملک بھر میں مہنگائی کا راج ،جہاں کھانے پینے کے دوسرے اشیاء ضرورت کی چیزوں میں دن بدن اضافہ ہو رہا ہے وہاں راولپنڈی ، اسلام آباد اور لاہور سمیت مختلف شہروں میں برائلر مرغی کے فی کلو گوشت کی قیمت 600 روپےسے اوپر ہو گئی ، جبکہ زندہ برائلر تھوک مارکیٹ میں 440 روپے اور پرچون میں 502 روپے فی کلو فروخت ہو رہا ہے جبکہ زندہ مرغی کے سرکاری نرخ 324 روپے کلو ہے۔ گھی، دالیں، چاول، لہسن، آلو اور مرغی سمیت 29 اشیا مہنگی ہو گئیں،اس کے علاوہ فارمی انڈوں کی فی درجن قیمت میں مزید 2 روپے کااضافہ ہو گیا ہے جس کے بعد فی درجن انڈوں کی قیمت قیمت 386 روپے تک پہنچ گئی ہے۔واضح رہے کہ مرغی کے گوشت کی قیمت میں تین دن کے دوران 54 روپے کا اضافہ ہوا ہے۔
-
لاہور پر قبضہ جمانے والوں کو انکے گھر میں ہی شکست دینگے،بلاول بھٹو
پاکستان پیپلز پارٹی کے چیئرمین بلاول بھٹو زرداری نے کہا ہے کہ آج وہ لوگ ہم سے سوال کرتے ہے کہ لاہور کیوں آئے ہو جو جنرل ضیاء کی وجہ سے پنجاب پر مسلط ہے انہی لوگوں کو گھر میں گھس کر ماریں گے۔ لاہور کسی کھلاڑی اور بزنس مین کا شہر نہیں، ذوالفقار علی بھٹو شہید کا شہر ہے، اور میں اپنے شہر سے الیکشن لڑرہا ہوں، آپ نے گھر گھرپارٹی کا پیغام پہنچانا ہے۔لاہور میں الیکشن آفس کے افتتاح کی تقریب سے خطاب کرتے ہوئے سابق وزیرِ خارجہ بلاول بھٹو زرداری نے کہا کہ لاہور میں ان کا مقابلہ کریں گے، انہیں گھر میں گھس کر ماریں گے۔ انہوں نے کہا کہ آپ میرے سفیر ہیں اور میری آواز ہیں، ذوالفقار علی بھٹو کی طرح میں بھی لاہور سے الیکشن لڑ رہاہوں، اپنے شہر لاہور آیا ہوں ذوالفقار بھٹو اور بی بی شہید نے یہاں سے الیکشن لڑا۔بلاول بھٹو نے کہا کہ یہ کہتے ہیں کہ ہم کیوں آئے ہیں، ہم پوچھتے ہیں وہ کیوں آئے تھے، وہ ضیاالحق اور حمید گل کی وجہ سے یہاں پر مسلط ہوئے، تو کبھی فیض کی وجہ سے اس شہر پرمسلط ہوئے، لیکن ہم کہیں اور نہیں دیکھ رہے، ہمیں نہ پٹواریوں کی اور نہ کسی اور کی ضرورت ہے، صرف عوام کا ساتھ چاہتا ہوں۔انہوں نے مزید کہا ہے کہ ہم الیکشن لڑنے کے لیے کہیں اور نہیں دیکھ رہے، ہم عوام کی طرف دیکھ رہے ہیں۔پاکستان پیپلز پارٹی کے چیئرمین بلاول بھٹو زرداری نے یہ بھی کہا ہے کہ مفت علاج کی سہولت دیں گے جس سے لاہور والوں کو لندن جانے کی ضرورت نہیں پڑے گی۔ بلاول نے کہا کہ ہم غربت، بیروزگاری، مہنگائی کا مقابلہ کریں گے، ہم عوام کی تنخواہیں اور آمدنی کو ڈبل کریں گے، 300 یونٹ تک مفت بجلی فراہم کریں گے اور مفت تعلیم دیں گے،سندھ کےشہروں کی طرح ملک بھرمیں مفت صحت کاعلاج دیں گے۔
-
بیرون ملک سے آنے والے مسافروں میں کورونا وائرس کی تصدیق
شارجہ اور جدہ سے آنے والےدو مسافروں میں کورونا کی موجودگی کا انکشاف ہوا ہے جناح انٹرنیشنل ایئرپورٹ کراچی پرمزید دو مسافروں میں کرونا وائرس کی تشخیص ہوئی ہے۔ محکمہ صحت سندھ کے ترجمان نے بتایا کہ مختلف ممالک میں کرونا وائرس کے نئے ویرینٹ کے کیسز سامنے آنے کے بعد نیشنل کمانڈ اینڈ آپریشن سینٹر (این سی او سی) کی ہدایت پر بیرون ملک سے آنے والے مسافروں کے ٹیسٹ کرنے کا فیصلہ کیا گیا تھا جس میں سےمزید دو مسافروں میں کووڈ کی تشخیص پائی گئی ہے۔ ترجمان کے مطابق قمبرشہدادکوٹ کا رہائشی 20 سالہ مسافر گزشتہ روز شارجہ سے کراچی پہنچا تھا،دوسرے مسافر کا تعلق پنجاب کے علاقے مظفر گڑھ سے ہے،مظفر گڑھ کا رہائشی 27 سالہ مسافر جدہ سے کراچی پہنچا تھا،۔ ترجمان کا کہنا ہے کہ دونوں مریضوں میں ممکنہ علامات کے پیش نظر ریپڈ اینٹیجن ٹیسٹ کیے گئے جو مثبت آئے،جے این ون کی جانچ کے لیے دونوں مریضوں کے نمونے ڈاؤ یونیورسٹی کی لیبارٹی روانہ کردیے گئے ہیں، دونوں مسافروں کو سختی سے کورنٹائن کی ہدایت کے ساتھ گھروں کو روانہ کردیا گیا ہے۔ محکمہ صحت کا کہنا ہے کہ لیبارٹری ٹیسٹ کی رپورٹ آنے کے بعد کوویڈ کی قسم کے بارے میں معلوم ہوسکے گا،اس سے قبل بھی بیرون ملک سے دو مسافروں میں ممکنہ کوویڈ کی تشخیص کی گئی تھی جبکہ لیبارٹری ٹیسٹ کی رپورٹ چار سے پانچ روز میں موصول ہوتی ہے
-
بلوچستان میں مختلف قبیلوں کو آپس میں لڑایا جارہا ہے،جمال رئیسانی
اسلام آباد میں بلوچستان شہداء فورم کے رہنماؤں کے ہمراہ پریس کانفرنس کرتے ہوئے جمال رئیسانی نے کہا کہ اگر پاکستان زندہ باد کہنے پر ہماری جانیں لی جارہی ہے تو ہم یہ الفاظ کہنے سے باز نہیں آئے گے ،انہوں نے کہا کہ بلوچستان میں کئی قسم کے قبیلے مقیم ہیں، بلوچستان میں ان قبیلوں کو ایک دوسرے سے لڑایا جارہا ہے، ہم اس آگ میں جل رہے ہیں کہ ہمارے پیاروں کو کس نے قتل کیا۔ جمال رئیسانی کا کہنا ہے کہ بلوچستان کی کہانی مکمل طور پر دکھانی چاہیے، ہمارے پیاروں کو کیوں شہید کیا گیا؟ بلوچستان میں ایک رکشہ چلانے والے کے بیٹے کو کیوں قتل کیا گیا؟ آج ہم یہاں بات کر رہے ہیں، کل ہمیں بھی ٹارگٹ کیا جا سکتا ہے۔انہوں نے کہا کہ ہمارے پیاروں کا خون ہمیں پکارتا ہے،انہیں کس نے شہید کیا، بلوچ، پنجابی اور سندھی کا خون کیا مختلف ہے، شدت پسند تنظیموں کو کس نے اجازت دی کہ ہمارے پیاروں کو ماریں۔سابق نگراں وزیر نے کہا کہ میڈیا بلوچستان کی پوری کہانی دکھائے، آدھی کہانی دکھانے سے دشمن کا فائدہ ہوتا ہے، اگر ہم اپنے شہداء کے لیے آواز نہ اٹھائیں تو ہمارا ضمیر ہمیں ملامت کرتا ہے، ہمیں رات کو نیند نہیں آتی۔ان کا یہ بھی کہنا ہے کہ ہمارے پیاروں کا خون کس کے سر جاتا ہے؟ انسانی حقوق کے علمبرداروں سے پوچھتا ہوں کیا ہمارے پیاروں کا خون اتنا سستا ہے؟ کیا ہمارے پیاروں کو تکلیف نہیں ہوتی۔
-
بانی پی ٹی آئی کی اپیل پر محفوظ فیصلہ 10 جنوری کو سنایا جائے گا۔
الیکشن ٹریبونل کے جج جسٹس چودھری عبدالعزیز نے بانی پی ٹی آئی کے این اے 89 میانوالی سے کاغذات نامزدگی مسترد ہونے کیخلاف اپیل پر سماعت کی لاہور ہائی کورٹ راولپنڈی بنچ نے کاغذات نامزدگی مسترد کئے جانے کیخلاف بانی پی ٹی آئی کی اپیل پر فیصلہ محفوظ کر لیا جو 10 جنوری کو سنایا جائے گا۔
دوران سماعت بیرسٹر علی ظفر بانی پی ٹی آئی کی جانب سے عدالت میں پیش ہوئے۔بیرسٹر علی ظفر نے استدعا کی کہ ریٹرننگ آفیسر کا فیصلہ کالعدم قرار دیا جائے۔وکیل بانی پی ٹی آئی نے کہا کوئی شخص اہل ہے یا نااہل اس کیلئے شواہد چاہئیں، بانی پاکستان تحریک انصاف کے معاملے میں آر او کے فیصلے میں ایسا کچھ نہیں تھا، 2018 میں خواجہ محمد آصف کیس کا حوالہ دینا چاہتا ہوں۔ٹریبونل نے کہا کہ خواجہ محمد آصف کیس میں تنخواہ کا ذکر تھا، توشہ خانہ سے جو چیزیں لی گئیں، کیا ان کی تفصیلات دی گئیں؟ ہم یہاں پر توشہ خانہ کیس کے میرٹ پر بات نہیں کر رہے ہیں، جو پیسہ توشہ خانہ کی چیزیں بیچ کر حاصل کیا گیا وہ بتایا گیا تھا؟
ڈی جی لاء نے دلائل میں کہا کہ ریٹرننگ آفیسر نے سرسری سماعت کرنا ہوتی ہے، ملزم سزا یافتہ ہو تو الیکشن نہیں لڑ سکتا اور اسلام آباد ہائی کورٹ نے بانی پی ٹی آئی کو نااہل قرار دیا ہے جبکہ سزا ختم نہیں کی بلکہ وہ برقرار ہے۔ڈی جی لاء نے کہا کہ ریٹرننگ آفیسر نے قانون کے مطابق کاغذات مسترد کئے اس لئے استدعا ہے کہ چیئرمین پی ٹی آئی کی اپیل خارج کی جائے۔بعدازاں الیکشن ٹریبونل نے بانی پی ٹی آئی کے این اے 89 میانوالی سے کاغذات نامزدگی مسترد ہونے کیخلاف اپیل پر فیصلہ محفوظ کر لیا۔بانی پی ٹی آئی کی انتخابی قسمت کا فیصلہ 10 جنوری کو صبح 10 بجے سنایا جائے گا۔ -
سیکرٹری الیکشن کمیشن بیمار ،استعفے کی خبروں کی تردید
وفاقی سیکرٹری الیکشن کمیشن عمر حمید خان نے اپنے عہدے سے استعفیٰ دے دیا ۔ذرائع کا کہنا ہے کہ صحت کی خرابی سیکرٹری الیکشن کمیشن کے استعفے کی وجہ بنی ، اُن کا کہنا ہے کہ میری صحت کام کرنے کی اجازت نہیں دیتی۔ذرائع کا یہ بھی کہنا ہے کہ عمر حمید خان چھ دن تک ہسپتال میں زیر علاج رہے ہیں اور اب گھر میں زیر علاج ہیں۔ذرائع کے مطابق چیف الیکشن کمشنر نے تاحال سیکرٹری الیکشن کمیشن کا استعفیٰ منظور نہیں کیا ہے جبکہ الیکشن کمیشن سیکرٹریٹ استعفے سے متعلق خبروں کی تصدیق سے گریزاں ہیں ۔ واضح رہے کہ سیکرٹری الیکشن کمیشن کے مستعفی ہونے کی اطلاعات ایسے وقت میں سامنے آئی ہیں جب ملک میں عام انتخابات کے انعقاد میں محض ایک ماہ باقی رہ گیا ہے۔
دوسری جانب ترجمان الیکشن کمیشن کاکہنا ہے کہ سیکرٹری الیکشن کمیشن آف پاکستان ایک ذہین اور محنتی آفیسر ہیں اور وہ بہت اچھے طریقے سے کمیشن کا کام کر رہے ہیں تاہم پچھلے کچھ دنوں سے ان کی صحت خراب تھی اور وہ اس سے قبل بھی میڈیکل ریسٹ پر رہے ہیں۔اب بھی اگر ان کی صحت نے اجازت دی تو وہ جلد ہی اپنے فرائض منصبی سر انجام دیں گے۔الیکشن کمیشن مکمل طور پر فعال ہے اور اس کے کام میں کسی قسم کی رکاوٹ یا رخنہ نہیں ہے۔حتی کہ تعطیلات کے دنوں میں بھی الیکشن کمیشن اور اس کے دفاتر کام کر رہے ہیں۔سیکرٹری کی غیر موجودگی میں کمیشن کے دونوں سپیشل سیکرٹری صاحبان احسن طریقے سے کمیشن کے کام کو چلا رہے ہیں۔
-
بانی پی ٹی آئی نے کہا جاوید اقبال کے خلاف کارروائی کریں گے لیکن دھوکہ دیا گیا، طیبہ گل
45 دن مرضی کے بغیر مجھے شوہر سمیت وزیراعظم ہاؤس میں حبس بیجا میں رکھا گیا۔ سابق چیئرمین قومی احتساب بیورو (نیب ) جاوید اقبال پر ہراسانی کا الزام لگانے والی طیبہ گل نے کہا ہے کہ میرا کیس سیاسی مقاصد کے لیے استعمال ہوا، پی ٹی آئی نے فائدہ اٹھایا، بانیٔ پی ٹی آئی وزیراعظم تھے تو وزیراعظم ہاؤس سے کال آئی کہ وہ ملنا چاہتے ہیں۔طیبہ گل نے کہا کہ پی ٹی آئی کو ڈر تھا کہ باہر گئی تو حقائق سب کو معلوم ہو جائیں گے، کوئی مدینہ کی ریاست نہیں تھی، لوگوں کو بے وقوف بنایا گیا۔
انہوں نے کہا کہ بانیٔ پی ٹی آئی نے کہا جاوید اقبال کے خلاف کارروائی کریں گے، میں نے بھروسہ کیا، ثبوت دیے لیکن انہوں نے سیاسی فائدہ اٹھایا، پی ٹی آئی نے اپنے نیب کے کیسز ختم کروائے۔طیبہ گل کا کہنا ہے کہ 2022ء میں ادارہ محتسب میں سابق چیئرمین نیب جاوید اقبال و دیگر کےخلاف شکایت دی، چیئر پرسن ادارہ محتسب کشمالہ طارق نے میرا کیس سنجیدہ نہیں لیا۔طیبہ گل کا کہنا ہے کہ جاوید اقبال نے سمجھوتا کیا، پی ٹی آئی کے مخالفین کی گرفتاریاں کیں، مجھے 45 دن وزیراعظم ہاؤس میں رکھا اور دھمکیاں دیں، مجھ سے پی ٹی آئی حکومت نے بلینک بیان حلفی لیا تھا۔انہوں نے کہا کہ بانیٔ پی ٹی آئی کے نوٹس میں سب معاملہ تھا، مجھے انصاف کہیں نظر نہیں آیا، اعظم خان نے میرے دروازے پر پہرہ دینے کے لیے سیکیورٹی کھڑی کی تھی۔طیبہ گل کا مزید کہنا تھا کہ مجھے وزیراعظم ہاؤس میں ہراساں کیا گیا، میرے پاس ثبوت ہیں، پی ٹی آئی حکومت نے ثبوتوں کو مٹانے کی کوشش کی۔