Author: صدف ابرار

ایم کیو ایم کے کنوینر ڈاکٹرخالد مقبول صدیقی نے کہاکہ کراچی شہر کو تقسیم کرکے آگ و خون میں نہلایا گیا۔لیکن کراچی جب کھڑا ہوتا ہے تو تخت و تاج گر جایا کرتے ہیں، آج کے اجتماع کو ہم اپنے تین شہید ساتھیوں کے نام کرتے ہیں، ہمارے ان شہید ساتھیوں کا خون ضرور رنگ لائے گا، ایم کیوایم پاکستان ایسی تبدیلی لائے گی کے مچھرکالونی کے عام لوگ وقت کے فرعونوں کو شکست دیں گے۔ کنوینر ایم کیو ایم نے مزید کہا کہ یہ نقطہ آغاز ہے، کیماڑی نے خطرے کی گھنٹی بجادی ہے، ہم وعدہ کرتے ہیں کہ آئندہ بھی اس علاقے سے غریب بلوچ، پختون اور بنگالی کو اسمبلیوں میں پہنچائیں گے، آج کا جلسہ یہ ذمہ داری لگا رہا ہے کہ ایم کیو ایم کے منتخب نمائندے آپ کا مقدمہ ایوانوں میں لڑیں، آپ کے بچوں کے مستقبل کیلئے ہم ملکر ایوانوں میں آواز بلند کریں گے۔خالد مقبول صدیقی نے کہا کہ اب جاگیردارانہ جمہوریت کا وقت ختم ہورہا ہے، آپ سب کو ایک نئی صبح کا سورج مبارک ہو۔
دوسری جانب متحدہ قومی موومنٹ (ایم کیو ایم) پاکستان کے سینئر رہنما خواجہ اظہار الحسن نے کہا ہے کہ آئندہ انتخابات میں 2013ء کی کھوئی ہوئی نشستیں بھی واپس لیں گے۔خواجہ الحسن نے کراچی میں 4 انتخابی حلقوں سے کاغذات نامزدگی جمع کروائے ہیں۔ ایم کیو ایم رہنما نے کہا کہ طویل انٹرویو پراسس کے بعد امیدوار سامنے لائے ہیں۔ الیکشن میں 2013 کی کھوئی ہوئی نشستیں واپس لیں گے۔ خواجہ اظہار الحسن نے مزید کہا کہ منتخب ہو کر اچھی قانون سازی کی کوشش کریں گے۔ وفاق کے ساتھ نہ چل سکے تو اپنے اپنے حلقے میں عوام کو ڈلیور کرنے کی حکمت عملی مرتب کر رہے ہیں۔ انہوں نے کہا کہ کسی بھی صوبے میں 18ویں ترمیم کے بعد علاقائی مسائل ظاہر کرتے ہیں کہ ترمیم ڈرامہ تھا۔

پاکستان پیپلز پارٹی (پی پی پی) کراچی ڈویژن کے صدر اور سابق صوبائی وزیر سعید غنی نے کراچی میں صوبائی اسمبلی کی نشست پی ایس 105 سے کاغذات نامزدگی جمع کروا دیے۔ اس موقع پر میڈیا سے گفتگو کرتے ہوئے انکا کہنا تھا کہ 9 مئی کے واقعات میں ملوث پی ٹی آئی کے لوگوں کو سزا ملنی چاہیے، پیپلز پارٹی بھر پور طریقے سے الیکشن مہم چلا رہی ہے۔ انہوں نے کہا کہ الیکشن نہ ہوں کچھ لوگوں کی خواہش ضرور ہوسکتی ہے۔ ملک کو معاشی بحران سے نکالنے کےلیے انتخابات ہونا ضروری ہے۔ پیپلز پارٹی ایک لمحے بھی الیکشن سے نہیں بھاگی۔ سعید غنی نے کہا کہ پیپلز پارٹی نے کبھی الیکشن سے فرار کی کوشش نہیں کی، ہر جماعت کو انتخابات میں حصہ لینے کا موقع ملنا چاہیے۔ کوشس ہے مضبوط ترین امیدوار میدان میں اتاریں۔ انہوں نے کہا کہ بشمول پی ٹی آئی لیول پلیئنگ کی سب بات کرتے ہیں۔ پیپلز پارٹی کراچی میں اپنی جگہ بنا رہی ہے۔ بات نئے، پرانے کی نہیں، پارٹی کی نظر میں جو بہترین امیدوار ہوگا اسے موقع ملے گا۔ بلدیاتی انتخابات میں پیپلز پارٹی لیاری سے 13 میں سے 12 سیٹیں جیتی ہے۔سعید غنی نے کہا کہ 2018 میں عرفان اللّٰہ مروت کو بدترین شکست ہوئی۔ ایسے امیدوار جو الیکشن میں نظر آتے ہیں ان کو لوگ پسند نہیں کرتے۔ عرفان اللّٰہ مروت حلقے میں نسلی تعصب پھیلا رہے ہیں۔ سعید غنی نے کہا لوگ با شعور ہیں کسی سازشی عمل میں نہیں آئیں گے۔ کچھ لوگوں کی خواہش ہے الیکشن نہ ہو یا تاخیر کا شکار ہو جائیں۔ ملک کو سیاسی و معاشی بحران سے نکالنے کےلیے انتخابات ضروری ہیں۔