Blog

اسرائیلی وزیر دفاع اسرائیل کاٹز نے ایران کے خلاف ممکنہ فوجی کارروائی کا عندیہ دیتے ہوئے کہا ہے کہ اسرائیل امریکا کے گرین سگنل کا انتظار کر رہا ہے تاکہ ایران پر بڑے پیمانے پر حملے کیے جا سکیں۔

اسرائیلی وزیرِ دفاع کا کہنا تھا کہ اگر حملے دوبارہ شروع کیے گئے تو ایران کو "پتھر کے زمانے میں دھکیل دیا جائے گا” اور خاص طور پر اس کی اہم توانائی اور بجلی کی تنصیبات کو نشانہ بنایا جائے گا۔ ان کے بیان نے خطے میں نئی تشویش کو جنم دیا ہے۔

دوسری جانب اقوام متحدہ میں ایران کے سفیر نے امریکا پر شدید اعتراض کرتے ہوئے کہا ہے کہ حالیہ حملوں میں پانچ عرب ممالک کی سرزمین استعمال کی گئی، جس پر ایران نے باقاعدہ احتجاج ریکارڈ کروا دیا ہے۔ایرانی سفیر نے قطر، بحرین، متحدہ عرب امارات، سعودی عرب اور کویت پر زور دیا کہ وہ اچھے ہمسائے کے اصولوں کی پاسداری کریں اور اپنی سرزمین کسی تیسرے ملک کے خلاف استعمال نہ ہونے دیں۔تجزیہ کاروں کے مطابق اسرائیل اور ایران کے درمیان بڑھتی ہوئی کشیدگی نہ صرف خطے بلکہ عالمی امن کے لیے بھی خطرہ بن سکتی ہے، جبکہ امریکا کے ممکنہ کردار پر بھی سوالات اٹھ رہے ہیں۔

ایرانی جلاوطن رہنما رضا پہلوی پر برلن میں ایک پریس کانفرنس کے دوران نامعلوم شخص نے لال رنگ پھینک دیا، جس کے بعد موقع پر موجود سکیورٹی اہلکار فوری حرکت میں آگئے۔

میڈیا رپورٹس کے مطابق واقعہ اس وقت پیش آیا جب رضا پہلوی صحافیوں سے گفتگو کر رہے تھے۔ اسی دوران ایک شخص نے اچانک ان پر لال رنگ کا مادہ پھینکا، جو بظاہر کیچپ جیسا پیسٹ تھا اور ان کی گردن اور کندھے پر جا لگا۔سوشل میڈیا پر وائرل ہونے والی ویڈیو میں دیکھا جا سکتا ہے کہ حملے کے وقت رضا پہلوی کے ساتھ سکیورٹی موجود تھی، جس نے فوری طور پر صورتحال کو قابو میں لیا۔

پولیس نے بروقت کارروائی کرتے ہوئے حملہ کرنے والے مشتبہ شخص کو موقع سے گرفتار کر لیا، جبکہ واقعے کی مزید تحقیقات جاری ہیں۔یاد رہے کہ رضا پہلوی ایران کی موجودہ حکومت کے ناقدین میں شمار ہوتے ہیں اور جلاوطنی کے دوران مختلف بین الاقوامی فورمز پر اپنی سیاسی سرگرمیاں جاری رکھے ہوئے ہیں۔

‎امریکا نے مشرق وسطیٰ میں اپنی عسکری موجودگی مزید مضبوط کرتے ہوئے ایک اور طیارہ بردار بحری جہاز تعینات کر دیا ہے۔ امریکی سینٹرل کمانڈ کے مطابق یو ایس ایس جارج ایچ ڈبلیو بُش بحر ہند میں داخل ہو کر سینٹکام کے دائرہ اختیار میں شامل ہو گیا ہے۔
‎عرب میڈیا رپورٹس کے مطابق اس پیش رفت کے بعد خطے میں موجود امریکی طیارہ بردار بحری جہازوں کی تعداد بڑھ کر تین ہو گئی ہے، جس سے امریکا کی بحری طاقت میں نمایاں اضافہ دیکھا جا رہا ہے۔ یہ اقدام ایسے وقت میں سامنے آیا ہے جب مشرق وسطیٰ میں کشیدگی پہلے ہی عروج پر ہے۔
‎دفاعی ماہرین کا کہنا ہے کہ طیارہ بردار بحری جہاز کسی بھی ملک کی سمندری طاقت کا اہم حصہ ہوتے ہیں، جو نہ صرف جنگی طیاروں کی نقل و حرکت کو ممکن بناتے ہیں بلکہ فوری ردعمل کی صلاحیت بھی فراہم کرتے ہیں۔ اس اضافی تعیناتی سے امریکا کو خطے میں آپریشنل برتری حاصل ہو سکتی ہے۔
‎امریکی حکام کے مطابق یہ اقدام خطے میں استحکام برقرار رکھنے اور عالمی بحری راستوں کی حفاظت کو یقینی بنانے کے لیے کیا گیا ہے۔ تاہم بعض تجزیہ کار اس تعیناتی کو بڑھتی ہوئی ایران امریکا کشیدگی کے تناظر میں بھی دیکھ رہے ہیں۔
‎خطے میں پہلے ہی جاری کشیدگی کے باعث عالمی برادری صورتحال پر گہری نظر رکھے ہوئے ہے، جبکہ اس نئی تعیناتی سے سفارتی اور عسکری سطح پر مزید ردعمل سامنے آنے کا امکان ظاہر کیا جا رہا ہے۔

‎امریکا اور ایران کے درمیان جاری مذاکرات میں غیر یقینی صورتحال کے باعث عالمی منڈی میں خام تیل کی قیمتوں میں نمایاں اضافہ دیکھنے میں آیا ہے، جس کے اثرات عالمی معیشت اور اسٹاک مارکیٹس پر بھی ظاہر ہو رہے ہیں۔
‎تازہ اعداد و شمار کے مطابق برینٹ خام تیل کی قیمت 103 ڈالر فی بیرل سے تجاوز کر گئی ہے، جبکہ ڈبلیو ٹی آئی خام تیل بھی تقریباً 95 ڈالر فی بیرل کی سطح پر ٹریڈ ہوتا دیکھا گیا۔ ماہرین کے مطابق مشرق وسطیٰ میں بڑھتی ہوئی کشیدگی اور آبنائے ہرمز کی صورتحال نے تیل کی سپلائی کے حوالے سے خدشات کو بڑھا دیا ہے، جس کے باعث قیمتیں اوپر جا رہی ہیں۔
‎دوسری جانب عالمی اسٹاک مارکیٹس میں ملا جلا رجحان سامنے آیا ہے۔ پاکستان اسٹاک ایکسچینج میں شدید مندی دیکھی گئی جہاں ہنڈرڈ انڈیکس 1,907 پوائنٹس کمی کے بعد 1 لاکھ 69 ہزار 671 پوائنٹس کی سطح پر آ گیا۔
‎ایشیا کی دیگر مارکیٹس میں بھی اتار چڑھاؤ جاری رہا۔ ہانگ کانگ کے ہینگ سینگ انڈیکس میں 0.9 فیصد کمی جبکہ جاپان کے نکئی انڈیکس میں 0.7 فیصد کمی ریکارڈ کی گئی۔ بھارتی شیئر مارکیٹس میں بھی منفی رجحان دیکھا گیا، جبکہ جنوبی کوریا کے کوسپی انڈیکس میں 0.9 فیصد اضافہ سامنے آیا۔
‎ماہرین اقتصادیات کے مطابق اگر ایران اور امریکا کے درمیان کشیدگی میں کمی نہ آئی تو تیل کی قیمتیں مزید بڑھ سکتی ہیں، جس سے مہنگائی میں اضافہ اور عالمی معاشی عدم استحکام کا خطرہ پیدا ہو سکتا ہے۔
‎تجزیہ کاروں کا کہنا ہے کہ سرمایہ کار اس وقت محتاط رویہ اختیار کیے ہوئے ہیں اور کسی بھی بڑی سفارتی پیش رفت کے منتظر ہیں، جو مارکیٹ کے رخ کا تعین کرے گی۔