Blog

بھوبال: بھارتی ریاست مدھیہ پردیش کے ضلع رائے سین میں انسانیت سوز واقعہ پیش آیا جہاں ایک 70 سالہ بزرگ کو بیٹے کے مبینہ تعلق کی وجہ سے ہجوم نے اغوا کر کے بدترین تشدد کا نشانہ بنایا اور اسے زبردستی پیشاب پینے پر مجبور کر دیا۔

پولیس کے مطابق متاثرہ شخص، بہاری بنجارہ، گاؤں اگاریا مارکھو کا رہائشی ہے۔ اس پر حملہ اس وقت کیا گیا جب اس کے بیٹے نے مبینہ طور پر ہمسایہ ضلع ودیشا کے علاقے شمش آباد کی ایک خاتون کے ساتھ فرار ہونے کی کوشش کی۔شکایت کے مطابق 10 سے 12 افراد پر مشتمل گروہ نے پہلے بنجارہ کے گھر پر دھاوا بولا، اسے اور اس کی اہلیہ کو تشدد کا نشانہ بنایا، پھر بزرگ کو زبردستی اپنے ساتھ لے گئے۔ بعد ازاں اسے تقریباً 150 کلومیٹر دور ضلع راج گڑھ کے علاقے بیاورا منتقل کیا گیا جہاں اسے بدترین تشدد کا نشانہ بنایا گیا اور بوتل میں پیشاب پلا دیا گیا۔

متاثرہ بزرگ نے بیان میں کہا،“انہوں نے مجھے بری طرح مارا پیٹا اور زبردستی پیشاب پلایا۔ میں انصاف چاہتا ہوں۔”واقعے کی سنگینی اس وقت مزید بڑھ گئی جب ملزمان نے اس تمام عمل کی ویڈیو بنا کر سوشل میڈیا پر وائرل کر دی، جس سے متاثرہ خاندان کو شدید ذہنی اذیت کا سامنا کرنا پڑا۔اہل خانہ کے مطابق ابتدائی طور پر پولیس نے کارروائی نہیں کی۔ بنجارہ کی بہو گیتا بائی نے الزام لگایا کہ ملزمان نے نہ صرف ان کے سسر کو اغوا کیا بلکہ گھر والوں کو بھی دھمکیاں دیں۔بعد ازاں متاثرہ شخص بھوبال پہنچا اور پولیس کے اعلیٰ حکام کو باقاعدہ درخواست دے کر وائرل ویڈیو بطور ثبوت پیش کی، جس کے بعد کیس نے توجہ حاصل کی۔

پولیس حکام کا کہنا ہے کہ مقدمہ درج کر لیا گیا ہے اور ملزمان کی گرفتاری کے لیے مختلف اضلاع کی پولیس مشترکہ کارروائی کر رہی ہے۔ ایس ڈی او پی پرتیبھا شرما کے مطابق واقعے کی تحقیقات جاری ہیں اور جلد ملزمان کو گرفتار کر لیا جائے گا

ایران نے امریکی دھمکیوں کے جواب میں سخت ردعمل دیتے ہوئے خبردار کیا ہے کہ اگر اس کی تیل تنصیبات کو نشانہ بنایا گیا تو بھرپور جوابی کارروائی کی جائے گی۔

ایران کے نائب صدر اسماعیل ثاقب اصفہانی نے مقامی خبر ایجنسی کے حوالے سے کہا ہے کہ اگر دشمن نے کوئی اور غلطی کی تو ایران کی حکمت عملی "اینٹ کا جواب پتھر” ہوگی۔ انہوں نے واضح کیا کہ اگر ایران کے کسی بھی آئل ویل پر حملہ کیا گیا تو ان ممالک کی تیل تنصیبات کو نشانہ بنایا جائے گا جہاں سے حملہ کیا گیا ہوگا۔اسماعیل ثاقب اصفہانی کا کہنا تھا کہ ایرانی عوام کو توانائی کی فراہمی کے حوالے سے پریشان ہونے کی ضرورت نہیں کیونکہ حکومت نے اس سلسلے میں ضروری انتظامات مکمل کر لیے ہیں۔ انہوں نے مزید کہا کہ ایران امریکی صدر ڈونلڈ ٹرمپ کی دھمکیوں سے خوفزدہ نہیں اور ہر ممکن جواب دیا جائے گا۔انہوں نے دعویٰ کیا کہ تہران کی مذاکراتی ٹیم نے مذاکرات کی میز پر دشمن پر دباؤ برقرار رکھا ہوا ہے۔

دوسری جانب ڈونلڈ ٹرمپ کی جانب سے ایران کی تیل اور بجلی کی تنصیبات کو نشانہ بنانے کی دھمکیاں بارہا دی جا چکی ہیں، جو خطے میں کشیدگی کو مزید بڑھا سکتی ہیں۔ ماہرین کے مطابق ایسے کسی بھی اقدام سے عالمی سطح پر تیل کی قیمتوں میں مزید اضافہ اور صورتحال میں شدید بگاڑ پیدا ہونے کا خدشہ ہے۔

صومالیہ کے ساحل کے قریب بحری قزاقوں نے حملہ کرکے آئل ٹینکر کو اپنے قبضے میں لے لیا، جس پر 11 پاکستانی عملے کے افراد بھی سوار ہیں۔

شپنگ ذرائع کے مطابق “اونر 25” نامی جہاز پر 21 اپریل کو مسلح قزاقوں نے دھاوا بولا اور اسے یرغمال بنا لیا۔ حملے کے بعد سے جہاز اور اس پر موجود عملے کے حوالے سے معلومات انتہائی محدود ہیں۔ذرائع کا کہنا ہے کہ وزارت بحری امور کے ڈائریکٹوریٹ آف پورٹ کی جانب سے پاکستانی عملے سے تاحال کوئی رابطہ نہیں ہو سکا، جبکہ جہاز کو بھیجنے والی ایجنسی نے بھی اس معاملے پر خاموشی اختیار کر رکھی ہے، جس سے خدشات میں مزید اضافہ ہو گیا ہے۔

دوسری جانب نجی ٹی وی جیونیوز سے گفتگو کرتے ہوئے عملے کے اہل خانہ نے شدید تشویش کا اظہار کیا ہے۔ ان کا کہنا ہے کہ جہاز کے انڈونیشین کپتان کی رہائی کے لیے انڈونیشیا کی حکومت قزاقوں سے رابطے میں ہے، تاہم پاکستانی عملے کے حوالے سے کوئی پیش رفت سامنے نہیں آئی۔اہل خانہ نے حکومت پاکستان سے مطالبہ کیا ہے کہ وہ فوری اور مؤثر اقدامات کرتے ہوئے یرغمال بنائے گئے پاکستانیوں کی بحفاظت واپسی یقینی بنائے۔