امریکی صدر کی جانب سے کشمیر کے مسئلہ پر ثالثی کے بیان پر بھارتی لوک سبھا میں خوب ہنگامہ آ رائی ہے، بھارت کی اپوزیشن جماعتوں نے مودی سے مطالبہ کیا کہ وہ خود بیان دیں تا ہم بھارتی وزیراعظم مودی ابھی تک خاموش ہیں.
باغی ٹی وی کی رپورٹ کے مطابق وزیراعظم عمران خان سے ملاقات کے دوران امریکی صدر ٹرمپ نے کشمیر پر ثالثی کی پیشکش کی ہے جس پر بھارت کی لوک سبھا میں خوب ہنگامہ آرائی ہوئی ہے، ڈپٹی چیئرمین ہری ونش نے دوپہر 12 بجے جیسے ہی وقفہ سوالات کا اعلان کیا اپوزیشن پارٹیوں-کانگریس، ترنمول کانگریس ، سماجوادی پارٹی اور بایاں محاذ کے اراکین اپنی اپنی نشستوں پر کھڑے ہو گئے ،
کانگریس کے نائب لیڈر آنند شرما ایوان میں کھڑے ہوئے اوربات کرنے کی اجازت مانگی لیکن اجازت نہیں دی گئی، احتجاج کے بعد جب شرما کو اجازت ملی تو انہوں نے کہا کہ بین الاقوامی سطح پر قومی مفادات کے سلسلے میں کوئی واقعہ ہوتا ہے تو وزیر اعظم اس پر وضاحت کرتے ہیں ۔ یہ ایوان کی روایت اور وقار رہا ہے۔ لہذا وزیر اعظم مودی کوجواب دینے کے لئے ا یوان میں آنا چاہئے۔
اقلیتی امور کے وزیر مختار عباس نقوی نے کہا کہ وزیر اعظم مودی ایوان میں آئے اور بیان دے اس کا اپوزیشن فیصلہ نہیں کرے گی، جس پر بھارتی لوک سبھا میں خوب ہنگامہ آرائی ہوئی.
بعد ازابں بھارتی حکومت نے منگل کو ایوان میں وضاحت پیش کی کہ مودی نے ٹرمپ سے اس طرح کی کبھی کوئی درخواست نہیں کی۔
واضح رہے کہ وزیراعظم عمران خان امریکا کے دورے پر ہیں، انہوں نے گزشتہ روز ڈونلڈ ٹرمپ سے ملاقات کی ہے، اس موقع پر آرمی چیف جنرل قمر جاوید باجوہ بھی ان کے ہمراہ تھے، امریکی صدر ڈونلڈ ٹرمپ نے پاکستان کو مسئلہ کشمیر پر ثالثی کی پیشکش کرتے ہوئے کہا ہے کہ دونوں رہنما اس کیلئے اہم کردار ادا کر سکتے ہیں،
