Blog

‎اسلام آباد: پاکستان تحریک انصاف کے چیئرمین بیرسٹر گوہر علی خان نے حکومت سے مطالبہ کیا ہے کہ پیٹرولیم مصنوعات کی قیمتیں فروری کی سطح پر واپس لائی جائیں اور عوام کے سامنے معاشی اعداد و شمار درست انداز میں پیش کیے جائیں۔
‎اسلام آباد میں میڈیا سے گفتگو کرتے ہوئے بیرسٹر گوہر علی خان نے کہا کہ جب عالمی منڈی میں پیٹرول کی قیمتوں میں صرف 3 فیصد اضافہ ہوا تو حکومت نے ملک میں قیمتوں میں 20 فیصد تک اضافہ کر دیا۔ انہوں نے دعویٰ کیا کہ اسی طرح جب بین الاقوامی سطح پر قیمتوں میں 17 فیصد اضافہ ہوا تھا تو اس وقت بھی حکومت نے پیٹرولیم مصنوعات کی قیمتوں میں 55 فیصد تک اضافہ کیا تھا۔
‎انہوں نے کہا کہ حکومت کو عوام کے ساتھ سنجیدگی کا مظاہرہ کرنا چاہیے اور معاشی حقائق اور اعداد و شمار درست انداز میں پیش کرنے چاہییں تاکہ عوام کو اصل صورتحال سے آگاہ رکھا جا سکے۔
‎بیرسٹر گوہر نے مطالبہ کیا کہ عالمی منڈی میں تیل کی قیمتوں میں کمی کے بعد ملک میں بھی پیٹرولیم مصنوعات کی قیمتیں کم کی جائیں اور انہیں فروری کی سطح پر واپس لایا جائے تاکہ مہنگائی سے متاثرہ عوام کو ریلیف مل سکے۔
‎امریکا اور ایران کے درمیان ہونے والے معاہدے پر تبصرہ کرتے ہوئے انہوں نے کہا کہ یہ ایک مثبت پیش رفت ہے اور اس سے خطے میں امن و استحکام کو فروغ ملے گا۔ ان کا کہنا تھا کہ اس معاہدے پر مکمل عملدرآمد ہونا چاہیے تاکہ اس کے ثمرات خطے کے تمام ممالک تک پہنچ سکیں۔
‎بیرسٹر گوہر علی خان نے کہا کہ امریکا سے یہ توقع کی جا رہی ہے کہ وہ معاہدے پر مؤثر عملدرآمد کو یقینی بنائے گا۔ انہوں نے اس بات پر بھی زور دیا کہ ماضی میں غزہ سے متعلق امن معاہدے کے باوجود حملے جاری رہے، اس لیے موجودہ معاہدے پر مسلسل نگرانی اور عملدرآمد نہایت ضروری ہے۔
‎انہوں نے مزید کہا کہ پاکستان کو خطے کی بدلتی ہوئی صورتحال پر گہری نظر رکھنی چاہیے اور ایسے اقدامات کی حمایت کرنی چاہیے جو امن، استحکام اور علاقائی تعاون کو فروغ دیں۔

‎اسلام آباد: پاکستان ٹیلی کمیونیکیشن ترمیمی بل 2026 میں ٹیلی کام کمپنیوں کو موبائل ٹاورز اور فائبر آپٹک نیٹ ورک کی تنصیب سے روکنے والوں پر 5 کروڑ روپے تک جرمانے کی تجویز نے سیاسی اور عوامی حلقوں میں نئی بحث چھیڑ دی ہے۔ مجوزہ قانون پر شہریوں کے جائیداد کے حقوق، حکومتی اختیارات اور ٹیلی کام انفراسٹرکچر کی توسیع کے حوالے سے کئی سوالات اٹھائے جا رہے ہیں۔
‎بل کے مسودے کے مطابق پاکستان ٹیلی کمیونیکیشن اتھارٹی (پی ٹی اے) کو ملک بھر میں فائبر آپٹک نیٹ ورک، موبائل ٹاورز، فائیو جی سروسز اور دیگر ٹیلی کام انفراسٹرکچر کی تنصیب کے لیے وسیع اختیارات دینے کی تجویز دی گئی ہے۔
‎مجوزہ قانون کے تحت اگر کوئی گھر کا مالک، دکاندار، زمیندار، کرایہ دار یا کوئی ادارہ ٹیلی کام کمپنیوں کو اپنی حدود میں فائبر آپٹک بچھانے یا مواصلاتی تنصیبات لگانے سے روکتا ہے تو اس پر 5 کروڑ روپے تک جرمانہ عائد کیا جا سکتا ہے۔
‎قانونی اور سماجی مبصرین کا کہنا ہے کہ اس تجویز سے نجی جائیداد کے آئینی تحفظ کے حوالے سے خدشات پیدا ہوئے ہیں۔ ان کے مطابق شہریوں کو اپنی مرضی کے خلاف زمین یا عمارت پر ٹیلی کام تنصیبات کی اجازت دینے پر مجبور نہیں کیا جا سکتا، اس لیے قانون میں بنیادی حقوق کے تحفظ کو بھی یقینی بنانا ضروری ہے۔
‎یہ معاملہ سینیٹر پلوشہ خان کی سربراہی میں قائمہ کمیٹی برائے آئی ٹی و ٹیلی کمیونیکیشن کے اجلاس میں بھی زیر بحث آیا، جہاں سینیٹر افنان اللہ، سینیٹر سعدیہ عباسی اور دیگر ارکان نے بل کی مختلف شقوں پر سوالات اور تحفظات کا اظہار کیا۔
‎سینیٹر افنان اللہ نے میڈیا سے گفتگو کرتے ہوئے کہا کہ حکومت کا مقصد ملک بھر میں فائبر نیٹ ورک کو وسعت دینا ہے، تاہم آئین پاکستان نجی جائیداد کے تحفظ کی ضمانت دیتا ہے اور کسی بھی شخص کی ملکیت کو اس کی رضامندی کے بغیر استعمال نہیں کیا جا سکتا۔
‎انہوں نے کہا کہ ٹیلی کام کمپنیوں کو "رائٹ آف وے” دینا اپنی جگہ اہم ہے، لیکن شہریوں کے بنیادی اور آئینی حقوق کا تحفظ بھی اتنا ہی ضروری ہے۔
‎سینیٹر افنان اللہ کے مطابق قائمہ کمیٹی نے اس بل پر تفصیلی غور کیا ہے اور ارکان کی جانب سے سامنے آنے والے تحفظات کے باعث بل کو مزید ترامیم، مشاورت اور قانونی جائزے کے لیے دوبارہ سینیٹ کی قائمہ کمیٹی کے سپرد کر دیا گیا ہے۔ اس لیے یہ تجویز ابھی قانون نہیں بنی اور اس پر مزید غور کیا جائے گا۔

اٹلی سے بازیاب 7 نایاب پاکستانی نوادرات وطن واپس پہنچ گئے، جنہیں پاکستان کے قونصل خانے میلان کے ذریعے محفوظ طریقے سے پاکستان منتقل کیا گیا۔

روم میں پاکستانی سفارتخانے کے مطابق یہ تاریخی نوادرات اپریل 2025 میں پاکستان کے قونصل خانے میلان کے سپرد کیے گئے تھے، جنہیں اب باقاعدہ طور پر وطن واپس لایا گیا ہے۔ سفارتخانے کا کہنا ہے کہ یہ اقدام پاکستان کے ثقافتی ورثے کے تحفظ اور قومی تاریخی اثاثوں کی بازیابی کی کوششوں کا اہم حصہ ہے۔سفارتی ذرائع کے مطابق اٹلی اس سے قبل بھی پاکستان کے تاریخی ورثے کی واپسی میں تعاون کر چکا ہے۔ اکتوبر 2025 میں اٹلی نے 90 پاکستانی تاریخی نوادرات پاکستان کے حوالے کیے تھے، جنہیں 2007 میں اٹلی کے کارابینیری ادارے نے ضبط کیا تھا۔

اٹلی میں پاکستان کے سفیر علی جاوید نے اس موقع پر کہا کہ پاکستان اور اٹلی کے درمیان آثارِ قدیمہ کی تحقیق، ثقافتی ورثے کے تحفظ اور پیشہ ورانہ تربیت کے شعبوں میں تعاون مزید مضبوط ہو رہا ہے۔ انہوں نے کہا کہ دونوں ممالک تاریخی ورثے کے تحفظ اور غیر قانونی طور پر منتقل کیے جانے والے نوادرات کی بازیابی کے لیے مشترکہ کوششیں جاری رکھے ہوئے ہیں۔

ماہرین کے مطابق تاریخی نوادرات کی واپسی نہ صرف پاکستان کے ثقافتی ورثے کے تحفظ میں معاون ثابت ہوگی بلکہ بین الاقوامی سطح پر ثقافتی تعاون کے فروغ کی بھی عکاسی کرتی ہے

پیپلز پارٹی نے سرکاری ملازمین کی تنخواہوں میں 10 فیصد اضافے کا مطالبہ کردیا ہے

قومی اسمبلی اجلاس میں اظہار خیال کرتے ہوئے راجہ پرویز اشرف نے کہا کہ سرکاری ملازمین، پنشنرز اور زراعت سے منسلک لوگ بجٹ سےفوری متاثر ہوتے ہیں، سرکاری ملازمین، پنشنرز اور زراعت سے منسلک طبقہ دباؤکا شکار رہتا ہے،کاروباری طبقے کی بھی دشواریاں ہوتی ہیں، کاروباری طبقہ مہنگائی کے تناسب سے اپنی چیزوں کی ریٹ بڑھا دیتا ہے اور آخر میں کنزیومر پر اثرات آتے ہیں، حکومت نے سرکاری ملازمین کی تنخواہوں میں 7 فیصد اضافہ کیا جو بہت کم ہے، ہم نے تنخواہوں اور پنشن میں 100 فیصد تک اضافہ کیا تھا، حکومت سے گزارش ہے کہ تنخواہوں میں اضافے کو 7 سےبڑھا کر 10 فیصد کیا جائے۔

راجہ پرویز اشرف کا مزید کہنا تھا کہ کشمیر کے حالات پر دل خون کے آنسو روتا ہے. جب ہم کشمیر گئے تھے ان لوگوں نے کھل کر بات کی اور ان کے تمام مطالبات مان لیے گئے اور 80 فیصد معاملات طے ہو گئے تھے لیکن ان کو 12 نشستوں کے معاملے پر 9 تاریخ کی احتجاج کی کال واپس لینے کی ڈیمانڈ کی گئی تھی،25کروڑ عوام ملک سے محبت کرتے ہیں بہتر ہے معیشت کے بجائے ہم ملک کو ایک ایسا ماحول دیں جہاں ہر طبقہ خوشی خوشی کام کرے۔ ہمیں امیروں کی بھی ضرورت ہے، پوری دنیا امیروں کو بلاتی ہے،ایران امریکا جنگ سے پوری دنیا کو نقصان ہو رہا تھا، حکومت کے اخراجات زیادہ اور آمدن کم ہے، وزیر اعظم اور فیلڈ مارشل نے مشکل معرکہ سر کر لیا