Blog

امریکا ،ایران جنگ بندی،پاکستان کی حالیہ سفارتی کوششوں اور ثالثی کردار نے عالمی سطح پر نمایاں توجہ حاصل کی ہے، جس کے بعد خطے سمیت بین الاقوامی حلقوں میں اس پر مختلف ردعمل سامنے آ رہے ہیں۔ دوسری جانب بھارت میں اس پیش رفت پر سیاسی و تجزیاتی حلقوں میں بحث کا سلسلہ تیز ہو گیا ہے۔

بھارتی میڈیا رپورٹس کے مطابق متعدد تجزیہ کاروں نے پاکستان کی سفارتی سرگرمیوں کو غیر معمولی قرار دیتے ہوئے اپنی حکومت کی پالیسیوں پر تنقید کی ہے۔ بعض مبصرین کا کہنا ہے کہ پاکستان کی قیادت، خصوصاً شہباز شریف اور فیلڈ مارشل سید عاصم منیر، کی عالمی سطح پر بڑھتی ہوئی پذیرائی نے خطے میں طاقت کے توازن سے متعلق نئی بحث چھیڑ دی ہے۔ایک بھارتی تجزیہ کار نے ماضی کا حوالہ دیتے ہوئے کہا کہ تقریباً ایک دہائی قبل اڑی واقعے کے بعد نریندر مودی نے پاکستان کو عالمی سطح پر تنہا کرنے کا عزم ظاہر کیا تھا، تاہم موجودہ صورتحال اس کے برعکس دکھائی دیتی ہے ، آج سفارتکاری کے میدان میں پاکستان کا نام ہے اور بھارت اور نریندری مودی کا نام و نشان تک نہیں ہے۔

دریں اثنا، مشرق وسطیٰ میں کشیدگی کم کرنے کے حوالے سے بھی اہم پیش رفت سامنے آئی ہے۔ امریکا اور ایران نے پاکستان کی جانب سے پیش کردہ دو ہفتوں کی جنگ بندی تجویز کو اصولی طور پر قبول کر لیا ہے۔ ایرانی ذرائع ابلاغ کے مطابق اس فیصلے کی منظوری مجتبیٰ خامنہ ای کی جانب سے دی گئی۔ایرانی وزیر خارجہ عباس عراقچی نے اپنے بیان میں کہا کہ اگر ایران پر حملے بند ہو جائیں تو ایران بھی جوابی کارروائی روک دے گا۔ انہوں نے مزید کہا کہ آبنائے ہرمز کے ذریعے آئندہ دو ہفتوں تک محفوظ ٹرانزٹ ممکن بنایا جا سکتا ہے، جس کے لیے فوجی سطح پر بھی رابطے جاری ہیں۔

ادھر امریکی صدر ڈونلڈ ٹرمپ نے ایران کے خلاف سخت بیانات کے بعد اپنی دی گئی ڈیڈ لائن ختم ہونے سے کچھ دیر قبل دو ہفتوں کے لیے عسکری کارروائی روکنے کا اعلان کیا۔ مبصرین کے مطابق یہ پیش رفت خطے میں کشیدگی کم کرنے کی جانب اہم قدم ہو سکتی ہے۔تجزیہ کاروں کا کہنا ہے کہ اگر یہ جنگ بندی برقرار رہتی ہے تو نہ صرف خطے میں امن و استحکام کو فروغ ملے گا بلکہ عالمی معیشت، خصوصاً تیل کی منڈیوں پر بھی مثبت اثرات مرتب ہوں گے۔ پاکستان کی ثالثی کو اس تناظر میں ایک اہم سفارتی کامیابی قرار دیا جا رہا ہے، جس نے اسے بین الاقوامی سطح پر ایک ذمہ دار اور فعال کردار کے طور پر اجاگر کیا ہے۔

امریکی صدر کی جانب سے جنگ بندی کے اعلان کے بعد ایران نے بھی آبنائے ہرمز سب کیلئے 2 ہفتے کیلئے کھولنےکا اعلان کردیا۔

وزیرخارجہ عباس عراقچی نے ایران کی قومی سلامتی کونسل کی جانب سے منظور بیان جاری کرتے ہوئے کہا کہ میں اسلامی جمہوریہ ایران کی طرف سے اپنے عزیز بھائی وزیراعظم شہبازشریف اور فیلڈ مارشل سید عاصم منیر کا مشکورہوں کہ انہوں نے خطے میں جنگ کے خاتمے کی انتھک کوشش کی،یرا ن نے وزیراعظم شہبازشریف کی اپیل اور 15 نکاتی تجاویز پر امریکا کی جانب سے مذاکرات کی درخواست مان لی ہے اور امریکا کے صدرٹرمپ نے ایران کی 10 نکاتی تجاویز پر عمومی فریم ورک پر بھی اتفاق کرلیاہے، اس بنیاد پر میں ایران کی سپریم قومی سلامتی کونسل کے حوالے سے کہتا ہوں کہ اگر ایران پر حملے روک دیے گئے تو ہماری طاقتور افواج بھی دفاعی کارروائیاں بند کردیں گی، ایرانی فوج سے رابطے کی صورت میں آبنائے ہرمز سے دو ہفتے کیلئے محفوظ راستہ دیا جائے گا تاہم اس میں تکنیکی قیود کا خیال رکھنا ہوگا

ایران نے پاکستان کی دو ہفتےکی جنگ بندی کی تجویز قبول کر لی، ایران کے نئے سپریم لیڈر نے جنگ بندی کی منظوری دی۔

ایرانی میڈیا نے کہاکہ ایران مخالف بیان بازی سے ٹرمپ کی ذلت آمیز پسپائی ہوئی جبکہ ایرانی وزیر خا رجہ عباس عراقچی نے کہا ایران پرحملے رک گئے تو ایران بھی حملے روک دے گا، ایرانی فوج سےرابطےکےساتھ آبنائےہرمزسےدوہفتےتک محفوظ ٹرانزٹ ممکن ہے،ایرانی میڈیا کے مطابق ٹرمپ نےجنگ کے خاتمے کے لیے ایران کی شرائط مان لیں جس کے بعد صدر ٹرمپ نے دو ہفتے کی بندی کا اعلان کیا ہے،ایک امریکی اہلکار نے کہا کہ ایران کے خلاف امریکی فوجی حملے دو ہفتے کے جنگ بندی کے معاہدے کے مطابق روک دیے گئے ہیں،ادھر اسرائیلی میڈ یا اور وائٹ ہاؤس عہدیداروں نے تصدیق کی ہے کہ اسرائیل نے بھی عارضی جنگ بندی سے اتفاق کر لیا۔

‎ایران کے شہر کرج کے علاقے عظیمیہ میں ایک رہائشی عمارت پر بمباری کی اطلاعات سامنے آئی ہیں جہاں مبینہ طور پر پاسدارانِ انقلاب کے اعلیٰ حکام کا اجلاس جاری تھا۔ غیر ملکی اور مقامی ذرائع کے مطابق حملہ ناظری گلی میں واقع ایک عمارت پر کیا گیا، تاہم اب تک ایرانی حکام کی جانب سے اس واقعے کی باضابطہ تصدیق نہیں کی گئی۔
رپورٹس کے مطابق اس حملے کے نتیجے میں پاسدارانِ انقلاب کے متعدد اہلکاروں کے شہید ہونے کا خدشہ ظاہر کیا جا رہا ہے، جبکہ عمارت میں موجود چند شہریوں کے متاثر ہونے کی اطلاعات بھی سامنے آئی ہیں۔ جائے وقوعہ سے سامنے آنے والی ویڈیوز میں آگ، ملبہ اور خوفزدہ شہریوں کو دیکھا جا سکتا ہے، تاہم ان ویڈیوز کی آزاد ذرائع سے تصدیق ابھی نہیں ہو سکی۔
علاقائی میڈیا کے مطابق یہ حملہ ایک حساس اجلاس کو نشانہ بنانے کے لیے کیا گیا، جس میں ممکنہ طور پر اہم فوجی شخصیات موجود تھیں۔ تاہم شہید ہونے والوں کی شناخت یا تعداد کے حوالے سے ابھی تک کوئی مستند تفصیلات جاری نہیں کی گئیں۔

‎ایران میں حالیہ کشیدگی کے دوران عوام نے غیر معمولی ردعمل دیتے ہوئے ملک کے اہم انفراسٹرکچر کے تحفظ کے لیے سڑکوں پر نکلنے کا فیصلہ کیا ہے۔ مختلف شہروں میں شہریوں نے پلوں اور بجلی پیدا کرنے والے مراکز کے گرد انسانی زنجیر بنا کر اپنے عزم کا اظہار کیا۔
‎رپورٹس کے مطابق ایرانی عوام نے قومی پرچم ہاتھوں میں تھام کر حساس مقامات پر جمع ہو کر واضح پیغام دیا کہ وہ دھمکیوں سے خوفزدہ نہیں ہوں گے۔ یہ اقدام ایسے وقت میں سامنے آیا ہے جب اہم تنصیبات کو نشانہ بنانے کی دھمکیاں دی جا رہی ہیں۔
‎مظاہرین کا کہنا تھا کہ وہ کسی بھی ممکنہ حملے کے باوجود اپنے ملک کے دفاع کے لیے تیار ہیں اور اپنی جانوں کی پروا کیے بغیر ان مقامات پر موجود ہیں۔ ان کے مطابق وہ جنگی دھمکیوں کے سامنے جھکنے کے لیے تیار نہیں اور ہر قیمت پر اپنے وطن کا دفاع کریں گے۔
‎ان مظاہروں میں ہر عمر اور ہر طبقے کے افراد شریک ہیں، جن میں بچے، بزرگ، نوجوان، طلبہ و طالبات اور خواتین بھی شامل ہیں۔ اس وسیع شرکت نے اس بات کو ظاہر کیا ہے کہ موجودہ صورتحال میں ایرانی عوام متحد ہو کر سامنے آ رہے ہیں۔
‎ماہرین کے مطابق عوام کا اس طرح حساس تنصیبات کے گرد جمع ہونا ایک غیر معمولی قدم ہے، جو نہ صرف داخلی سطح پر عزم کی علامت ہے بلکہ عالمی سطح پر بھی ایک مضبوط پیغام دیتا ہے۔
‎تاہم ماہرین یہ بھی خبردار کرتے ہیں کہ ایسے مقامات پر شہریوں کی موجودگی خطرناک ہو سکتی ہے، اس لیے حالات کو بہتر بنانے کے لیے فوری سفارتی اقدامات ناگزیر ہیں۔