Blog


مشرق وسطیٰ میں بڑھتی ہوئی کشیدگی کے باعث فیڈرل بورڈ آف انٹرمیڈیٹ اینڈ سیکنڈری ایجوکیشن نے چار ممالک میں میٹرک (دہم جماعت) کے امتحانات ملتوی کرنے کا اعلان کر دیا ہے۔
بورڈ کی جانب سے جاری نوٹیفکیشن کے مطابق یہ فیصلہ طلبہ کی سیکیورٹی کو مدنظر رکھتے ہوئے کیا گیا ہے۔ جن ممالک میں امتحانات ملتوی کیے گئے ہیں ان میں ایران، کویت، متحدہ عرب امارات اور بحرین شامل ہیں۔
‎واضح رہے کہ ان ممالک میں میٹرک کے امتحانات 31 مارچ 2026 سے شروع ہونا تھے، تاہم موجودہ علاقائی صورتحال کے باعث انہیں فی الحال روک دیا گیا ہے۔
‎فیڈرل بورڈ کا کہنا ہے کہ نئی تاریخوں کا اعلان حالات بہتر ہونے پر کیا جائے گا اور طلبہ و والدین کو بروقت آگاہ کیا جائے گا، اس لیے کسی قسم کی پریشانی کی ضرورت نہیں۔
‎دوسری جانب پنجاب کے تمام تعلیمی بورڈز کے تحت میٹرک کے پہلے سالانہ امتحانات 2026 کا آغاز کل 26 مارچ سے ہوگا، جس کیلئے تمام انتظامات مکمل کر لیے گئے ہیں۔ پرائیویٹ طلبہ اپنی رول نمبر سلپس متعلقہ بورڈز کی ویب سائٹس سے حاصل کر سکتے ہیں۔


پاکستان انجینئرنگ کونسل نے نوجوان انجینئرز کو خود مختار بنانے اور انہیں عالمی منڈی تک رسائی دینے کیلئے “گلوبل انجینئرنگ فری لانس انیشی ایٹو” کا آغاز کر دیا ہے۔
اس پروگرام کے تحت ملک بھر سے 5 ہزار انجینئرز کو آن لائن تربیت دی جائے گی تاکہ وہ بین الاقوامی فری لانس پلیٹ فارمز پر کام حاصل کر سکیں۔ تربیت کے دوران شرکا کو نہ صرف کام کے مواقع تلاش کرنے بلکہ ایک مضبوط پورٹ فولیو بنانے اور پہلا فری لانس پروجیکٹ حاصل کرنے کے حوالے سے بھی رہنمائی فراہم کی جائے گی۔
‎یہ آن لائن کورس رواں سال اپریل کے تیسرے ہفتے میں شروع ہوگا جس میں جدید تقاضوں کے مطابق مہارتیں سکھائی جائیں گی۔
‎چیئرمین پی ای سی وسیم نذیر کے مطابق انجینئرنگ کا شعبہ تیزی سے ڈیجیٹل اور ریموٹ ورک کی طرف بڑھ رہا ہے، اس لیے نوجوانوں کو اس تبدیلی کے مطابق تیار کرنا ضروری ہے۔ انہوں نے بتایا کہ پروگرام میں آرٹیفیشل انٹیلیجنس کی مدد سے شرکا کی صلاحیتوں کا جائزہ لیا جائے گا تاکہ انہیں ان کی مہارت کے مطابق بہترین مواقع فراہم کیے جا سکیں۔
‎وسیم نذیر کا کہنا تھا کہ اس اقدام سے نہ صرف انجینئرز کو عالمی سطح پر روزگار کے مواقع ملیں گے بلکہ پاکستان کی انجینئرنگ خدمات کی برآمدات میں بھی اضافہ ہوگا اور ملک کو قیمتی زرمبادلہ حاصل ہوگا۔


ایران جنگ اور مشرق وسطیٰ میں بڑھتی ہوئی کشیدگی کے باعث پیدا ہونے والے عالمی توانائی بحران نے دنیا بھر کے ممالک کو متاثر کرنا شروع کر دیا ہے، جس کے نتیجے میں فلپائن نے ملک میں ایک سال کیلئے قومی انرجی ایمرجنسی نافذ کر دی ہے۔
غیر ملکی میڈیا کے مطابق فلپائن کے صدر فرڈیننڈ مارکوس جونیئر نے اعلان کیا کہ ملک کو توانائی کی فراہمی اور استحکام کے حوالے سے سنگین خطرات لاحق ہیں، جس کے پیش نظر فوری اقدامات ناگزیر ہو گئے ہیں۔
‎رپورٹ کے مطابق فلپائن نے بحران سے نمٹنے کیلئے روس سے ایک لاکھ ٹن خام تیل خریدنے کا فیصلہ بھی کیا ہے تاکہ توانائی کی قلت کو کم کیا جا سکے۔
‎دوسری جانب بھارت میں پٹرول اور گیس کی شدید قلت کے باعث پٹرول پمپس پر لمبی قطاریں لگ گئی ہیں جبکہ کمبوڈیا میں بھی شہریوں کو اسی صورتحال کا سامنا ہے۔
‎بنگلہ دیش میں جیٹ فیول کی قیمت میں 79 فیصد تک اضافہ ہو چکا ہے اور مارچ کے مہینے میں دوسری مرتبہ قیمتیں بڑھائی گئی ہیں۔
‎ادھر جنوبی کوریا نے توانائی بحران سے نمٹنے کیلئے 16 ارب ڈالر کے خصوصی بجٹ کا اعلان کیا ہے جبکہ نیوزی لینڈ میں ایندھن کی قیمتیں تاریخ کی بلند ترین سطح پر پہنچ گئی ہیں۔
‎ماہرین کے مطابق اگر مشرق وسطیٰ کی صورتحال مزید بگڑی تو عالمی توانائی بحران مزید شدت اختیار کر سکتا ہے، جس کے اثرات معیشت اور روزمرہ زندگی پر گہرے ہوں گے۔


ہسپانوی وزیراعظم پیڈرو سانچیز نے کہا ہے کہ اسرائیلی وزیراعظم نیتن یاہو لبنان میں بھی وہی تباہی پھیلانا چاہتے ہیں جو غزہ میں دیکھی گئی۔
اسپین کی پارلیمنٹ میں خطاب کرتے ہوئے پیڈرو سانچیز کا کہنا تھا کہ مشرق وسطیٰ کی صورتحال انتہائی نازک ہو چکی ہے اور خطے میں کشیدگی مسلسل بڑھ رہی ہے۔
‎انہوں نے ایران کی قیادت کے حوالے سے بھی تبصرہ کرتے ہوئے کہا کہ نئی ایرانی قیادت اپنے پیشرو کے مقابلے میں زیادہ سخت مؤقف رکھتی ہے۔ ان کا کہنا تھا کہ مجتبیٰ خامنہ ای اپنے والد کی طرح سخت پالیسیوں کے حامی ہیں بلکہ ان سے بھی زیادہ سخت گیر ثابت ہو سکتے ہیں۔
‎پیڈرو سانچیز نے خطے میں امن کی ضرورت پر زور دیتے ہوئے کہا کہ موجودہ حالات مزید بگاڑ کے متحمل نہیں ہو سکتے اور عالمی برادری کو فوری کردار ادا کرنا ہوگا۔

ایران کی بحریہ کے کمانڈر شہرام ایرانی نے کہا ہے کہ امریکی طیارہ بردار بحری بیڑا یو ایس ایس ابراہم لنکن مسلسل ایرانی نگرانی میں ہے اور اس کی نقل و حرکت پر گہری نظر رکھی جا رہی ہے۔

شہرام ایرانی کے مطابق جیسے ہی یہ امریکی بیڑا ایرانی میزائلوں کی رینج میں داخل ہوگا، اسے فوری طور پر نشانہ بنایا جا سکتا ہے۔ انہوں نے خبردار کیا کہ ایران اپنی سمندری حدود اور قومی سلامتی کے تحفظ کے لیے ہر ممکن اقدام کرے گا۔ایرانی بحریہ کا مزید کہنا ہے کہ امریکی بحری بیڑے نے دعویٰ کیا ہے کہ ساحل سے داغے گئے کروز میزائلوں کے بعد طیارہ بردار بحری جہاز نے اپنی پوزیشن تبدیل کر لی ہے تاکہ ممکنہ خطرات سے بچا جا سکے۔

دوسری جانب برطانوی اخبار دی ٹیلی گراف نے ایک ایسی رپورٹ جاری کی ہے جس نے امریکی بحریہ کے ایوانوں میں کھلبلی مچا دی ہے۔ اب تک دنیا سمجھ رہی تھی کہ ایران کا اصل ہتھیار اس کے میزائل اور ڈرونز ہیں، لیکن اصل خطرہ تو سمندر کی گہرائیوں میں چھپا ہوا ہے،رپورٹ کے مطابق ایران نے چھوٹی مگر انتہائی مہلک آبدوزوں کا ایک ایسا نیٹ ورک تیار کر لیا ہے جو خلیج کے کم گہرے اور گدلے پانیوں میں ، یہ آبدوزیں اتنی چھوٹی اور خاموش ہیں کہ امریکہ کے جدید ترین جنگی طیارے اور سیٹیلائیٹ سسٹمز بھی انہیں آسانی سے تلاش کرنے یا نشانہ بنانے میں ناکام ہو رہے ہیں،یہ "خفیہ بیڑا” خاص طور پر آبنائے ہرمز اور خلیجی سمندری راستوں میں تجارتی جہازوں اور امریکی بیڑوں کو اچانک نشانہ بنانے کے لیے ڈیزائن کیا گیا ہے۔ ان کی موجودگی کا مطلب ہے کہ امریکہ کا کوئی بھی بحری جہاز اب محفوظ نہیں۔ماہرین کا کہنا ہے کہ یہ آبدوزیں سمندر کی تہہ میں بیٹھ کر خاموشی سے بارودی سرنگیں بچھانے اور ٹارپیڈو فائر کرنے کی صلاحیت رکھتی ہیں، جس کا پتا تب چلتا ہے جب دھماکہ ہو چکا ہوتا ہے۔


اسلام آباد میں وزیراعظم شہباز شریف کی زیر صدارت اعلیٰ سطح کا اجلاس منعقد ہوا جس میں موجودہ علاقائی صورتحال، خلیجی ممالک کو خوراک کی فراہمی اور بندرگاہوں کی کارکردگی کا جائزہ لیا گیا۔
وزیراعظم نے خلیجی ممالک کو خوراک کی برآمد کیلئے حکمت عملی پر اطمینان کا اظہار کرتے ہوئے متعلقہ اداروں کی کارکردگی کو سراہا۔ انہوں نے ہدایت کی کہ تمام ادارے خلیجی ممالک کے ساتھ قریبی رابطہ رکھیں تاکہ فوڈ سکیورٹی کو یقینی بنایا جا سکے، کیونکہ خطے کی بدلتی صورتحال عالمی سپلائی چین کو متاثر کر رہی ہے۔
‎شہباز شریف نے کہا کہ برآمدات میں تیزی لائی جائے لیکن ملک کے اندر ضروری اشیاء کی دستیابی پر کوئی سمجھوتہ نہ کیا جائے۔ انہوں نے واضح کیا کہ طلب اور رسد کی سخت نگرانی کی جائے اور فیصلوں میں تاخیر ہرگز برداشت نہیں کی جائے گی۔
‎اجلاس کو بتایا گیا کہ ایک خصوصی کمیٹی نے 40 اشیاء کی برآمد کی منظوری دے دی ہے جن میں چاول، گھی، چینی، گوشت، پولٹری، ڈیری مصنوعات، پھل اور سبزیاں شامل ہیں۔ برآمد کنندگان کا ڈیٹا بیس بھی تیار کر لیا گیا ہے اور فضائی و بحری راستوں سے تجارت کو سہل بنایا جا رہا ہے۔
‎حکام کے مطابق عید کے دوران بھی کراچی اور پورٹ قاسم مکمل طور پر فعال رہے۔ بندرگاہوں کی استعداد بڑھانے کیلئے آف ڈاک ٹرمینلز پر ٹرانس شپمنٹ کی اجازت دی گئی ہے اور کسٹمز قوانین میں بھی ترامیم کی گئی ہیں۔ مزید برآں بندرگاہوں پر ٹرانسپورٹ اخراجات میں 60 فیصد تک کمی کی گئی ہے جبکہ تمام بندرگاہوں پر ایکسپورٹ فیسلیٹیشن ڈیسک بھی قائم کر دیے گئے ہیں۔


امریکی خلائی ادارے ناسا نے چاند اور مریخ سے متعلق اپنے بڑے منصوبوں کا اعلان کر دیا ہے، جس کے تحت آئندہ چند برسوں میں خلائی تحقیق میں اہم پیش رفت متوقع ہے۔
ناسا کے منتظم جیراڈ آئزک مین نے ایک تقریب کے دوران بتایا کہ چاند پر مستقل بیس کی تعمیر فوری طور پر ممکن نہیں بلکہ اس کیلئے آئندہ 7 سالوں میں تقریباً 20 ارب ڈالر خرچ کیے جائیں گے۔ ان کے مطابق اس بیس کی تعمیر درجنوں خلائی مشنز کے ذریعے مرحلہ وار مکمل کی جائے گی۔
‎انہوں نے بتایا کہ ناسا نے چاند کے مدار میں اسپیس اسٹیشن بنانے کا منصوبہ ختم کر دیا ہے اور اب توجہ براہ راست چاند کی سطح پر بیس بنانے پر مرکوز ہے۔
‎جیراڈ آئزک مین کے مطابق مریخ کیلئے جوہری توانائی سے چلنے والے اسپیس کرافٹ کی تیاری بھی جاری ہے جسے 2028 تک روانہ کرنے کا منصوبہ ہے۔ یہ مشن مریخ پر تحقیق کیلئے جدید ٹیکنالوجی سے لیس ہوگا اور وہاں پہنچ کر ہیلی کاپٹرز کے ذریعے مزید معلومات حاصل کی جائیں گی۔
‎انہوں نے کہا کہ چین خلا میں تیزی سے پیشرفت کر رہا ہے اور امریکی برتری کو چیلنج کرنے کی کوشش کر رہا ہے، اس لیے امریکا کو اپنی خلائی حکمت عملی مزید مضبوط بنانا ہوگی۔
‎تاہم انہوں نے یہ بھی واضح کیا کہ چاند پر خلا بازوں کی واپسی میں کچھ تاخیر ہو رہی ہے کیونکہ اسپیس ایکس اب تک مطلوبہ لینڈرز تیار نہیں کر سکی۔


ایران، امریکا اور اسرائیل کے درمیان جاری کشیدگی کے باعث پیدا ہونے والے توانائی بحران نے بھارت کو بھی شدید متاثر کیا ہے جہاں بڑی تعداد میں عوام گیس کی قلت کا سامنا کر رہے ہیں۔
عرب میڈیا رپورٹس کے مطابق گیس کی قلت کے باعث خصوصاً غریب طبقہ شدید مشکلات میں گھر گیا ہے اور بہت سے لوگ دوبارہ لکڑی اور کوئلہ جلانے پر مجبور ہو گئے ہیں۔
‎مارکیٹ میں دستیاب گیس کی قیمتوں میں بھی غیر معمولی اضافہ دیکھنے میں آیا ہے جس نے عوام کی پریشانیوں میں مزید اضافہ کر دیا ہے۔
‎دوسری جانب پیٹرول کے حصول کیلئے شہریوں کو طویل قطاروں میں کھڑا ہونا پڑ رہا ہے، جس سے ملک میں توانائی بحران کی سنگینی واضح ہو رہی ہے۔
‎ماہرین کے مطابق بدانتظامی اور بڑھتے ہوئے عالمی دباؤ نے صورتحال کو مزید پیچیدہ بنا دیا ہے، جس کے باعث عام شہری سب سے زیادہ متاثر ہو رہے ہیں۔