پیٹرول ڈیلرز ایسوسی ایشن نے اعلان کیا ہے کہ 27 مارچ سے ملک بھر میں پیٹرول پمپس غیر معینہ مدت کے لیے بند کر دیے جائیں گے۔
ایسوسی ایشن کے مطابق ڈیلرز عالمی سطح پر تیل کی قلت اور مشرق وسطیٰ کی کشیدہ صورتحال کے باعث اپنے منافع کے مارجن میں اضافے کا مطالبہ کر رہے ہیں۔ تاہم اس معاملے پر حکومت کی جانب سے تاحال کوئی باضابطہ ردعمل سامنے نہیں آیا۔
یہ مطالبہ ایسے وقت سامنے آیا ہے جب گزشتہ ہفتے پیٹرول کی قیمت میں ریکارڈ 55 روپے فی لیٹر اضافہ کیا گیا تھا۔ اس کے علاوہ اطلاعات ہیں کہ حکومت آج ہونے والے ہفتہ وار جائزے میں بھی پیٹرولیم مصنوعات کی قیمتوں کو برقرار رکھنے پر غور کر رہی ہے۔
پیٹرول ڈیلرز کا کہنا ہے کہ اگر ان کے مطالبات تسلیم نہ کیے گئے تو ملک بھر میں پیٹرول پمپس بند رہیں گے جس سے ایندھن کی فراہمی متاثر ہو سکتی ہے۔
Blog
-
پیٹرول ڈیلرز کا 27 مارچ سے ملک بھر میں غیر معینہ مدت تک ہڑتال کا اعلان
-
امریکا کا ایران پر شدید حملوں کا اعلان، آج جنگ کا سب سے سخت دن ہوگا
امریکی وزیر دفاع پیٹ ہیگسیتھ نے میڈیا بریفنگ میں کہا ہے کہ ایران کے فضائی دفاعی نظام کو شدید نقصان پہنچ چکا ہے اور جنگ کے دوران مزید سخت حملے کیے جائیں گے۔
انہوں نے کہا کہ امریکا اپنی کارروائیاں روکنے کا ارادہ نہیں رکھتا اور آج ایران پر حملوں کا سب سے سخت دن ہو سکتا ہے۔ ان کے مطابق ایرانی حکومت کے اہم رہنما زیر زمین پناہ گاہوں میں چلے گئے ہیں۔
پیٹ ہیگسیتھ کا کہنا تھا کہ آبنائے ہرمز میں پیدا ہونے والی صورتحال پر دنیا کو زیادہ پریشان ہونے کی ضرورت نہیں اور امریکا وہاں حالات پر نظر رکھے ہوئے ہے۔
اس موقع پر امریکی چیئرمین جوائنٹ چیفس آف اسٹاف نے کہا کہ ایران پر فوجی کارروائیوں کو آج چودہ دن مکمل ہو گئے ہیں اور آج کے حملے شدت کے اعتبار سے اب تک کے سب سے بڑے حملے ہوں گے۔
انہوں نے مزید بتایا کہ دو ہفتوں سے بھی کم عرصے میں امریکی کارروائیوں کے نتیجے میں ایرانی بحریہ کو بڑی حد تک غیر فعال کر دیا گیا ہے۔ تاہم ان کا کہنا تھا کہ ایران کے پاس اب بھی اتنی صلاحیت موجود ہے کہ وہ خطے میں موجود اتحادی افواج اور تجارتی جہازوں کو نقصان پہنچا سکتا ہے۔ -
افغانستان کے ڈرون حملے،کوہاٹ،اسلام آباد،پشاور،اٹک میں ڈرون گرے،اسلام آباد ایئر پورٹ بند
افغانستان کی عبوری حکومت باز نہ آئی، پاکستان کی طرف ڈرون بھیج دیئے،راولپنڈی اور اسلام آباد کے مختلف علاقوں میں جمعہ کی شام ڈرون سرگرمیوں اور حملوں کی اطلاعات سامنے آئی ہیں، جس کے بعد سکیورٹی اداروں کو ہائی الرٹ کر دیا گیا ہے جبکہ احتیاطی اقدامات کے طور پر اسلام آباد ایئرپورٹ پر پروازیں عارضی طور پر معطل کر دی گئی ہیں۔
سکیورٹی ذرائع کے مطابق دو ڈرون پشاور اور دیگر شمالی علاقوں سے پرواز کرتے ہوئے اٹک کے راستے راولپنڈی کی سمت بڑھتے ہوئے دیکھے گئے۔ اطلاعات کے مطابق شام تقریباً 7 بج کر 15 منٹ پر یہ ڈرون اٹک شہر کے اوپر سے گزرے اور ان کی ممکنہ سمت واہ کینٹ اور اسلام آباد بتائی جا رہی تھی۔دوسری جانب کوہاٹ کینٹ کے علاقے میں مبینہ کامی کازی ڈرون حملے کی تین مختلف جگہوں پر اطلاعات موصول ہوئیں۔پہلا دھماکہ صبح 7 بج کر 55 منٹ پر جس کے نتیجے میں تین افراد زخمی ہوئے۔دوسرا واقعہ صبح 8 بج کر 55 منٹ پر پاک فضائیہ کے آفیسرز میس کے قریب پیش آیا جبکہ تیسرا واقعہ صبح 9 بج کر 7 منٹ پر پاک فضائیہ کے افسران کی رہائشی کالونی کے قریب لاگ ہاؤس کے ساتھ ریکارڈ کیا گیا حکام کے مطابق سکیورٹی خدشات کے باعث ابھی ان مقامات کا مکمل تکنیکی تجزیہ نہیں کیا جا سکا۔
ادھر 13 مارچ 2026 کو شام تقریباً 7 بجے راولپنڈی کے حمزہ کیمپ میں ایک ڈرون گرنے کی اطلاع بھی سامنے آئی۔ ذرائع کے مطابق ڈرون بلاک 28 کی افسران کی رہائش گاہ کی بالائی منزل سے ٹکرایا تاہم خوش قسمتی سے اس میں دھماکہ نہیں ہوا اور کوئی جانی نقصان نہیں ہوا۔مزید اطلاعات کے مطابق ایک اور ڈرون اسلام آباد کے سیکٹر I-8 کے قریب گرنے یا ٹکرانے کی خبر بھی زیر گردش ہے،
صورتحال کے پیش نظر سکیورٹی فورسز نے 100 فیصد اسٹینڈ ٹو نافذ کر دیا ہے، کینٹ کے تمام چیک پوسٹس بند کر دی گئی ہیں اور صرف محدود آمد و رفت کی اجازت دی جا رہی ہے۔ فوری ردعمل کی فورسز کو کسی بھی ہنگامی صورتحال سے نمٹنے کے لیے تیار رکھا گیا ہے جبکہ سی ایم ایچ کو بھی ہائی الرٹ پر رکھا گیا ہے۔حکام کے مطابق شہریوں سے اپیل کی گئی ہے کہ وہ افواہوں سے گریز کریں اور غیر ضروری طور پر حساس مقامات کے قریب جانے سے احتیاط کریں۔
-
اسلام آباد کے قریب دو ڈرون مار گرائے گئے، ائیرپورٹ عارضی طور پر پروازوں کے لیے بند
پاکستانی حکام کے مطابق اسلام آباد اور راولپنڈی کے سنگم کے قریب فیصل آباد روڈ کے علاقے میں پرواز کرنے والے دو مشتبہ ڈرونز کو فضائی دفاعی نظام نے مار گرایا ہے۔
سینئر پاکستانی حکام کا کہنا ہے کہ ڈرونز دارالحکومت کے فضائی حدود کے قریب منڈلا رہے تھے جس کے بعد فوری کارروائی کرتے ہوئے انہیں نشانہ بنایا گیا۔
واقعے کے بعد احتیاطی اقدامات کے طور پر اسلام آباد کی فضائی حدود کو عارضی طور پر بند کر دیا گیا جبکہ اسلام آباد انٹرنیشنل ائیرپورٹ پر لینڈنگ اور ٹیک آف کے تمام آپریشنز بھی وقتی طور پر معطل کر دیے گئے ہیں۔
ائیرپورٹ ذرائع کے مطابق تمام پروازوں کو روک دیا گیا ہے اور صورتحال کا جائزہ لینے کے بعد فلائٹ آپریشن بحال کرنے کا فیصلہ کیا جائے گا۔
حکام کے مطابق سیکیورٹی ادارے صورتحال پر نظر رکھے ہوئے ہیں اور فضائی حدود کی حفاظت کے لیے ضروری اقدامات کیے جا رہے ہیں۔ -
آبنائے ہرمز کی بندش سے روس کو بڑا فائدہ، تیل سے یومیہ 150 ملین ڈالر اضافی آمدن
مشرقِ وسطیٰ میں جاری کشیدگی اور آبنائے ہرمز کی بندش کے باعث عالمی تیل منڈی میں بڑی تبدیلیاں دیکھنے میں آ رہی ہیں جس سے روس کو نمایاں معاشی فائدہ ہو رہا ہے۔
برطانوی جریدے کی رپورٹ کے مطابق ایران سے متعلق جنگی صورتحال اور آبنائے ہرمز میں رکاوٹوں کے بعد روسی تیل کی عالمی مانگ میں تیزی سے اضافہ ہوا ہے۔ اس صورتحال کے نتیجے میں روس کو تیل کی فروخت سے یومیہ تقریباً 150 ملین ڈالر اضافی آمدن حاصل ہو رہی ہے۔
رپورٹ میں بتایا گیا ہے کہ بھارت اور چین روسی تیل کے بڑے خریدار بن کر سامنے آئے ہیں۔ خاص طور پر بھارت کی روس سے تیل کی درآمدات بڑھ کر تقریباً 1.5 ملین بیرل یومیہ تک پہنچ گئی ہیں، جو ایک ماہ کے دوران تقریباً 50 فیصد اضافہ ظاہر کرتی ہیں۔
مزید کہا گیا ہے کہ تیل کی برآمدات پر عائد ٹیکس کی بدولت روس کو اب تک 1.3 سے 1.9 ارب ڈالر تک غیر متوقع اضافی فائدہ حاصل ہو چکا ہے۔
رپورٹ کے مطابق اگر عالمی منڈی میں قیمتیں اسی طرح برقرار رہیں تو مارچ کے مہینے میں روس کو مجموعی طور پر 3.3 سے 4.9 ارب ڈالر تک اضافی آمدن ہونے کا امکان ہے۔ -
نیتن یاہو کی موت کی افواہیں گردش میں، اسرائیلی حکومت کی ویڈیو پر بھی سوالات اٹھ گئے
اسرائیل کے وزیر اعظم بنیامین نیتن یاہو کی موت سے متعلق سوشل میڈیا پر ایک بار پھر مختلف دعوے گردش کر رہے ہیں۔ بعض پوسٹس میں کہا جا رہا ہے کہ وہ اپنے گھر پر ہونے والے حملے میں ہلاک ہو گئے تھے اور یہ خبر گزشتہ چار دنوں سے غیر مصدقہ طور پر پھیل رہی ہے۔
ان دعوؤں میں یہ بھی کہا گیا کہ اس مبینہ حملے میں نیتن یاہو کے بھائی اور اسرائیل کے قومی سلامتی کے وزیر ایتامار بن گویر بھی مارے گئے۔ تاہم ان دعوؤں کی اب تک کسی سرکاری ذریعے سے تصدیق نہیں ہو سکی۔
اسی دوران اسرائیلی حکومت کی جانب سے ایک ویڈیو جاری کی گئی جس میں نیتن یاہو کو براہ راست ٹی وی پر خطاب کرتے دکھایا گیا ہے۔ سوشل میڈیا پر کچھ صارفین نے اس ویڈیو پر بھی سوالات اٹھائے ہیں اور دعویٰ کیا ہے کہ یہ ویڈیو مصنوعی ذہانت کی مدد سے تیار کی گئی ہو سکتی ہے۔
کچھ صارفین نے ویڈیو کے ایک منظر کی نشاندہی کرتے ہوئے کہا کہ نیتن یاہو کے ہاتھ میں چھ انگلیاں نظر آ رہی ہیں جس کے بعد ویڈیو کی حقیقت پر مزید بحث شروع ہو گئی ہے۔
تاہم اب تک اسرائیلی حکومت یا کسی معتبر بین الاقوامی ادارے نے نیتن یاہو کی موت یا زخمی ہونے کی کوئی تصدیق نہیں کی۔ صورتحال کے حوالے سے حتمی معلومات سامنے آنے کا انتظار کیا جا رہا ہے۔ -
آپریشن غزب للحق: پاکستان کا افغانستان میں دہشت گرد ٹھکانوں پر بڑا فضائی حملہ
پاکستان کی جانب سے جاری معلومات کے مطابق آپریشن “غزب للحق” کے تحت افغانستان میں دہشت گردوں کے ٹھکانوں کو نشانہ بنایا گیا ہے۔ آپریشن کے حوالے سے جاری تازہ اپڈیٹ میں دعویٰ کیا گیا ہے کہ کارروائی میں بڑی تعداد میں شدت پسند ہلاک اور زخمی ہوئے جبکہ متعدد عسکری تنصیبات تباہ کر دی گئیں۔
جاری کردہ تفصیلات کے مطابق کارروائی کے نتیجے میں 663 جنگجو ہلاک اور 887 سے زائد زخمی ہوئے۔ اس کے علاوہ 249 عسکری چوکیاں تباہ جبکہ 44 چوکیوں پر قبضہ کیے جانے کا بھی دعویٰ کیا گیا ہے۔
بیان میں کہا گیا ہے کہ کارروائی کے دوران 224 ٹینک، بکتر بند گاڑیاں اور توپ خانہ بھی تباہ کیا گیا۔ مزید بتایا گیا کہ افغانستان کے مختلف علاقوں میں 70 مقامات کو فضائی حملوں میں نشانہ بنایا گیا جو مبینہ طور پر دہشت گردوں کے ٹھکانے اور معاونت فراہم کرنے والے مراکز تھے۔
اطلاعات کے مطابق 12 اور 13 مارچ 2026 کی درمیانی شب پاکستان نے افغانستان میں دہشت گردوں سے منسلک تنصیبات کو کامیابی سے نشانہ بنایا۔ کارروائی کے دوران کابل، پکتیا اور قندھار کے علاقوں میں مبینہ طور پر لاجسٹک بیسز اور تربیتی کیمپوں کو ہدف بنایا گیا۔
جاری بیان میں کہا گیا ہے کہ حملوں میں صرف ان مقامات کو نشانہ بنایا گیا جو دہشت گردی کی سرگرمیوں میں براہ راست یا بالواسطہ ملوث تھے۔ حکام کے مطابق کسی شہری آبادی یا سول انفراسٹرکچر کو نشانہ نہیں بنایا گیا اور اس حوالے سے پھیلائی جانے والی خبروں کو بے بنیاد قرار دیا گیا ہے۔ -
وزیراعظم شہباز شریف کا پیٹرولیم مصنوعات کی قیمتیں نہ بڑھانے کا فیصلہ
وزیراعظم شہباز شریف نے آئندہ ہفتے کے لیے پیٹرولیم مصنوعات کی قیمتوں کے حوالے سے اہم فیصلہ کرتے ہوئے اعلان کیا ہے کہ اس مرتبہ قیمتوں میں اضافہ نہیں کیا جائے گا۔
وزیراعظم آفس سے جاری بیان میں کہا گیا ہے کہ عالمی منڈی میں تیل کی قیمتوں میں اضافے کے باوجود حکومت نے عوام کو ریلیف دینے کے لیے پیٹرولیم مصنوعات کی قیمتیں برقرار رکھنے کا فیصلہ کیا ہے۔ وزیراعظم نے کہا کہ حکومت نے عوام سے جو وعدہ کیا تھا اس کے مطابق عام آدمی پر بوجھ کم رکھنے کی کوشش کی جا رہی ہے۔
ان کا کہنا تھا کہ موجودہ مشکل معاشی حالات کے باوجود حکومت کی ترجیح یہ ہے کہ زیادہ سے زیادہ ریلیف عوام تک پہنچایا جائے اور مہنگائی کے اثرات کو کم کیا جائے۔
وزیراعظم شہباز شریف نے کہا کہ خطے میں بڑھتی کشیدگی کے باعث عالمی معیشت دباؤ کا شکار ہے جس کے اثرات پاکستان کی معیشت پر بھی پڑ سکتے ہیں۔ تاہم حکومت بروقت پالیسی سازی، بچت کے اقدامات اور مالی نظم و ضبط کے ذریعے اس صورتحال سے نمٹنے کی کوشش کر رہی ہے۔
انہوں نے مزید کہا کہ حکومت کی معاشی اور سفارتی ٹیم کی کوششوں سے ملک کی ضروریات کے مطابق خام تیل کی فراہمی یقینی بنائی جا رہی ہے۔ اس کے ساتھ وفاقی اور صوبائی حکومتیں مل کر اس بات کو یقینی بنا رہی ہیں کہ کوئی بھی پیٹرول پمپ مقررہ قیمت سے زیادہ وصولی نہ کرے۔
وزیراعظم نے امید ظاہر کی کہ عالمی سطح پر حالات بہتر ہوں گے اور عالمی منڈی میں پیٹرولیم مصنوعات کی قیمتوں میں استحکام آئے گا۔ -
نہال ہاشمی نے گورنر سندھ کے عہدے کا حلف اٹھا لیا
کراچی: پاکستان مسلم لیگ (ن) کے رہنما نہال ہاشمی نے گورنر سندھ کے عہدے کا باضابطہ حلف اٹھا لیا۔ سندھ ہائیکورٹ کے چیف جسٹس ظفر احمد راجپوت نے نہال ہاشمی سے گورنر کے عہدے کا حلف لیا۔
تقریب حلف برداری میں وزیراعلیٰ سندھ سید مرادعلی شاہ، مرتضیٰ وہاب اور مسلم لیگ (ن) سندھ کے صدر بشیر میمن سمیت مختلف سیاسی و سماجی شخصیات، سرکاری حکام اور کارکنان نے شرکت کی۔ تقریب کے دوران مہمانوں نے نئے گورنر کو مبارکباد دی اور ان کے لیے نیک خواہشات کا اظہار کیا۔اس موقع پر صوبائی قیادت نے امید ظاہر کی کہ نئے گورنر صوبے کی ترقی کے لیے مثبت اقدامات کریں گے۔
یاد رہے کہ صدر مملکت آصف علی زرداری نے گزشتہ روزنہال ہاشمی کی بطور گورنر سندھ تعیناتی کی منظوری دی تھی، جس کے بعد آج باقاعدہ طور پر ان کی حلف برداری کی تقریب منعقد کی گئی۔
-
حالیہ مشرق وسطیٰ جنگ میں پاکستان کا ابھرتا کردار دنیا دیکھ رہی ہے ،خالد مسعود سندھو
مرکزی مسلم لیگ کے صدر خالد مسعود سندھو نے کہا ہے کہ حالیہ مشرق وسطیٰ جنگ میں پاکستان کا ابھرتا کردار دنیا دیکھ رہی ہے ،وزیراعظم کا دورہ سعودی عرب واضح پیغام ہے کہ حرمین الشریفین کی حفاظت پاکستان اولین فریضہ سمجھتا ہے، افغانستان کی عبوری حکومت دہشتگردوں کو نہیں روکے گی تو پاکستان اپنا دفاع کرتا رہے گا، لکی مروت میں پولیس موبائل حملے میں چھ اہلکاروں کی شہادت پر گہرے رنج و غم کا اظہار کرتے ہیں
ان خیالات کا اظہار انہوں نے افطار ڈنر کی تقریب سے خطاب کرتے ہوئے کیا، اس موقع پر انجنئیر اعجاز نصر ،ڈپٹی سیکرٹری اطلاعات طہٰ منیب ،احمد اجمل و دیگر نے بھی خطاب کیا، خالد مسعود سندھو کا کہنا تھا کہ اسرائیل و امریکہ کے ایران پر حملوں کے بعد پیدا ہونے والی صورتحال میں پاکستان کا کردار انتہائی اہم ہو چکا ہے، ایرانی و امریکی حملے قابل مذمت تو وہیں ایران کی اسلامی ممالک پر جوابی کاروائی بھی درست نہیں،پاکستان کی جانب سے قیام امن کی کوشش قابل قدر ہے، تاہم جنگ کی آڑ میں پٹرولیم مصنوعات کی قیمتوں میں اضافہ عوام دشمنی ہے،مرکزی مسلم لیگ خدمت کی سیاست کو فروغ دے رہی ہے، عوامی جذبات،حقوق کی ہمیشہ ترجمانی کرتی رہے گی، میڈیا کا معاشرے کی اصلاح میں انتہائی اہم کردار ہے،مرکزی مسلم لیگ صحافیوں کے لئے بھی تربیتی پروگرامز لا رہی ہے،
خالد مسعود سندھو کا مزید کہنا تھا کہ وطن عزیز سے دہشتگردی کے خاتمے کے لئے قوم متحد ہے،افغانستان کی عبوری حکومت اپنی سرزمین کو پاکستان کے خلاف استعمال ہونے سے نہیں روکے گی تو پاکستان دفاع کا حق استعمال کرے گا، لکی مروت میں پولیس موبائل پر حملے میں شہید 6 اہلکاروں کے لواحقین سے اظہار افسوس اور شہداکے درجات کی بلندی کے لئے دعا گو ہیں.