Blog

ممبئی کے جنوبی علاقے میں واقع نیول ڈاکیارڈ میں جمعرات کی رات اچانک آگ بھڑک اٹھی، جس کے بعد سیکیورٹی اور ریسکیو حکام فوری طور پر موقع پر پہنچ گئے۔ حکام کے مطابق آگ لگنے کا واقعہ رات تقریباً 10 بج کر 15 منٹ پر پیش آیا۔

ابتدائی اطلاعات کے مطابق آگ نیول ڈاکیارڈ کے اندر قائم سروے یارڈ بلڈنگ میں لگی۔ ایک سرکاری عہدیدار نے بتایا کہ جس مقام پر آگ بھڑکی وہ کولابا کے علاقے میں واقع گیٹ وے آف انڈیا کے بالکل سامنے ترچھی سمت میں واقع ہے، جو شہر کا ایک اہم اور حساس علاقہ تصور کیا جاتا ہے۔واقعے کی اطلاع ملتے ہی بحریہ کے حکام اور فائر فائٹنگ ٹیمیں فوری طور پر جائے وقوعہ پر پہنچ گئیں اور آگ پر قابو پانے کے لیے کارروائی شروع کردی۔ حکام کا کہنا ہے کہ تاحال کسی جانی نقصان یا زخمی ہونے کی اطلاع موصول نہیں ہوئی، تاہم مزید تفصیلات کا انتظار کیا جا رہا ہے۔

عینی شاہدین کے مطابق آگ کے شعلے دور سے دیکھے جا سکتے تھے جبکہ قریبی علاقوں میں موجود بعض افراد نے واقعے کی ویڈیوز بنا کر سوشل میڈیا پر شیئر کیں، جو تیزی سے وائرل ہو رہی ہیں۔حکام نے آگ لگنے کی وجوہات جاننے کے لیے تحقیقات شروع کر دی ہیں۔ ابتدائی طور پر کسی تخریب کاری یا بیرونی مداخلت کی تصدیق نہیں ہوئی، تاہم مکمل حقائق سامنے آنے تک کچھ بھی حتمی طور پر نہیں کہا جا سکتا۔

نیول ڈاکیارڈ بھارت کا ایک اہم دفاعی مرکز ہے، اس لیے واقعے کو حساس نوعیت کا قرار دیا جا رہا ہے۔ مزید معلومات سامنے آنے پر صورتحال مزید واضح ہو سکے گی۔

بھارتی ریاست جھارکھنڈ کے ضلع گڑھوا میں ایک افسوسناک واقعہ پیش آیا جہاں 27 سالہ یوٹیوبر نے شدید ذہنی دباؤ کے باعث اپنے گھر میں قائم جدید اسٹوڈیو کو آگ لگا دی۔

پولیس اور اہلِ محلہ کی بروقت کارروائی سے اہلِ خانہ کو تو بحفاظت نکال لیا گیا، تاہم لاکھوں روپے مالیت کا قیمتی سامان جل کر تباہ ہو گیا۔پولیس کے مطابق وِدھایاک پراجاپتی نامی نوجوان اپنے گھر سے فلم ایڈیٹنگ اور ڈیجیٹل ورک کا اسٹوڈیو چلا رہا تھا۔ مقامی افراد کا کہنا ہے کہ پراجاپتی نے جدید اسٹوڈیو بنانے کے لیے آبائی زمین فروخت کی تھی اور اسے امید تھی کہ وہ یوٹیوب پر شہرت حاصل کر کے کامیاب کیریئر بنا سکے گا۔ تاہم کئی ماہ کی مسلسل محنت کے باوجود خاطر خواہ کامیابی نہ ملنے پر وہ شدید ذہنی دباؤ اور ڈپریشن کا شکار ہو گیا تھا۔اہلِ محلہ اور سابق گاؤں پردھان پرکاش کمار ارون کے مطابق گزشتہ ایک ہفتے سے پراجاپتی نے خود کو لوگوں سے الگ تھلگ کر لیا تھا۔ گزشتہ تقریباً 10 بجے اس نے خود کو اسٹوڈیو کے اندر بند کر لیا اور مبینہ طور پر آگ لگا دی۔

آگ لگنے کے بعد پورا گھر دھوئیں سے بھر گیا جبکہ اہلِ خانہ اندر ہی پھنس کر رہ گئے کیونکہ لوہے کا دروازہ اندر سے بند تھا۔ گھر والوں کی چیخ و پکار سن کر پڑوسیوں نے فوری طور پر میرال پولیس کو اطلاع دی۔ پولیس ٹیم نے موقع پر پہنچ کر گھر کی عقبی دیوار توڑ کر اندر داخل ہونے میں کامیابی حاصل کی اور اہلِ خانہ کو بحفاظت باہر نکال لیا۔واقعے میں کسی جانی نقصان کی اطلاع نہیں ملی، تاہم آگ کی لپیٹ میں آ کر مہنگے کمپیوٹرز، کیمرے، ساؤنڈ سسٹم، لائٹنگ آلات اور دیگر جدید مشینری مکمل طور پر تباہ ہو گئی۔ ابتدائی اندازے کے مطابق 10 لاکھ روپے سے زائد کا نقصان ہوا ہے۔

پرکاش کمار ارون کا کہنا تھا کہ "وہ ایک محنتی نوجوان تھا لیکن کامیابی کے شدید دباؤ نے اسے ذہنی طور پر توڑ دیا تھا۔”ریسکیو کارروائی کے دوران پراجاپتی مبینہ طور پر پچھلی دیوار پھلانگ کر فرار ہو گیا تھا۔ اہلِ خانہ نے اسے اتوار کی صبح تلاش کر لیا، جس کے بعد اسے ذہنی معائنے اور علاج کے لیے رانچی منتقل کر دیا گیا ہے۔واقعے کے بعد متاثرہ خاندان کو شدید مالی بحران کا سامنا ہے اور انہوں نے ضلعی انتظامیہ سے مالی امداد فراہم کرنے کی اپیل کی ہے۔ پولیس واقعے کی مزید تحقیقات کر رہی ہے جبکہ مقامی افراد نے نوجوانوں میں بڑھتے ذہنی دباؤ پر تشویش کا اظہار کیا ہے۔

بہار کے ضلع منگیر میں "روز ڈے” کی ایک ویڈیو سوشل میڈیا پر وائرل ہونے کے بعد ایک خاتون اور ان کے شوہر کو قانونی مشکلات کا سامنا کرنا پڑ گیا۔

ویڈیو میں ریاست میں نافذ سخت شراب بندی قانون کی مبینہ خلاف ورزی دکھائی دینے پر پولیس نے مقدمہ درج کر کے تحقیقات شروع کر دی ہیں۔ خاتون کنچن دیوی نے مبینہ طور پر خود اپنے انسٹاگرام اور فیس بک اکاؤنٹس پر ایک ویڈیو شیئر کی، جس میں وہ اپنے شوہر کو گلاب کا پھول پیش کرنے کے بعد انہیں شراب کا گلاس دیتی اور ہاتھ میں شراب کی بوتل تھماتی دکھائی دے رہی ہیں۔ ویڈیو میں شوہر کو مسکراتے ہوئے دیکھا جا سکتا ہے، تاہم بہار میں مکمل شراب بندی کے باعث اس ویڈیو نے سوشل میڈیا پر شدید بحث چھیڑ دی۔

واضح رہے کہ بہار میں 2016 سے مکمل شراب بندی نافذ ہے اور شراب کی خرید و فروخت، ذخیرہ اندوزی اور تشہیر قانوناً جرم ہے، جس پر سخت سزائیں مقرر ہیں۔معاملہ اس وقت مزید سنگین ہو گیا جب کنچن دیوی کی ایک اور تصویر منظر عام پر آئی، جس میں وہ ایک بیوٹی پارلر کے اندر پستول کے ساتھ پوز دیتی دکھائی دے رہی ہیں۔ اس تصویر نے بھی سوشل میڈیا پر ہلچل مچا دی اور قانون نافذ کرنے والے اداروں کو حرکت میں آنے پر مجبور کر دیا۔منگیر کے سپرنٹنڈنٹ آف پولیس (ایس پی) سید عمران مسعود نے تصدیق کی ہے کہ تصاویر اور ویڈیوز وائرل ہوتے ہی ایک خصوصی ٹیم تشکیل دی گئی، جس نے فوری کارروائی کرتے ہوئے خاتون کے گھر پر چھاپہ مارا۔

تحقیقات کے دوران معلوم ہوا کہ تصویر میں نظر آنے والا پستول ویشال کمار نامی شخص کا لائسنس یافتہ اسلحہ ہے، جو دین دیال چوک کا رہائشی ہے۔ اگرچہ اسلحہ قانونی طور پر رجسٹرڈ ہے، تاہم کسی غیر مجاز شخص کو اس کے ساتھ تصویر بنوانے یا سوشل میڈیا پر نمائش کی اجازت دینا قانون کی خلاف ورزی ہے۔پولیس نے کنچن دیوی اور اسلحہ کے مالک ویشال کمار کے خلاف مقدمہ درج کر لیا ہے۔ ایس پی سید عمران مسعود کا کہنا ہے کہ اسلحے کی نمائش اور شراب جیسے ممنوعہ مادوں کی تشہیر سنگین جرائم کے زمرے میں آتی ہے اور ایسے معاملات میں قانون کے مطابق سخت کارروائی کی جائے گی۔

‎امریکی معاون وزیر خارجہ سمیر پال کپور نے بدھ کو کانگریس کی کمیٹی کو بتایا کہ پاکستان جنوبی ایشیا میں واشنگٹن کا ایک اہم شراکت دار ہے اور امریکہ اس کے ساتھ تجارتی، اقتصادی اور سکیورٹی تعلقات کو مضبوط کرنا چاہتا ہے۔
‎انہوں نے کمیٹی کو بتایا کہ امریکہ پاکستان کے ساتھ مل کر ملک کے اہم معدنی وسائل کی صلاحیت سے فائدہ اٹھانے اور نجی شعبے کے ساتھ مالی اعانت کو مربوط کرنے کی کوشش کر رہا ہے تاکہ دونوں ممالک کو اقتصادی فوائد حاصل ہوں۔
‎پال کپور نے توانائی اور زراعت میں دوطرفہ تجارت کے فروغ پر بھی روشنی ڈالی اور سکیورٹی تعاون کے حوالے سے کہا کہ انسداد دہشت گردی کے شعبے میں موجودہ تعاون پاکستان کو اندرونی اور بین الاقوامی سلامتی کے خطرات سے نمٹنے میں مدد دیتا ہے۔
‎بعد میں قانون سازوں نے سوالات کے دوران عسکریت پسندی، پاکستان کی سابقہ سیکیورٹی حکمت عملی اور علاقائی حرکیات پر بھی بات کی۔

ڈھاکا: بنگلہ دیش میں 13ویں قومی پارلیمانی انتخابات کے لیے ووٹنگ کے اختتام کے بعد ملک بھر میں ووٹوں کی گنتی جاری ہے اور مختلف حلقوں سے غیر سرکاری و ابتدائی نتائج موصول ہونا شروع ہوگئے ہیں۔ متعدد اہم نشستوں پر بنگلہ دیش نیشنلسٹ پارٹی (بی این پی) کے امیدواروں کو برتری حاصل ہے، جبکہ بعض حلقوں میں سخت مقابلہ بھی دیکھنے میں آ رہا ہے۔اب تک کے نتائج کے مطابق بی این پی کو 68،جماعت اسلامی کو 21،این سی پی کو دو نشستیں ملی ہیں

طارق رحمان ڈھاکا-17 اور بوگرا-6 سے کامیاب
رات 10 بج کر 20 منٹ تک موصول ہونے والے غیر سرکاری نتائج کے مطابق بی این پی کے چیئرمین طارق رحمان نے ڈھاکا-17 اور بوگرا-6 کی نشستوں پر کامیابی حاصل کرلی ہے۔ یہ بات بی این پی میڈیا سیل کے رکن شائرل کبیر خان نے بتائی۔اس سے قبل طارق رحمان نے جمعرات کی صبح 9:30 بجے گلشن ماڈل ہائی اسکول اینڈ کالج پولنگ اسٹیشن میں اپنا ووٹ کاسٹ کیا۔ اس موقع پر ان کی اہلیہ ڈاکٹر زبیدہ رحمان اور صاحبزادی زائمہ رحمان بھی ان کے ہمراہ تھیں۔ بعد ازاں میڈیا سے گفتگو کرتے ہوئے انہوں نے امید ظاہر کی کہ ان کی جماعت ملک میں مستحکم حکومت بنانے کی پوزیشن میں آئے گی۔

میرزا فخرالاسلام عالمگیر کو ٹھاکرگاؤں-1 میں برتری
رات 9:25 بجے تک کے ابتدائی نتائج کے مطابق بی این پی کے سیکریٹری جنرل میرزا فخرالاسلام عالمگیر ٹھاکرگاؤں-1 میں نمایاں برتری حاصل کیے ہوئے ہیں۔ 35 پولنگ مراکز کے نتائج کے مطابق انہیں 39 ہزار 101 ووٹ ملے، جبکہ ان کے قریب ترین حریف جماعت اسلامی کے امیدوار کو 25 ہزار 976 ووٹ حاصل ہوئے۔ اس حلقے میں مجموعی طور پر 185 پولنگ اسٹیشنز قائم کیے گئے تھے۔دن کے وقت میڈیا سے گفتگو کرتے ہوئے میرزا فخرالاسلام نے کہا کہ ملک بھر میں ووٹنگ کا ماحول توقع سے زیادہ پُرجوش اور پُرامن رہا۔ ان کا کہنا تھا کہ عوام کی بھرپور شرکت اس بات کا ثبوت ہے کہ ملک جمہوری عمل کی جانب گامزن ہے۔

کاکس بازار-1 میں صلاح الدین احمد کو واضح برتری
کاکس بازار-1 (چکریا-پیکوا) سے بی این پی کی اسٹینڈنگ کمیٹی کے رکن صلاح الدین احمد کو نمایاں برتری حاصل ہے۔ 177 میں سے 74 پولنگ مراکز کے نتائج کے مطابق انہوں نے ایک لاکھ 21 ہزار 119 ووٹ حاصل کیے ہیں۔ مکمل نتائج کا انتظار کیا جا رہا ہے۔

سنام گنج-2 میں جماعت اسلامی کے امیدوار نے شکست تسلیم کرلی
رات 9:04 بجے جماعت اسلامی کے امیدوار شیشیر منیر نے سنام گنج-2 (دیرائی-شالا) سے اپنی شکست تسلیم کرلی۔ انہوں نے فیس بک پر جاری بیان میں اپنے مدمقابل ناصر الدین چوہدری کو مبارکباد پیش کی۔

براہمن باریا-2 میں رُمین فرحانہ کو برتری
براہمن باریا-2 میں آزاد امیدوار رُمین فرحانہ 12 پولنگ مراکز کے نتائج کے مطابق 9 ہزار 648 ووٹ لے کر آگے ہیں، جبکہ بی این پی اتحاد کے امیدوار مولانا جنید الحبیب کو 6 ہزار 745 ووٹ ملے ہیں۔

جھینائیدہ-1 میں اسدالزمان کامیاب
جھینائیدہ-1 (شائل کوپا) سے بی این پی کے امیدوار اور سابق اٹارنی جنرل محمد اسدالزمان ابتدائی نتائج کے مطابق کامیاب قرار پائے ہیں۔ انہوں نے انتخاب لڑنے کے لیے اپنے عہدے سے استعفیٰ دیا تھا۔ اس حلقے میں ووٹر ٹرن آؤٹ زیادہ رپورٹ ہوا۔

کومیلا-4 میں تنازع اور بائیکاٹ
کومیلا-4 (دیبدوار) میں 11 جماعتی اتحاد کے امیدوار حسنت عبداللہ کو بعض مراکز پر برتری حاصل ہوئی، تاہم ان کے مدمقابل ایم ڈی اے جاسم الدین نے بے ضابطگیوں کا الزام لگاتے ہوئے انتخاب کا بائیکاٹ کر دیا۔ انہوں نے دعویٰ کیا کہ ان کے پولنگ ایجنٹس کو کئی مقامات پر داخلے سے روکا گیا۔

پوسٹل بیلٹس کی بڑی تعداد موصول
الیکشن کمیشن کے مطابق 13ویں انتخابات اور ریفرنڈم کے لیے 11 لاکھ 43 ہزار 845 پوسٹل بیلٹس موصول ہوئے، جن میں تقریباً پانچ لاکھ بیرون ملک مقیم ووٹرز کے تھے۔ حکام کے مطابق بیرون ملک سے بڑی تعداد میں بیلٹس واپس موصول ہو چکے ہیں۔

الیکشن کمیشن اور مبصرین کا ردعمل
الیکشن کمیشن کے مطابق 4:30 بجے ووٹنگ کے اختتام تک 299 حلقوں میں پولنگ پُرامن طور پر مکمل ہوئی، جبکہ شیرپور-3 میں ایک امیدوار کی وفات کے باعث انتخاب ملتوی کیا گیا۔ دوپہر 2 بجے تک 47.91 فیصد ووٹ کاسٹ ہونے کی اطلاع دی گئی۔یورپی یونین کے چیف مبصر ایوارس ایجابس نے ووٹرز کی مثبت شرکت کو سراہا، جبکہ انٹرنیشنل ریپبلکن انسٹی ٹیوٹ کے سربراہ اور سابق امریکی رکن کانگریس ڈیوڈ ڈرائر نے انتخابی عمل کو "آزاد، منصفانہ اور پُرجوش” قرار دیا۔نگراں حکومت کے چیف ایڈوائزر پروفیسر محمد یونس نے کہا کہ عوام نے آئینی حق استعمال کرتے ہوئے ملک کے مستقبل کے تعین میں فعال کردار ادا کیا ہے۔

پولنگ کے اختتام کے بعد ملک بھر میں سیکیورٹی مزید سخت کر دی گئی اور پولنگ اسٹیشنز کے اطراف سے غیر متعلقہ افراد کو ہٹا دیا گیا۔ بعض مقامات پر بے ضابطگیوں کے الزامات پر چار انتخابی اہلکاروں کو معطل بھی کیا گیا۔
ملک بھر میں ووٹوں کی گنتی کا عمل جاری ہے اور سرکاری نتائج آئندہ چند دنوں میں مرحلہ وار جاری کیے جائیں گے۔ ابتدائی رجحانات کے مطابق بی این پی کو کئی اہم حلقوں میں برتری حاصل ہے، تاہم حتمی تصویر مکمل نتائج سامنے آنے کے بعد ہی واضح ہوگی۔

بنگلادیش میں قومی انتخابات کے ساتھ قومی ریفرنڈم بھی کرایا گیا ہے۔اب تک کے غیر سرکاری غیرحتمی نتائج کے مطابق 67 فیصد ووٹرز نے اصلاحات کے حق میں ووٹ ڈالا ہے جبکہ 33 فیصد ووٹرز نے اصلاحات کے خلاف ووٹ ڈالا ہے۔بنگلادیشی میڈیا کے مطابق ریفرنڈم کے جواب میں عوام کو ہاں یا نہیں کا انتخاب کرنا تھا، ریفرنڈم سے ملک کے مستقبل کے سیاسی و آئینی ڈھانچے کا تعین کیا جائےگا۔ریفرنڈم میں جولائی نیشنل چارٹر میں وسیع آئینی اصلاحات کی تجویز مانگی گئی ہے۔

جعلی ووٹ ڈالنے کی کوشش پر 2 افراد کو 2 ، 2 سال قید کی سزا سنا دی گئی،بنگلادیشی میڈیا کا کہنا ہے کہ سراج گنج4 اور جھالاکاٹھی 2 میں جعلی ووٹ ڈالنےکی کوشش کی گئی۔ سراج گنج میں 22 سال کے روبیل حسین نے ووٹ ڈالنے کے بعد بیرون ملک مقیم ووٹر کا ووٹ ڈالنے کی کوشش کی،انتخابی حکام نے روبیل حسین کو حراست میں لے کر سمری کورٹ میں پیش کیا تھا،اس کے علاوہ جھالاکاٹھی میں خاتون کو جعلی ووٹ ڈالنے کی کوشش پر 2 سال قید کی سزا ہوئی، 34 سال کی خاتون کو موبائل کورٹ نے سزا سنائی جبکہ 50 ہزار ٹکہ جرمانہ بھی عائد کیا گیا۔