Baaghi TV

Blog

  • وزیراعظم کی ملک بھر میں آٹو ڈسیبل سرنج کا استعمال یقینی بنانے کی ہدایت

    وزیراعظم کی ملک بھر میں آٹو ڈسیبل سرنج کا استعمال یقینی بنانے کی ہدایت

    اسلام آباد:وزیراعظم محمد شہباز شریف نے وائرل امراض کے پھیلاؤ کو روکنے کے لیے پورے ملک میں آٹو ڈسیبل (Auto Disable – AD) سرنج کا استعمال یقینی بنانے کی ہدایت کردی۔

    وزیراعظم محمد شہباز شریف کی زیر صدارت وزارت قومی صحت کے امور کے حوالے سے جائزہ اجلاس منعقد ہوا،وزیراعظم نے کہا کہ پاکستانی شہریوں کی صحت کے لیے بہترین خدمات فراہم کرنا حکومت پاکستان کی اولین ترجیحات میں شامل ہے، کسی بھی ایک قیمتی جان کے تحفظ کے لیے ہم ہر حد، ہر رکاوٹ اور ہر قربانی سے گزرنے کو تیار ہیں، تمام سرکاری اسپتالوں میں ہیپا ٹائیٹس اور ایڈز جیسے موذی امراض کے مکمل خاتمے کے لیے تمام مریضوں کی اسکریننگ یقینی بنائی جائے۔

    وزیراعظم نے وزارت قومی صحت کو صوبائی حکومتوں کے تعاون سے ہیپاٹائیٹس، ایڈز اور دیگر امراض کی بروقت رپورٹنگ کے لیے مربوط نظام تشکیل دینے کی ہدایت کی اور کہا کہ بروقت شناخت سے ہی ان امراض کا مکمل سدباب ممکن ہو سکے گا، ہیپیٹائٹس کی اسکریننگ، ٹیسٹنگ اور علاج کے لیے وزارت صحت صوبوں کے اشتراک سے ’’وزیراعظم ہیپیٹائٹس کنٹرول پروگرام‘‘ کے نفاذ میں تیزی لائے۔

    وزیراعظم نے وائرل امراض کے پھیلاؤ کو روکنے کے لیے پورے ملک میں آٹو ڈسیبل سرنج کا استعمال یقینی بنانے کی ہدا یت کی اور کہا کہ ڈریپ اور دیگر ادارے سرنج کے دوبارہ استعمال کو مکمل طور پر روکنے کو یقینی بنائیں، پاکستان سے پولیو کے مکمل خاتمے کےلئے پر عزم ہیں،اجلاس میں وزیراعظم کو پولیو، ہیپاٹائیٹس اور ایڈز کے خاتمے کے لیے اقدامات کے حوالے سے جاری اقدامات پر بریفنگ دی گئی۔

    وزیراعظم کو بتایا گیا کہ ایڈز جیسے مرض کے خاتمے کے لیے ملک کے بڑے اسپتالوں میں 98 اینٹی ریٹرو وائرل تھراپی سینٹرز قائم ہوچکے ہیں، جسے ایک سال میں 164 تک لے جایا جائے گا، ملک واپس آنے والے غیر قانونی تارکین وطن کے لیے تمام بین الاقوامی ہوائی اڈوں پر ایڈز کی اسکریننگ کی سہولت شروع ہو چکی ہے۔

    بریفنگ میں بتایا گیا کہ وزیراعظم قومی پروگرام برائے انسداد ہیپاٹائیٹس سی کا پائلٹ جلد اسلام آباد، آزاد کشمیر اور گلگت بلتستان میں شروع کیا جائے گا، ماحو لیاتی نمونوں کے حالیہ ٹیسٹوں میں پولیو وائرس کی موجودگی میں بتدریج کمی آرہی ہے جو کہ خوش آئند ہے، حالیہ انسداد پولیو مہم میں کوریج 98 فیصد رہی۔

    اجلاس میں وزیر اقتصادی امور احد خان چیمہ، وزیر خزانہ محمد اورنگزیب ، وزیر صحت مصطفیٰ کمال، وزیر مملکت صحت ڈاکٹر مختار بھرتھ، فوکل پرسن انسداد پولیو عائشہ رضا اور متعلقہ اداروں کے اعلیٰ افسران شریک تھے۔

  • 
جماعت اسلامی کا عید کے بعد ملک گیر تحریک کا اعلان

    
جماعت اسلامی کا عید کے بعد ملک گیر تحریک کا اعلان

    ‎جماعت اسلامی پاکستان نے عوامی مسائل کے حل کے لیے عیدالاضحیٰ کے بعد ملک گیر تحریک چلانے کا اعلان کر دیا ہے۔ امیر جماعت اسلامی حافظ نعیم الرحمان نے اس حوالے سے وکلا اور سول سوسائٹی سے بھی اپیل کی ہے کہ وہ اس تحریک میں بھرپور حصہ لیں۔
    ‎رحیم یار خان میں ایک تقریب سے خطاب کرتے ہوئے حافظ نعیم الرحمان کا کہنا تھا کہ ملک میں اشرافیہ کا نظام غریب عوام کا استحصال کر رہا ہے اور عام شہری مہنگائی اور معاشی دباؤ کے باعث شدید مشکلات کا شکار ہیں۔ انہوں نے الزام عائد کیا کہ گزشتہ دو برسوں میں لیوی کی مد میں تقریباً 2400 ارب روپے عوام سے وصول کیے گئے، جو مبینہ طور پر آئی پی پیز کو ادا کیے جا رہے ہیں۔
    ‎ان کا کہنا تھا کہ پاکستان میں گزشتہ کئی دہائیوں سے وراثتی سیاست کا نظام جاری ہے جس نے جمہوری عمل کو کمزور کر دیا ہے۔ انہوں نے کہا کہ فارم 47 کے ذریعے اقتدار کا حصول مزید قابل قبول نہیں ہوگا اور عوام اب اپنے حقوق کے لیے کھڑے ہوں گے۔
    ‎حافظ نعیم الرحمان نے واضح کیا کہ جماعت اسلامی کسی بھی ایسے سیاسی اتحاد کا حصہ نہیں بنے گی جو ذاتی مفادات پر مبنی ہو۔ انہوں نے عدلیہ کی کارکردگی پر بھی تنقید کرتے ہوئے کہا کہ عدالتی نظام عوامی توقعات پر پورا نہیں اتر سکا۔
    ‎انہوں نے وکلا برادری کو مخاطب کرتے ہوئے کہا کہ وہ آگے آئیں اور عوامی حقوق کے لیے اس تحریک میں شامل ہوں تاکہ ملک میں ایک منصفانہ اور شفاف نظام قائم کیا جا سکے۔

  • معروف بھارتی اداکار ٹریفک حادثے میں جاں بحق

    معروف بھارتی اداکار ٹریفک حادثے میں جاں بحق

    بھارت کے معروف ملیالم اداکار سنتوش کے نائر ایک افسوسناک ٹریفک حادثے میں 65 سال کی عمر میں انتقال کرگئے۔

    رپورٹس کے مطابق حادثہ منگل کی صبح ریاست کیرالہ کے علاقے ایڈور میں پیش آیا، جہاں ان کی گاڑی سامنے سے آنے والے ٹرک سے ٹکرا گئی، حادثے میں ان کی اہلیہ بھی شدید زخمی ہوئیں اور اسپتال میں زیر علاج ہیں،اداکار کو فوری طور پر نجی اسپتال منتقل کیا گیا تاہم وہ زخموں کی تاب نہ لاتے ہوئے دل کا دورہ پڑنے سے دم توڑ گئے۔

    سنتوش کے نائر نے اپنے فنی سفر کا آغاز 1982 میں فلم ایتھو آرتی کتھا سے کیا تھا اور اپنے طویل کیریئر کے دوران 100 سے زائد فلموں میں کام کیا، وہ خاص طور پر منفی اور مزاحیہ کرداروں کی وجہ سے بے حد مقبول تھے، ان کی وفات پر ملیالم فلم انڈسٹری میں گہرے دکھ کا اظہار کیا جا رہا ہے،انہوں نے نہ صرف بڑے پردے بلکہ چھوٹی اسکرین یعنی ٹیلی ویژن پر بھی بہت کام کیا اور اپنی ایک الگ پہچان بنائی۔

  • جنوبی کوریا کا ٹرمپ کے پروجیکٹ فریڈم میں شمولیت پر غور

    جنوبی کوریا کا ٹرمپ کے پروجیکٹ فریڈم میں شمولیت پر غور

    جنوبی کوریا نے امریکی صدر ڈونلڈ ٹرمپ کے آبنائے ہرمز میں نئے مشن ’پروجیکٹ فریڈم‘ میں شرکت کے امکانات پر غور شروع کر دیا ہے۔

    ’رائٹرز‘ کے مطابق جنوبی کوریا کا صدارتی دفتر اس بات کی تحقیقات کر رہا ہے کہ آیا ملک آبنائے ہرمز میں پھنسے ہوئے بحری جہازوں کو نکالنے کے لیے امریکی قیادت میں شروع کیے جانے والے اس فوجی آپریشن کا حصہ بن سکتا ہے یا نہیں۔

    صدر ٹرمپ نے حال ہی میں اس اہم آبی گزرگاہ میں پھنسے ہوئے جہازوں کی بحفاظت واپسی کے لیے اس مہم کا اعلان کیا تھا صدر ٹرمپ کا کہنا ہے کہ اس مہم کا مقصد ان لوگوں، کمپنیوں اور ممالک کو آزاد کرانا ہے جنہوں نے کچھ غلط نہیں کیا اور وہ صرف حالات کے شکار ہوئے ہیں یہ مہم ان ممالک کی درخواست پر شروع کی جا رہی ہے جن کے جہاز اسٹریٹجک اہمیت کی حامل آبنائے ہرمز میں پھنسے ہوئے ہیں اگر اس آپریشن میں کسی قسم کی مداخلت کی گئی تو اس کا جواب طاقت سے دیا جائے گا۔

    دوسری جانب ایران نے خبردار کیا ہے کہ آبنائے ہرمز اور خلیج فارس کا انتظام صدر ٹرمپ کی سوشل میڈیا پوسٹس کے ذریعے نہیں چلایا جائے گا ایرانی پارلیمنٹ کے عہدیدار ابراہیم عزیزی نے انتباہ دیا ہے کہ کسی بھی قسم کی امریکی مداخلت جنگ بندی کی خلاف ورزی تصور کی جائے گی یہاں سے گزرنے والے جہازوں کو ٹول ٹیکس ادا کرنا ہوگا اور پاسداران انقلاب کے منظور شدہ راستوں پر چلنا ہوگا۔

    اس وقت صورتحال انتہائی تشویشناک ہے کیونکہ بین الاقوامی میری ٹائم آرگنائزیشن کے مطابق تقریباً دو ہزار بحری جہازوں پر بیس ہزار کے قریب ملاح پھنسے ہوئے ہیں ان جہازوں پر خوراک، ایندھن اور پانی کی شدید قلت پیدا ہو رہی ہےتنظیم کے ڈائریکٹر ڈیمین شیولیئر کا کہنا ہے کہ جدید دور میں اتنی بڑی تعداد میں ملاحوں کے پھنس جانے کی کوئی دوسری مثال نہیں ملتی۔

  • 4 روزہ تعطل کے بعد پاکستانی پاسپورٹ سروسز بحال

    4 روزہ تعطل کے بعد پاکستانی پاسپورٹ سروسز بحال

    پاکستان کے پاسپورٹ کے اجرا کی خدمات تکنیکی خرابیوں کے باعث پیدا ہونے والے 4 روزہ تعطل کے بعد دنیا بھر میں مکمل طور پر بحال کر دی گئی ہیں-

    تکنیکی خرابیوں سے سعودی عرب، متحدہ عرب امارات اور متعدد یورپی ممالک سمیت کئی ملکوں میں پاسپورٹ کے اجرا کا عمل متاثر ہوا اور درخواست دہند گان کو تاخیر کا سامنا کرنا پڑا،ڈائریکٹر جنرل پاسپورٹ اینڈ امیگریشن، محمد علی رندھاوا کے مطابق پاسپورٹ ہیڈکوارٹر میں پیش آنے والے تکنیکی مسائل اب حل کر لیے گئے ہیں، جس کے بعد خدمات دوبارہ معمول کے مطابق بحال ہو گئی ہیں۔

    سوشل میڈیا پلیٹ فارم ایکس پر پاکستانی سفارتخانے کی جانب سے بتایا گیا کہ اس سے قبل تکنیکی مسائل کے باعث خدمات معطل تھیں، تاہم اب تمام درخواست دہندگان کے لیے پاسپورٹ سے متعلق امور دوبارہ شروع ہو چکے ہیں، تمام پاکستانی شہریوں کو ہدایت کی جاتی ہے کہ وہ مقررہ اوقات کار کے دوران سفارت خانے کا رخ کریں اور اپنے پاسپورٹ کے اجرا یا تجدید کے لیے درخواستیں جمع کروائیں، ابوظہبی میں سفارت خانہ اب معمول کے مطابق خدمات فراہم کر رہا ہے تاکہ کمیونٹی کو سہولت فراہم کی جا سکے۔

  • 
بارش اور آسمانی بجلی سے 4 افراد جاں بحق، مختلف شہر متاثر

    
بارش اور آسمانی بجلی سے 4 افراد جاں بحق، مختلف شہر متاثر

    ‎پاکستان کے مختلف شہروں میں آندھی اور گرج چمک کے ساتھ ہونے والی بارشوں کے دوران آسمانی بجلی گرنے سے 4 افراد جاں بحق ہو گئے جبکہ ایک گھر کی چھت گرنے سے 4 افراد زخمی بھی ہوئے ہیں۔
    ‎تفصیلات کے مطابق پنجاب کے شہر جھنگ میں آسمانی بجلی گرنے کے باعث 2 افراد جان کی بازی ہار گئے، جبکہ کمالیہ اور ٹوبہ ٹیک سنگھ میں بھی ایک، ایک شخص جاں بحق ہوا۔ تیز آندھی اور بارش کے باعث کئی علاقوں میں معمولات زندگی متاثر ہوئے اور شہریوں کو مشکلات کا سامنا کرنا پڑا۔
    ‎مریدکے، شیخوپورہ، تاندلیانوالہ، چنیوٹ اور خانیوال سمیت متعدد علاقوں میں بارش کے بعد نشیبی علاقے زیر آب آ گئے، جس سے آمد و رفت میں رکاوٹ پیدا ہوئی۔ اوکاڑہ اور اس کے اطراف میں گرج چمک کے ساتھ بارش کے باعث بجلی کا نظام متاثر ہوا اور کئی علاقوں میں بجلی کی فراہمی معطل ہو گئی۔
    ‎پیرمحل، گجرات، پنڈی بھٹیاں اور دیگر علاقوں میں بھی وقفے وقفے سے بارش کا سلسلہ جاری رہا جبکہ خیبرپختونخوا کے علاقے مانسہرہ میں موسلا دھار بارش ریکارڈ کی گئی۔
    ‎دوسری جانب بلوچستان کے علاقے موسیٰ خیل میں بارش کے ساتھ ژالہ باری بھی ہوئی، جس سے فصلوں کو نقصان پہنچنے کا خدشہ ظاہر کیا جا رہا ہے۔
    ‎محکمہ موسمیات نے آئندہ دنوں میں مزید بارشوں اور گرج چمک کی پیشگوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے، خاص طور پر کھلے مقامات پر جانے سے گریز اور محفوظ جگہوں پر رہنے کا مشورہ دیا گیا ہے۔

  • عالمی منڈی میں تیل کی قیمتوں میں معمولی کمی

    عالمی منڈی میں تیل کی قیمتوں میں معمولی کمی

    عالمی منڈی میں تیل کی قیمتوں میں معمولی کمی دیکھنے میں آئی ہے تاہم قیمتیں اب بھی 100 ڈالر فی بیرل سے اوپر برقرار ہیں۔

    رپورٹس کے مطابق برینٹ کروڈ فیوچرز کی قیمت میں ایک فیصد سے زائد کمی ہوئی جس کے بعد یہ تقریباً 112 ڈالر فی بیرل کی سطح پر آ گئی، جبکہ امریکی خام تیل (یو ایس آئل) کی قیمت بھی کم ہو کر 104 ڈالر فی بیرل سے کچھ نیچے آگئی ہے۔

    تجزیہ کاروں کا کہنا ہے کہ اگرچہ قیمتوں میں کمی آئی ہے، لیکن یہ کمی عارضی ہو سکتی ہے کیونکہ خطے میں غیر یقینی صورتحال اب بھی برقرار ہے خاص طور پر امریکا اور ایران کے درمیان نازک جنگ بندی اور آبنائے ہرمز میں جاری تنازع عالمی تیل کی سپلائی کو متاثر کر رہا ہے۔

    ماہرین کے مطابق آبنائے ہرمز دنیا کی اہم ترین تیل گزرگاہوں میں شامل ہے، جہاں کسی بھی قسم کی رکاوٹ عالمی معیشت پر فوری اثر ڈالتی ہے۔ یہی وجہ ہے کہ تیل کی قیمتیں کم ہونے کے باوجود اب بھی بلند سطح پر موجود ہیں جب تک خطے میں کشیدگی ختم نہیں ہوتی اور سپلائی مکمل طور پر بحال نہیں ہوتی، تیل کی قیمتوں میں نمایاں کمی کا امکان کم ہے۔

  • ٹرمپ کی کرپٹو کمپنی نے جسٹن سن کے خلاف ہتکِ عزت کا مقدمہ دائر کر دیا

    ٹرمپ کی کرپٹو کمپنی نے جسٹن سن کے خلاف ہتکِ عزت کا مقدمہ دائر کر دیا

    ٹرمپ اور اس کے بیٹوں کی کرپٹو کمپنی نے جسٹن سن کے خلاف ہتکِ عزت کا مقدمہ دائر کر دیا-

    امریکی صدر ڈونلڈ ٹرمپ اور ان کے بیٹوں کی مشترکہ قائم کردہ کرپٹو کمپنی ورلڈ لبرٹی فائنانشل نے پیر کے روز اعلان کیا کہ اس نے ہانگ کانگ میں مقیم کرپٹو کاروباری شخصیت جسٹن سن کے خلاف ہتکِ عزت کا مقدمہ دائر کر دیا ہے۔

    ورلڈ لبرٹی نے سوشل میڈیا پلیٹ فارم ایکس پر مقدمے کی کاپی شیئر کرتے ہوئے الزام عائد کیا کہ جسٹن سن نے کمپنی کے خلاف عوامی سطح پر بدنامی کر نے کی غرض سے مہم چلائی اور ایسے دعوے کیے جو کمپنی کے مطابق بے بنیاد ہیں،سن نے اپنے ٹوکنز کے ساتھ ایسے اقدامات کیے جن کی اسے اجاز ت نہیں تھی، جن میں انہیں کرپٹو ایکسچینج بائنانس کو منتقل کرنا بھی شامل ہے، ٹوکنز کو منجمد کرنے کا اختیار فروخت کی شرائط میں واضح طور پر درج تھا۔

    اس سے قبل اپریل میں جسٹن سن نے خود ورلڈ لبرٹی فنانشل کے خلاف مقدمہ دائر کیا تھا، جس میں مؤقف اختیار کیا گیا کہ کمپنی نے غیرقانونی طور پر ان کے خریدے گئے ٹوکنز منجمد کر دیے ہیں، کمپنی نے خفیہ طور پر ایسے ٹولز نصب کیے جن کے ذریعے ستمبر 2025 میں ٹوکنز کے قابلِ تجارت ہونے کے بعد بھی ان کی فروخت کو روکا گیا۔

    جسٹن سن نے خبر رساں ادارے رائٹرزسے گفتگو کرتے ہوئے بتایا کہ ورلڈ لبرٹی کی جانب سے ایکس پر اعلان کردہ یہ مبینہ ہتکِ عزت کا مقدمہ محض ایک بے بنیاد تشہیری حربہ ہےمیں اپنے اقدامات پر قائم ہوں اور عدالت میں اس کیس کو شکست دینے کا منتظر ہوں۔

    امریکی صدر کے بیٹے ڈونلڈ ٹرمپ جونیئر نے ورلڈ لبرٹی کی پوسٹ کو دوبارہ شیئر کرتے ہوئے لکھا کہ سچ جاننے کے لیے اس پوری تھریڈ کو پڑھیں جبکہ کمپنی کے چیف ایگزیکٹو اور شریک بانی زیک وٹکوف کا کہنا تھا کہ وہ عدالت میں حقیقت سامنے آنے کے منتظر ہیں۔

  • سائبر مجرموں کے لیے اے آئی کا استعمال مشکل، نئی تحقیق

    سائبر مجرموں کے لیے اے آئی کا استعمال مشکل، نئی تحقیق

    ‎ایک نئی بین الاقوامی تحقیق میں یہ انکشاف سامنے آیا ہے کہ سائبر مجرموں کو مصنوعی ذہانت (اے آئی) کو مؤثر انداز میں اپنے جرائم میں استعمال کرنے میں نمایاں مشکلات کا سامنا ہے۔
    ‎تحقیق کے دوران ڈارک ویب اور زیر زمین سائبر کرائم فورمز پر موجود تقریباً 10 کروڑ پوسٹس کا تفصیلی تجزیہ کیا گیا، جس سے معلوم ہوا کہ بیشتر ہیکرز کے پاس اے آئی ٹیکنالوجی کو مؤثر انداز میں استعمال کرنے کے لیے نہ تو مطلوبہ مہارت موجود ہے اور نہ ہی ضروری وسائل۔
    ‎یہ تحقیق ایڈنبرا، سٹراتھ کلائیڈ اور کیمبرج یونیورسٹی کے ماہرین نے مشترکہ طور پر کی، جس میں جدید مشین لرننگ ٹولز اور دستی تجزیے کے ذریعے ڈیٹا کا جائزہ لیا گیا۔ ماہرین نے خاص طور پر یہ جاننے کی کوشش کی کہ نومبر 2022 کے بعد، جب چیٹ جی پی ٹی متعارف ہوا، سائبر مجرم کس طرح اے آئی کے ساتھ تجربات کر رہے ہیں۔
    ‎نتائج سے معلوم ہوا کہ اے آئی ٹولز زیادہ تر انہی افراد کے لیے فائدہ مند ثابت ہو رہے ہیں جو پہلے ہی تکنیکی مہارت رکھتے ہیں۔ عام سائبر مجرم ان ٹولز سے خاطر خواہ فائدہ نہیں اٹھا پا رہے کیونکہ ان کے مؤثر استعمال کے لیے گہرا علم اور تجربہ درکار ہے۔
    ‎تحقیق کے مطابق اے آئی کا سب سے زیادہ استعمال سوشل میڈیا بوٹس بنانے میں دیکھا گیا، جن کے ذریعے آن لائن ہراسانی یا دھوکہ دہی جیسے جرائم کیے جاتے ہیں۔ تاہم ماہرین نے اس بات پر اطمینان کا اظہار کیا کہ جدید چیٹ بوٹس میں شامل حفاظتی اقدامات نقصان کو محدود کرنے میں اہم کردار ادا کر رہے ہیں۔

  • سونے اور چاندی کی قیمتوں میں کمی

    سونے اور چاندی کی قیمتوں میں کمی

    عالمی اور مقامی مارکیٹوں میں سونے اور چاندی کی قیمتوں میں آج بھی کمی ریکارڈ کی گئی-

    بین الاقوامی بلین مارکیٹ میں فی اونس سونے کی قیمت 21ڈالر کی کمی سے 4ہزار 555ڈالر کی سطح پر آگئی،جس کے بعد مقامی مارکیٹ میں بھی فی تولہ سونے کی قیمت 2ہزار 100روپے کی کمی سے 4لاکھ 77ہزار 862روپے کی سطح پر آگئی جبکہ دس گرام سونے کی قیمت 1ہزار 801روپے گھٹ کر 4لاکھ 09ہزار 689روپے کی سطح پر آگئی۔

    اسی طرح، فی تولہ چاندی کی قیمت 65 روپے کی کمی سے 7ہزار 849 روپے اور فی دس گرام چاندی کی قیمت بھی 55روپے کی کمی سے 6ہزار 729روپے کی سطح پر آگئی۔