Category: بلاگ

مُجھے یقین ہے ہر کسی نے ٹوئٹر کا سنا ہوا ہوگا ،استعمال کرتے ہیں یا نہی وہ الگ بات ہے لیکن کسی نہ کِسی ذریعے سے ٹوئٹر کا سن ضرور رکھا ہوگا۔ ٹوئٹر کا ہم نے بھی بہت سالوں سے سن رکھا تھا تقریباً پانچ سال پہلے ٹوئٹر کا سن کر ڈاؤن لوڈ کیا، جب ٹوئٹر کو اکائونٹ بنانے کے بعد کھولا تو عجیب بدرنگی سی دنیا نظر آئی۔۔ نظر کے سامنے کچھ ٹویٹس گزریں پر کچھ سمجھ نہیں آیا ۔۔ تھوڑا آگے پیچھے دیکھا پر کوئی دلچسپ چیز نظر نہی آئی اور دس منٹوں میں ہی بور ہو کر بند کر دیا۔ ایک دو دفعہ پھر کوشش کی لیکن نتیجہ وہی ڈھاک کے تین پات۔ سو ہم نے ٹوئٹر کو الوداع کہہ کر ڈیلیٹ کر دیا۔۔ سال بھر بعد پھر کسی کے مونہہ سے ٹوئٹر کا سن کر پھر سے لاگ ان کیا نتیجہ وہی رہا جو پہلی دفعہ تھا۔ دل میں سوچا عجیب لوگ ہیں۔ پتہ نہیں کیا نظر آتا ہے انکو ٹوئٹر میں جو ٹائم ضایع کرنے آ جاتے ہیں یہاں، ہم تو فیس بک پر ہی ٹھیک ہیں۔ سو ایک دفعہ پھر الوداع کہا اور ٹوئٹر کو پھر سے حذف کر دیا اپنے موبائل سے۔

سال 2018 کے الیکشن سے پہلے ایک جنون سا دل پر چھا گیا کے اس دفعہ اپنے ملک کے لیے کچھ کرنا ہے۔ تمام بدعنوان عناصر سے اپنے ملک کو پاک کرنا ہے انکی بدعنوانی کو دنیا کے سامنے لانا ہے اور ایک ایسے بندے کا ساتھ دینا ہے جو ایک لمبے عرصے سے سب کو جگانے کی کوشش کر رہا ہے پر کوئی جاگنے کو تیار ہی نہیں۔۔ میری مراد عمران خان صاحب ہیں۔ دھرنے کے دنوں میں جو آگاہی مہم اُنہوں نے چلائ اور جس طرح لوگوں کو۔ ایک تحریک دی بدعنوان عناصر کے خلاف ، اس سے دل میں ایک نیا ہی جوش و جذبہ پیدا ہو گیا کچھ کر دکھانے کا۔۔ سو اب کے ہم نے ایک عزم صمیم کے ساتھ ٹوئٹر ڈاؤن لوڈ کیا اور سوچ لیا کچھ بھی ہو جائے اب اسکو سمجھ کر ہی چھوڑنا ہے۔۔کافی سارے دن بہت بوریت ہوئی، اِدھر اُدھر ٹامک ٹوئیاں مارتے رہے۔ پھر کچھ ٹویٹس کو ری ٹویٹ کرنا شروع کیا، کچھ فالوورز بڑھنا شروع ہوئے۔ گلابی نمک کی اُن دِنوں ایک بہت اچھے صاحب(نام نہیں لونگی) بہت اچھی مہم چلا رہے تھے ، انکی طرف سے دعوت نامہ آیا ٹیم میں شامل ہونے کا ۔ ہم نے جھٹ سے ہاں کر دی۔
مزے کی بات یہ کے ابھی تک ہمیں ڈی ایم کے بارے میں کوئی خاص آئیڈیا نہیں تھا اور گروپ میں کیا ہوتا ہے اسکا تو بلکل بھی علم نہیں تھا۔۔ ہم تو گروپ میں جا کر گھبرا ہی گئے۔ ارے اتنے سارے لڑکے اور ٹیکسٹ میں گفتگو چلی جا رہی۔ ایک لڑکی ہونے کی وجہ سے بہت سارا خوش آمدید ۔ ارے باپ رے یہ سب کیا ہے۔ ہمارے بھائی لوگ نے یہ سب دیکھ لیا تو ٹوئٹر بند کرا دیں گے اس لیے ہم ڈر کے مارے اگلے ہی دن وہاں سے بھاگ نکلے۔۔( معافی گلابی نمک بھائی)

خیر پھر کچھ دن ایسے چلے۔۔ کچھ ٹویٹ کیے۔۔ کیونکہ لکھنے کا کیڑا تو ہم میں بدرجہ اتم موجود تھا۔ سو اپنی تئیں اچھا لکھنے کی کوشش کی۔۔ آہستہ آہستہ خود پر تھوڑا اعتماد ہونا شروع ہوا۔ اور پھر ایک ٹیم آئی کے وارئیرز کے ایک ایڈمن کی طرف سے دعوت نامہ ملا جو ہم نے تھوڑی شد و مد کے بعد قبول کر لیا۔۔ ساتھ میں وعدہ لیا ایڈمن سے کے ہم گروپ میں کوئی بات نہیں کریں گے صرف ٹرینڈز میں حصہ لیں گے۔ ایڈمن صاحب تو خوش ہو گئے ک ٹرینڈز کرنا ہی تو مقصد ہے۔ وہ ایک بہت اچھا دور تھا، ٹوئٹر صاف ستھرا تھا، لڑکے لڑکے ہی ہوتے تھے( مطلب لڑکیوں کے اکاؤنٹس سے نہیں آتے تھے) لڑکیاں کم تھیں لیکن ماحول بہت اچھا تھا۔ پہلے ہی ٹرینڈ میں ہم نے تو اپنی دھاک بٹھا دی۔۔ خود ہی سارے ٹوئٹس لکھے کیونکہ کاپی پیسٹ کا اس وقت پتہ ہی نہیں تھا۔ بہت تعریفیں ہوئیں ۔ اسکے بعد ایک مشن شروع ہو گیا۔۔ کچھ سمجھ آنے لگا کے کس سمت میں اور کِس طرح سے مثبت انداز میں ٹوئٹر کا استعمال کرنا ہے۔۔ فالوورز کا کوئی جنون نہیں تھا۔ کوئی کرتا ہے تو کرے نہیں تو پرواہ نہیں۔ بہت سے ٹرینڈز کیے۔ ہر ہفتے تین چار ٹرینڈز ہوتے تھے اور ہم ہوتے تھے اور ٹویٹس اور ریٹویٹس کی قطار لگ جاتی تھی۔ ایک دن میں چار چار لمٹس لگواتے اور بڑے خوش ہوتے تھے۔ اور اگلے دن رزلٹ کا انتظار کے کونسے نمبر پر آئے ہم۔ کیونکہ بچپن سے جنون نمبر ایک پر آنے کا بھی تھا۔۔ پھر ٹیم والوں کا دباؤ شروع ہوا کہ اب ایڈمن بنیں اور ہم کوئی ذمےداری لینا نہی چاہتے تھے اس لیے انکار پر انکار ۔۔ پر شاباش ہے ٹیم مینیجمنٹ کو بھی ، پیچھا نہی چھوڑا اُنہوں نے بھی اور آخر کار پہلے نائب ایڈمن اور پھر ایڈمن بنا ڈالا۔۔ پھر سینئر ایڈمن بن کر مینیجمنٹ کا حصہ بنے، اپنے سینئرز سے بہت کچھ سیکھا۔ ٹرینڈ کیسے بنتے ہیں ایچ ٹی کیسے بنتا ہے، ٹاپک کیسے چنا جاتا ہے، یہ سب ایک دلچسپ تجربہ رہا۔۔ کچھ اور ٹیموں میں بھی شمولیت اختیار کی لیکن اپنی پہلی ٹیم کے ساتھ وفادار رہے کیون وفاداری بھی ہم میں کوٹ کوٹ کر بھری ہے۔ سال سے زیادہ ہو گیا تھا اسی اثناء میں ہمیں ٹوئٹر پر۔۔ عمران خان الیکشن جیت کر وزیر اعظم بن چکے ہوئے تھے۔ اور ہم انکے ساتھ ایک نئے پاکستان کی تکمیل کے لیے کوشاں رہے۔۔ ساتھ ساتھ کشمیر کی جدوجہد آزادی کے لیے بیشمار ٹرینڈز کیے ۔۔ بیشمار اکاؤنٹس شہید کروائے اور کبھی غم بھی نہی کیا انکا۔ کیونکہ مقصد اکائونٹ نہیں تھا۔ مقصد پاکستان، اپنی افواج، کشمیر اور پاکستان کے لوگوں کی بھلائی کے لیے کام کرنا تھا۔

پھر افسوس کے ہماری ٹیم مینجمنٹ میں پھوٹ پڑ گئی اور ہماری ٹیم ٹوٹ گئی جسکا آج بھی افسوس ہے۔ اور پھر ہم نے اپنی ایک ٹیم کا آغاز کیا اپنے چند بہترین دوستوں کی مدد سے۔ الحمدللہ آج سال سے اُوپر ہو گیا وہ ٹیم چلا رہے ہیں۔ مقصد وہی ہے جو پہلے دن تھا۔ اس سفر میں بہت سے اچھے دوست ملے۔ بہت سے بچھڑ بھی گئے جن کی یاد آج بھی دل سے جاتی نہیں ہے۔ بہت سے سبق ملے۔۔ بہت کچھ سیکھا لوگوں کے رویوں سے متعلق۔۔ آج ٹوئٹر ویسا نہی ہے جیسا آج سے دو تین سال پہلے تھا لیکن اچھے لوگوں کی کمی نہیں ہے اور یہ دیکھ کر بہت خوشی ہوتی ہے کے جہاں بہت سے لوگ صرف دوسرے لوگوں کو استعمال کرنے کے لیے ٹوئٹر استعمال کرتے ہیں وہاں بیشمار لوگ صرف اور صرف اپنے وطن، پاکستان کی بھلائی کے لیے اپنا دن رات ایک کیے ہوئے ہیں۔ایسے سب لوگ میرے دل کے بےحد قریب رہتے ہیں۔ اللہ ہم سب کو نیک کام کرنے کی ہدایت اور توفیق عطا فرمائیں۔۔آمین ثم آمین
نوٹ: کسی اگلے آرٹیکل میں کچھ مزے دار قصے بھی بیان کرنے کی کوشش کروں گی جو کے بیشمار ہیں۔

@NiniYmz

ایک ملک ایک قوم ایک نصاب

حکومت وقت نے جب سے یکساں تعلیمی نصاب متعارف کروایا ہے تب سے کئی حلقوں میں اس عمل کو سراہا جارہا ہے کہ غریب اور امیر کا بچہ ایک ہی تعلیم حاصل کرے گا اور مستقبل میں ہر شعبہ ہائے زندگی میں سب شہریوں کو مساوی حقوق مل سکیں گے۔ یعنی امیر غریب کی تفریق ختم ہو جائے گی۔ لیکن جہاں لوگ اس نصاب کو مثبت نظر سے دیکھ رہے ہیں وہیں ہمیشہ کی طرح لبرل طبقے کو اس نصاب میں بھی کیڑے نکالنے کا موقع مل گیا۔ اور اس طبقے کا من پسند منجن عورت کے حقوق عورت کی آزادی کے نام پر واویلا شروع کر دیا بی بی سی کو مضمون لکھ ڈالے کہ پاکستان میں عورتوں کے حقوق سلب کیے جارہے ہیں اور وجہ بھی ایسی مزحکہ خیز پیش کی گئی کہ کوئی بھی با شعور انسان کا سر چکرا جائے کہ آخر کوئی اس قدر پسند ذہنیت کیسے رکھ سکتا ہے۔ پانچویں جماعت کی انگریزی کی کتاب پر شائع کی گئی ایک تصویر ہے جس میں ماں اور بیٹی کالین پر بیٹھے ہیں جبکہ باپ اور بیٹا صوفے پر اس ایک تصویر کو بنیاد بنا کر پراپیگنڈا کیا جارہا ہے کہ یہ نصاب اور یہ حکومت عورتوں کے حقوق کے خلاف ہے یہ خدا نخواستہ عورت کو مرد سے کمتر سمجھتی ہے۔ اس کے برعکس دیگر کئی درسی کتب میں خواتین یعنی ماں بیٹی کو صوفے پر بیٹھا دیکھا جاسکتا ہے اور بیٹا یا شوہر کالین پر بیٹھے ہیں جیسے عام طور پر ہمارے گھروں میں ہوتا ہے۔ لیکن وہ تمام تصاویر اس لبرل طبقے کو نظر نہیں آئیں۔

جیسے اس لبرل طبقے کو عید قربان پر جانوروں کے حقوق یاد آجاتے ہیں پھر چاہے سارا سال خود کے ایف سی مکڈولنڈ نوش فرماتے رہیں لیکن غریب کو مفت میں گوشت کھانے کو ملے تو جانوروں کا دکھ درد جاگ اٹھتا ہے تاکہ عام مسلمانوں کو دینی فریضے سے بدظن کیا جاسکے۔ ایسے ہی یکساں تعلیمی نصاب میں بھی انہیں عورتوں کے حقوق کا کوئی دکھ درد نہیں اصل مسئلہ یہ ہے کہ غریب کے بچے کی کیا مجال جو ہمارے بچوں کے مقابلے پر آسکے۔ اس ملک کی اشرافیہ بننا تو صرف ہمارا حق ہے ہم اس ملک کے مالک کرتا دھرتا ہیں غریب کا بچہ تو ہمارا نوکر ہی بنے گا وہ کیونکر افسر بنے۔

ساتھ ہی انہیں حکومت کے اس اقدام پر بھی شدید دکھ اور صدمہ پہنچا ہے کہ تعلیمی اداروں میں مرد و خواتین اساتذہ کے جینز پتلون پہننے پر کیوں پابندی لگا دی ہے۔ حالانکہ مُہزب لباس کے متعلق قوانین تو مغربی ممالک کے تعلیمی اداروں میں بھی لاگو ہے جن کا دین اسلام سے بھی کوئی تعلق نہیں ۔ لیکن بنیادی اخلاقیات کو تو وہ بھی مانتے ہیں اور اپنے اساتذہ کو طالب علموں کے لیے رول ماڈل کے طور پر دکھانا چاہتے ہیں اساتذہ کا لباس چال ڈھال اٹھنا بیٹھنا انداز گفتگو ہر چیز بچوں پر اثر ڈالتی ہے اس لیے وہ مغربی معاشرے بھی اپنے اساتذہ کو بنیادی اخلاقیات پر عمل کرنے کے لیے پابند کرتے ہیں۔ لیکن یہاں بدقسمتی سے اس لبرل طبقے کو کوئی عقل و شعور کی بات سمجھنا اونٹ کو رکشے میں بٹھانے کے مترادف ہے کیونکہ یہ دین بیزار طبقہ سمجھنا ہی نہیں چاہتا۔ میرا مطالبہ ہے کہ حکومتِ وقت ان مٹھی بھر ننگ دھڑنگ شدت پسند عناصر کے آگے ڈٹ جائے اور ہمارے معاشرے کے معمار نئی نسل اور اساتزہ کی بھلائی کے لیے اپنے اس بہترین فیصلے سے ہرگز پیچھے نا ہٹے۔۔

Twitter @zohaibofficialk

‏

حضرت قائداعظمؒ محمد علی جناح وہ بطل جلیل ہیں جن کی فراست، تدبر، سیاست اور وکالت کا برصغیر میں تو کیا پوری دنیا میں کوئی ثانی نہیں. آپ یقیناً بیسویں صدی کے عظیم ترین اور بہترین رہنما ہیں جن کی عظمت، فراست، اخلاق اور سیاست کی تعریف کرنے پر پوری دنیا مجبور ہے. آپ نے مسلمانان برصغیر کے خلاف انگریز-ہندو گٹھ جوڑ کا بڑی کامیابی سے مقابلہ کیا اور دونوں حریفوں کو اپنی فراست اور سیاست کے ذریعے زیر کیا. تقریباً 200 سالہ غلامی میں جکڑی مسلمان قوم کو بدمست اور متعصب ہندوؤں اور انگریزوں سے آزادی دلانا یقیناً بہترین صاحب سیاست اور صاحب فراست شخصیت کا کام ہے. بانی پاکستان حضرت قائداعظمؒ محمد علی جناح عالم سیاسیات میں ایک انتہائی منفرد اور غیرمعمولی شخصیت ہیں. آپ نہ صرف سیاست، وکالت، شجاعت اور حوصلے میں اعلیٰ ترین تھے بلکہ اسلام اور مسلمانوں کے لئے بے لوث اور بے غرض ہو کر اجتماعی فلاح کا ایسا کارنامہ سرانجام دینے میں کامیاب ہوئے جس کی دشمنوں سمیت ساری دنیا معترف ہے.

حضرت قائداعظمؒ ایک بہترین سیاستدان اور مدبر ہونے کے ساتھ ساتھ دور اندیش بھی تھے. برصغیر کے مسلمانوں کے متعلق آپ نے جتنے خدشات کا اظہار کیا وہ سارے خدشات وقت کے ساتھ ساتھ درست ثابت ہوئے. دہلی میں منعقدہ مسلم لیگ کے تیسویں اجلاس میں آپ نے فرمایا تھا.

"مسلمان گروہوں اور فرقوں کی نہیں بلکہ اسلام اور قوم کی محبت پیدا کریں کیوں کہ انہیں برائیوں نے مسلمانوں کو 200 سال سے کمزور اور محکوم بنا رکھا ہے”. اسی طرح آپ نے کشمیر کے متعلق جو فرمایا تھا کہ "کشمیر پاکستان کی شہ رگ ہے” ہمیں اب احساس ہوا کہ کہ کشمیر کیسے اور کس طرح پاکستان کی شہ رگ ہے. ناجائز اسرائیلی ریاست کے قیام کے خلاف آپ نے جو کچھ فرمایا تھا آج وقت نے ٹھیک اسی طرح ثابت کر دیا ہے. ہندوستان کے مسلمانوں کے متعلق ہندوؤں کی سوچ کا آپ 100 سال پہلے بتا چکے تھے جو آج ہندوستان میں ہندو مسلمانوں کے ساتھ کر رہے ہیں.

بانی پاکستان بابائے قوم حضرت قائداعظمؒ بیماری کی حالت میں بھی پاکستان کا سوچ رہے تھے. قائداعظمؒ کے ذاتی معالج ڈاکٹر ریاض علی شاہ "قائداعظمؒ کے آخری لمحات” میں لکھتے ہیں کہ، 

قائداعظمؒ کو کریون اے کے سگریٹ پسند تھے اور اکثر یہی سگریٹ نوش فرماتے تھے. ایک دن کریون اے کے سگریٹ ختم ہو گئے اور پورے کویٹہ میں ڈھونڈنے سے بھی نہیں مل رہے تھے. لیفٹیننٹ کرنل الٰہی بخش نے کہا کہ میں نے ایک دوکان پر یہ سگریٹ دیکھے ہیں اگر آپ اجازت دیں تو میں جا کر یہ سگریٹ لے آتا ہوں. جاتے جاتے کرنل الٰہی بخش کہنے لگے کہ اگر ہم پاکستان میں سگریٹ بنانے کی فیکٹری بنائیں اور اچھی قسم کا تمباکو امریکہ سے منگوا کر اپنے ہی ملک میں سگریٹ بنانا شروع کر دیں تو یہ کتنا اچھا ہوگا. یہ سن کر حضرت محمد علی جناحؒ کی آنکھیں جوش سے لال ہو گئیں اور فرمانے لگے "پاکستان میں دنیا کا سب سے اچھا تمباکو ملتا ہے، تمباکو کے لئے ہم امریکہ کے محتاج نہیں ہو سکتے. ہم اپنے ملک میں بہترین تمباکو پیدا کر کے سیگریٹ بنا کر دوسرے ملکوں کو بھی بیچ سکتے ہیں”

ایک روز حضرت قائداعظمؒ باتوں باتوں میں فرمانے لگے کہ پاکستان ایک زندہ حقیقت ہے، ایک ایسی حقیقت جس کا دوست، دشمن، اپنے اور پرائے سب اعتراف کرنے پر مجبور ہیں. پاکستان بن چکا ہے. پاکستان کا مستقل درخشندہ ہے. میری روح کو تسکین میسر ہے کیوں کہ برصغیر کے مسلمان اب ہندوؤں یا انگریزوں کے غلام نہیں رہے بلکہ آزاد ریاست کے مالک ہیں. مزید فرماتے ہیں کہ جب مجھے احساس ہوتا ہے کہ میری قوم آج ایک آزاد اور خود مختار قوم بن چکی ہے تو فخر سے میرا سر عجز و نیاز کے جذبات سے اللہ سبحانہ وتعالیٰ کے حضور سجدہ شکر بجا لانے کو جھک جاتا ہے.

ان دنوں معالجین کی زیر نگرانی آپ حضرت قائداعظمؒ کوئٹہ زیارت میں تھے. آپ کی طبیعت قدرے سنبھل گئی تھی مگر بعد میں آپکی طبیعت روز بروز مضمحل ہوتی چلی گئی اور کمزوری میں اضافہ ہوتا گیا. 8 یا 9 ستمبر کو قائداعظمؒ نے اپنی طبی ٹیم سے فرمایا کہ مجھے کراچی لے چلو.

11 ستمبر کو کوئیٹہ سے کراچی کے لئے روانہ ہوئے. آپکے ذاتی معالجین، مادر ملت فاطمہ جناح اور کرنل الٰہی بخش ہمراہ تھے. دوران سفر آپ سکون سے رہے. قائداعظمؒ کے ذاتی معالج ڈاکٹر ریاض علی شاہ لکھتے ہیں کہ

"ہم 11 ستمبر کو کوئٹہ سے کراچی کے لئے روانہ ہوئے. راستہ میں مکمل پرسکون رہے اور ادھر ادھر کی باتیں بھی کرتے رہے. سفر کے دوران کسی قسم کی پریشانی یا تکلیف محسوس نہیں کی”

فاطمہ جناح کے کہنے پر کرنل الٰہی بخش، ڈاکٹر مستری اور ڈاکٹر ریاض علی شاہ ہوٹل چلے گئے. ڈاکٹر کہتے ہیں کہ 9 بجے کے قریب فاطمہ جناح کا ہمیں فون آیا اور کہتی ہیں کہ کمزوری میں اضافہ ہو گیا ہے اور طبیعت میں بے قراری بڑھتی جا رہی ہیں، پریشانی کے عالم میں محترمہ فاطمہ جناح نے یہ سب فون پر ڈاکٹروں کو بتایا. معالجین اور کرنل الٰہی بخش فوراً گورنمنٹ ہاؤس کراچی پہنچے. حضرت قائداعظمؒ پر بے ہوشی طاری تھی اور کمزوری انتہا کو پہنچ چکی تھی. آپکی نبض میں بگاڑ آ گیا تھا اور آنکھیں پتھرا رہی تھیں. طبی ٹیم نے باہم مشورے سے آپکو کئی ٹیکے لگائے گئے جس سے آپکی طبیعت میں کسی حد تک بہتری پیدا ہوئی. مگر کچھ دیر بعد آپ کا دل ڈوبنے لگا اور آپکی نبض بھی غیرمتوازن طریقے سے چلنے لگی، آنکھیں بند ہونے لگیں اور سانس بھی رک رک کر چلنے لگی. اس بے ہوشی کے عالم میں آپ نے کچھ کہا.

ساتھ کھڑے معالجین اور قریبی لوگوں کے بقول کہ حضرت قائداعظمؒ کا آخری فقرہ مکمل طور پر ہمیں سمجھ نہیں آیا صرف "اللہ” اور "پاکستان”سمجھ آیا. مطلب آخری لمحات میں آخری الفاظ بھی اللہ اور پاکستان کے متعلق تھے. 11 ستمبر 1948 کو 71 سال کی عمر میں پاکستان اور مسلمانوں کا سوچتے سوچتے 10 بج کر 25 منٹوں پر صدی کے عظیم ترین رہنما، مسلمانان برصغیر کے مسیحا، باکردار، بابائے قوم اور بانی پاکستان ہمیشہ کی نیند سو گئے.

انا للہ واناالیہ راجعون.

بانی پاکستان حضرت محمد علی جناحؒ کے انتقال کی خبر پورے کراچی میں جنگل میں آگ کی طرح پھیل گئی. کراچی سمیت پورا پاکستان حزن و ملال میں ڈوب گیا. تمام رات لاکھوں پاکستانیوں سمیت دنیا کے تمام مسلمان اپنے عظیم رہنما اور مسیحا کی رحلت پر ماتم میں سوگوار اور اشک بار رہے. صبح ہوتے ہی پورا پاکستان ماتم کدہ بن گیا. 12 ستمبر کو عظیم قائد کے عظیم جنازے کو اس کی شایانِ شان کے مطابق فوجی اور ریاستی اعزاز سے اٹھایا گیا. اپنے عظیم قائد کو الوداع کہنے کے لئے لاکھوں لوگوں نے جنازہ میں شرکت کی. صدی کے عظیم ترین رہنما اور مسیحا کو دفن کر دیا گیا.

ہزاروں سال نرگس اپنی بے نوری پہ روتی ہے

بڑی مشکل سے ہوتا ہے چمن میں دیدہ ور پیدا.

اللہ تعالیٰ حضرت قائداعظمؒ محمد علی جناحؒ کی تمام لغزشوں کو معاف فرمائیں اور درجات بلند فرماتے ہوئے جنت الفردوس میں اعلیٰ ترین مقام عطا کریں۔ آمین

‎@mian_ihsaan