Category: بلاگ

تما ش بینی کب تک؟

سیاست کے بکھیڑوں سے جان چھڑوائیں تو ہم قومی تعمیر کے معاملات پر بات چیت کریں‘ ملک کو درپیش چیلنجوں کے بارے میں سوچیںاور انکے حل پر گفتگو کریں کہ ہمیں بحیثیت قوم کس طرح آگے بڑھنا ہے‘ ہماری ترجیحات کیا ہونی چاہئیں‘ طریقہ کار کیا ہونا چاہیے۔ ماضی میں ملک کو صرف حکومت میں شامل لوگوںکی کرپشن سے ہی نقصان نہیں پہنچا بلکہ غلط ترجیحات نے بھی شدید بحران پیدا کیے۔ پاکستان اسوقت جن معاشی ‘ سماجی مسائل کا شکار ہے وہ راتوں رات پیدا نہیں ہوئے۔ دہائیوں کی غفلت‘ غلط ترجیحات اور پا لیسیوں کے باعث ہم اس مقام پر پہنچے ہیں۔ غربت‘ بے روزگاری بڑھ گئی ہے۔ مہنگائی بہت بڑھ گئی ہے۔ معاشی ترقی کی رفتار بہت سست ہے۔ پاکستانی روپیہ کی قدر بہت کم رہ گئی ہے۔ غیرملکی اور ملکی قرضوںکا بوجھ بڑھتا چلا جا رہا ہے۔ لگتا ہے ہم کسی دلدل میں دھنسے ہوئے ہیں جس سے نکلنے کی کوئی اُمید نظر نہیں آتی۔موجودہ صورتحال کی سب سے بڑی وجہ یہ ہے کہ ہماری حکومتوں نے بے تحاشا قرضے لیے لیکن انکا استعمال غیرپیداواری کاموں کی خاطر کیا حالانکہ قرض کی رقم کو سوچ سمجھ کر ایسے منصوبوں پر استعمال کرنا چاہیے تھا جن سے ہماری آمدن میں اضافہ ہوتا۔ لاہور کی اورنج ٹرین کو دیکھ لیجیے کہ چین سے ڈیڑھ سو ارب روپے قرض لیکر بنائی ہے لیکن اس سے آمدن تو کیا ہوگی اُلٹا حکومت کو اسے چلانے کے لیے سالانہ اربوں روپے کی سبسڈی دینا پڑے گی۔ یہی حال موٹرویز اور ائیرپورٹس کا ہے۔ بھارت نے کوئی موٹروے نہیں بنائی لیکن اسکی معیشت ہم سے کہیںزیادہ مستحکم ہے ‘ اسے بھاگ بھاگ کر آئی ایم ایف اور سعودی عرب سے قرضے لینے نہیں جانا پڑتا۔ وجہ یہ ہے کہ بھارت نے پہلے اپنی جڑیں مضبوط کیں‘ ملک کی صنعتی ترقی پر توجہ دی‘ جدید تعلیم کے بڑے بڑے ادارے بنائے۔ بھارت کے اعلیٰ تعلیم یافتہ لوگ امریکہ اور جاپان میں بڑے بڑے عہدوں پر فائز ہیں۔ان ملکوں کی پالیسیوں پر اثر انداز ہوتے ہیں۔ ملک کے اندر بھی یہ لوگ معاشی ترقی کے قیادت کررہے ہیں۔ جب دنیا کمپیوٹر انقلاب کے دور میں داخل ہورہی تھی تو بھارت نے الیکٹرانکس اور انفارمیشن ٹیکنالوجی کی تعلیم اور صنعتکاری میں کثیر سرمایہ کاری کی۔ آج بھارت آئی ٹی کی برآمدات سے سوا سو ارب ڈالر سے زیادہ زرمبادلہ کما رہا ہے۔ جبکہ ہم صرف سواارب ڈالر کیونکہ ہماری حکومت کو بڑی بڑی سڑکیں بنانے کا خبط سوار تھا ‘ تعلیم میں سرمایہ کاری ہماری ترجیح نہیں تھی۔ یہ جھوٹی شان و شوکت کے منصوبے ہیں جن کے باعث ہماری معیشت بحران کا شکار ہے۔ حتی کہ بنگلہ دیش ہم سے بہتر حالت میں ہے۔ بنگلہ دیش نے کوئی بڑا ائیر پورٹ نہیں بنایا نہ کوئی موٹروے۔اسکی برآمدات پینتالیس ارب ڈالر سالانہ سے زیادہ ہیں اور ہماری تئیس ارب ڈالر۔ اسی بنگلہ دیش کا کچھ عرصہ پہلے تک ہمارے لوگ مذاق اُڑایا کرتے تھے۔ صحیح ترجیحات اور پالیسیوں کی بدولت بنگلہ دیش کی کرنسی ٹکا ہمارے روپے سے زیادہ مضبوط ہے۔ ایک بنگلہ دیشی ٹکا تقریبا دوپاکستانی روپے کے برابر ہے۔1971 میںجب مشرقی پاکستان ہم سے جدا ہوکر بنگلہ دیش بنا تو اسکی آبادی ہمارے ملک سے تقریباً ایک کروڑ زیادہ تھی۔آج ہم سے پانچ کروڑ کم ہے۔ہم نمائشی کاموں میں پھنس کر رہ گئے یانام نہاد جہادی‘مسلح فرقہ وارانہ گروپوں کے نرغے میں گھرے رہے جنہوں نے ملک کے امن و امان کو تہہ و بالا کرکے رکھ دیا۔ ان حالات میںکوئی ملک خاک ترقی کرسکتا ہے۔ کوئی مسیحا نہیں ہوتا جو کسی ملک کو راتوںرات مسائل سے با ہر نکال دے۔ چٹکی بجاتے تمام مسائل حل کردے۔مہنگائی ختم کردے اور سب کو روزگار مہیا کردے۔ ہتھیلی پر سرسوں نہیں جما کرتی۔جو لوگ سال دو سال میں دکھاوے کے پراجیکٹ کھڑے کرتے ہیں وہ شعبدہ باز‘ مداری ہوتے ہیں۔ اُلجھی ہوئی گتھیاں سلجھانے کی خاطر غور و فکر کے بعد پالیسیاں تشکیل دینا پڑتی ہیں اوربرسوں مستقل مزاجی سے ان پر عمل کرنا پڑتا ہے تب دس پندرہ سال بعد مثبت نتائج سامنے آتے ہیں۔ ایسے منصوبے جو قرضے لیکر ایک دو سال میں مکمل کرلیے جائیں سادہ لوح عوام کواچھے لگتے ہیں لیکن ملک کے لیے تباہ کن ثابت ہوتے ہیں۔ مثلاً ملک کو پانی کے بڑے ذخائر کی ضرورت ہے‘ آبپاشی کے نئے ترقی یا فتہ نظام کی تاکہ بڑھتی ہوئی آبادی کی زرعی اور گھریلو استعمال کی ضروریات کو پورا کیا جاسکے۔ جب دریاؤں میں پانی زیادہ آتا ہے اسے ضائع ہونے سے بچایا جائے۔ ایک بڑا ڈیم بنانے کے لیے دس بارہ برس درکار ہوتے ہیں۔ لیکن جب یہ مکمل ہوجاتا ہے تو اسکے ملکی معیشت کو بے بہا فوائد پہنچتے ہیں۔ ملکی آمدن میں اضافہ ہوتا ہے۔ اگر ہم بیس پچیس سال پہلے بڑے ڈیمز پر کام شروع کردیتے تو آج زیادہ خوشحال ہوتے۔ زیادہ رقبہ زیرکاشت ہوتا۔ زرعی پیداوار میں اضافہ ہوچکا ہوتا۔ ہمیں آج گندم باہر سے درآمد نہ کرنا پڑتی۔ کراچی کو دریائے سندھ سے اضافی پانی سپلائی کرنے میں آسانی ہوتی۔ بجلی زیادہ اور سستی دستیاب ہوتی۔ اسی طرح ہمیں قدامت پسند طبقات کی بلیک میلنگ سے نجات حاصل کرنا ہوگی اور آبادی میں اضافہ کو کنٹرول کرنا ہوگا جس طرح ایران اور بنگلہ دیش نے بہبود آبادی کے پروگرام کامیابی سے چلا کر کیا ہے۔ پاکستان دنیا کے ان چند ملکوں میں شامل ہے جہاں آبادی میں اضافہ کی رفتار بہت زیادہ ہے۔خاص طور سے ہمارے دیہات میں اور قبائلی معاشرت کے علاقوں میں۔ حکومت اگر اس معاملہ پر مستحکم اور طویل المعیاد منصوبہ بندی نہیں کرے گی توملک میں جتنی بھی معاشی ترقی ہوجائے عوام کی غربت کم نہیں ہوگی۔ بیروزگار نوجوانوں کے جتھے کے جتھے ہوں گے جو بدامنی اور لاقانونیت کا باعث بنیں گے۔ اب بھی وقت ہے کہ ہم سنبھل جائیں اور اپنی ترجیحات کو درست کریں۔ تعصبات‘ توہم پرستی اور احمقانہ بیانیہ پھیلانے والوں سے نجات پائیں۔ انفارمیشن ٹیکنالوجی‘ مصنوعی ذہانت ‘ روبوٹکس ‘ بائیوٹیکنالوجی میں بھاری سرمایہ کاری کریں تاکہ اگلے دس پندرہ سال بعد ہماری معیشت مضبوط بنیادوں پر استوار ہو ۔ جدید تعلیم میں سرمایہ کاری‘ صنعتی کارخانوں کا قیام‘ پانی کے وسائل کی ترقی‘ آبادی میں کمی کے لیے پروگرام‘ نظام عدل و انصاف کی اصلاح‘ اقتدار و اختیار کی نچلی سطح پر منتقلی ایسے اقدامات ہیں جو پاکستان کی بقا ‘ سلامتی اور خوشحالی کے لیے انتہائی اہمیت کے حامل ہیں۔ ہمیں کم سے کم ان موضوعات پر سیر حاصل بحث مباحثہ تو کرنا چاہیے۔ کب تک ہم بے معنی سیاست کی تماش بینی میں مصروف رہیں گے؟

سعادت کی زندگی کس کے لیے؟
عمر یوسف

طبیعت پر چھائی گہری کدرت اچھے احساس میں بدلنا شروع ہوئی ۔۔۔ خیالات کا جمود ٹوٹا اور سوچ کی روانی شروع ہوئی ۔۔۔ طبیعت کی اداسی ختم ہوئی اور شادانی و فرحانی آنے لگی ۔۔۔۔ مرجھائے چہرے نے اچانک کھلنا شروع کردیا جیسے بہار میں تازہ پھول باغ کو جنت نظیر بناتے ہیں اور اپنی مہک سے انسان کی طبیعت کو یوں ہلکا کرتے ہیں جیسے وہ تنکے جیسا ہو ۔۔۔۔ مزاج کا یوں ایک دم سے بدلنا مجھے حیراں کرگیا ۔۔۔۔

ہاں ہاں یہ تو خداوند بزرگ وبرتر کی بھیجی ہوئی ٹھنڈی ہوا ہے جو انسان کے مزاج پر خوب اثر انداز ہوتی ہے ۔۔۔۔

کہ جب آگ برساتا سورج انسان کو ادھ موا کردیتا ہے تو وہ مالک المک خدا اپنے بندوں پر خوب ترس کرتا ہے اور اس کی ہواوں کے لشکر اس کے بندوں کو تروتازہ کردیتے ہیں ۔۔۔۔۔ کہ جب انسان نڈھال ہوجاتا ہے اور موسم کی کیفیت کے آگے ہتھیار ڈالنے ہی والا ہوتا ہے تو اس کی رحمت جوش میں آتی ہے اور انسان کو اپنے سائے میں ڈھانپ لیتی ہے گرمی کی حدت ہو یا سردی کی شدت وہ خوب بدل دیتا ہے ۔۔۔۔۔ کیونکہ وہ وعدہ کرتا ہے کہ وہ انسان پر اتنا ہی بوجھ ڈالتا ہے کہ جتنا انسان سہہ سکتا ہے ۔۔۔۔
کیا تم تھک جاتے ہو ۔۔۔۔ اکتا جاتے ہو ۔۔۔۔ بوکھلا جاتے ہو ۔۔۔ مرجھا جاتے ہو ۔۔۔۔ ہمت ہار جاتے ہو ۔۔۔۔۔؟

تو یوں کیا کرو کہ سب کچھ چھوڑ دیا کرو ۔۔۔ سر سجدے میں رکھ دیا کرو ۔۔۔ دل میں دبے لاوے کو پھٹنے دیا کرو ۔۔۔ کہ جب دل کا لاوا پھٹتا ہے تو آنکھوں کے ذریعے بہتا ہے ۔۔۔۔ تمہارے اس لاوے میں اتنا اثر ہوتا ہے کہ آسمان دنیا پر ہلچل مچا دیتا ہے ۔۔۔ خدا تمہاری طرف متوجہ ہوجاتا ہے ۔۔۔۔ جب اپنے بادشاہ کی توجہ پالو تو بے بسی کا اعتراف کرو ۔۔۔ عاجزی کو اس کے سامنے پیش کرو ۔۔۔ بندگی کا واسطہ دو ۔۔۔ خود کو عاجز پیش کرو ۔۔۔ وہ یہی چاہتا ہے ۔۔۔ وہ یہی پسند کرتا ہے ۔۔۔ کہ جب تم یہ کرلو ۔۔۔ تو اسے کہو کہ میں تیرا ہی سوالی ہو بتا مجھے تیرے علاوہ خیرات کون دے ۔۔۔ وہ تمہیں خیرات دے گا ۔۔۔۔ کہو کہ مجھے عزت چاہیے کہ تم نے وعدہ کیا ہے کہ عزت تو تیرے بندوں کے لیے ہے ۔۔۔ وہ تمہیں عزتوں سے نواز دے گا ۔۔۔ بھیک مانگو مدد کی ۔۔۔ کہ کون ہے جو اس کے علاوہ مدد کرے ۔۔۔۔

تم دل میں دہائی دو ۔۔۔ کہ اس گھٹیا دنیا کا بوجھ میرے بس میں نہیں رہا ۔۔۔ اب تو ہی ہے جو میرا بوجھ ہلکا کرے گا ۔۔۔ وہ تمہارا بوجھ ہلکا کردے گا ۔۔۔۔ کیونکہ وہ وعدے کا پکا ہے ۔۔۔ کون ہے جو اس سے بڑھ کر وعدے میں سچا ہو ۔۔۔ تم بیماری میں پکارو وہ تمہیں شفاء دے ۔۔ تنگدستی میں پکارو وہ تمہیں خوشحالی دے ۔۔۔ مشکل میں پکارو وہ آسانی لے آئے ۔۔۔۔

وہ دیکھو وہ انسان کتنا پریشان ہے ۔۔۔ کیا اسے علم نہیں کہ اس کا رب پریشانیاں دور کردیتا ہے ۔۔۔
اسے دیکھو یہ در در کی خاک چھان رہا ہے کیا اس کا رب اس کی داد رسی اور فریاد سن کر مراد پوری کرنے سے عاجز آگیا ؟۔۔۔۔

آہ کون ہے اس سے بڑا بیوقوف جو اپنے رب کی ربوبیت کو نہ پہچان سکے ۔۔۔ کتنے خسارے میں ہے وہ جو اپنے رب کی کبریائی نہ پہچان سکے ۔۔۔۔ تم دیکھو گے جن لوگوں نے اسے پہچان لیا وہ آگ سے بچ گئے ۔۔۔ سمندر ان کے لیے راستے بنانے لگے ۔۔۔ مچھلی کے پیٹ سے وہ صحیح سلامت آگئے ۔۔۔ دشمن کی ناک کے نیچے سے بچا لیے گئے ۔۔۔۔

تم دنیاوی مال و دولت کی بہتات رکھنے والے ڈھیروں غریب دیکھو گے کیونکہ وہ معیت خداوندی سے محروم کردیے گئے ۔۔۔۔
کیا کہنے ان کے مقدر کے جو ولایت ربانی ۔۔۔ معیت خداوندی سے سرشار ہوئے دنیا ان کی لونڈی بنی آخرت کی سعادت ان کی غلام ہوئی ۔۔۔۔ تم کہو کہ میرا رب وہ اللہ ہے پھر دنیا تمہارے قدموں تلے ہوجائے گی ۔۔۔ اور معززین میں بلند مقام پاو گے ۔۔۔

آزادی اظہار رائے

مملکت خداد پاکستان کو اللہ تعالی نے بہت سی نعمتوں سے نوازا ہے.پاکستان گیس اور کوئلہ کے زخائر سے مالامال ہے. پھر بھی پاکستان معاشی طور پر بہت کمزور ہے. پاکستان کے تنزلی کے اسباب میں ایک سبب یہاں کی عوام کی غالب اکثریت کی آواز کو دبانے کی کوشش کرنا بھی یے. حالیہ دنوں میں پاکستان کی پارلیمنٹ نے ایف اے ٹی ایف کی گرے لسٹ سے نکلنے کے لئے قومی اسمبلی سے بل پاس کروائے ہیں. جن میں محکمہ اوقاف کے متعلق اور منی لانڈرنگ کی روک تھام کے لئے بھی بل موجود تھے. قومی اسمبلی کے اجلاس کے بعد اپوزیشن نے متفقہ فیصلہ کے تحت آل پارٹیز کانفرنس منعقد کرنے کا اعلان کیا.جناب نواز شریف صاحب نے وڈیو لنک خطاب کیا عندیہ دیا جس کے نتیجے میں حکمران جماعت کے شہباز گل صاحب نے اسکے خلاف پیمرا کو استعمال کرنے کا کہا مگر پھر سابقہ وزیر اعظم کی تقریر نشر کی گئی حالانکہ ان پر نیب کی جانب سےکرپشن کے چارجز موجود ہیں اور انکے ناقابل ضمانت وارنٹ گرفتاری جاری کر کہ لندن ہائی کمیشن کے ذریعے ان کو وصول کروائے جا چکے ہیں.
2018 کے عام انتخابات میں حکمران اور دیگر سابقہ جماعتوں کے علاوہ ایک جماعت تحریک لبیک پاکستان نے بھی پہلی بار الیکشن میں حصہ لیا اور 22 لاکھ سے زائد ووٹ حاصل کیے. ملکی تاریخ میں پہلی پار کسی مذہبی سیاسی جماعت نے رجسٹرڈ ہونے کے فوراً بعد محض چند ماہ کی الیکشن کمپین میں اتنی کثیر تعداد میں ووٹ حاصل کیے. تحریک لبیک پاکستان کے امیر علامہ خادم حسین رضوی ناموس رسالت و ختم نبوت کی تحاریک کا ماضی میں بھی حصہ رہے اور غازی ممتاز حسین قادری کی رہائی کی بھرپور تحریک چلاتے رہے جو بعدازاں تحریک لبیک یا رسول اللہ صلی اللہ علیہ وسلم کے نام سے مشہور ہوئی. پاکستان میں ختم نبوت قانون میں تبدیلی ہو یا ہالینڈ میں گستاخانہ خاکوں کی اشاعت کا معاملہ، علامہ خادم رضوی میدان عمل میں موجود رہے اور انہی کے اسلام آباد کی طرف مارچ کی بدولت ہالینڈ نے گستاخانہ خاکوں کا مقابلہ منسوخ کیا. جبکہ حکمران جماعت کے چند وزراء اس پر بغلیں بجاتے اور کریڈٹ لیتے نظر آئے.
حال ہی میں فرانس کے ایک میگزین نے گستاخانہ خاکوں کو شائع کرنے کا اعلان کیا یے جس کے ضمن میں تحریک لبیک پاکستان نے ملک بھر میں پر امن احتجاجی ریلیوں کا انعقاد کیا اور عوام کی کثیر تعداد نے ان ریلیوں میں شرکت کی. علامہ خادم حسین رضوی کی پنجاب اسمبلی کے سامنے ریلی سے خطاب کے بعد پولیس اور مقتدر قوتوں نے علامہ صاحب کو گرفتار کرنے کی ٹھانی اور ایک معذور شخص کو گرفتار کرنے کے لئے پولیس کی 6 وین بمعہ عملہ، اسلحہ و سازوسامان روانہ کر دی گئیں. مگر کارکنان کے بروقت پہنچنے اور علاقہ کے خواتین کے بھی سڑکوں پر آجانے کے باعث پنجاب پولیس کو پسپائی اختیار کرنا پڑی. نواز شریف صاحب اور دیگر پارٹیز کے کرپٹ حکمران جو کرپشن چارجـز کی وجہ سے جیل میں رہے میڈیا کی جانب سے انکا بیانیہ جاری کیا جاتا رہا مگر تحریک لبیک پاکستان جو کہ ایک پر امن مذہبی سیاسی جماعت ہے انکی کسی ریلی کسی احتجاج کسی بیان کو براہ راست میڈیا نے کوریج نہ دی. مملکت پاکستان کے باوقار شہری ہونے کے ناطے ہر کسی کی آواز کو میڈیا تک پہنچنے اور اسے نشر ہونے کا حق ملک کا آئیں و قانون دیتا ہے مگر ہمارے ملک میں پیمرا اور دیگر چینلز تحریک لبیک کے ساتھ سوتیلی ماں جیسا سلوک کر رہے ہیں. بقول مفتی اعظم پاکستان اگر پاکستان میں اعتدال کی فضا نہ قائم کی گئی اور ایک غالب اکثریت رکھنے والے طبقے کو یوں ہی نظر انداز کیا جاتا رہا تو ملک میں انارگی، انتشار اور شدت پسندانہ جذبات کی ترویج ہوگی.
نواز شریف صاحب کی تقریر آزادی اظہار رائے کی آڑ میں تمام.چینلز پر نشر کی گئی مگر وہ جماعت جس کے امیر اور کسی عہدیدار پر کسی قسم کے کرپشن چارجز نہیں ہیں انکی ہر تقریب پر میڈیا نے بلیک آؤٹ کیا. کیا یہی میانہ روی اور انصاف ہے. کیا اس طرح ملک ترقی کرے گا.
ضرورت اس امر کی ہے کہ جہاں دیگر کرپٹ حکمرانوں جن کے وارنٹ گرفتاری جاری ہو چکے اور جو کرپشن چارجز کی زد میں ہیں ان کو میڈیا کوریج دی جاتی ہے ان کے خطابات نشر کئے جاتے ہیں وہاں تحریک لبیک پاکستان کو بھی آزادی اظہارِ رائے کے تحت مکمل آزادی کے ساتھ میڈیا پر اپنا اعلامیہ پیش کرنے کی کھلی اجازت ہونی چاہئیے. میڈیا چینلز کے سوتیلی ماں جیسے سلوک کی بناء پر ایک غالب اکثریت والے طبقے کے جذبات مجروح ہو رہے ہیں جس کا واحد حق بلا تفریق آزادی اظہارِ رائے ہے.

انجینئر محمد ابرار

اجڑا کچھ اس طرح سے گھر
انجینئر محمد ابرار

اچانک فون کی گھنٹی بجی اس بار فون شوہر نے اٹھایا،بغیر بولے کان کو لگا کر رکھا دوسری جانب ایک جاذب مردانہ آواز میں یہ الفاظ سنائی دئیے ” کب سے فون ٹرائی کر رہا ہوں کہاں مصروف ہو کال کیوں نہیں اتھا رہی تھی” شوہر نے بغیر جواب دے فون بیوی کی جانب بڑھا دیا بقیہ گفتگو بیوی نے سنی. بیوی کے پاؤن تلے زمین نکل گئیں آواز ہرگز شناسا نہ تھی البتہ بولنے والا اس روانی سے گلے شکوے کر رہا تھا کہ جیسے اسکا اس سے تعلق صدیوں پر محیط ہو.شوہر نے بیوی کو خون پی جانے والے انداز سے گھورا اور وضاحت طلب کی پر بیوی کی زبان گنگ تھی.
آج سے دو برس قبل محمد عمران کی شادی ثانیہ نامی خاتون سے طے پائی. شادی سے قبل محمد عمران برطانیہ میں تلاش روزگار کے لئے ٹھوکریں کھا رہا تھا آخر کار سات سال کی طویل مدت میں اپنوں سے جدائی کاٹنے کے بعد گرین کارڈ لینے میں کامیاب ہوا. دو دسمبر 2018 کو گھر واپسی تھی. گھر والوں نے اسکی آمد سے قبل ہی اسکی چچا زاد سے اسکی منگنی کر رکھی تھی. ابھی چند ماہ ہی شادی کو گزرے تھے کہ ایک بار پھر پردیس میں واپس جانا پڑا اور آج دو سال بعد ایک بار پھر وہ اپنے دیس واپس آیا تھا. ائیرپورٹ سے گھر واپس آنے کے بعد اپنے گھر والوں اور دوست احباب سے ملا.رات گئے جب وہ اپنی بیوی کے کمرے میں گیا تو فون کی گھنٹی بجی دوسری جانب گلے شکوؤں کا انبار لئے ایک انجان شخص موجود تھا. وہ خاموشی سے بیوی کو فون تھما کر کال ختم ہونے کا انتظار کرتا رہا.
شوہر: کس کا فون تھا اتنی رات گئے.
بیوی: معلوم نہیں کون پاگل تھا.
شوہر: اگر وہ نامعلوم پاگل تھا تو تم سے گلے شکوے شکایتیں تو ایسے کر رہا تھا جیسے تمہیں صدیوں سے جانتا ہو.
بیوی: خُدا کی قسم مجھے معلوم نہیں کہ وہ کم بخت کون تھا جو اس طرح آدھی رات کو فون کر کے مجھ سے کہہ رہا تھا کہ ” روزانہ میں تمہارا انتظار کرتا ہوں پر تم مجھ سے بات نہیں کرتی. مانا کہ تم دور ہو پر دل سے دور نہیں”.
شوہر: (غصے میں چلاتے ہوئے) کیا میں نے اس لیے تم سے شادی کی تھی کہ تم میری غیر موجودگی میں گل چھڑے اڑاتی پھرو؟ آخر تمہارا کیا تعلق ہے اس لڑکے سے. کتنی بار میری غیر موجودگی میں اس سے فون پر بات کر چکی ہو؟ کتنی بار اس سے ملاقات کی ہے.آخر تمہارا کب سے اپنے آشنا سے چکر چل رہاہے اور میری آنکھیں میں دھول جھونک رہی ہو.
بیوی: میرا یقین کریں میں خود کو آپکی امانت سمجھتی ہوں میں کیسے آپ کے ساتھ دھوکہ کر کہ امانت میں خیانت کر سکتی ہوں
شوہر: (آگ بگولا ہوتے ہوئے) بس بس بہت ہوگیا. اپنی اماں کے گھر جا کر امانت امانت کے راگ الاپنا.میں نے تمہارے لئے پردیس میں دن رات گن گن کر گزارے اور تم نے بدلے میں مجھے یہ صلہ دیا یے. میں تمہیں ایک لمحہ بھی اپنے گھر میں بطور بیوی برداشت نہیں کروں گا..نکل جاؤں میرے گھر سے. دفع ہو جاؤ میں.نظروں کے سامنے سے. میں تمہیں طلاق دیتا ہوں.
بیوی: اللہ کے واسطے ایسا مت کری.
بیوی کے یہ سب کہنے تک بہت دیر ہو چکی تھی. ہنسا بستا گھر اجڑ چکا تھا. صرف ایک رانگ کال نے لڑکی زندگی داغدار کر کہ رکھ دی تھی. خاندان کی آنٹیوں نے خبر پر جلتی میں آپ کا کام گیا اور جنگل کی آگ کی طرح یہ خبر پورے خاندان میں پھیل گئی. ہر کوئی ثانیہ کو حقارت کی نگاہ سے دیکھ رہا تھا. سب ہی اس کو کوس رہے تھے کہ شوہر کے ہوتے ہوئے آشنا سے باتیں کرنے کی کیا ضرورت تھی؟
آج ایک اور ہوّا کی بیٹی کا گھر صرف موبائل پر موصول ہونے والا رانگ کال کی وجہ سے اجڑ چکا تھا. ہمارے معاشرے میں بہت سی ایسی لڑکیاں موجود میں جن کے گھر ایک رانگ کال نے اجاڑ دیے.
قارئیں سے گزارش ہے کہ اس کو صرف ایک کہانی کے طور پر مت لیں بلکہ معاشرے کے ان ناسور کو ختم کرنے کے لئے اپنا کردار ادا کریں.