Category: چترال

چترال،باغی ٹی وی (گل حمادفاروقی کی رپورٹ)علاقہ پرسن میں پہاڑ گرگیا،کئی ہفتوں سے راستے بند،اشیائے خوردونوش ختم،مریض گھروں میں مرنے لگے

تفصیل کے مطابق چترال کے علاقے پرسن میں پورا پہاڑ گرنے سے راستہ ہر قسم کے ٹریفک کیلئے بند پڑا ہے، لوگوں کے گھروں میں راشن اور دوسریاشیاءخوردنی بھی ختم ہو چکی ہیں۔دو روزقبل یہاں سے دو مریضوں کو اسٹریچر کے ذریعےچار گھنٹے پیدل چلنے کے بعد گاڑی تک پہنچایا گیا۔

راستے بند ہونے کی وجہ سے علاقے میں مریض علاج کیلئے ہسپتال نہ پہنچ سکنے اور علاج نہ ہونے اور ادویات نہ مل سکنے کی وجہ سے مررہے ہیں ،لوگ اپنے پیاروں کو اپنی آنکھوں سامنے مرتا دیکھنے پر مجبور ہوچکے ہیں

اوریہاں کی عوام نےمتعلقہ اداروں سے اپیل کی ہے کہ ان کے ساتھ بھر پور تعاون کرکے اس راستے کو فوری کھولا جائے تاکہ لوگ اپنے مریضوں کو تو علاج کیلئے کم از کم بر وقت ہسپتال پہنچا سکیں اور گھر میں پڑے ہوئے ان کی موت کا انتظار نہ کریں،اور اشیائے خوردنی بھی گھروں میں لاسکیں

چترال،باغی ٹی وی (گل حماد فاروقی کی رپورٹ) سرحدی علاقے” ارندو” کی سڑک دو دن کھلنے کے بعد برساتی نالہ میں طغیانی کی وجہ سے دوبارہ بند

چترال میں بارشوں اور ندی نالوں میں طغیانی کی وجہ سے پاک افغان سرحدی علاقہ ارندو میں بھی بڑے پیمانے پر تباہی مچ گئی ہ، میر کھنی سے ارندو، لنگوربٹ، دامیل نثار، کوتائی اور رام رام سڑک پر جگہ بھاری پتھر اور پہاڑی تودے گرنے اور اس سڑک پر موجود مختلف ندی نالوں میں طغیانی کی وجہ سے یہ سڑک ہر قسم کے ٹریفک کیلئے بند ہو گئی تھی۔ تاہم ڈپٹی کمشنر چترال اے سی دروش، ایگزیکٹیو انجنئیر محکمہ کمیونیکیشن اینڈ ورکس ( سی اینڈ ڈبلیو) انجنیر طارق مرتضے کی ہدایت پر شاہ محمد ٹھیکیدار نے فوری ان سڑکوں کی صفائی پر بھای مشینری لگاکر ان کی صفائی کا کام شروع کروایا۔

مسلسل محنت کے بعد ان سڑکوں کو ہر قسم کے ٹریفک کیلیے کھول دیاگیا تھا جبکہ لنگور بٹ سڑک پر بھی صفائی کی کام کا آغاز آج ہونا تھا، تاہم جمعرات کے شب سے چترال میں ایک بار پھر بارشوں کا سلسلہ جاری ہوا جس کی وجہ سے مختلف ندی نالوں میں طغیانی آگئی۔

لنگور بٹ کے مقام پر برساتی نالے میں طغیانی کی وجہ سے ارندو کی سڑک ایک بار پھر بند ہوگئی،جس کی وجہ سے مسافروں کو کئی گھنٹے انتظار کرنا پڑا اور کئی مسافر گاڑیاں سڑک کے کنارے کھڑی رہیں جن میں خواتین اور بچے بھِی موجود تھے۔ تاہم محکمہ سی اینڈ ڈبلیو کے ہدایت پر ٹھیکیدار کی مشینری سٹینڈ بائی کھڑی ہے اور بارش رکنے کی انتظار میں ہے جونہی سیلاب کا سلسلہ بند ہوگا اس سڑک کو دوبارہ ٹریفک کیلئے کھول دیا جایے گا۔

اس کے علاوہ محکمہ سی اینڈ ڈبلیو نے دروش گول کے برساتی نالے میں بھی بلڈوزر اور ایکسیویٹر مشین لگاکر اس کی بھل صفائی کا کام شروع کروایا دیا ہےاور اس نالے کے بیچ میں سے ملبہ کناروں پر ڈالتے ہوئے اس کی صفائی کا کام شروع کردیاگیاہے تاکہ پانی کی سطح بلند ہونے کی صورت مِیں اس نالے کے کنارے آباد دکانوں اور مکانوں کو نقصان نہ پہنچے۔ ان ندی، نالوں کی صفائی کے ساتھ ساتھ محکمہ سی اینڈ ڈبلیو نے بیوڑی سڑک، جنجیریت، ارسون، سویر، شیشی مڈگلشٹ اور کوتائی کی سڑکوں کو بھی صاف کرکے ان کو ہر قسم کے ٹریفک کیلیے کھول دیا۔

گذشتہ روز محکمہ سی اینڈ ڈبلیو کے سپرنٹنڈنٹ انجنیر منیر احمد اور ایگزیکٹیو انجنیر طارق مرتضے نے خود ہی ارندو سڑک کا معائنہ کیا اور اپنے عملہ کے ساتھ ساتھ متعلقہ ٹھیکیدار کو بھی ہدایت کی کہ وہ اپنی مشینری تیار رکھے جب بھی یہ سڑکیں بند ہوتی ہیں انہیں فوری طور پر کھول دیا کرے۔

دروش کے ایک بزرگ شہری عبد الرحمان بابا نے کہا کہ دروش گول نالہ کی وجہ سے ہمیں بار بار نقصان کا سامنا کرنا پڑتا تھا ،انہوں نے کہا کہ محکمہ آبپاشی (ایریگیشن ڈیپارٹمنٹ) اس نالے کی بھل صفائی نہیں کرتے اور کئی سالوں سے اس میں ملبہ جمع ہوتا رہہاے جس کی وجہ سے جب بھی معمولی سا سیلاب آتا ہے تو پانی ہماری کھیتوں، گھروں، اور دکانوں کو تباہ کردیتا ہے۔ انہوں نے کہا کہ سیلاب سے پہلے اس نالے کی بھل صفائی کرکے اس سے ملبہ صاف کرنا چاہیے تاکہ یہ علاقے کے لوگوں کیلئے مصیبت کا باعث نہ بنے۔

کورو سے تعلق رکھنے والے محمد شعیب نے ہمارے نمائندے کو بتایا کہ جب بھی اس نالے مِیں سیلاب آتا ہے تو ہم لوگ ڈر کی وجہ سے سو نہیں سکتے کہ کہیں سوتے وقت سیلاب آکر ہمیں بہاکر نہ لے جائے اب جب سے اس نالے میں صفائی کا کام شروع ہوا ہے تو ہم سکون کی نیند سوتے ہیں۔

ایڈیشنل اسسٹنٹ کمشنر دروش محمد علی نے بتایا کہ مسلسل بارشوں کے بعد دروش گول نالے میں سیلاب آتا رہتا ہے اور اس کے کنارے آباد لوگوں کو شدید خطرہ لاحق ہے اب ہم نے ٹھیکیدار کے ذریعے اس کی صفائی کا کام شروع کروایا ہے، جس سے کافی حد تک خطرہ ٹل جائے گا۔ انہوں نے تصدیق کرلی کہ سیلاب سے پہلے اس نالے نے ملبہ ہٹانا چاہیے تاکہ طغیانی کی صورت میں لوگوں کیلئے جانی اور مالی نقصان کا باعث نہ بنے۔

ارندو سے تعلق رکھنے والے حاجی سلطان نے بتایا کہ ارندو وہ بدقسمت علاقہ ہے کہ کچھ تو سرکار کی عدم توجہ کی وجہ سے پسماندہ ترین علاقوں میں شمار ہوتا ہے، جہاں اس جدید دور میں بھی سرکاری بجلی، موبائل فون، انٹرنیٹ ، ڈی ایس ایل ، ڈاکٹر وغیرہ نہیں ہے اور کچھ قدرتی آفات کی وجہ سے یہ علاقہ بری طرح متاثر ہورہا ہے۔ انہوں نے مطالبہ کیا کہ ارندو کی اس خوبصورت مگر پسماندہ علاقے پر توجہ دینا چاہیے اور مستقل بنیادوں پر یہاں ترقیاتی کاموں کا آغاز کرناچاہیے تاکہ ان لوگوں کی زندگی مِیں آسانیاں پیدا ہوسکیں۔

شہزادہ جان اس علاقے کا باشندہ ہے اس نے کہا کہ یہ سڑک دس دنوں سے بند پڑی تھی کل محکمہ سی اینڈ ڈبلیو نے اسے ٹریفک کیلئے کھول دیا تھا مگر آج پھر بارش کے بعد طغیانی آئی اور ایک بار پھر سے یہ سڑک بند ہوگئی ہے.

حبیب اللہ بھی ارندو کا باسی ہے جو سیلابی پانی میں جان جوکھوں میں ڈال کر اسے پیدل عبور کیا ان کا کہنا ہے کہ وہ صبح بھی اسی برساتی نالے میں پیدل گیا تھا اور واپس اس میں اندر داخل ہوکر پیدل اسے عبور کرکے گھر جارہا ہے، جس مِیں اس کی جان بھی جاسکتی ہے، مگر کیا کرے مجبوری ہے۔ ان کا مزید کہنا تھا کہ بد قسمتی سے اس علاقے میں نہ تو موبائل فون ہے اور نہ انٹرنیٹ کی سہولت تاکہ ہم کسی بھی ہنگامی صورت حال میں ریسکیو 1122ا،فائربریگیڈ یا ایمبولنیس والوں کو اطلاع دے سکیں یا مصیبت کے گھڑی میں اپنے رشتہ داروں کی خیر خیریت دریافت کرسکیں۔

واضح رہے کہ چترال کے دیگر علاقوں کی طرح پاک افغان سرحد پر واقع ارندو کے علاقے میں بھِی بڑے پیمانے پر سیلاب نے تباہی مچائی ہے جہاں سڑکوں، آبپاشی کی ندیوں،پینے کے پانی کی پائپ لائن کے ساتھ ساتھ لوگوں کے مکانات، دکانیں بھی گرچکے ہیں مگر ابھی تک یہ متاثرین حکومتی امداد کی راہ تک رہے ہیں۔

متاثرہ لوگوں نے صوبائی اور وفاقی حکومت سے مطالبہ کیا ہے کہ جن کا نقصان ہوا ہے ان کی مالی امداد کی جائے اور جہاں سڑکیں، راستے، پل وغیرہ سیلاب کی وجہ سے تباہ ہوچکے ہیں انہیں جلد دوبارہ بحال کیا جائے تاکہ ان لوگوں کی مشکلات میں کمی لائی جاسکے۔

چترال،باغی ٹی وی (گل حماد فاروقی کی رپورٹ)چترال پشاور شاہراہ دروش کے مقام پر سیلاب کی وجہ سے بند ۔ مسافروں کو شدید مشکلات کا سامنا

چترال میں پشاور شاہراہ دروش میں کلدام گول کے مقام پرسیلاب کے باعث بند ہے،مسافروں کو شدید مشکلات کا سامنا ہے، سکول سے واپس آنے والے طلباء بھی سیلاب میں پھنس گیے۔ دروش میں کلدام گول نالہ میں شدید طغیانی کی وجہ سے مسافر گاڑیاں سیلاب کے اندر پھنس گئی ہیں ،جنہیں بڑی مشکل سے ٹریکٹر سے باندھ کر نکالا گیا۔

اسی جگہ پر خواتین کا ڈگری کالج بھی ہے جہاں کی طالبات بھی سیلاب کی وجہ سے محصور ہوچکی تھیں۔ طلباءکو لانے والی ایک سکول بس بھی سیلاب میں پھنس گئی جسے بڑی مشکل سے نکالا گیا۔ بس میں پھنسے ہوئے طلباء نے بتایا کہ ہم بہت خوف زدہ ہوگئے، یہاں پل نہ ہونے کی وجہ جب بھی بارش برستی ہے تو اس نالے میں سیلاب آتا ہے ہم بار بار مطالبہ کرتے آرہے ہیں کہ یہاں ایک پل تعمیر کیا جایے مگر اس کی کہیں بھِی شنوانی نہیں ہوتی۔

مقامی لوگوں کا کہنا ہے کہ این ایچ اے کی جانب سے صرف ایک ٹریکٹر بھیجا گیا تھا مگر وہ بھی سیلاب میں آنے والا ملبہ جو سڑک پر جمع ہواتھا اسے صاف نہ کرسکا۔

مسافر گاڑیوں کے ڈرائیور جان کا خطرہ مول لیتے ہوئےاس سیلاب کے اندر سے گاڑیاں گذارنے پر مجبور ہیں،برساتی نالے کے دونوں جانب کثیر تعداد میں گاڑیاں پھنس گئیں ، مقامی لوگوں کا کہنا ہے کہ نیشنل ہائی وے اتھارٹی کا مینٹینس سیکشن سڑک کی مرمت کے نام پر کروڑوں روپے کا فنڈ تو لیتا ہے مگر اسے چند افسران اور ٹھیکیداران ملی بگھت کرکے ہڑپ کرجاتے ہیں۔

متاثرہ لوگوں نے اعلیٰ حکام سےمطالبہ کیا ہے کہ کلدام گول نالہ میں پچھلے دنوں بھی چوبیس گھنٹے سے زیادہ مسافر پھنسے رہےتھے

یہاں ایک پل تعمیر کیا جائے تاکہ مستقل بنیادوں پر اس مسئلے کا حل نکالا جاسکے اور مسافر گاڑیاں بار بار اس سیلابی نالے مِیں پھنسنے سے بچ سکیں اورچترال پشاور روڈ گاڑیاں مسافر بلاتعطل اپناسفرجاری رکھ سکیں.

چترال،باغی ٹی وی (گل حماد فاروقی)بارشوں اور سیلاب کے باعث اورغوچ، شاڈوک میں محکمہ سی اینڈ ڈبلیو نے بند راستے کھولنےپر کام شروع کردیا

چترال میں حالیہ مسلسل بارشوں اور تباہ کن سیلاب کی وجہ سے چترال کے مختلف علاقوں کے راستے ہر قسم کے ٹریفک کیلیے بند ہوئے تھے۔ مسلسل بارشوں کے بعد ندی نالوں میں طغیانی نے پہاڑوں سے بڑے بڑے پتھر اور ملبہ بھی بہاکر سڑکوں پر ڈھیر کردیا جس کی وجہ سے یہ راستے سفر کے قابل نہیں رہے۔ سیلاب کی وجہ سے اورغوچ، بکامک، شاڈوک، دنین گہتک وغیرہ کے راستے بند ہویے ہیں جس کی وجہ سے ہزاروں لوگ سفری مشکلات سے دوچار ہیں۔

اور غوچ کے آس پاس کئی دیہات آباد ہیں جہاں پندرہ ہزار نفوس پر مشتمل اس وادی کی سڑک دونوں جانب سے بند ہے۔ مین چترال سڑک پر دریائے چترال پر اورغوچ کیلیے جو پل تعمیر ہوئی ہے اس کے آگے بھِی راستہ خراب ہے جبکہ فیض آباد سے جانے والے سڑک پر پہاڑ سے بھاری پتھر، درخت، ملبہ گرنے سے یہ راستہ ہر قسم کے ٹریفک کیلے بند ہے۔ مسلسل بارش کے بعد محتلف علاقوں میں پہاڑی بھِی سرک گئے اور اکثر جگہوں میں بجلی کے کھمبے بھی گر چکے ہیں جس کی وجہ سے ان علاقوں میں بجلی کی فراہمی بھِی معطل ہے۔

اسی طرح شاڈوک، دنین، گہتک کی سڑک بھِی ہر قسم کے ٹریفک کیلیے بند ے جس پر پیدل جانا بھِی نہایت مشکل ہونے کے ساتھ ساتھ خطرناک بھی ہے۔ کیونکہ اب بھی پہاڑوں سے مٹی کے تودے، بھاری پتھر اور ملبہ گررہا ہے۔

مقامی لوگوں کا کہنا ہے کہ اورغوچ جانے والی سڑک برطانوی دور حکومت میں تعمیر ہوئی تھی مگر حکومت پاکستان نے اس پر کوئی زیادہ توجہ نہیں دی۔ اس سڑک کی بندش کی وجہ سے لوگ15 کلومیٹر پیدل سفرکرنے پر مجبور ہیں جبکہ اشیائے خوردونوش کو کندھوں پر اٹھانے کے ساتھ ساتھ مریضوں کو بھِی چارپائی پر ڈال کر ہسپتال لے جانا پڑتا ہے۔

مقامی لوگوں نے ڈپٹی کمشنر چترال اور ایگزیکٹیو انجینئر محکمہ سی اینڈ ڈبلیو کمیونیکیشن اینڈ ورکس طارق مرتضے کا شکریہ ادا کیا کہ ان کی ہدایت پر ٹھیکیدار نے فوری طور پر ان سڑکوں کی صفائی پر ٹریکٹر، ایکسیویٹر مشین لگاکر ملبہ صاف کررہے ہیں اور ٹریفک ک ی روانی کے قابل بنارہے ہیں۔

محکمہ سی اینڈ ڈبلیو نے حالیہ بارشوں اور سیلاب کے باعث بند ہونے والے عبدالولی خان بائی پاس روڈ، دنین چیوڈوک، آفیسر میس روڈ، مغلاندہ، شاہ ڈوک، ہون فیض آباد، اور غوچ ڈوم شغور، کربیتولی اور ضلع اپر چترال کی سڑک بھی محکمہ سی اینڈ ڈبلیو نے صاف کی تھی تاہم بونی سڑک پر دوبارہ پہاڑ سے بھاری پتھر اور پہاڑی تودے گرنے کی وجہ سے دوبارہ بند ہوگئی تھی۔

ویلیج کونسل دنین کے چیئرمین منیر احمد چاریلو اور دیگر لوگوں نے مطالبہ کیا کہ حکومت نے چترال کو آفت زدہ قراردیا ہے مگر جس طرح سابقہ صدر پاکستان پرویز مشرف اور آصف علی زرداری کے دور حکومت میں لوگوں کے قرضے معاف ہوئے تھے اسی طرح اس بار بھی زرعی اور عام لوگوں کے چھوٹے چھوٹے قرضے معاف کیے جائیں تاکہ ان کی مشکلات میں کمی آسکے۔

انہوں نے یہ بھِی مطالبہ کیا کہ جن سڑکوں پر ملبہ پڑا ہے اسے فوری ہٹایا جائےاور اورغوچ سڑک کو کشادہ کرنے کے ساتھ ساتھ دریا کی جانب سڑک کے کنارے حفاظتی دیوار بھی تعمیر کی جائے تاکہ اس سڑک پر سفر کرنے والے کسی قسم کے حادثے کا شکار نہ ہوں.

چترال،باغی ٹی وی (گل حمادفاروقی کی رپورٹ)مسلسل بارشیں، ندی نالوں میں طغیانی بڑے پیمانے پر تباہی ، راستے بند
چترال میں جمعہ کے روز سے موسلا دھار بارش کا سلسلہ جاری ہے جبکہ پہاڑوں کے چوٹیوں، بالائی علاقوں اور وادی کیلاش کڑاکار گاؤں میں برف باری بھی ہوئی ہے۔

تیز اور مسلسل بارشوں کی وجہ سے ندی نالے بپھر گئے ہیں طغیانی کی وجہ سے مختلف وادیوں کے راستے بند ہیں، چترال کو ملک کے دیگر حصوں سے ملانے والا واحد زمینی راستہ لواری ٹنل کا راستہ بھی ہر قسم کے ٹریفک کیلیے بند ہے جبکہ ضلع اپر چترال، گرم چشمہ اور وادی کیلاش کا راستہ بھی بند ہے۔ بجلی کی آنکھ مچولی اور پی ٹی سی ایل، انٹرنیٹ کی سروس بھی معطل ہے جس کی وجہ سے لوگوں کو شدید مشکلات کا سامنا ہے۔

لوئر چترال کے چمرکن کف گاؤں میں سیلاب نے تباہی مچادی ، کف گاؤں کی رابطہ سڑک، پیدک پل، آبپاشی کی ندی اور پانی کی پائپ لائن بھی سیلاب کی وجہ سے تباہ ہوگئی ہے، اس پل پر روزانہ سکول جانے والے سینکڑوں بچے، بچیاں، مسجد جانے والے نمازی اور عام لوگ بھِی گزرتے تھے جبکہ آبپاشی کی ندی جغور گول کے نالے سے سینکڑوں گھروں اور ہزاروں ایکڑ زمین کو بھی پانی جاکر سیراب کرتا تھا اب اس ندی کی ٹوٹنے کی وجہ سے خدشہ ہے کہ یہ زرعی زمین بھِی بنجر بن جائے گی.

چمرکن کف گاؤں سے تعلق رکھنے والے محراب ولی، محمد شفیق،شیر علی،انتخاب احمد،شمس الرحمان اور ایک مقامی انجینئر نے کہا کہ چمرکن کف گاؤں کو جانے والی سڑک بار بار سیلاب کی وجہ سے تباہ ہورہی ہے۔ دو سال قبل جب یہ سڑک سیلاب کی نظرہوگئی تھی تو علاقے کے لوگوں نے اپنی مدد آپ کے تحت ایک مقامی شخص کا کھیت کرائے پر لیکر اس میں عارضی طور پر سڑک گزاری مگر بدقسمتی سے اب وہ سڑک بھی پانی کیساتھ بہہ گئی ہےاور لوگوں کے پاس اب کوئی متبادل بھِی نہیں ہے۔

گاؤں والوں نے کہا کہ اس سڑک پر بار بار سرکاری خزانے سے بھاری رقم خرچ ہوتی ہے مگر ناقص منصوبہ بندی کی وجہ سے کام بھی ناقص ہوتا ہےجس کی وجہ سے سڑک بارش کے سیلابی پانی میں خس وخاشاک کی طرح بہہ جاتی ہے

مقامی لوگوں نے مطالبہ کیا ہے کہ اس سڑک سائیڈوں میں حفاظتی دیواریں میں ستون اور آر سی سی کنکریٹ کا استعمال کیا جائے تاکہ مستقل طور پر یہ سڑک محفوظ رہے۔اس سڑک کے ٹوٹنے کی وجہ کافی تعداد میں گاڑیاں اور موٹر سائیکلیں وغیر ہ دوسری طرف پھنس گئے ہیں جو اب ان کے نکلنے کا کوئی راستہ بھی نہیں ہے جب تک اس سڑک کو دوبارہ تعمیر نہ کیا جائے۔

شیر علی کا کہنا ہے کہ اس نے سولہ سال سعودی عرب میں محنت مزدوری کرکے بڑی مشکل سے یہ مکان بنایا تھا جو بار بار سیلاب کی زد میں آکر اس کا ایک حصہ دریا برد ہوچکا ہے اور اب میری بوڑھی والدہ، بیوی چھوٹے بہت خطرے میں ہیں کسی بھی وقت سیلاب آکر ہمارے گھر کو بہاکر لے جاسکتا ہے۔

اسی گاؤں میں فدا محمد نامی شحص کے گھر کو بھی نقصان پہنچا اور اس کے گھر میں پھل دار درخت وغیرہ بھِی گر گیے ہیں

چمرکن کے ویلیج کونسل چیئرمین عبدالحق کا کہنا ہے کہ حالیہ بارشوں اور سیلاب کی وجہ سے یہاں جو پیدل کا پل اور پانی کی ندی بہہ گئی اس سے علاقے کے لوگوں کو بہت نقصان ہوا ہے ان کا مزید کہنا تھا کہ یہ علاقہ میٹھے اور رسیلے انار کی باغات کیلئے مشہور ہے اگر آبپاشی کی نہر اور پانی کی پائپ لائن جلدی بحال نہ ہوئے تو خدشہ ہے کہ انار کے یہ باغات بھی خشک ہوکر تلف جائیں گے جو یہاں کے لوگوں کا آمدنی کا واحد ذریعہ ہے۔

متاثرہ لوگوں نے این ڈی ایم اے، پی ڈی ایم اے ، صوبائی وزیر اعلیٰ اور اعلیٰ حکام سے پر زور مطالبہ کیا ہے چمرکن کف گاؤں میں پیدل پل، رابطے کی سڑک، آبپاشی کی ندی اور پانی کی پائپ لائن فوری بحال کئے جائیں تاکہ یہ لوگ مزید مشکلات کے شکار نہ ہوں کیونکہ پانی کی پائپ لائن سیلاب میں بہہ جانے سے گھروں میں پانی کی سپلائی بند ہے۔ انہوں نے یہ بھی مطالبہ کیا ہے کہ جن لوگوں کے گھروں کو نقصان پہنچا ہے ان کی تلافی بھی کی جائے تاکہ وہ اپنے مکانوں کی جلدی مرمت کرواسکیں۔