Category: جرائم و حادثات

میرپورماتھیلو باغی ٹی وی نامہ نگار مشتاق علی لغاری
جروار کے قریب گاؤں خدا بخش لغاری میں مسلح افراد نے ڈکیتی کی سنگین واردات انجام دی۔ تفصیلات کے مطابق مائی سمینان اپنے شوہر سگھیا خان کی تنخواہ کی رقم ڈیڑھ لاکھ روپے لے کر شام کے وقت گھر پہنچی تو گھر کے سامنے گھات لگائے بیٹھے پانچ مسلح ملزمان نے اسے گھیر لیا۔

عینی شاہدین کے مطابق ملزمان نے اسلحے کے زور پر خاتون کو خوفزدہ کیا اور اس سے ڈیڑھ لاکھ روپے نقدی اور موبائل فون چھین لیا۔ ڈکیتی کے بعد ملزمان شام تقریباً چھ بجے موقع سے بآسانی فرار ہونے میں کامیاب ہو گئے۔متاثرہ خاتون نے بتایا کہ ملزمان میں سے دو کی شناخت محمد نواز لغاری اور اس کے بیٹے دل شیر لغاری کے طور پر ہوئی ہے، جبکہ تین ملزمان تاحال نامعلوم ہیں۔ واقعے کے فوراً بعد مائی سمینان کی جانب سے جروار تھانے میں این سی رپورٹ درج کرا دی گئی ہے، تاہم پولیس کی جانب سے تاحال کوئی واضح پیش رفت سامنے نہیں آ سکی۔

واقعے پر شدید تشویش کا اظہار کرتے ہوئے متاثرہ خاتون اور اس کے اہلِ خانہ نے گھوٹکی کے ایس ایس پی، میرپور ماتھیلو کے ڈی ایس پی اور جروار تھانے کے ایس ایچ او سے مطالبہ کیا ہے کہ واقعے کا فوری نوٹس لیتے ہوئے نامزد اور نامعلوم تمام ملزمان کو جلد گرفتار کیا جائے، جبکہ لوٹی گئی رقم اور موبائل فون کی فوری برآمدگی کو یقینی بنایا جائے۔اہلِ علاقہ نے بھی بڑھتی ہوئی وارداتوں پر تشویش کا اظہار کرتے ہوئے پولیس گشت مؤثر بنانے اور ملزمان کے خلاف سخت کارروائی کا مطالبہ کیا ہے۔

گوجرخان (قمرشہزاد) سوشل میڈیا کی چکاچوند کے پیچھے چھپا بھیانک چہرہ آخرکار بے نقاب ہو گیا۔ گزشتہ دنوں ہاوسنگ سکیم ٹو گوجرخان سے ملنے والی نعش آٹھ بچوں کی ماں، 43 سالہ نعمانہ افضل کے اندھے قتل کا معمہ حل ہوگیا اور پولیس تھانہ گوجرخان نے مرکزی ملزم کو گرفتار کرلیا۔

یہ لرزہ خیز واردات ٹک ٹاک پر ہونے والی دوستی، جھوٹے وعدوں اور ہوسِ زر کا ہولناک انجام ثابت ہوئی۔ پولیس کے مطابق لکی مروت کی رہائشی مقتولہ کی دوستی ملائشیا میں مقیم گوجرخان کے 32 سالہ شادی شدہ شخص عدنان اختر سے سوشل میڈیا اور ٹک ٹاک کے ذریعے ہوئی۔ مسلسل رابطوں نے دوستی کو محبت کا رنگ دیا، مگر اس کہانی کی بنیاد خلوص نہیں بلکہ مفاد، دھوکہ اور استحصال تھا۔ ملزم نہ صرف خاتون سے رقوم بٹورتا رہا بلکہ ملائشیا سے غیر قانونی سرگرمیوں پر ڈیپورٹ ہونے کے بعد بھی اسے مالی طور پر استعمال کرتا رہا۔ ذرائع کے مطابق عدنان مختلف اوقات میں لکی مروت جا کر مقتولہ سے ملاقاتیں کرتا رہا۔ جب قربتیں بڑھیں تو نعمانہ نے اس پر اپنی پہلی بیوی کو طلاق دے کر شادی کرنے کا دباؤ ڈالنا شروع کیا۔

یہی مطالبہ اس کے لیے موت کا پروانہ بن گیا۔ قتل سے ایک روز قبل ملزم عدنان، نعمانہ کو لکی مروت سے گاڑی میں گوجرخان لے آیا اور مختلف مقامات پر گھماتا رہا۔ بعدازاں اس نے اپنے دوست کامران کے ساتھ مل کر سفاک منصوبہ بنایا اور گاڑی کے اندر ہی خاتون کو دم گھونٹ کر قتل کر دیا۔ ملزمان نے نعش کو ہاؤسنگ سکیم ٹو، اقراء کالج کے قریب سڑک کنارے پھینکا اور فرار ہوگئے۔ اندھے قتل کی اس واردات کا اے ایس پی سید دانیال حسن نے پولیس کی مدعیت میں مقدمہ درج کرکے جدید ٹیکنالوجی اور ہیومن انٹیلی جنس کی مدد سے تفتیش کا دائرہ وسیع کیا۔ نادرا ریکارڈ سے شناخت کے بعد مقتولہ کے اہلخانہ کو طلب کیا گیا تو انکشاف ہوا کہ وہ دو روز سے لاپتہ تھی۔ ایس ایچ او گوجرخان طیب ظہیر بیگ اور ایچ آئی یو ٹیم نے مقتولہ کے موبائل رابطوں کی چھان بین کی تو عدنان اختر تک رسائی ہوئی۔ شاملِ تفتیش کرنے پر ملزم کے بیانات نے پوری سازش کو بے نقاب کردیا۔ عدنان نے اپنے ساتھی کامران کے ساتھ مل کر قتل کا اعتراف کرلیا ہے، جبکہ شریک ملزم تاحال مفرور ہے اور اس کی گرفتاری کے لیے چھاپے مارے جارہے ہیں۔ یہ واقعہ نہ صرف ایک خاندان کی تباہی ہے بلکہ سوشل میڈیا پر اندھی محبت اور دھوکے کے بڑھتے رجحان پر بھی ایک خطرناک سوالیہ نشان ہے۔ آٹھ بچوں کی ماں کو جھوٹے وعدوں، مالی استحصال اور بے رحمانہ سازش کا نشانہ بنایا گیا اور آخرکار اس کی سانسیں بھی چھین لی گئیں۔ پولیس حکام کا کہنا ہے کہ کیس کو منطقی انجام تک پہنچایا جائے گا اور مفرور ملزم کو بھی جلد گرفتار کرلیا جائے گا۔

‎پنجاب کے علاقے شرقپور شریف میں آتشبازی کا سامان تیار کرنے والی فیکٹری میں دھماکے کے نتیجے میں ایک شخص جاں بحق اور چار دیگر زخمی ہوگئے۔
‎رپورٹس کے مطابق دھماکا فیکٹری میں آتشبازی تیار کرتے وقت ہوا، جس کے باعث عمارت کی چھت گر گئی۔ عینی شاہدین کا کہنا ہے کہ دھماکے کے وقت متعدد افراد فیکٹری میں موجود تھے، اور ریسکیو ٹیمیں موقع پر پہنچ کر امدادی سرگرمیاں جاری رکھے ہوئے ہیں۔ ملبے تلے مزید افراد کے دبے ہونے کا خدشہ ظاہر کیا گیا ہے۔

صوبہ پنجاب کے علاقے شرقپور شریف میں آتشبازی کا سامان تیار کرنے والی فیکٹری میں خوفناک دھماکے کے نتیجے میں ایک شخص جاں بحق جبکہ کم از کم چار افراد زخمی ہو گئے۔ دھماکا اس قدر شدید تھا کہ فیکٹری کی عمارت کی چھت زمین بوس ہو گئی اور اطراف کی عمارتوں کے شیشے بھی ٹوٹ گئے۔

رپورٹس کے مطابق واقعہ اس وقت پیش آیا جب فیکٹری میں آتشبازی کا سامان تیار کیا جا رہا تھا۔ عینی شاہدین کا کہنا ہے کہ اچانک زور دار دھماکے کی آواز سنائی دی جس کے بعد علاقے میں خوف و ہراس پھیل گیا۔ دھماکے کے باعث عمارت کا ایک بڑا حصہ منہدم ہو گیا اور کئی مزدور ملبے تلے دب گئے۔ریسکیو ذرائع کے مطابق ایک شخص موقع پر ہی جاں بحق ہو گیا جبکہ چار زخمیوں کو فوری طور پر قریبی اسپتال منتقل کر دیا گیا ہے، جہاں انہیں طبی امداد فراہم کی جا رہی ہے۔ زخمیوں میں سے بعض کی حالت تشویشناک بتائی جا رہی ہے۔ دھماکے کی اطلاع ملتے ہی ریسکیو ٹیمیں اور پولیس کی نفری موقع پر پہنچ گئی۔ بھاری مشینری کی مدد سے ملبہ ہٹانے کا عمل جاری ہے جبکہ علاقے کو گھیرے میں لے کر سیکیورٹی سخت کر دی گئی ہے۔

پولیس نے واقعے کی تحقیقات شروع کر دی ہیں۔ ابتدائی طور پر دھماکے کی وجہ آتش گیر مواد کو غیر محفوظ طریقے سے تیار کرنا قرار دی جا رہی ہے، تاہم حکام کا کہنا ہے کہ مکمل تحقیقات کے بعد ہی اصل وجوہات کا تعین کیا جائے گا۔مقامی شہریوں نے مطالبہ کیا ہے کہ رہائشی علاقوں میں قائم ایسی فیکٹریوں کے خلاف سخت کارروائی کی جائے تاکہ مستقبل میں ایسے افسوسناک واقعات سے بچا جا سکے۔