سیالکوٹ،باغی ٹی وی( بیوروچیف شاہد ریاض)مقدمات میں ریکارڈ اضافہ، پولیس کی کارکردگی سوالیہ نشان بن گئی
تفصیل کے مطابق سال 2024 کے 11 ماہ کے اعداد و شمار کے مطابق ضلع سیالکوٹ میں 44 ہزار 320 مقدمات درج کیے گئے، جن میں سے 1850 مقدمات کو مختلف وجوہات کی بنا پر خارج کیا گیا۔ پولیس کی مصروفیت اور جدید ٹیکنالوجی کے باوجود 11 ہزار 240 مقدمات کو عدم پتہ قرار دے دیا گیا، جو شہریوں کے لیے ایک سنگین تشویش کا باعث ہے۔
2023 کے مقابلے میں رواں سال درج مقدمات میں 6138 کا اضافہ ہوا جبکہ عدم پتہ مقدمات کی تعداد بھی 1187 زیادہ رہی۔ گزشتہ سال 38 ہزار 182 مقدمات درج ہوئے تھے، جن میں سے 1599 مقدمات خارج اور 10 ہزار 53 مقدمات عدم پتہ قرار پائے تھے۔
دلچسپ بات یہ ہے کہ تھانہ پھوکلیان میں 196 مقدمات درج ہوئے جو ضلع بھر میں سب سے کم ہیں اور یہاں کوئی بھی مقدمہ عدم پتہ قرار نہیں دیا گیا جو ایک مثبت پیش رفت ہے۔
عوامی حلقوں نے پولیس کی کارکردگی پر سوالات اٹھاتے ہوئے جدید ٹیکنالوجی کے موثر استعمال اور جرائم کی روک تھام کے لیے مزید اقدامات کا مطالبہ کیا ہے۔
