Category: جرائم و حادثات

سیالکوٹ (باغی ٹی وی،بیوروچیف شاہدریاض) تھانہ سول لائن پولیس کا منشیات فروشوں سے ٹاکرا ہوا، جس کے دوران تعاقب کے دوران ملزم کی فائرنگ سے اس کا اپنا ساتھی زخمی ہو گیا۔ پولیس نے دونوں ملزمان کو گرفتار کر کے ان کے قبضے سے اسلحہ اور منشیات برآمد کر لی۔

تفصیلات کے مطابق پولیس پارٹی تھانہ سول لائن نے دورانِ گشت دو مشتبہ افراد محمد ارشد اور سلیم رضا کو موٹر سائیکل پر دارہ ارائیاں کی جانب سے آتے ہوئے دیکھا۔ مشکوک سمجھتے ہوئے انہیں رکنے کا اشارہ کیا گیا لیکن دونوں ملزمان موٹر سائیکل چھوڑ کر بھاگنے لگے۔

پولیس کے تعاقب کرنے پر ملزمان نے اہلکاروں پر سیدھی فائرنگ کر دی لیکن محمد ارشد کی فائرنگ سے اس کا اپنا ساتھی سلیم رضا زخمی ہو کر زمین پر گر گیا۔ پولیس نے فوری کارروائی کرتے ہوئے زخمی ملزم اور بھاگنے والے دوسرے ملزم کو گرفتار کر لیا۔

ملزمان کی تلاشی کے دوران ان کے قبضے سے دو 30 بور پستول اور چرس برآمد ہوئی۔ مزید تحقیقات سے معلوم ہوا کہ گرفتار ملزمان کے خلاف پہلے بھی مختلف تھانوں میں اینٹی نارکوٹکس ایکٹ کے تحت مقدمات درج ہیں۔ پولیس نے مزید قانونی کارروائی کا آغاز کر دیا ہے۔

سیالکوٹ (باغی ٹی وی،بیوروچیف شاہدریاض) سڑک پر ملنے والی لاش اشتہاری مجرم کی نکلی

تفصیلات کے مطابق تھانہ پھلورہ کے علاقے میں ایک نامعلوم شخص کی لاش ملنے کی اطلاع پر پولیس کی ٹیم فوری موقع پر پہنچ گئی۔ شہری شوکت نے پکار 15 پر اطلاع دی تھی کہ سہیووال کے قریب ایک نامعلوم شخص کی لاش سڑک پر پڑی ہے۔

ایس ایچ او تھانہ پھلورہ اور SDPO پسرور نفری کے ہمراہ موقع پر پہنچے اور حالات کا جائزہ لیا۔ ابتدائی تحقیقات کے مطابق نامعلوم گاڑی نے مقتول کو ٹکر مار کر فرار ہونے کی کوشش کی تھی۔

لاش کی تلاشی کے دوران مقتول کے موبائل فون اور شناختی کارڈ سے اس کی شناخت شہاب السلام ولد عبدالسلام رہائشی محلہ قصاباں کلاس والا، تحصیل پسرور کے نام سے ہوئی۔

مزید تفتیش سے معلوم ہوا کہ مقتول مختلف تھانوں کو قتل (302) اور انسدادِ دہشت گردی کے مقدمات میں مطلوب اشتہاری مجرم تھا۔ پولیس نے ضابطے کی کارروائی مکمل کرتے ہوئے لاش کا پوسٹ مارٹم شروع کر ادیا ہے جبکہ فرانزک ٹیمیں موقع سے شواہد اکٹھا کر رہی ہیں۔

پولیس مزید تحقیقات کر رہی ہے تاکہ حادثے کے اصل محرکات اور مجرموں کا پتہ لگایا جا سکے۔

سیالکوٹ (باغی ٹی وی بیوروچیف شاہد ریاض) ضلع سیالکوٹ کے مختلف علاقوں میں پیش آنے والے ٹریفک حادثات میں ایک شخص جاں بحق جبکہ متعدد افراد زخمی ہوگئے۔

تھانہ سول لائن کے علاقہ خادم علی روڈ پر تیز رفتارکار نےپیدل سڑک پار کرنے والے 52 سالہ شخص کو ٹکر مار دی جس کی شناخت ناصر طور کے نام سے ہوئی ہے جو موقع پر ہی جانبحق ہو گیا جس کی لاش کو ضروری کارروائی کے بعد ہسپتال منقتل کر دیا گیا ہے

اسی طرح کنگرہ روڈ بھلور سٹاپ کے قریب پیش آیا جہاں ایک کوسٹر نے موٹرسائیکل سوار کو ٹکر مار دی۔ اس حادثے میں 32 سالہ مہوش اور اس کی 3 سالہ بیٹی زخمی ہو گئیں، جنہیں فوری طور پر سول ہسپتال منتقل کر دیا گیا۔

ایک اورحادثہ ڈھوڈا روڈ کے قریب پیش آیا جہاں سڑک کنارے چلتا ہوا کتا اچانک سڑک کے درمیان آ گیا، جس سے موٹرسائیکل سوار سنبھل نہ سکا اور گر گیا۔ اس حادثے میں 80 سالہ خاتون سلیمان بی بی زخمی ہو گئیں۔

فقیرانوالی سٹاپ پسرور میں گوجرانوالہ روڈ پر ایک تیز رفتار کار نے موٹرسائیکل کو ٹکر مار دی، جس کے نتیجے میں 80 سالہ غلام علی زخمی ہوا۔

چونڈہ روڈ پر دو موٹرسائیکلوں کی آپس میں ٹکر کے نتیجے میں 25 سالہ شیراز زخمی ہوگیا۔

پسرور نارووال پھاٹک کے قریب 35 سالہ تنویر موٹرسائیکل پر جا رہا تھا کہ رکشہ سے ٹکرا کر زخمی ہوگیا۔ تمام زخمیوں کو فوری طور پر پسرور ہسپتال منتقل کر دیا گیا۔