Category: جرائم و حادثات

سیالکوٹ (باغی ٹی وی بیوروچیف شاہد ریاض)سرکل ڈسکہ کے تھانہ صدر کی حدود میں دھرم کوٹ کے قریب کار اور موٹر سائیکل میں خوفناک تصادم کے نتیجے میں دو نوجوان موقع پر ہی جاں بحق ہوگئے، جبکہ کار کا ڈرائیور حادثے کے بعد فرار ہونے میں کامیاب ہوگیا۔

پولیس کے مطابق حادثے میں جاں بحق ہونے والوں کی شناخت 18 سالہ آفتاب اور 20 سالہ اجمل کے ناموں سے ہوئی ہے، دونوں کا تعلق جہلم سے بتایا جاتا ہے۔ ریسکیو ذرائع کے مطابق نوجوانوں کو سر پر شدید چوٹیں آئیں جس کے باعث وہ موقع پر ہی دم توڑ گئے۔

ریسکیو 1122 نے موقع پر پہنچ کر ضروری کارروائی مکمل کی اور دونوں لاشوں کو پوسٹ مارٹم کے لیے مقامی اسپتال منتقل کر دیا۔

پولیس نے کار ڈرائیور کی تلاش شروع کر دی ہے اور واقعے کی مزید تحقیقات جاری ہیں۔

سیالکوٹ (باغی ٹی وی، بیوروچیف شاہد ریاض) اینٹی کرپشن سیالکوٹ نے تھانہ حاجی پورہ کے سب انسپکٹر طیب حیدر کے خلاف کامیاب ریڈ کارروائی کی۔ مدعی مقدمہ کی شکایت پر معلوم ہوا کہ سب انسپیکٹر طیب حیدر اور ایک کانسٹیبل مل کر مدعی مقدمہ پر تشدد کر کے اس کا سامان چھین چکے ہیں اور اسے واپس کرنے کے لیے 20 ہزار روپے طلب کر رہے تھے۔

اینٹی کرپشن نے مجسٹریٹ کی موجودگی میں ٹریپ ریڈ کروایا، جس دوران ذیشان نامی شخص، جو خود کو کانسٹیبل بتاتا ہے، مدعی مقدمہ سے 20 ہزار روپے وصول کرتے ہوئے پکڑا گیا اور رقم برآمد کر لی گئی۔ اس کے ساتھ کار خاص میں پولیس فائل اور ٹیگ شدہ درخواستیں بھی برآمد ہوئیں۔ ذیشان نے اعتراف کیا کہ طیب حیدر نے اسے پیسے لینے بھیجا تھا۔

اینٹی کرپشن نے ذیشان کو حراست میں لے لیا ہے اور سب انسپیکٹر طیب حیدر کی گرفتاری کے لیے کارروائی جاری ہے۔
سرکل افیسر اینٹی کرپشن سیالکوٹ رانا مبشر نے عوام سے درخواست کی ہے کہ اگر کوئی سرکاری ملازم رشوت طلب کرے تو فوراً اینٹی کرپشن کو اطلاع دیں۔

سیالکوٹ (باغی ٹی وی بیوروچیف شاہد ریاض)موجودہ ملکی صورتِ حال اور بڑھتے ہوئے سیکیورٹی خدشات کے پیش نظر ڈسٹرکٹ پولیس آفیسر فیصل شہزاد کی خصوصی ہدایات پر سیالکوٹ کے مختلف تعلیمی اداروں میں بڑے پیمانے پر فرضی مشقوں کا انعقاد کیا گیا۔ ان مشقوں کا مقصد اداروں کی استعدادِ کار اور ہنگامی حالات میں فوری ردِعمل کی صلاحیت کا جائزہ لینا تھا۔

تفصیلات کے مطابق وزیر اعلیٰ پنجاب کے ویژن "محفوظ پنجاب” کے تحت ضلعی پولیس نے ایلیٹ فورس، ریسکیو 1122، سول ڈیفنس اور دیگر اداروں کے ساتھ مل کر عملی مشقوں میں حصہ لیا۔ اس دوران ایمرجنسی سائرن بجائے گئے، پکار 15 پر فرضی ایمرجنسی کالز کی گئیں جبکہ فورسز نے بروقت رسپانس دیتے ہوئے دہشت گردوں کو گرفتار کرنے کا عملی مظاہرہ کیا۔

ان مشقوں کا بنیادی مقصد اداروں کے درمیان کوآرڈینیشن، آپریشنل صلاحیت اور فوری رسپانس کو مزید بہتر بنانا تھا تاکہ حقیقی حالات میں بروقت اور مؤثر کارروائی یقینی بنائی جا سکے۔

مشقوں کے دوران افسران و جوانوں کو سیکیورٹی انتظامات، ایس او پیز اور ہنگامی ردِعمل کے طریقہ کار کے حوالے سے مکمل بریفنگ بھی دی گئی۔

ڈی پی او فیصل شہزاد نے اس موقع پر کہا کہ کرائم کنٹرول کے ساتھ ساتھ سیکیورٹی معاملات میں پنجاب حکومت کے طے کردہ ایس او پیز پر سو فیصد عملدرآمد ہر صورت یقینی بنایا جائے گا۔