Category: جرائم و حادثات

اوچ شریف باغی ٹی وی (نامہ نگار حبیب خان) اڈا ظاہر پیر کے قریب پیش آنے والے خوفناک ٹریفک حادثے میں اوچ شریف کے نواحی علاقے خیرپور ڈاہا کے ایک ہی خاندان کے پانچ افراد جاں بحق و زخمی ہو گئے۔ حادثے کے بعد علاقے میں کہرام مچ گیا۔

ریسکیو 1122 کے مطابق موٹر سائیکل پر سوار دو خواتین، ایک مرد اور دو بچے سڑک کنارے کھڑے تھے کہ پیچھے سے آنے والی تیز رفتار کار نے زور دار ٹکر ماری۔ حادثے کے نتیجے میں 16 سالہ نگو مائی دختر پنو خان موقع پر جاں بحق ہو گئی، جبکہ چار افراد ماہیوال ولد کبیر خان (50 سال)، تسلیم بی بی زوجہ ماہیوال (45 سال)، محمد مجید ولد ماہیوال (10 سال) اور عالیہ دختر ماہیوال (18 سال) شدید زخمی ہو گئے۔

ریسکیو ٹیم نے فوری طور پر موقع پر پہنچ کر زخمیوں کو ابتدائی طبی امداد فراہم کی اور بعد ازاں تمام زخمیوں اور جاں بحق لڑکی کی نعش کو تحصیل ہیڈ کوارٹر ہسپتال احمد پور شرقیہ منتقل کر دیا۔

حادثے کی اطلاع ملتے ہی موٹر وے پولیس موقع پر پہنچ گئی اور قانونی کارروائی کا آغاز کر دیا گیا۔ عینی شاہدین کے مطابق کار کی رفتار حد سے زیادہ تھی، جبکہ موقع پر موجود افراد نے انتظامیہ سے ٹریفک قوانین پر سختی سے عملدرآمد اور اوور اسپیڈنگ کے خلاف کارروائی کا مطالبہ کیا ہے۔

اوچ شریف باغی ٹی وی (نامہ نگار حبیب خان)اوچ شریف کے نواحی علاقے رتڑ نہڑانوالی بستی عبداللہ خان سمیت قریبی دیہات میں لمپی وائرس اور منہ کھر کی وبا نے تباہی مچا دی، درجنوں مویشی ہلاک اور کسان شدید مالی بحران سے دوچار ہو گئے۔

تفصیلات کے مطابق وبا نے بستی عبداللہ خان، چاکر خان رند، بستی بہار خان اور دیگر قریبی علاقوں میں درجنوں جانوروں کو اپنی لپیٹ میں لے لیا ہے۔ کسان محمد دین کی قیمتی وچھی بیماری کے باعث تڑپ تڑپ کر مر گئی، جبکہ متعدد دوسرے مویشی بھی شدید متاثر ہیں۔

علاقہ مکینوں کا کہنا ہے کہ محکمہ لائیو اسٹاک کی ٹیمیں مکمل طور پر غائب ہیں۔ نہ ویکسین فراہم کی جا رہی ہے اور نہ ہی کسی ڈاکٹر کی جانب سے دورہ کیا گیا ہے۔ مقامی کسانوں نے بتایا کہ وہ پہلے ہی سیلاب کے نقصانات سے مالی طور پر کمزور ہو چکے ہیں اور اب یہ وائرس ان کے روزگار پر کاری ضرب لگا رہا ہے۔

اہلِ علاقہ نے الزام لگایا کہ محکمہ لائیو اسٹاک کے اہلکار محض فائلوں میں کارروائی دکھا رہے ہیں جبکہ زمینی سطح پر کوئی عملی اقدامات نظر نہیں آ رہے۔ جانور کئی کئی دن تک اذیت میں مبتلا رہتے ہیں مگر محکمہ خاموش تماشائی بنا ہوا ہے۔

عوامی حلقوں کا کہنا ہے کہ حکومتی عدم توجہی اور محکمانہ غفلت کی وجہ سے وبا تیزی سے پھیل رہی ہے، جس سے مویشی پال کسانوں کا بھاری نقصان ہو رہا ہے۔

علاقہ مکینوں نے ڈپٹی کمشنر بہاولپور اور ڈائریکٹر لائیو اسٹاک سے فوری نوٹس لینے، ایمرجنسی ویکسینیشن مہم شروع کرنے اور ذمہ دار اہلکاروں کے خلاف سخت کارروائی کا مطالبہ کیا ہے تاکہ مزید نقصان سے بچا جا سکے۔

اوچ شریف (باغی ٹی وی، نامہ نگار حبیب خان)تحصیل احمد پور شرقیہ کے سیلاب زدہ علاقوں میں وزیراعلیٰ پنجاب محترمہ مریم نواز شریف کے اعلان کردہ بحالی پیکج پر عملدرآمد میں سنگین بے ضابطگیاں سامنے آگئی ہیں۔ سیلاب متاثرین کے مطابق اعلانات کے برعکس رقم کی تقسیم میں غیر مساوات، بدنظمی اور مبینہ اقرباپروری نے متاثرہ عوام کو شدید مایوسی سے دوچار کر دیا ہے۔

اوچ شریف کے نواحی علاقوں ترنڈ بشارت، رتھر نھڑانوالی، سرور آباد، بیٹ احمد بختیاری، چک کہل سمیت متعدد دیہاتوں میں متاثرین کو غیر مساوی رقوم دی جا رہی ہیں۔ بعض مقامات پر پکے گھروں کے متاثرین کو محض 75 ہزار روپے ملے، جبکہ دوسرے علاقوں میں کچے مکانات کے مالکان کو 2 لاکھ 50 ہزار سے 5 لاکھ روپے تک ادا کیے گئے، جس سے حکومتی اعلانات اور زمینی حقائق میں واضح تضاد سامنے آگیا ہے۔

ذرائع کے مطابق وزیراعلیٰ پنجاب نے اعلان کیا تھا کہ پکے مکانات کے منہدم ہونے پر 10 لاکھ روپے، کچے مکانات کے لیے 5 لاکھ روپے، اور فی ایکڑ زرعی زمین کے نقصان پر 20 ہزار روپے دیے جائیں گے۔ مگر بیشتر متاثرین کو یہ رقم مکمل طور پر نہیں ملی۔ کئی گاؤں میں یکساں نقصان کے باوجود ادائیگیوں میں زمین آسمان کا فرق ہے۔ متعدد خاندانوں کو محض 5 سے 10 ہزار روپے تک ادا کیے گئے، جو بحالی کے لیے ناکافی ہیں۔

متاثرین کا کہنا ہے کہ سرکاری افسران کی جانب سے فہرستوں میں تبدیلیاں اور ’’پسند و ناپسند‘‘ کی بنیاد پر تقسیم کی جا رہی ہے۔ عوامی حلقوں نے وزیراعلیٰ پنجاب سے اپیل کی ہے کہ امدادی رقوم کی شفاف تقسیم کو یقینی بنانے کے لیے فوری تحقیقات کرائی جائیں اور زمینی سطح پر کارروائی کی جائے۔

سیلاب زدہ خاندانوں نے خبردار کیا ہے کہ اگر حکومت نے بروقت اصلاح نہ کی تو یہ پیکج متاثرین کے زخموں پر مرہم رکھنے کے بجائے ان پر نمک چھڑکنے کے مترادف ثابت ہوگا۔

اوچ شریف( باغی ٹی وی، نامہ نگار حبیب خان)اوچ شریف کے نواحی موضع بکھری میں رات گئے فائرنگ کا افسوسناک واقعہ پیش آ گیا، جہاں نامعلوم حملہ آوروں کی فائرنگ سے ایک شہری شدید زخمی ہو گیا۔ پولیس نے نامعلوم افراد کے خلاف مقدمہ درج کر کے تلاش شروع کر دی ہے۔

تفصیلات کے مطابق اوچ شریف کے نواحی موضع بکھری رتہر لعل بستی میں گزشتہ رات تقریباً 3 بجے کے قریب نامعلوم مسلح افراد نے اچانک فائرنگ کر دی، جس کے نتیجے میں محمد ناظم اللہ ولد بچایا قوم سیال شدید زخمی ہو گیا۔

زخمی ناظم اللہ کے مطابق وہ اپنے گھر میں سو رہا تھا کہ اچانک پڑوس سے زرہا بی بی (زوجہ محمد اکمل قوم سیال) کے گھر سے چیخ و پکار کی آوازیں سنائی دیں۔ جب وہ صورتحال دیکھنے کے لیے باہر نکلا تو تین نامعلوم افراد وہاں سے فرار ہو رہے تھے۔ اس نے آواز دے کر ان سے شناخت پوچھی تو ملزمان نے اس کی ٹانگ پر فائر کر دیا اور موقع سے فرار ہو گئے۔

واقعہ کی اطلاع ملتے ہی پولیس تھانہ اوچ شریف اور ریسکیو 1122 کی ٹیمیں فوری طور پر موقع پر پہنچ گئیں۔ زخمی کو ابتدائی طبی امداد کے بعد ہسپتال منتقل کر دیا گیا، جہاں ڈاکٹروں کے مطابق اس کی حالت خطرے سے باہر ہے۔

پولیس نے جائے وقوعہ سے شواہد اکٹھے کر کے نامعلوم ملزمان کے خلاف مقدمہ درج کر لیا اور تلاش شروع کر دی۔ تھانہ اوچ شریف کے مطابق، واقعہ کے مختلف پہلوؤں پر تفتیش جاری ہے۔

اوچ شریف( باغی ٹی وی ، نامہ نگار حبیب خان)اوچ شریف میں نجی تعلیمی ادارہ "دی کنٹری سکول” میں افسوسناک واقعہ پیش آ گیا، جہاں تیسری جماعت کے 8 سالہ طالب علم کی آنکھ شدید زخمی ہو گئی اور اس کی بینائی متاثر ہو گئی۔ غصے میں والد نے سکول انتظامیہ کے خلاف قانونی کارروائی کی درخواست پولیس کو جمع کرا دی۔

تفصیلات کے مطابق اوچ شریف کے محلہ بخاری کے رہائشی زمیندار مخدوم زادہ سید فرقان حیدر بخاری (ولد مخدوم سید باقر حسین بخاری) کے تین بیٹے اس سکول میں زیر تعلیم ہیں۔ 29 اکتوبر 2025 کو ان کا کمسن بیٹا سید محمد تقی علی کلاس تھری میں تدریس کے دوران موجود تھا کہ اچانک کسی طالب علم کی پنسل اس کی آنکھ میں لگ گئی۔

والد کے مطابق اس وقت کلاس میں ٹیچر موجود نہ تھی، جس کی وجہ سے بروقت طبی امداد نہ ملنے پر بچے کی حالت مزید بگڑ گئی۔ سکول کے ایک ملازم لطیف نامی شخص نے زخمی بچے کو گھر پہنچایا۔ جب والدین نے طبی معائنہ کرایا تو احمد پور شرقیہ کے سید لیزر آئی کلینک میں ڈاکٹر نے بتایا کہ بچے کی آنکھ کا لینز اور پردہ متاثر ہو چکا ہے اور مزید علاج کے لیے بہاولپور ریفر کر دیا گیا۔

مخدوم زادہ سید فرقان حیدر بخاری کا کہنا ہے کہ انہوں نے متعدد بار سکول کی پرنسپل میڈم گل زہرہ سے رابطہ کرنے کی کوشش کی مگر انہوں نے فون اٹینڈ نہیں کیا۔ والد نے مؤقف اختیار کیا کہ سکول میں نظم و ضبط نہ ہونے اور تدریسی عملے کی غفلت کی وجہ سے اس افسوسناک واقعہ نے بچے کی زندگی کو متاثر کر دیا ہے۔

انہوں نے تھانہ اوچ شریف کے ایس ایچ او سے مطالبہ کیا ہے کہ سکول کے مالک اور پرنسپل کے خلاف سخت قانونی کارروائی کی جائے تاکہ دیگر بچوں کے ساتھ ایسے واقعات دوبارہ پیش نہ آئیں۔

ذرائع کے مطابق پولیس نے درخواست موصول کر لی ہے اور واقعہ کی چھان بین شروع کر دی گئی ہے۔ شہریوں نے بھی اس واقعہ پر گہری تشویش کا اظہار کرتے ہوئے نجی سکولوں میں بچوں کی حفاظت کو یقینی بنانے کا مطالبہ کیا ہے۔

بہاولنگر( باغی ٹی وی، محمد عرفان نامہ نگار)بہاولنگر اور گرد و نواح میں غیر قانونی رہائش پذیر افغان باشندوں کے خلاف گھیرا مزید تنگ کر دیا گیا۔ پابندی کے باوجود افغان باشندوں کو مکانات، رہائش اور دکانیں کرایہ پر دینے والوں کے خلاف سخت کارروائی کا آغاز کر دیا گیا ہے۔

پولیس ترجمان کے مطابق غیر قانونی مقیم افغانوں اور ویزہ کی خلاف ورزی پر 11 افغانیوں کے خلاف مقدمات درج کر لیے گئے۔ اس کے علاوہ افغانوں کو مکانات اور دکانیں کرایہ پر دینے پر 8 الگ الگ مقدمات درج کیے گئے۔ یہ مقدمات تھانہ سٹی بی ڈویژن بہاولنگر، سٹی اے اور بی ڈویژن چشتیاں، سٹی ہارون آباد اور فورٹ عباس کی حدود میں درج کیے گئے۔

پولیس نے غیر قانونی افغان باشندوں اور انہیں رہائش اور دکانیں مہیا کرنے والوں کو تحویل میں لے لیا ہے۔
ڈی پی او بہاولنگر کامران اصغر نے کہا کہ عوام کی جان و مال کا تحفظ پولیس کی اولین ترجیح ہے۔