Category: جرائم و حادثات

اوچ شریف (باغی ٹی وی، نامہ نگار حبیب خان)پنجاب حکومت کی جانب سے موٹر سائیکل ڈرائیونگ لائسنس اور ہیلمٹ کے لازمی استعمال کا قانون عملی طور پر نافذ ہوتے ہی اوچ شریف میں ہیلمٹ کی خریداری میں غیر معمولی اضافہ دیکھنے میں آ رہا ہے۔ شہری قانون کے مطابق ہیلمٹ خریدنے بازاروں کا رُخ کر رہے ہیں، مگر دکان داروں نے اس صورتحال کا فائدہ اٹھاتے ہوئے قیمتوں میں بے انتہا اضافہ کر دیا ہے۔

ذرائع کے مطابق عام معیار کے ہیلمٹ، جو چند روز قبل 800 سے 1000 روپے میں دستیاب تھے، اب 3500 سے 4000 روپے میں بلیک پر فروخت ہو رہے ہیں۔ متعدد دکانداروں نے نہ صرف قیمتیں بڑھا دی ہیں بلکہ اسٹاک بھی چھپا دیا ہے، جس سے مصنوعی قلت پیدا ہو کر شہری شدید مشکلات کا شکار ہو گئے ہیں۔

شہریوں کا کہنا ہے کہ”قانون نافذ ہونا اچھی بات ہے لیکن عوام کی جیبیں خالی کر کے نہیں۔”
انہوں نے ضلعی انتظامیہ، اسسٹنٹ کمشنر اور پرائس کنٹرول کمیٹی سے مطالبہ کیا کہ ناجائز منافع خوروں کے خلاف فوری کارروائی کی جائے، جرمانے کیے جائیں اور دکانیں سیل کی جائیں تاکہ عام آدمی بھی مقررہ قیمت پر ہیلمٹ خرید سکے۔

عوامی حلقوں نے حکومت سے اپیل کی ہے کہ قانون پر سختی سے عمل کرانے کے ساتھ ساتھ ریلیف اقدامات بھی کیے جائیں، ورنہ بلیک مارکیٹ اور بے تحاشہ مہنگائی شہریوں کے لیے مزید مسائل پیدا کر دے گی۔

اوچ شریف (باغی ٹی وی، نامہ نگار حبیب خان) اوچ شریف شہر مکمل طور پر تجاوزات کی لپیٹ میں آ چکا ہے جبکہ میونسپل کمیٹی مبینہ طور پر مسلسل خاموشی اختیار کیے ہوئے ہے۔ احمد پور شرقیہ روڈ، خیرپور ڈاہا روڈ سمیت مرکزی شاہراہیں سریا، بجری، تعمیراتی سامان اور غیر قانونی اسٹالز سے بھر گئی ہیں، جس کے باعث ٹریفک نظام شدید درہم برہم ہو چکا ہے۔

شہریوں کا کہنا ہے کہ چیف آفیسر میونسپل کمیٹی اور فیلڈ اسٹاف تجاوزات کے خلاف کارروائی کے بجائے بھتہ مافیا کی پشت پناہی کر رہے ہیں۔ روزانہ کی بنیاد پر ’’نذرانے‘‘ وصول کیے جاتے ہیں جبکہ صرف کاغذی کارروائی دکھا کر عوام کو دھوکہ دیا جا رہا ہے۔

مین شاہراہوں پر قائم نجی اسپتالوں، کلینکس، اسکولز اور دکانداروں کی خودساختہ پارکنگز نے اندرونِ شہر ٹریفک کو مکمل جام کر رکھا ہے۔ ہاتھی گیٹ بازار، موبائل مارکیٹ، سبزی و فروٹ منڈی اور مرکزی چوک تجاوزات کے نرغے میں آ کر گزرگاہوں کو تنگ ترین بنا چکے ہیں، جبکہ غیر قانونی رکشہ اسٹینڈز اور ریڑھی بانوں نے سڑکوں کو یرغمال بنا دیا ہے۔

علاقہ مکینوں نے خبردار کیا ہے کہ اگر انتظامیہ نے مزید چشم پوشی کی تو شہر کی سڑکیں مکمل طور پر بند ہو جائیں گی اور کاروبار بری طرح متاثر ہوگا۔ شہریوں اور سماجی حلقوں نے ڈی سی بہاولپور سے فوری اور سخت آپریشن کا مطالبہ کرتے ہوئے کہا ہے کہ اب بیانات نہیں، عملی اقدام ضروری ہے۔

انہوں نے واضح کیا کہ اگر صورتحال جوں کی توں رہی تو شہری وسیع پیمانے پر احتجاج پر مجبور ہو جائیں گے۔

اوچ شریف (باغی ٹی وی نامہ نگار حبیب خان)تھانہ اوچ شریف سے چند فرلانگ کے فاصلے پر احمد پور شرقیہ روڈ پر واقع خواجہ دلاور میڈیکل اسٹور اینڈ کلینک میں رات کے وقت چوری کی واردات پیش آئی، جس میں نامعلوم ملزمان لاکھوں روپے مالیت کی ادویات اٹھا کر فرار ہوگئے۔

متاثرہ دکاندار کے مطابق اوچ شریف میں چوری اور نقب زنی کی وارداتیں بڑھتی جا رہی ہیں اور شہری شدید عدم تحفظ کا شکار ہیں۔ دکاندار نے آئی جی پنجاب اور ڈی پی او بہاولپور سے مطالبہ کیا ہے کہ چوروں کو فوری گرفتار کر کے علاقے میں بڑھتے ہوئے جرائم کے سلسلے کو روکا جائے۔

تھانہ اوچ شریف کے مہتمم فیصل امین نے بتایا کہ واقعے کی تحقیقات شروع کر دی گئی ہیں اور جلد ملوث ملزمان کو قانون کے کٹہرے میں لایا جائے گا۔
واقعے کے بعد شہریوں میں تشویش کی لہر دوڑ گئی ہے اور عوام نے تجارتی علاقوں کی سیکیورٹی مزید سخت کرنے کا مطالبہ کیا ہے۔

اوچ شریف (باغی ٹی وی نامہ نگار حبیب خان) اڈا ظاہر پیر ماماے والا نیشنل ہائی وے پر موٹر سائیکل اور ٹریلر کے درمیان خوفناک تصادم کے نتیجے میں ایک خاتون موقع پر جاں بحق جبکہ ایک شخص زخمی ہو گیا۔

ریسکیو ذرائع کے مطابق حادثہ تیز رفتاری کی وجہ سے پیش آیا۔ زخمی شخص کی شناخت محمود ولد حاجی حبیب (عمر 30 سال، سکونت موضع ممو آرائیں احمدپور شرقیہ) کے نام سے ہوئی ہے۔ اسے معمولی خراشیں آئیں اور ریسکیو اہلکاروں نے موقع پر ہی ابتدائی طبی امداد فراہم کر دی۔

ریسکیو سٹاف کے مطابق جاں بحق ہونے والی خاتون کو لواحقین ریسکیو ٹیم کے پہنچنے سے قبل ہی اپنے گھر منتقل کر گئے، ان کا گھر اڈا ظاہر پیر کے قریب واقع بتایا جاتا ہے۔

حادثے کی اطلاع ملتے ہی موٹر وے پولیس موقع پر پہنچ گئی اور ٹریلر ڈرائیور سمیت واقعے کی قانونی کارروائی شروع کر دی۔

اوچ شریف (باغی ٹی وی نامہ نگار حبیب خان)اوچ شریف کے نواحی علاقے چوک بھٹہ میں منشیات فروشوں کی گرفتاری کے لیے جانے والی پولیس پارٹی پر فائرنگ کے نتیجے میں دو سب انسپیکٹرز زخمی جبکہ ایک منشیات فروش ہلاک ہو گیا۔

تفصیلات کے مطابق، صدر پولیس اسٹیشن احمدپور کی ٹیم منشیات فروشوں کے خلاف کارروائی کے لیے چوک بھٹہ پہنچی تو ملزمان نے اچانک پولیس پر فائرنگ کر دی۔ فائرنگ کے نتیجے میں سب انسپیکٹر افتخار (عمر 53 سال) ٹانگ پر گولی لگنے سے زخمی ہو گئے جبکہ ایلیٹ فورس کے سب انسپیکٹر نذیر احمد بھی فائرنگ کی زد میں آ کر زخمی ہوئے۔

ریسکیو 1122 نے دونوں زخمی اہلکاروں کو جہانگیر رشید آباد کوٹلہ موسیٰ خان روڈ سے فوری طور پر تحصیل ہیڈ کوارٹر ہسپتال احمدپور منتقل کیا، جہاں انہیں ابتدائی طبی امداد فراہم کر کے مزید علاج کے لیے داخل کر لیا گیا۔

دوسری جانب پولیس کی جوابی فائرنگ میں منشیات فروش منظور موقع پر ہلاک ہو گیا۔ پولیس نے علاقے کو گھیرے میں لے کر مزید کارروائی شروع کر دی ہے۔