تنگوانی (باغی ٹی وی،نامہ نگار منصور بلوچ) تنگوانی کا رہائشی پولیس اہلکار اے ایس آئی قیصر علی بَلکانی کراچی میں ڈاکوؤں سے مقابلے کے دوران شہید ہو گیا۔
وہ تھانہ سعود آباد کورنگی میں تعینات تھے اور ڈکیتی مزاحمت کے دوران تھانہ سکھن کی حدود دس نمبر روڈ پر شہید ہوئے۔
شہید اہلکار کی نعش کراچی سے آبائی گاؤں تنگوانی لائی گئی تو کہرام مچ گیا اور پورے علاقے میں سوگ کی فضا چھا گئی۔
پولیس کے مطابق مقابلے کے دوران اہلکار کا قاتل ڈکیت بھی مارا گیا۔
منڈی بہاؤالدین (باغی ٹی وی، نامہ نگار محمد افنان ) ڈپٹی ڈائریکٹر فوڈ اتھارٹی عدیل احمد کی سربراہی میں فوڈ سیفٹی آفیسر عثمان چیمہ، اسسٹنٹ فوڈ سیفٹی آفیسر کرن قرت العین اور ویجیلینس اسسٹنٹ عادل خان نے خفیہ اطلاع پر کارروائی کرتے ہوئے ہزاروں لیٹر دودھ کی کین قبضے میں لے کر سیمپل کیے۔
لیبارٹری رپورٹ میں دودھ ملاوٹ شدہ ثابت ہونے پر تمام دودھ تلف کردیا گیا۔
ویجیلینس اسسٹنٹ عادل خان نے کہا کہ غیر معیاری دودھ کی خرید و فروخت کسی صورت برداشت نہیں کی جائے گی۔
عوام اپنی نشاندہی کے ذریعے فوڈ اتھارٹی کو اطلاع دیں تاکہ فوری کارروائی ممکن ہو سکے۔
ڈیرہ غازی خان (باغی ٹی وی، سٹی رپورٹر جواد اکبر)ڈیرہ غازی خان میں بارڈر ملٹری پولیس کی بروقت کارروائی، لادی گینگ کا ایک ڈکیت مقابلے کے بعد اسلحہ سمیت گرفتار کر لیا گیا۔ گرفتار ہونے والے ملزم کی شناخت مجاہد ولد یوسف گوراغ سکنہ یارو کھوسہ کے نام سے ہوئی ہے، جس نے اپنے ساتھیوں کے ہمراہ تھانہ کشوبہ کے ایس ایچ او یونس خان کھوسہ اور ان کی ٹیم پر فائرنگ کی تھی۔
واقعہ کی اطلاع ملتے ہی کمانڈنٹ بارڈر ملٹری پولیس امیر تیمور کے حکم پر لائن آفیسر ساجد خان لغاری بھاری نفری کے ساتھ موقع پر پہنچے اور ڈاکوؤں کے ساتھ شدید فائرنگ کا تبادلہ ہوا۔ پولیس کی جوابی کارروائی کے نتیجے میں ایک ملزم گرفتار کر لیا گیا جبکہ دیگر فرار ہونے میں کامیاب ہو گئے۔ ذرائع کے مطابق بارڈر ملٹری پولیس مفرور ملزمان کی گرفتاری کے لیے چھاپے مار رہی ہے۔
عوامی حلقوں نے ایس ایچ او یونس خان کھوسہ اور لائن آفیسر ساجد خان لغاری کی جرات اور بہادری پر زبردست خراج تحسین پیش کیا۔ کمانڈنٹ امیر تیمور کی قیادت میں یہ دوسری بڑی کارروائی ہے جس میں لادی گینگ کے خلاف براہِ راست آپریشن کیا گیا۔ شہریوں کا کہنا ہے کہ بی ایم پی کی اس کامیاب کارروائی نے یہ واضح پیغام دیا ہے کہ کوہ سلیمان کے علاقے میں جرائم پیشہ عناصر کے لیے کوئی رعایت نہیں ہوگی۔
یاد رہے کہ پولیس تھانہ کوٹ مبارک کی حدود میں ڈکیتی کی واردات کے بعد ملزمان پہاڑی علاقوں کی جانب فرار ہو رہے تھے، اطلاع ملنے پر ایس ایچ او یونس کھوسہ اپنی ٹیم کے ساتھ تعاقب میں گئے جہاں ڈاکوؤں نے اندھا دھند فائرنگ کر دی۔ بی ایم پی کی سرکاری گاڑی پر فائر لگا تاہم پولیس اہلکار معجزانہ طور پر محفوظ رہے۔ بعدازاں کمانڈنٹ بی ایم پی نے اضافی نفری موقع پر طلب کی اور کارروائی کرتے ہوئے ایک خطرناک ملزم کو گرفتار کر لیا۔
اوکاڑہ (نامہ نگار ملک ظفر)اوکاڑہ میں سیوریج کی صفائی کے دوران افسوسناک واقعہ پیش آیا، گرین سٹی دیپالپور روڈ پر دو پرائیویٹ سینٹری ورکر جاں بحق ہو گئے۔ تفصیلات کے مطابق شہباز اور سیموئیل نامی ورکرز سیوریج ہول میں صفائی کے لیے اترے، جہاں گیس بھر جانے کے باعث وہ بے ہوش ہو گئے۔
ساتھیوں نے انہیں فوری طور پر تشویشناک حالت میں باہر نکال کر ڈسٹرکٹ ہسپتال اوکاڑہ منتقل کیا، جہاں ایمرجنسی طبی امداد کے باوجود دونوں ورکر جانبر نہ ہو سکے اور دم توڑ گئے۔
لاشوں کو ڈسٹرکٹ ہسپتال کے ڈیڈ ہاؤس منتقل کر دیا گیا ہے جبکہ ضلعی انتظامیہ نے واقعے کی تحقیقات شروع کر دی ہیں۔ اس افسوسناک واقعے پر علاقے میں سوگ کی فضا قائم ہے۔
سکھر (باغی ٹی وی،نامہ نگار مشتاق علی لغاری)کوٹ ڈیجی کی یونین کونسل لیاری میں 33 لاکھ روپے کے مبینہ غبن پر منتخب کونسلروں اور وائس چیئرمین نے شدید احتجاج کیا۔ اس سلسلے میں چیئرمین مختیار حسین کانہڑو کے خلاف ہنگامی پریس کانفرنس کی گئی جس میں کونسلروں نے سنگین الزامات عائد کیے۔
کونسلروں نے انکشاف کیا کہ گزشتہ 28 ماہ کی آڈٹ رپورٹ اب تک پیش نہیں کی گئی جبکہ 10 سے 13 روز قبل یونین کونسل کے اکاؤنٹ سے 33 لاکھ روپے کا غبن کیا گیا ہے جس کا کوئی ریکارڈ دستیاب نہیں۔ انہوں نے کہا کہ عوامی نمائندوں کو اعتماد میں لیے بغیر فنڈز کی اس بڑی رقم کا غائب ہونا سنگین بدعنوانی ہے۔
مقررین نے مطالبہ کیا کہ فوری طور پر یونین کونسل کا اجلاس طلب کیا جائے اور مکمل ریکارڈ سامنے لایا جائے، بصورتِ دیگر پیر سے چیئرمین کے خلاف اینٹی کرپشن حکام اور اعلیٰ عدالتوں سے رجوع کیا جائے گا۔
کراچی کے علاقے ملیر میں زیر تعمیر شاپنگ سینٹر کے مالک کو بھتہ مافیا کی سنگین دھمکیاں موصول ہوئیں۔ نامعلوم ملزمان نے فائرنگ کے بعد 5 کروڑ روپے بھتہ طلب کرتے ہوئے ایک ہفتے کی مہلت دی اور رقم نہ دینے کی صورت میں دوبارہ مسلح کارروائی کرنے کی وارننگ دی ہے۔
پولیس کے مطابق واقعہ ملیر سٹی تھانے کی حدود میں پیش آیا جہاں چند روز قبل ملیر 15 پل کے قریب زیر تعمیر جیلانی شاپنگ سینٹر پر دو موٹرسائیکلوں پر سوار چار مسلح ملزمان نے اندھا دھند فائرنگ کی تھی۔ اچانک ہونے والی فائرنگ سے علاقے میں شدید خوف و ہراس پھیل گیا جبکہ راہگیر اور قریبی دکاندار اپنی جان بچانے کے لیے ادھر ادھر بھاگتے رہے۔ خوش قسمتی سے واقعے میں کوئی جانی نقصان نہیں ہوا۔ایف آئی آر کے متن کے مطابق فائرنگ کے کچھ دیر بعد شاپنگ سینٹر کے مالکان کو ایک انٹرنیشنل نمبر سے کال موصول ہوئی۔ ملزمان نے فون پر 5 کروڑ روپے بھتہ ادا کرنے کا مطالبہ کرتے ہوئے دھمکی دی کہ اگر مقررہ وقت پر رقم فراہم نہ کی گئی تو پلازہ کو دوبارہ نشانہ بنایا جائے گا۔
پولیس نے واقعے کا مقدمہ بھتہ خوری اور دہشتگردی کی دفعات کے تحت درج کرلیا ہے جبکہ ملزمان کی تلاش کے لیے خصوصی ٹیمیں تشکیل دے دی گئی ہیں۔ پولیس حکام کا کہنا ہے کہ جائے وقوعہ سے شواہد اکٹھے کرلیے گئے ہیں اور سی سی ٹی وی فوٹیج کی مدد سے ملزمان کی نشاندہی کی کوشش جاری ہے۔
لاہور کے علاقے اقبال ٹاؤن میں پولیس نے بروقت اور موثر کارروائی کرتے ہوئے خاتون شہری سے اسلحہ کے زور پر گاڑی چھیننے والے دو ملزمان کو گرفتار کر لیا۔
پولیس کے مطابق ملزمان احتشام اور فاروق نے واردات کے دوران انتہائی مکاری سے منصوبہ بنایا۔ دونوں ملزمان نے موٹر سائیکل پر سوار ہو کر خاتون کی گاڑی کو پیچھے سے ٹکر ماری۔ جب متاثرہ خاتون صورتحال دیکھنے کے لیے گاڑی سے باہر نکلیں تو ایک ملزم فوراً گاڑی میں بیٹھ گیا اور پستول دکھا کر خاتون کو ڈرا دھمکا کر گاڑی لے اڑا۔واردات کی یہ منظر کشی قریبی کیمروں میں ریکارڈ ہوگئی جس کی مدد سے پولیس نے فوری کارروائی کا آغاز کیا۔ خاتون کی مدعیت میں مقدمہ درج کر کے ملزمان کی تلاش شروع کی گئی۔ پولیس نے جدید ٹیکنالوجی کا استعمال کرتے ہوئے 300 سے زائد سیف سٹی اور لوکل کیمروں کی فوٹیجز کا تجزیہ کیا اور بالآخر دونوں ملزمان کو گرفتار کرنے میں کامیاب ہوگئی۔
کارروائی کے دوران چھینی گئی ٹویوٹا کرولا گاڑی، نقدی، پستول، گولیاں، بمہ اور موبائل فون برآمد کر لیے گئے۔ مزید تحقیقات میں یہ بھی انکشاف ہوا کہ گرفتار ملزم فاروق سابقہ ریکارڈ یافتہ ہے اور متعدد وارداتوں میں ملوث رہا ہے۔ دونوں ملزمان کے خلاف مزید مقدمات درج کر لیے گئے ہیں۔لاہور پولیس نے بروقت کارروائی پر ایس ایچ او عامر شہزاد اور ان کی ٹیم کو شاباش دی اور تعریفی اسناد بھی عطا کیں۔ شہریوں نے پولیس کی یہ کامیاب کارروائی سراہتے ہوئے کہا کہ اس طرح کے فوری اقدامات عوام میں تحفظ کا احساس پیدا کرتے ہیں۔
گھوٹکی (نامہ نگار باغی ٹی وی مشتاق علی لغاری) ایس ایس پی گھوٹکی محمد انور کھیتران کی ہدایات پر ضلع بھر میں جرائم پیشہ عناصر کے خلاف پولیس کی کارروائیاں تیز کر دی گئی ہیں۔ اسی سلسلے میں تھانہ اوباڑو پولیس نے کار چوری کے مقدمے میں مطلوب ملزم کو مسروقہ کار سمیت گرفتار کر لیا۔
ایس ایچ او تھانہ اوباڑو رفیق احمد سومرو بمعہ اسٹاف نے دورانِ گشت خفیہ اطلاع پر کارروائی کرتے ہوئے نیشنل ہائی وے نزد آدھی بنگلو سے کرائم نمبر 400/2025 دفعہ 381 اے ت پ تھانہ گلشن معمار ضلع ویسٹ کراچی کے مقدمے میں مطلوب ملزم عامر عرف شہزاد ولد نیاز احمد بھٹو سکنہ سیکٹر 4 رحموانی موڑ ضلع سینٹرل کراچی کو گرفتار کر لیا۔ پولیس نے ملزم کے قبضے سے چوری شدہ کار بھی برآمد کر لی۔
ایس ایس پی گھوٹکی محمد انور کھیتران نے کامیاب کارروائی پر پولیس پارٹی کو شاباش دیتے ہوئے کہا کہ ضلع بھر میں اشتہاریوں اور جرائم پیشہ افراد کے خلاف آپریشن مزید تیز کیا جائے گا تاکہ عوام کو امن و امان کی بہتر فضا فراہم کی جا سکے۔
گھوٹکی ( باغی ٹی وی ،نامہ نگارمشتاق علی لغاری) محمد انور کھیتران کے احکامات پر ضلع بھر میں جرائم پیشہ عناصر کے خلاف کارروائیاں جاری ہیں۔ امن و امان کو برقرار رکھنے کے لیے ضلع کے داخلی و خارجی راستوں پر سخت ناکہ بندی اور سنیپ چیکنگ کا عمل تیز کر دیا گیا ہے۔
ایس ایچ او تھانہ کھمبڑا ظہیر حسین بھٹو بمعہ اسٹاف نے حساس ادارے کی نشاندہی پر کراس بند پکٹ پر کارروائی کے دوران نان کسٹم کپڑوں سے بھرا ایک رکشہ برآمد کر لیا۔ پولیس پارٹی کو چیکنگ کرتا دیکھ کر ایک نامعلوم ملزم تقریباً 13 من نان کسٹم کپڑوں سے لوڈ رکشہ چھوڑ کر موقع سے فرار ہو گیا۔
پولیس نے چھکڑے کو نان کسٹم کپڑوں سمیت اپنی تحویل میں لے کر قانونی کارروائی کے بعد کسٹم حکام کے حوالے کر دیا۔ ترجمان پولیس کے مطابق ضلع بھر میں امن و امان کی فضا قائم رکھنے اور قانون کی بالادستی برقرار رکھنے کے لیے پولیس کو سخت احکامات جاری کیے گئے ہیں، جبکہ جرائم پیشہ عناصر اور سماجی برائیوں کے خلاف بلا تفریق کارروائی جاری رہے گی۔
ایس ایچ او تھانہ صدر تلہ گنگ انسپکٹر راجہ محمد عماد نے ہمراہ ٹیم کاروائی کرتے ہوئے مدرسے کے معلم کو گرفتار کر لیا
12 سالہ بچے سے مدرسے میں بد فعلی کرنے والا معلم گرفتار مقدمہ درج کر لیا گیا وزیر اعلیٰ پنجاب کے ویژن، آئی جی پنجاب پولیس ڈاکٹر عثمان انور اور آر پی او راولپنڈی بابر سرفراز الپا کے احکامات پر ڈسٹرکٹ پولیس آفیسر تلہ گنگ،چکوال لیفٹیننٹ ریٹائرڈ احمد محی الدین کی زیر نگرانی ایس ڈی پی او تلہ گنگ سرکل یاسر مطلوب کیانی کی سربراہی میں، ایس ایچ او تھانہ صدر تلہ گنگ انسپکٹر راجہ محمد عماد نے ہمراہ ٹیم کاروائی کرتے ہوئے مدرسے کے معلم کو گرفتار کر لیا۔
ترجمان چکوال پولیس کے مطابق ملزم کو ٹھوس شواہد کے ساتھ چالان عدالت کیا جائے گا تاکہ ملزم کو قرار واقعی سزا دلوائی جا سکے۔ وزیر اعلیٰ پنجاب کے ویژن NEVER AGAIN مہم کے تحت عورتوں، بچوں پر تشدد،جنسی ہراسگی کے فوری مقدمات درج کیے جا رہے ہیں۔ تشدد،زیادتی اور ہراسمنٹ نا قابل برداشت ہیں۔