Baaghi TV

Category: جرائم و حادثات

  • گوجرہ :دو موٹر سائیکلیں چوری، دو بجلی چور گرفتار

    گوجرہ :دو موٹر سائیکلیں چوری، دو بجلی چور گرفتار

    گوجرہ(باغی ٹی وی،سٹی رپورٹرمحمداجمل خان)شہر میں چوری کی وارداتوں کا سلسلہ جاری ہے، جہاں دو الگ الگ واقعات میں شہریوں کی دو موٹر سائیکلیں چوری ہو گئیں۔ اس کے علاوہ، فیسکو ٹاسک فورس نے دو افراد کو بجلی چوری کرتے ہوئے رنگے ہاتھوں پکڑ لیا ہے۔ پولیس نے تمام واقعات کا مقدمہ درج کر کے کارروائی شروع کر دی ہے۔

    پہلے واقعے میں، محلہ شریف پورہ کا رہائشی محمد اکبر اپنی موٹر سائیکل (نمبر FDK-5224) لے کر غلہ منڈی میں ایک دکان پر آیا۔ وہ موٹر سائیکل باہر کھڑی کر کے دکان کے اندر گیا اور جب واپس آیا تو موٹر سائیکل غائب تھی۔

    دوسرا واقعہ چک نمبر 279 ج ب میں پیش آیا، جہاں محمد علی نے اپنی موٹر سائیکل (نمبر ALP-6849) اپنے کلینک کے باہر کھڑی کی جو نامعلوم چور چرا کر لے گئے۔ تھانہ سٹی اور نواں لاہور پولیس نے دونوں واقعات کے الگ الگ مقدمات درج کر کے چوروں کی تلاش شروع کر دی ہے۔

    اسی دوران، فیسکو ٹاسک فورس نے خفیہ اطلاع پر کارروائی کرتے ہوئے دو بجلی چوروں کو گرفتار کر لیا۔ محلہ شہسوار ٹاؤن کے غلام عباس اور چک نمبر 373 ج ب کے ناصر علی میٹر سے براہ راست تاریں لگا کر بجلی چوری کر رہے تھے۔ فیسکو اہلکاروں نے موقع پر چھاپہ مار کر انہیں بجلی چوری کرتے ہوئے پکڑا اور ان کے میٹر اتار لیے۔ دونوں ملزمان کے خلاف متعلقہ تھانوں میں مقدمات درج کر لیے گئے ہیں اور ان کی گرفتاری کے لیے چھاپے مارے جا رہے ہیں۔

  • گوجرہ:جنگلی حیات کا تحفظ ،محکمہ وائلڈ لائف نے غیر قانونی کاروبار کرنے والے گرفتار کر لیے

    گوجرہ:جنگلی حیات کا تحفظ ،محکمہ وائلڈ لائف نے غیر قانونی کاروبار کرنے والے گرفتار کر لیے

    گوجرہ(باغی ٹی وی ،سٹی رپورٹرمحمداجمل خان)محکمہ وائلڈ لائف نے گوجرہ میں پرندوں کا غیر قانونی کاروبار کرنے والے تین افراد کو گرفتار کر کے ان کے خلاف مقدمات درج کر لیے۔ گرفتار ملزمان کو عدالت نے جوڈیشل ریمانڈ پر جیل بھیج دیا ہے جبکہ ان کے قبضے سے برآمد ہونے والے پرندوں کو دوبارہ قدرتی ماحول میں چھوڑ دیا گیا ہے۔

    محکمہ وائلڈ لائف رینجر ٹوبہ ٹیک سنگھ کی ٹیم نے اسسٹنٹ چیف وائلڈ لائف رینجر عبدالرشید کی قیادت میں گوجرہ شہر میں پرندوں کی غیر قانونی خرید و فروخت کے اڈوں پر چھاپے مارے۔ اس دوران قمر مسیح، جارج مسیح، اور محمد رضوان نامی افراد کو غیر قانونی طور پر پرندوں کا کاروبار کرتے ہوئے پایا گیا۔ ان کے خلاف فوری طور پر قانونی کارروائی کی گئی۔

    ملزمان کو مقامی عدالت میں پیش کیا گیا جہاں عدالت کے حکم پر انہیں جیل بھیج دیا گیا۔ محکمہ وائلڈ لائف نے کارروائی کے دوران برآمد ہونے والے مختلف پرندے، جن میں تیتر، بٹیر، فینسی طوطے، اور دیگر اقسام شامل تھیں، کو واپس فطرت میں آزاد کر دیا۔ یہ کارروائی جنگلی حیات کے تحفظ کے لیے محکمہ وائلڈ لائف کی سنجیدگی کو ظاہر کرتی ہے۔

  • ٹھٹھہ : دو مختلف واقعات میں 4 افراد جاں بحق

    ٹھٹھہ : دو مختلف واقعات میں 4 افراد جاں بحق

    ٹھٹھہ(باغی ٹی وی ،ڈسٹرکٹ رپورٹربلاول سموں)ٹھٹھہ میں دو الگ الگ افسوسناک واقعات میں چار افراد، جن میں تین خواتین بھی شامل ہیں، اپنی جانوں سے ہاتھ دھو بیٹھے۔

    گھارو کے علاقے میں ایک معمولی تکرار پر مالک کورائی نامی شخص نے اپنے بھائی انس کورائی پر چاقو سے پے در پے وار کر کے اسے شدید زخمی کر دیا۔ زخمی کو فوری طور پر گھارو رورل ہیلتھ سینٹر منتقل کیا گیا، لیکن وہ زخموں کی تاب نہ لاتے ہوئے چل بسا۔ ڈاکٹروں نے اس کی موت کی تصدیق کر دی ہے۔ پولیس کے مطابق قاتل بھائی جائے وقوعہ سے فرار ہونے میں کامیاب ہو گیا ہے۔

    دوسرا دلخراش واقعہ جھرک کے قریب پیش آیا، جہاں تالاب سے پانی بھرتے ہوئے ایک خاتون کا پاؤں پھسل گیا۔ اسے بچانے کے لیے دو مزید خواتین نے تالاب میں چھلانگ لگا دی، لیکن بدقسمتی سے تینوں ڈوب گئیں۔ ایک خاتون پٹھانی ببر موقع پر ہی جاں بحق ہو گئی، جبکہ دوسری دو خواتین مہک اور غزالہ کو مقامی افراد نے تالاب سے باہر نکال کر کوٹری ہسپتال منتقل کیا، مگر وہ بھی جانبر نہ ہو سکیں۔ تینوں خواتین کی میتیں جب ان کے گاؤں پہنچیں تو علاقے میں کہرام مچ گیا اور ہر آنکھ اشکبار تھی

  • سعودی عرب میں انتقال کرنے والے نوجوان اعجاز احمد کی نماز جنازہ ادا کردی گئی

    سعودی عرب میں انتقال کرنے والے نوجوان اعجاز احمد کی نماز جنازہ ادا کردی گئی

    منڈی بہاوالدین(باغی ٹی وی،نامہ نگارافنان طالب)منڈی بہاوالدین سے تعلق رکھنے والے نوجوان اعجاز احمد کی نماز جنازہ ان کے آبائی گاؤں سیویہ شریف میں ادا کردی گئی، جو سعودی عرب میں انتقال کر گئے تھے۔ نماز جنازہ میں اہل علاقہ اور دوست احباب کی بڑی تعداد نے شرکت کی۔

    تفصیلات کے مطابق اعجاز احمد ولد حاجی محمد اسلم رحمانی جو سعودی عرب میں انتقال کر گئے تھے، ان کی میت پاکستان منتقل کی گئی۔ ان کا نماز جنازہ 17 ستمبر 2025 کو بعد نماز مغرب ادا کیا گیا۔ نماز جنازہ میں ان کے ماموں یاسر اقبال رحمانی، بھائی ریاض احمد رحمانی اور قریبی دوستوں سمیت کثیر تعداد میں لوگوں نے شرکت کی۔ بیرون ملک مقیم دوستوں نے بھی اعجاز احمد کے انتقال پر گہرے دکھ اور افسوس کا اظہار کیا۔

    نماز جنازہ کے بعد اعجاز احمد کی میت کو آبائی قبرستان میں سپرد خاک کیا گیا۔ اس موقع پر غمزدہ خاندان سے تعزیت کا اظہار کیا گیا اور مرحوم کی مغفرت اور بلند درجات کے لیے دعا کی گئی۔

  • بہاولپور کے قریب موٹروے پر دلخراش حادثہ، باپ بیٹا جاں بحق

    بہاولپور کے قریب موٹروے پر دلخراش حادثہ، باپ بیٹا جاں بحق

    اوچ شریف(باغی ٹی وی ،نامہ نگارحبیب خان) بہاولپور کے قریب نیشنل ہائی وے پر مسافر خانہ کے مقام پر ایک المناک ٹریفک حادثے میں باپ اور بیٹے کی جان چلی گئی۔ یہ واقعہ اس وقت پیش آیا جب ایک تیز رفتار ٹریلر نے موٹر سائیکل کو پیچھے سے ٹکر مار دی۔

    تفصیلات کے مطابق ریسکیو ذرائع نے بتایا ہے کہ عبدالحمید (عمر 70 سال) اور ان کے بیٹے محمد جمشید (عمر 30 سال) موٹر بائیک پر بہاولپور سے احمد پور کی جانب جا رہے تھے۔ اسی دوران پیچھے سے آنے والے ایک تیز رفتار ٹریلر نے انہیں کچل دیا، جس کے نتیجے میں دونوں کی موقع پر ہی موت ہو گئی۔

    موٹروے پولیس کے مطابق حادثے کی شدت اتنی زیادہ تھی کہ دونوں لاشیں شدید زخمی حالت میں پائی گئیں۔ ریسکیو اہلکاروں نے فوری طور پر جائے وقوع پر پہنچ کر وائٹل سائنز چیک کیے جو کہ موجود نہیں تھے۔

    جاں بحق ہونے والے باپ بیٹے کا تعلق احمد پور شرقیہ کے موضع ٹبی ہوت سے تھا۔ پولیس نے حادثے کی جگہ پر پہنچ کر مزید تفتیش شروع کر دی ہے۔

  • گھوٹکی: سیلاب سے سینکڑوں گاؤں زیرِ آب، متاثرین کا احتجاج، انتظامیہ پر غفلت کا الزام

    گھوٹکی: سیلاب سے سینکڑوں گاؤں زیرِ آب، متاثرین کا احتجاج، انتظامیہ پر غفلت کا الزام

    میرپورماتھیلو(باغی ٹی وی ،نامہ نگارمشتاق علی لغاری)گھوٹکی میں سیلاب سے سینکڑوں گاؤں زیرِ آب، متاثرین کا احتجاج، انتظامیہ پر غفلت کا الزام
    تفصیلات کے مطابق ضلع گھوٹکی میں حالیہ سیلاب نے تباہی مچا دی ہے، جس کے نتیجے میں سینکڑوں گاؤں پانی میں ڈوب گئے، درجنوں مکانات تباہ ہوئے اور ہزاروں لوگ بے گھر ہو گئے۔ متاثرین نے انتظامیہ کی جانب سے کسی بھی قسم کی امداد نہ ملنے پر شدید احتجاج کیا۔

    گاؤں جاڑو خان شیخ کے متاثرین نے مقامی رہنماؤں کمال مہر، نظیر احمد شیخ، جسقم شہید بشیر خان، اور میر حسن لاشاری کی قیادت میں ضلعی انتظامیہ کے خلاف بھرپور مظاہرہ کیا۔ مظاہرین نے الزام عائد کیا کہ سیلاب کو کئی دن گزر جانے کے باوجود ضلعی انتظامیہ نے ابھی تک کوئی امدادی کارروائی شروع نہیں کی۔

    مظاہرین کا کہنا تھا کہ سیلابی پانی سے بچوں میں بیماریاں تیزی سے پھیل رہی ہیں، اور مچھروں کی کثرت کے باعث ملیریا کے کیسز بڑھ رہے ہیں۔ ان کے مویشی بھی بیمار ہو رہے ہیں، لیکن کوئی ڈاکٹر علاج کے لیے نہیں پہنچا۔ اس صورتحال نے ان کے مالی اور جانی نقصان کو مزید بڑھا دیا ہے۔

    متاثرین نے حکومت سے فوری امداد کا مطالبہ کرتے ہوئے کہا کہ
    * سیلاب زدہ علاقوں میں فوری طور پر امدادی کارروائیاں شروع کی جائیں۔
    * متاثرین کو ادویات، خوراک اور عارضی رہائش فراہم کی جائے۔
    * جانوروں کے لیے بھی فوری طبی امداد کا بندوبست کیا جائے تاکہ ان کی زندگیاں بچائی جا سکیں۔

  • میرپورخاص: پولیس کی منشیات فروشوں کے خلاف بڑی کارروائی، 11 ملزمان گرفتار

    میرپورخاص: پولیس کی منشیات فروشوں کے خلاف بڑی کارروائی، 11 ملزمان گرفتار

    میرپورخاص(باغی ٹی وی ،نامہ نگارسیدشاہزیب شاہ) سینئر سپرنٹنڈنٹ آف پولیس (ایس ایس پی) میرپورخاص ڈاکٹر سمیر نور چنہ کے احکامات پر میرپورخاص پولیس نے منشیات فروشوں اور جرائم پیشہ عناصر کے خلاف کارروائیاں تیز کر دی ہیں۔ ان کارروائیوں کے دوران 11 ملزمان کو گرفتار کیا گیا ہے۔

    تفصیلات کے مطابق میرپورخاص پولیس نے گرفتار ملزمان کے قبضے سے بھاری مقدار میں غیر قانونی اشیاء برآمد کی ہیں۔ ان میں 1 کلو سے زائد چرس، 5 ہزار لیٹر سے زائد دیسی شراب، ایک چوری شدہ موٹر سائیکل، غیر قانونی اسلحہ اور بڑی تعداد میں مضر صحت گٹکے اور دیگر منشیات شامل ہیں۔

    پولیس کا کہنا ہے کہ تمام گرفتار ملزمان کے خلاف مقدمات درج کر لیے گئے ہیں اور مزید تحقیقات جاری ہیں۔ ایس ایس پی ڈاکٹر سمیر نور چنہ نے واضح کیا ہے کہ میرپورخاص میں جرائم کے خاتمے تک یہ کارروائیاں جاری رہیں گی۔

  • خانپور مہر: سکول کی چھت گرنے سے متعدد طلبہ زخمی

    خانپور مہر: سکول کی چھت گرنے سے متعدد طلبہ زخمی

    میرپورماتھیلو(باغی ٹی وی،نامہ نگارمشتاق لغاری)گھوٹکی کے علاقے خانپور مہر کے گاؤں احمد آباد میں ایک پرائمری اسکول کی چھت کا ایک حصہ گرنے سے کئی معصوم طلبہ زخمی ہو گئے۔ یہ افسوسناک واقعہ اس وقت پیش آیا جب بچے معمول کے مطابق کلاس میں مصروف تھے۔

    تفصیلات کے مطابق اچانک چھت کا ایک حصہ گر گیا جس کے نتیجے میں متعدد طلبہ ملبے تلے دب گئے۔ فوری طور پر امدادی کارروائیاں شروع کی گئیں اور زخمی بچوں کو قریبی ہسپتال منتقل کیا گیا جہاں ان کا علاج جاری ہے۔

    سماجی رہنماؤں نے اس واقعے کو محکمہ تعلیم کی شدید غفلت قرار دیا ہے۔ انہوں نے اس سانحے کی مذمت کرتے ہوئے کہا ہے کہ بچوں کی زندگیوں کو خطرے میں ڈالنے والوں کے خلاف سخت کارروائی کی جانی چاہیے اور انہیں کسی صورت معاف نہیں کیا جا سکتا۔ یہ واقعہ اسکولوں کی بوسیدہ عمارتوں اور ان کی دیکھ بھال میں غفلت جیسے اہم مسائل کی طرف توجہ دلاتا ہے۔

  • 6 ماہ کی حاملہ خاتون سے دیور اور اس کے 2 دوستوں کا گینگ ریپ، مقدمہ درج

    6 ماہ کی حاملہ خاتون سے دیور اور اس کے 2 دوستوں کا گینگ ریپ، مقدمہ درج

    فیصل آباد کے تھانہ سیہانوالہ پولیس نے 6 ماہ کی حاملہ خاتون کے گینگ ریپ کے الزام میں 3 افراد کے خلاف مقدمہ درج کر لیا۔

    متاثرہ خاتون کی والدہ نے درخواست میں الزام عائد کیا ہے کہ اس کا داماد روزگار کے سلسلے میں دوسرے گاؤں میں رہتا ہے، داماد کے چھوٹے بھائی اور اس کے 2 ساتھیوں نے یکم ستمبر کو چائے میں نشہ آور دوا ملا کر ان کی بیٹی کو بے ہوش کر کے گینگ ریپ اور غیر فطری جنسی عمل کا نشانہ بنایا،ملزمان اور ان کے گھر والوں نے متاثرہ خاتون کو ایک کمرے میں بند کر دیا اور ماں اور شوہر سے رابطہ بھی کرنے نہیں دیا، بیٹی کے ہمسایوں نے انہیں فون پر واقعے سے آگاہ کیا، جس کے بعد ایڈیشنل ڈسٹرکٹ اینڈ سیشن جج کے حکم پر پولیس نے خاتون کو بازیاب کرایا۔

    پولیس ترجمان کا کہنا ہے کہ ملزمان کی گرفتاری کے لیے چھاپے مارے جا رہے ہیں۔

  • راولپنڈی میں 50 سالہ خاتون کو مٹی کا تیل چھڑک کر زندہ جلا دیا گیا

    راولپنڈی میں 50 سالہ خاتون کو مٹی کا تیل چھڑک کر زندہ جلا دیا گیا

    راولپنڈی میں 50 سالہ خاتون کو مبینہ طور پر ان کے دیور نے مٹی کا تیل چھڑک کر زندہ جلا دیا پولیس نے ملزم کو گرفتار کر کے اس کے خلاف قتل کا مقدمہ درج کر لیا ہے،

    ابتدائی طور پر ملزم نے دعویٰ کیا کہ واقعہ کمپریسر پھٹنے سے پیش آیا، تاہم پولیس کی تحقیقات کے بعد انکشاف ہوا کہ 2 روز قبل دھمیال میں خاتون کو آگ لگا کر جلایا گیا تھا،واقعے کی اطلاع ملنے پر سٹی پولیس افسر (سی پی او) سید خالد حمدانی نے نوٹس لیا اور فوری طور پر مقدمہ درج کرنے اور ملزم کو گرفتار کرنے کا حکم دیا، مقتولہ کے دیور کو گرفتار کر لیا گیا ہے اور مزید تحقیقات جاری ہونے پر رپورٹ میں قتل کی دفعہ شامل کر دی گئی ہے،قائداعظم کالونی دھمیال کے رہائشی 23 سالہ محمد شہزاد احمد بھٹی نے فرسٹ انفارمیشن رپورٹ (ایف آئی آر) درج کرائی، انہوں نے بیان دیا کہ وہ کام پر تھے جب انہیں اپنے چچا کی کال موصول ہوئی، جس میں بتایا گیا کہ ان کی والدہ کمپریسر پھٹنے کے باعث جل گئی ہیں۔