Category: جرائم و حادثات

اوچ شریف (باغی ٹی وی، نامہ نگار حبیب خان)ڈپٹی کمشنر بہاولپور ڈاکٹر فرحان فاروق کی ہدایت پر اسسٹنٹ کمشنر تحصیل احمد پور شرقیہ محمد نوید حیدر کی سربراہی میں موضع بکھری میں غیر قانونی آئل ایجنسی کے خلاف کامیاب کارروائی عمل میں لائی گئی۔ کارروائی کے دوران غیر قانونی تیل ذخیرہ کرنے والی ایجنسی کو موقع پر سیل کر دیا گیا جبکہ تمام مشینری، ڈرمز اور دیگر سامان ضبط کر کے سول ڈیفنس آفس کے حوالے کر دیا گیا۔

اس موقع پر اسسٹنٹ کمشنر محمد نوید حیدر نے میڈیا سے گفتگو کرتے ہوئے کہا کہ ڈپٹی کمشنر بہاولپور کی واضح ہدایات کے مطابق تحصیل بھر میں غیر قانونی کاروبار، ذخیرہ اندوزی، مضر صحت اشیاء اور خطرناک سرگرمیوں کے خلاف زیرو ٹالرنس پالیسی پر سختی سے عمل کیا جا رہا ہے۔

انہوں نے کہا کہ عوام کے جان و مال کا تحفظ اور قانون کی عملداری حکومت کی اولین ترجیح ہے، کسی کو بھی غیر قانونی کاروبار یا خطرناک سرگرمی جاری رکھنے کی اجازت نہیں دی جائے گی۔ عوامی و سماجی حلقوں نے انتظامیہ کے بروقت اور مؤثر ایکشن کو سراہتے ہوئے کہا کہ ایسے اقدامات سے علاقے میں قانون کی بالادستی، امن و امان کی فضا اور عوامی تحفظ میں نمایاں بہتری آ رہی ہے۔

اسسٹنٹ کمشنر محمد نوید حیدر نے واضح کیا کہ آئندہ بھی غیر قانونی سرگرمیوں کے خلاف بلا تفریق کارروائیاں جاری رہیں گی تاکہ عوام کو محفوظ، منظم اور قانون پر مبنی ماحول فراہم کیا جا سکے۔

اوچ شریف (باغی ٹی وی نامہ نگار حبیب خان)اوچ شریف میں آوارہ کتوں کی بڑھتی ہوئی تعداد نے شہریوں کا جینا محال کر دیا ہے۔ شہر کے گلی کوچوں، بازاروں، تعلیمی اداروں کے اطراف حتیٰ کہ میونسپل کمیٹی کے قریب بھی آوارہ کتے ٹولیوں کی صورت میں دندناتے پھر رہے ہیں، جس سے شہری شدید خوف و ہراس میں مبتلا ہیں۔ خواتین، بچے اور بزرگ شام ڈھلنے کے بعد گھروں سے نکلنے سے گریز کرنے لگے ہیں جبکہ کئی موٹر سائیکل سوار شہری آوارہ کتوں کے حملوں یا اچانک دوڑنے سے حادثات کا شکار ہو چکے ہیں۔

شہریوں نے بتایا کہ تحصیل انتظامیہ اور میونسپل کمیٹی کو بارہا شکایات درج کروائی گئیں لیکن کوئی مؤثر کارروائی تاحال عمل میں نہیں لائی گئی۔ عوامی حلقوں نے انتظامیہ کی خاموشی کو مجرمانہ غفلت قرار دیتے ہوئے کہا کہ آوارہ کتوں کے خاتمے کے لیے مہم نہ چلانا شہریوں کی جانوں سے کھیلنے کے مترادف ہے۔

والدین نے تشویش کا اظہار کرتے ہوئے کہا کہ اسکولوں کے باہر آوارہ کتوں کی موجودگی بچوں کے لیے مستقل خطرہ بن چکی ہے اور کسی بھی وقت کوئی افسوسناک واقعہ پیش آ سکتا ہے۔ شہریوں نے ڈپٹی کمشنر بہاولپور، اسسٹنٹ کمشنر احمد پور شرقیہ اور میونسپل حکام سے مطالبہ کیا ہے کہ فوری طور پر آوارہ کتوں کے خاتمے کی مہم شروع کی جائے تاکہ عوام کو اس اذیت ناک صورتحال سے نجات دلائی جا سکے۔

اوچ شریف (باغی ٹی وی نامہ نگار حبیب خان)اوچ شریف کے نواحی گاؤں بیٹ احمد کے رہائشی 16 سالہ محمد عرفان بلوچ کی کراچی میں مبینہ پولیس تشدد سے ہلاکت نے پورے علاقے کو غم و غصے میں مبتلا کر دیا۔ ذرائع کے مطابق کمسن عرفان سیر و تفریح کے لیے کراچی گیا تھا، جہاں سی آئی اے پولیس نے اسے عائشہ منزل کے قریب مشتبہ قرار دے کر حراست میں لے لیا۔ دورانِ حراست اہلکاروں نے عرفان بلوچ پر شدید تشدد کیا جس کے باعث وہ موقع پر ہی دم توڑ گیا۔

افسوسناک واقعے کے بعد پولیس نے خود ورثا کو فون کر کے لاش حوالے کی، جس پر اہل خانہ اور مقامی افراد نے شدید احتجاج کیا۔ سوشل میڈیا پر معاملہ وائرل ہونے کے بعد پولیس حکام حرکت میں آ گئے اور تین ایس آئیز سمیت سات اہلکاروں کو فوری طور پر معطل کر دیا گیا۔

پوسٹ مارٹم کے بعد ورثا نے ایدھی سینٹر کے باہر احتجاج شروع کر دیا اور مطالبہ کیا کہ جب تک ذمہ دار اہلکاروں کے خلاف قتل کا مقدمہ درج نہیں ہوتا اور گرفتاریاں عمل میں نہیں آتیں، وہ عرفان بلوچ کی میت وصول نہیں کریں گے۔

علاقہ مکینوں اور کراچی کے شہریوں نے کمسن عرفان کی ہلاکت کو پولیس گردی کی بدترین مثال قرار دیتے ہوئے وزیراعلیٰ سندھ، آئی جی پولیس اور انسانی حقوق کمیشن سے مطالبہ کیا ہے کہ اس اندوہناک واقعے کی غیرجانبدارانہ تحقیقات کرائی جائیں اور ملوث اہلکاروں کو نشانِ عبرت بنایا جائے تاکہ آئندہ کوئی شہری پولیس کے ہاتھوں یوں نہ مارا جائے۔