Category: جرائم و حادثات

سکھر (باغی ٹی وی نامہ نگار مشتاق علی لغاری)سکھر میں دہشت کی علامت سمجھے جانے والا بدنام زمانہ ڈاکو سلطان شاہ اپنے بیٹے حبدار شاہ سمیت دوران واردات پولیس مقابلے میں ہلاک ہوگیا۔

تفصیلات کے مطابق روہڑی کے علاقے میں ڈکیتی کے دوران ملزمان کی فائرنگ سے ایک بچہ فیضان شیخ زخمی ہوگیا، جس کی حالت اب خطرے سے باہر بتائی جاتی ہے۔ اطلاع ملنے پر پولیس نے فوری کارروائی کرتے ہوئے ملزمان کا تعاقب کیا۔ فرار ہوتے ہوئے ملزمان کی گاڑی پرانا سکھر تھانہ سی سیکشن کی حدود میں پولیس کے محاصرے میں آگئی، جہاں شدید فائرنگ کا تبادلہ ہوا۔

پولیس کی جوابی فائرنگ کے نتیجے میں سلطان شاہ اور اس کا بیٹا حبدار شاہ موقع پر ہی ہلاک ہوگئے۔مقابلے کے دوران پولیس کانسٹیبل فضل بھٹو بھی زخمی ہوگیا، جسے فوری طور پر اسپتال منتقل کرکے طبی امداد فراہم کی جا رہی ہے۔

دوسری جانب ڈی آئی جی سکھر رینج کیپٹن (ر) فیصل عبداللہ چاچڑ نے زخمی اہلکار کے علاج معالجے کے لیے فوری احکامات جاری کیے ہیں، جبکہ ایس ایس پی سکھر اظہر مغل اور پوری پولیس ٹیم کو کامیاب کارروائی پر شاباش اور مبارکباد دی ہے۔

گھوٹکی (باغی ٹی وی، نامہ نگار مشتاق علی لغاری)گھوٹکی پولیس نے سوشل میڈیا کے ذریعے شر، سیلرا اور دوندھو برادری کے مابین تنازع کو ہوا دینے والے ایک اور ملزم کے خلاف پیکا ایکٹ کے تحت مقدمہ درج کر لیا ہے۔

پولیس کے مطابق ملزم شیر محمد عرف شیرو بادشاہ نے الطاف علی کے فیس بک اکاؤنٹ سے ایک ویڈیو وائرل کی، جس میں اس نے ڈاکوؤں کی حمایت اور برادریوں کے درمیان جاری جھگڑے کو بڑھاوا دینے والے بیانات دیے۔

پولیس نے واقعے کا مقدمہ تھانہ بیلو میرپور پر کرائم نمبر 52/2025 کے تحت دفعہ 153-A تعزیراتِ پاکستان اور دفعہ 26-A پیکا ایکٹ 2016 کے تحت درج کیا ہے، جبکہ ملزم کی گرفتاری کے لیے پولیس ٹیمیں تشکیل دے دی گئی ہیں۔

پولیس ترجمان کے مطابق اس سے قبل بھی وزیر بلو نامی شخص کے خلاف کنگ آف رونتی کچہ کے فیس بک اکاؤنٹ سے ڈاکوؤں کی تعریف اور اشتعال انگیز ویڈیو وائرل کرنے پر مقدمہ درج کیا گیا تھا۔

ملزم وزیر بلو کے خلاف تھانہ میرپور ماتھیلو پر کرائم نمبر 237/2025 کے تحت دفعہ 153-A تعزیراتِ پاکستان اور دفعہ 21، 22 پیکا ایکٹ 2016 کے تحت مقدمہ درج ہے۔

یاد رہے کہ دونوں ملزمان نے سوشل میڈیا (فیس بک)کے ذریعے شر، سیلرا اور دوندھو برادری کے مابین تنازع کو ہوا دینے اور ڈاکوؤں کی حمایت اور برادریوں کے درمیان جاری جھگڑے کو بڑھاوا دینے والے بیانات دیے تھے ۔

گھوٹکی پولیس نے واضح کیا کہ سوشل میڈیا پر نفرت، اشتعال یا غیر ذمہ دارانہ مواد پھیلانے والے افراد کو کسی صورت معاف نہیں کیا جائے گا۔

گھوٹکی (باغی ٹی وی، نامہ نگار مشتاق علی لغاری)گھوٹکی پولیس نے شر، سیلرا اور دوندھو برادری کے درمیان جاری تنازع کو سوشل میڈیا کے ذریعے ہوا دینے والے ملزم کے خلاف کارروائی کرتے ہوئے پیکا ایکٹ کے تحت مقدمہ درج کر لیا ہے۔

پولیس ترجمان کے مطابق، ملزم وزیر بلو نے اپنی فیس بک آئی ڈی "King of Ronati Kacha” کے نام سے ایک ویڈیو وائرل کی، جس میں اس نے مبینہ طور پر ڈاکوؤں کی تعریف کرتے ہوئے فریقین کے درمیان اختلافات کو مزید بھڑکانے کی کوشش کی۔

پولیس نے بتایا کہ اس عمل سے علاقے میں امن و امان کی صورتحال متاثر ہونے کا خدشہ تھا، جس پر فوری کارروائی کرتے ہوئے تھانہ میرپور ماتھیلو میں کرائم نمبر 237/2025 کے تحت دفعہ 153-A ت پ (مختلف برادریوں میں نفرت یا دشمنی پھیلانے کی کوشش) اور دفعہ 21، 22 پیکا ایکٹ 2016 کے تحت مقدمہ درج کیا گیا۔

گھوٹکی پولیس نے اس موقع پر شہریوں کو ایک بار پھر متنبہ کیا ہے کہ سوشل میڈیا پلیٹ فارمز پر ایسی ویڈیوز یا پوسٹس اپ لوڈ نہ کریں جو کسی بھی برادری یا گروہ کے درمیان اشتعال یا تنازع پیدا کرنے کا باعث بنیں۔

پولیس کے مطابق ملزم کی گرفتاری کے لیے خصوصی ٹیمیں تشکیل دے دی گئی ہیں جو مختلف مقامات پر چھاپے مار رہی ہیں۔
ذرائع کے مطابق، پولیس کا کہنا ہے کہ قانون کی خلاف ورزی کرنے والوں سے آہنی ہاتھوں سے نمٹا جائے گا۔