Category: جرائم و حادثات

اوچ شریف (باغی ٹی وی نامہ نگار حبیب خان) چنی گوٹھ کے ایل پی روڈ احمد پور شرقیہ پر ایک المناک حادثے میں ایک نامعلوم شخص موقع پر جاں بحق ہو گیا۔ ریسکیو 1122 کے مطابق موٹروے پولیس نے اطلاع دی کہ ایک پیدل چلنے والے شخص کو تیز رفتار ٹرک نے زور دار ٹکر ماری، جس کے نتیجے میں وہ شدید زخمی ہو گیا۔

ریسکیو ذرائع کے مطابق متوفی کو جسم کے مختلف حصوں میں فریکچر اور کرش انجری آئی، تاہم وہ زخموں کی تاب نہ لاتے ہوئے جائے حادثہ پر ہی دم توڑ گیا۔ جاں بحق شخص کی عمر تقریباً 30 سال بتائی جا رہی ہے، مگر تاحال اس کی شناخت نہیں ہو سکی۔

لاش کو ضروری کارروائی کے بعد ٹی ایچ کیو اسپتال احمد پور شرقیہ منتقل کر دیا گیا ہے جبکہ موٹروے پولیس نے حادثے کی تفتیش شروع کر دی ہے۔

اوچ شریف باغی ٹی وی (نامہ نگار حبیب خان) اڈا ظاہر پیر کے قریب پیش آنے والے خوفناک ٹریفک حادثے میں اوچ شریف کے نواحی علاقے خیرپور ڈاہا کے ایک ہی خاندان کے پانچ افراد جاں بحق و زخمی ہو گئے۔ حادثے کے بعد علاقے میں کہرام مچ گیا۔

ریسکیو 1122 کے مطابق موٹر سائیکل پر سوار دو خواتین، ایک مرد اور دو بچے سڑک کنارے کھڑے تھے کہ پیچھے سے آنے والی تیز رفتار کار نے زور دار ٹکر ماری۔ حادثے کے نتیجے میں 16 سالہ نگو مائی دختر پنو خان موقع پر جاں بحق ہو گئی، جبکہ چار افراد ماہیوال ولد کبیر خان (50 سال)، تسلیم بی بی زوجہ ماہیوال (45 سال)، محمد مجید ولد ماہیوال (10 سال) اور عالیہ دختر ماہیوال (18 سال) شدید زخمی ہو گئے۔

ریسکیو ٹیم نے فوری طور پر موقع پر پہنچ کر زخمیوں کو ابتدائی طبی امداد فراہم کی اور بعد ازاں تمام زخمیوں اور جاں بحق لڑکی کی نعش کو تحصیل ہیڈ کوارٹر ہسپتال احمد پور شرقیہ منتقل کر دیا۔

حادثے کی اطلاع ملتے ہی موٹر وے پولیس موقع پر پہنچ گئی اور قانونی کارروائی کا آغاز کر دیا گیا۔ عینی شاہدین کے مطابق کار کی رفتار حد سے زیادہ تھی، جبکہ موقع پر موجود افراد نے انتظامیہ سے ٹریفک قوانین پر سختی سے عملدرآمد اور اوور اسپیڈنگ کے خلاف کارروائی کا مطالبہ کیا ہے۔

اوچ شریف باغی ٹی وی (نامہ نگار حبیب خان)اوچ شریف کے نواحی علاقے رتڑ نہڑانوالی بستی عبداللہ خان سمیت قریبی دیہات میں لمپی وائرس اور منہ کھر کی وبا نے تباہی مچا دی، درجنوں مویشی ہلاک اور کسان شدید مالی بحران سے دوچار ہو گئے۔

تفصیلات کے مطابق وبا نے بستی عبداللہ خان، چاکر خان رند، بستی بہار خان اور دیگر قریبی علاقوں میں درجنوں جانوروں کو اپنی لپیٹ میں لے لیا ہے۔ کسان محمد دین کی قیمتی وچھی بیماری کے باعث تڑپ تڑپ کر مر گئی، جبکہ متعدد دوسرے مویشی بھی شدید متاثر ہیں۔

علاقہ مکینوں کا کہنا ہے کہ محکمہ لائیو اسٹاک کی ٹیمیں مکمل طور پر غائب ہیں۔ نہ ویکسین فراہم کی جا رہی ہے اور نہ ہی کسی ڈاکٹر کی جانب سے دورہ کیا گیا ہے۔ مقامی کسانوں نے بتایا کہ وہ پہلے ہی سیلاب کے نقصانات سے مالی طور پر کمزور ہو چکے ہیں اور اب یہ وائرس ان کے روزگار پر کاری ضرب لگا رہا ہے۔

اہلِ علاقہ نے الزام لگایا کہ محکمہ لائیو اسٹاک کے اہلکار محض فائلوں میں کارروائی دکھا رہے ہیں جبکہ زمینی سطح پر کوئی عملی اقدامات نظر نہیں آ رہے۔ جانور کئی کئی دن تک اذیت میں مبتلا رہتے ہیں مگر محکمہ خاموش تماشائی بنا ہوا ہے۔

عوامی حلقوں کا کہنا ہے کہ حکومتی عدم توجہی اور محکمانہ غفلت کی وجہ سے وبا تیزی سے پھیل رہی ہے، جس سے مویشی پال کسانوں کا بھاری نقصان ہو رہا ہے۔

علاقہ مکینوں نے ڈپٹی کمشنر بہاولپور اور ڈائریکٹر لائیو اسٹاک سے فوری نوٹس لینے، ایمرجنسی ویکسینیشن مہم شروع کرنے اور ذمہ دار اہلکاروں کے خلاف سخت کارروائی کا مطالبہ کیا ہے تاکہ مزید نقصان سے بچا جا سکے۔