Category: اہم خبریں

پاکستان نیول اکیڈمی کراچی میں 125ویں مڈشپ مین اور 33ویں شارٹ سروس کمیشن کورس کی پروقار پاسنگ آؤٹ پریڈ منعقد ہوئی، جس میں وزیراعظم شہباز شریف نے بطور مہمانِ خصوصی شرکت کی اور نمایاں کارکردگی کا مظاہرہ کرنے والے مڈشپ مین اور آفیسر کیڈٹس میں اعزازات تقسیم کیے۔

وزیراعظم شہباز شریف کی اکیڈمی آمد پر چیف آف دی نیول اسٹاف ایڈمرل نوید اشرف نے ان کا استقبال کیا، جس کے بعد وزیراعظم نے پاسنگ آؤٹ پریڈ کا معائنہ کیا اور سلامی لی،تقریب میں وزیر دفاع خواجہ آصف، وزیر اطلاعات عطا اللہ تارڑ، وزیراعلیٰ سندھ سید مراد علی شاہ، گورنر سندھ اور دیگر اعلیٰ سول و عسکری حکام نے بھی شرکت کی،اس سال پاس آؤٹ ہونے والے افسران میں پاکستان کے علاوہ برادر اور دوست ممالک بحرین، عراق اور جبوتی کے مڈشپ مین بھی شامل تھے، جو پاکستان نیوی کی پیشہ ورانہ تربیت پر عالمی اعتماد کا مظہر ہیں،تقریب کے دوران وزیراعظم شہباز شریف نے کورسز میں شاندار کارکردگی کا مظاہرہ کرنے والے کیڈٹس اور مڈشپ مین میں مختلف اعزازات تقسیم کیے۔

مڈشپ مین عمر مختار کو بہترین مجموعی کارکردگی پر اعزازی شمشیر (Sword of Honour) سے نوازا گیا، جبکہ مڈشپ مین ہادی عباس خان نے اکیڈمی ڈرک کا اعزاز اپنے نام کیا،اسی طرح آفیسر کیڈٹ الویرہ حمزہ کو کمانڈنٹ گولڈ میڈل جبکہ آفیسر کیڈٹ حافظ محمد احمد منور کو چیف آف ڈیفنس فورسز گولڈ میڈل سے نوازا گیا،تقریب کے اختتام پر وزیراعظم نے نو منتخب افسران کو مبارکباد دیتے ہوئے ان کے روشن مستقبل کے لیے نیک تمناؤں کا اظہار کیا اور ملکی بحری دفاع میں ان کے کردار کو اہم قرار دیا

بھارت کا سرکاری سطح پر اعتراف شکست، آپریشن سندور میں فوجی ہلاکتیں تسلیم کر لیں

بھارتی حکومت نے آپریشن سندور میں مارے گئے چھ اہلکاروں کے نام سرکاری طور پر ظاہر کر دیے ۔ کشمیرمیڈیا سروس کے مطابق فوجی ہلاکتیں کے اعتراف نے پاکستانی مؤقف کی سچائی پر سرکاری مہر ثبت کر دی ۔ بھارتی حکومت نے چھ اہلکاروں کے نام نیشنل وار میموریل کے رول آف آنر میں شامل کر دیے ۔ بھارتی حکومت سیاسی مفادات کی خاطر اپنے ہی فوجیوں کی قربانی کو چھپاتی رہی ۔ فوجیوں کے ورثا کے مسلسل دباؤ اور احتجاج کے بعد حکومت ان ناموں کو ظاہر کرنے پر مجبور ہوئی ۔ تسلیم شدہ ہلاکتوں میں صوبیدار میجر پون کمار، رائفل مین سنیل کمار ، لانس نائک دنیش کمار، ایوی ایشن ٹیکنیشن مود مرلی نائیک ، حوالدار سنیل کمار سنگھ، اور سارجنٹ سریندر کمار شامل ہیں- بھارتی اعترافات سے پاکستان کے اس مؤقف کو مزید تقویت ملی ہے کہ آپریشن سندور میں بھارت کو بھاری نقصان اٹھانا پڑا ۔ بھارت کی جانب سے نقصانات مرحلہ وار سامنے لائے جا رہے ہیں ۔ پاکستان نے ۱۰ انفنٹری بریگیڈ کو تباہ کرنے کا دعویٰ کیا تھا۔ صوبیدار میجر پون کمار کا تعلق اسی بریگیڈ ہیڈکوارٹر سے ہے ۔ پاکستان نے ادھم پور میں ایس ۴۰۰ میزائل شکن سسٹم کی بیٹری بھی تباہ کی تھی۔ سارجنٹ سریندر کمار ادھم پور میں ہلاک ہوا اور انہیں وایو میڈل سے نوازا گیا ۔ بھارت نے اپنی عوام کو دھوکا دینے ایس ۴۰۰ کی بیٹری کی تباہی کی تردید کی تھی۔ سیٹیلائٹ اور بھارت کے ریکارڈز اب تصدیق کر رہے ہیں کہ یہ اہم فارورڈ بیس مکمل طور پر مفلوج ہو چکا تھا۔ بین الاقوامی میڈیا نے تصدیق کی کہ پاکستان نے بھارت کے رافیل ، میراج 2000 اور متعدد دوسرے طیاروں کو مار گرایا.

وزیراعظم شہباز شریف نے کہا ہےکہ ایرانی صدر مسعود پزشکیان کا دورہ برادرانہ تعلقات ہیں اور یہ پاکستان کے اہم کردار کا اعتراف تھا۔

کراچی میں پاک بحریہ کی پاسنگ آؤٹ پریڈ سے خطاب کرتے ہوئے وزیراعظم نے کہا کہ پاس ہونے والے کیڈٹس کو مبارک باد پیش کرتا ہوں اور دوست ممالک کے کیڈٹس کو دیکھ کر خوشی ہوئی، معرکہ حق میں نیوی کا کردار شاندار رہا۔وزیراعظم شہباز شریف کا کہنا تھا کہ ایران اور امریکا کے درمیان معاہدے پاکستان کے لیے اعزاز کی بات ہے، پاکستان کی مخلصانہ کوششوں سے اسلام آباد مفاہمت کی یادداشت پر دستخط کیے گئے، اسلام آباد اکارڈ پر دستخط پاکستان کے لیے باعث اعزاز ہے، امریکا اور ایران کے درمیان مفاہمت کی یادداشت میں دوسمت ممالک کا تعاون قابل قدر رہا جب کہ قیام امن کے لیے فیلڈ مارشل عاصم منیر نےشب و روز انتھک محنت کی، ایرانی صدر مسعود پزشکیان کا دورہ برادرانہ تعلقات ہیں یہ پاکستان کے اہم کردار کا اعتراف تھا، خطے میں بڑی تبدیلیاں آ رہی ہیں جس کے دور رس اثرات ہوں گے، ہمارے مشرقی ہمسائے نے شکست کے بعد پراکسیز کا استعمال شروع کردیا ہے، پاکستان بیرون سرپرستی میں ہونے والی دہشتگردی کا سامنا کررہا ہے، افواج پاکستان دہشتگردی کو مکمل ناکام بنانےاور اس کے خاتمے کے لیے پرعزم ہیں، پاکستان دنیا میں امن کے علمبردار کے طور پر پہنچانا جاتا ہے، پاکستان کشمیر اور فلسطین میں کی غیر متزلزل حمایت جاری رکھے گا

بلوچستان کے اضلاع خاران اور مستونگ میں سکیورٹی فورسز کی کارروائیوں میں 8 دہشتگرد ہلاک ہوگئے۔

پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے 25 اور 26 جون کو فتنہ الہندوستان کے خلاف انٹیلی جنس بنیاد پر آپریشن کیا،آئی ایس پی آر نے بتایا کہ سکیورٹی فورسز نے خاران میں دہشتگردوں کے ایک گروہ کی نقل و حرکت کا سراغ لگایا، فورسز کی بروقت اور مؤثرکارروائی میں بھارتی پراکسی فتنہ الہندوستان کے 3دہشتگرد ہلاک اور متعدد زخمی ہوگئے،اس کے علاوہ 26جون کومستونگ میں ممکنہ خودکش حملہ آور کی موجودگی کی اطلاع پر قبل ازوقت انٹیلی جنس آپریشن کیا گیا جس میں فورسز نے دہشتگردوں کے ٹھکانے کو مؤثر انداز میں نشانہ بنایا۔ شدید فائرنگ کے تبادلے کے بعد 5 دہشتگرد ہلاک ہوگئے جن میں ایک خودکش حملہ آور بھی شامل تھا۔

بنوں: سیکیورٹی فورسز نے ضلع بنوں کے علاقے سردی خیل میں بروقت کارروائی کرتے ہوئے بھاری اسلحہ اور گولہ بارود سے لدی ایک مشکوک گاڑی کو تباہ کر دیا، جبکہ کارروائی کے دوران چار مبینہ دہشتگرد ہلاک ہو گئے۔

سیکیورٹی ذرائع کے مطابق 26 جون 2026 کو فورسز کو مصدقہ خفیہ اطلاع موصول ہوئی کہ سردی خیل کے علاقے میں ایک مشکوک گاڑی بھاری مقدار میں اسلحہ اور گولہ بارود لے کر نقل و حرکت کر رہی ہے۔ اطلاع ملتے ہی سیکیورٹی فورسز نے فوری کارروائی کرتے ہوئے گاڑی کا تعاقب شروع کیا۔ذرائع کا کہنا ہے کہ جب سیکیورٹی اہلکاروں نے گاڑی کو روکنے کی کوشش کی تو اس میں سوار مسلح افراد نے فائرنگ شروع کر دی، جس کے جواب میں فورسز نے مؤثر کارروائی کی۔سیکیورٹی ذرائع کے مطابق فائرنگ کے تبادلے کے دوران گاڑی میں موجود بھاری اسلحہ، جس میں 12.7 ملی میٹر گن، آر پی جی راکٹ اور 75 ملی میٹر مارٹر گولے شامل تھے، زور دار دھماکے سے پھٹ گئے، جس کے نتیجے میں گاڑی مکمل طور پر تباہ ہو گئی۔ذرائع کے مطابق دھماکے اور جوابی کارروائی کے نتیجے میں گاڑی میں سوار چار مبینہ دہشتگرد ہلاک ہو گئے۔

سیکیورٹی ذرائع نے مزید بتایا کہ علاقے میں ممکنہ طور پر فرار ہونے والے دیگر مشتبہ افراد کی تلاش کے لیے سرچ اور کلیئرنس آپریشن تاحال جاری ہے، جبکہ سیکیورٹی فورسز نے علاقے کو گھیرے میں لے کر تلاشی کا عمل مزید تیز کر دیا ہے۔

بھارت نے مئی 2025 میں معرکہ حق کے دوران ہلاک ہونے والے اپنے فوجیوں کی شناخت پہلی بار سرکاری سطح پر ظاہر کر دی ہے۔

بھارتی میڈیا رپورٹس کے مطابق بھارتی حکومت نے آپریشن سندور کے دوران مارے جانے والے چھ اہلکاروں کے نام جاری کیے ہیں۔ بھارتی اخبار دی ہندو کے مطابق ان میں بھارتی فوج کے پانچ جبکہ بھارتی فضائیہ کا ایک اہلکار شامل ہے۔بھارتی میڈیا کے مطابق یہ پہلا موقع ہے کہ حکومت نے اس فوجی کارروائی میں ہلاک ہونے والے اہلکاروں کی شناخت باضابطہ طور پر عوام کے سامنے پیش کی ہے۔بھارتی اخبار کے مطابق ہلاک فوجیوں میں میجر پون کمار، سنیل کمار ، لانس نائیک دنیش کمار، اگنی ویر ، حوالدار سنیل کمار سنگھ اور فضائیہ کے سارجنٹ سریندر کمار شامل ہیں۔

یاد رہے کہ مئی 2025 میں پہلگام واقعے کے بعد بھارت نے پاکستان پر الزام عائد کرتے ہوئے 6 اور 7 مئی کی درمیانی شب پاکستان کے مختلف مقامات پر حملے کیے تھے۔ پاکستان کا مؤقف تھا کہ ان حملوں میں معصوم شہری نشانہ بنے۔پاکستان نے اس کارروائی کے جواب میں بھرپور دفاعی ردعمل کا دعویٰ کرتے ہوئے کہا تھا کہ اس نے بھارتی فضائیہ کے متعدد جنگی طیارے مار گرائے، جن میں تین رافیل طیارے بھی شامل تھے۔ جب بھارت جارحیت سے باز نہ آیا تو چند روز میں پاکستان نے بھارت پر ایسا جوابی وار کیا جس نے اسے نہ صرف بھاری جانی و مالی نقصان پہنچایا بلکہ پاکستان کو بھارت پر عسکری اعتبار سے برتری دلادی۔

بھارت نے ایک سال سے زائد عرصہ گزرنے کے باوجود صرف چند فوجیوں کی شناخت ظاہر کی ہے، جبکہ مزید ہلاک ہونے والے اہلکاروں کے بارے میں سرکاری طور پر کوئی تفصیلات جاری نہیں کی گئیں،

بلوچستان: آپریشن "ترسانی ہنٹ” کے پہلے مرحلے میں دہشتگردوں کے ٹھکانے پر کارروائی،2 دہشت گرد ہلاک، بھاری مقدار میں اسلحہ، بارودی مواد اور بڑی مقدار میں لاجسٹک سامان برآمدکر لیاگیا

بلوچستان میں سیکیورٹی فورسز نے آپریشن "ترسانی ہنٹ” کے پہلے مرحلے کو کامیابی سے مکمل کرتے ہوئے دو دہشت گردوں کو ہلاک کر دیا،ذرائع کے مطابق ایک دہشت گرد کی لاش موقع سے برآمد کر لی گئی، جبکہ دوسرے کی ہلاکت اور ایک دہشت گرد کے زخمی ہونے کی تصدیق ہوئی۔کارروائی کے دوران دہشت گردوں کے ٹھکانے سے بڑی مقدار میں اسلحہ، گولہ بارود، دھماکہ خیز مواد اور لاجسٹک سامان برآمد کیا گیا۔ برآمد ہونے والے سامان میں بی ایل اے کا پرچم، آئی ای ڈیز، آئی ای ڈی بنانے کا سامان، تقریباً 2 کلوگرام دھماکہ خیز مواد، آر پی جی، یو بی جی ایل گولے، پی کے ایم گولیاں، وائرلیس سیٹ، سولر پینلز، بیٹریاں، ادویات، خوراک، کمبل، پانی کے کین اور دیگر ضروری سامان شامل ہے۔

سیکیورٹی فورسز نے کارروائی کے دوران دہشت گردوں کے متعدد سیکنڈری دھماکہ خیز آلات بھی ناکارہ بنا دیے، جبکہ برآمد شدہ مواد کو مزید تفتیش اور فرانزک جانچ کے لیے محفوظ مقام پر منتقل کر دیا گیا ہے۔ذرائع کا کہنا ہے کہ علاقے میں کلیئرنس اور سرچ آپریشن جاری ہے۔

پنجگور: سیکیورٹی فورسز نے بلوچستان کے ضلع پنجگور میں خفیہ اطلاع پر مبنی کامیاب کارروائی کرتے ہوئے دہشتگردی کا ایک بڑا منصوبہ ناکام بنا دیا۔ کارروائی کے دوران بھاری مقدار میں اسلحہ، دھماکا خیز مواد اور مواصلاتی آلات برآمد کر لیے گئے۔

سیکیورٹی ذرائع کے مطابق انٹیلی جنس اطلاعات کی بنیاد پر کی گئی کارروائی میں اہلکاروں نے ایک مشکوک گاڑی کو روک کر اس کی تلاشی لی، جس کے دوران چار راکٹ فیوز، متعدد دیسی ساختہ بم (آئی ای ڈیز) اور دہشتگردانہ سرگرمیوں میں رابطے اور منصوبہ بندی کے لیے استعمال ہونے والا مواصلاتی سامان برآمد ہوا۔ابتدائی تحقیقات کے مطابق برآمد ہونے والا دھماکا خیز مواد اور دیگر سامان علاقے میں تخریبی کارروائی کے لیے استعمال کیا جانا تھا، جس کا مقصد امن و امان کی صورتحال کو خراب کرنا اور شہریوں کی جانوں کو خطرے میں ڈالنا تھا۔ تاہم سیکیورٹی فورسز کی بروقت کارروائی نے اس مذموم منصوبے کو ناکام بنا دیا اور ایک ممکنہ بڑے سانحے سے بچا لیا۔

کارروائی کے فوراً بعد علاقے کو گھیرے میں لے کر سرچ آپریشن شروع کر دیا گیا، جبکہ واقعے میں ملوث دیگر عناصر اور سہولت کاروں کی تلاش بھی جاری ہے۔ حکام کا کہنا ہے کہ تحقیقات کے ذریعے اس نیٹ ورک کی نشاندہی کی جا رہی ہے جو اس منصوبے کے پیچھے کارفرما تھا، تاکہ اس کے تمام ڈھانچے کو مکمل طور پر ختم کیا جا سکے۔سیکیورٹی حکام نے اس عزم کا اعادہ کیا ہے کہ ملک میں امن و استحکام کے قیام کے لیے انٹیلی جنس پر مبنی کارروائیاں مسلسل جاری رہیں گی اور دہشتگرد عناصر کے خلاف بلاامتیاز اقدامات کیے جائیں گے۔حکام کے مطابق پنجگور میں کی جانے والی یہ کامیاب کارروائی دہشتگردی کے خلاف جاری مہم میں ایک اہم پیش رفت ہے، جو سیکیورٹی فورسز کی پیشہ ورانہ صلاحیت، باہمی رابطے اور قومی سلامتی کے تحفظ کے لیے ان کی مؤثر حکمت عملی کی عکاسی کرتی ہے۔

ایرانی صدر مسعود پزشکیان نے اسلامی ممالک کے درمیان اتحاد و یکجہتی کو فروغ دینے کے لیے ایک مضبوط اور مؤثر مسلم بلاک کے قیام کی تجویز پیش کرتے ہوئے کہا ہے کہ ایسا پلیٹ فارم مشترکہ چیلنجز سے نمٹنے، علاقائی بحرانوں کے حل اور خطے میں امن و استحکام کے فروغ میں اہم کردار ادا کر سکتا ہے۔

ایرانی میڈیا کے مطابق صدر مسعود پزشکیان نے اسلام آباد میں فیلڈ مارشل عاصم منیر سے ملاقات کے دوران پاکستان کی حکومت، عوام اور عسکری قیادت کی خطے میں امن کے قیام اور ثالثی کے لیے کی جانے والی تعمیری کوششوں کو سراہا۔ انہوں نے کہا کہ پاکستان کے سفارتی اقدامات مسلم ممالک کے درمیان یکجہتی اور تعاون کے حوالے سے اس کے مضبوط مؤقف کی عکاسی کرتے ہیں۔ایرانی صدر نے کہا کہ ایران اور پاکستان کے تعلقات سیاسی، اقتصادی اور اسٹریٹجک شعبوں میں تعاون کے ایک نئے مرحلے میں داخل ہو رہے ہیں۔ ان کا کہنا تھا کہ اسلامی دنیا بے پناہ سیاسی، اقتصادی اور انسانی صلاحیتوں کی حامل ہے، لہٰذا مسلم ممالک کے درمیان زیادہ سے زیادہ ہم آہنگی علاقائی مسائل کے حل اور درپیش مشکلات سے نمٹنے کی صلاحیت کو مزید مضبوط بنا سکتی ہے۔

ملاقات کے دوران فیلڈ مارشل عاصم منیر نے ایرانی صدر کو حالیہ مذاکرات اور ایک اہم معاہدے پر دستخط کے حوالے سے آگاہ کیا اور ایران کی اعلیٰ قیادت، بالخصوص صدر مسعود پزشکیان کی حمایت کو سراہا۔فیلڈ مارشل عاصم منیر نے عالم اسلام میں امن کے قیام کی اہمیت پر زور دیتے ہوئے کہا کہ پاکستان اس اصول پر یقین رکھتا ہے کہ کسی بھی مسلمان قوم کو مشکلات اور مصائب کا شکار نہیں ہونا چاہیے۔ انہوں نے مزید کہا کہ ایران نے ثابت قدمی کا مظاہرہ کرتے ہوئے اسرائیل کو ایک اہم پیغام دیا ہے اور اپنے حقوق کے دفاع میں کامیابی حاصل کی ہے۔ملاقات میں دونوں ممالک کے درمیان باہمی تعاون، علاقائی امن اور مسلم دنیا کے اتحاد کے فروغ سے متعلق امور پر بھی تبادلہ خیال کیا گیا۔

مظفرآباد: چیف سیکرٹری آزاد کشمیر اور آئی جی پولیس آزاد کشمیر کی مشترکہ پریس کانفرنس کو عوامی حلقوں کی جانب سے بھرپور پذیرائی حاصل ہوئی ہے۔ شہریوں نے اعلیٰ حکام کی جانب سے پیش کیے گئے شواہد اور حقائق کو سراہتے ہوئے کہا ہے کہ پریس کانفرنس نے کالعدم کمیٹی کے مبینہ گمراہ کن بیانیے کو بے نقاب کر دیا ہے۔

عوامی نمائندوں اور مختلف شعبہ ہائے زندگی سے تعلق رکھنے والے افراد کا کہنا ہے کہ راولاکوٹ ہسپتال کے واقعے میں پہل کالعدم کمیٹی کی جانب سے کی گئی، تاہم بعد ازاں جوابی کارروائی کو بنیاد بنا کر حقائق کے برعکس پروپیگنڈا کیا گیا۔ شہریوں کے مطابق پریس کانفرنس میں پیش کیے گئے شواہد نے صورتحال کو واضح کر دیا اور عوام کو اصل حقائق سے آگاہ کیا۔شہریوں نے اس بات پر بھی تشویش کا اظہار کیا کہ بعض انتشار پسند عناصر نوجوانوں کو ورغلا کر انہیں ریاستی اداروں کے خلاف استعمال کرنے کی کوشش کر رہے ہیں۔ ان کا کہنا تھا کہ نوجوانوں کے ہاتھوں میں ڈنڈے تھما کر اشتعال انگیزی اور بدامنی کو فروغ دینا کسی صورت قابل قبول نہیں۔

عوامی حلقوں نے الحاقِ پاکستان کے خلاف کسی بھی مطالبے یا بیانیے کو مسترد کرتے ہوئے کہا کہ پاکستان سے وابستگی کشمیری عوام کے ایمان، نظریے اور اجتماعی شناخت کا بنیادی حصہ ہے۔ انہوں نے اس مؤقف کو ریاستی مفاد اور عوامی امنگوں کے مطابق قرار دیا۔شہریوں کا کہنا تھا کہ قانونی اور آئینی معاملات کو طاقت یا تشدد کے ذریعے حل نہیں کیا جا سکتا، اس لیے عوام کو چاہیے کہ وہ شرپسند عناصر اور انتشار پھیلانے والی کمیٹیوں سے دور رہیں اور قانون کے دائرے میں رہتے ہوئے اپنے مسائل کے حل کے لیے کوشش کریں۔عوام نے ریاستی معاملات پر کھل کر مؤقف اختیار کرنے اور حقائق قوم کے سامنے لانے پر چیف سیکرٹری اور آئی جی پولیس آزاد کشمیر کا شکریہ ادا کیا۔ ان کا کہنا تھا کہ موجودہ حالات میں ریاستی اداروں اور عوام کے درمیان مکمل ہم آہنگی موجود ہے اور آزاد کشمیر کے عوام ریاستی استحکام، امن اور قانون کی بالادستی کے ساتھ کھڑے ہیں۔

شہریوں نے اس عزم کا اظہار کیا کہ آزاد کشمیر میں امن و امان، قومی یکجہتی اور ریاستی اداروں کے وقار کے خلاف کسی بھی سازش یا انتشار انگیز سرگرمی کو کامیاب نہیں ہونے دیا جائے گا۔