Category: اہم خبریں

اسلام آباد:برٹش کونسل کو جولائی-اگست میں ‘خصوصی’ امتحانات کیلئے این او سی جاری:وفاقی وزیرتعلیم نے تصدیق کردی ،اطلاعات کے مطابق وفاقی وزیر تعلیم شفقت محمود نے برٹش کونسل کو جولائی-اگست میں ‘خصوصی’ او لیول امتحانات لینے کے لیے نو اوبجیکشن سرٹیفیکیٹ (این او سی) جاری کردیا۔

سماجی رابطے کی ویب سائٹ ٹوئٹر پر وفاقی وزیر تعلیم شفقت محمود نے کہا کہ ‘ہم نے آج برٹش کونسل کو ایک این او سی جاری کردیا ہے اور 26 جولائی سے 6 اگست تک خصوصی او لیول امتحانات لینے کی اجازت دی گئی ہے’۔انہوں نے کہا کہ اس فیصلے سے او لیول کے طلبہ کو ستمبر سے اے لیول یا ایف اے/ ایف ایس سی کی تعلیم شروع کرنے میں سہولت ہوگی۔

شفقت محمود کا کہنا تھا کہ ‘جولائی میں اس طرح کے امتحان کی مثال نہیں ہے اور میں خوش ہوں کہ کیمبرج نے انتظامات کرلیے ہیں’۔

وزیر تعلیم نے برٹش کونسل کے کنٹری ڈائریکٹر کو لکھا گیا خط بھی شیئر کیا، جس میں کہا گیا کہ ایجنسی ’26 جولائی 2021 سے 6 اگست 2021 تک ذیلی امتحان سیریز شروع کرنے کے لیے مکمل طور پر بااختیار ہے تاہم کووڈ-19 کی تمام موجودہ ایس اوپیز پر عمل درآمد ضروری ہے’۔

شفقت محمود نے ٹوئٹرپر کہا کہ وبا نے ہر شعبہ ہائے زندگی کو مشکل میں ڈال دیا ہے لیکن خاص کر تعلیم زیادہ مشکلات کا شکار ہے۔انہوں نے کہا کہ ‘ہم تعلیمی سلسلے کو جاری رکھنے کے لیے سخت فیصلے لے رہے ہیں، ہر فیصلے کے فائدے اور نقصانات ہوتے ہیں لیکن ہمارے لیے طلبہ کا مفاد ہر وقت عزیز ہے’۔

خیال رہے کہ اس سے قبل حکومت نے ملک میں کورونا کیسز میں اضافے کے پیش نظر امتحانات ملتوی کردیے تھے۔

یاد رہے کہ وفاقی وزیر تعلیم نے اپریل کے آخر میں اعلان کیا تھا کہ 15 جون تک ملک میں امتحانات نہیں ہوں گے کیونکہ ملک میں کووڈ-19 کے باعث کیسز اور اموات میں اضافہ ہورہا ہے۔

We issued an NOC today to British Council allowing it to hold special O level exams from July 26 to August 6. This will facilitate O level students to start A level or FA/Fsc from September. This kind of exam in July is unprecedented and I am happy that Cambridge is arranging it pic.twitter.com/bYIikHAECD

— Shafqat Mahmood (@Shafqat_Mahmood) May 27, 2021

یہ بھی یاد رہے کہ اس موقع پرجب ایک طرف کورونا وائرس کی تباہیاں ہرطرف پھیل رہی تھیں اورطالبعلموں کے ساتھ ساتھ ان کے والدین بھی پریشان تھے تواس موقع پرمعروف صحافی مبشرلقمان نے قدم آگے بڑھاتے ہوئے این سی او سے کے چیئرمین سے درخواست کی تھی کہ خدارا اپنے نونہالوں کی زندگیوں سےنہ کھیلیں اورجب تک وبا میں کمی نہیں آتی یہ امتحانات ملتوی کردیئے جائیں

اس پر وفاقی وزیر اور این سی اوسی کے چیئرمین اسد عمر نے یہ یقین دہانی کروائی تھی کہ وہ ضرور اس حوالے سے مثبت جواب دیں گے اورپھرانہوں نےمبشرلقمان کے ساتھ کیئے ہوئے وعدے کو نبھایا اورامتحانات ملتوی کردیئے تھے

پھر اس کے بعد وفاقی وزیرتعلیم نے بھی اسی تناظرمیں او اور اے لیول امتحانات ملتوی ہونے کا بھی اعلان کیا تھا جو اس وقت شروع ہوچکے تھے تاہم انہوں نے کہا تھا یہ امتحانات اب اکتوبر اور نومبر میں ہوں گے۔

تاہم اب کورونا وبا میں کمی آنے پردوبارہ امتحانات کا شیڈول دے دیا گیا ہے

علی طفر رپورٹ حکومت پھنس گئی ، عمران خان حیران شہزاد اکبر پریشان ، سیاسی کھیل کا نیا چیمپئن سامنے آگیا

باغی ٹی وی : سینئر اینکر پرسن مبشر لقمان نے کہا ہے کہ ایک طرف جہاں اپوزیشن کی دھینگا مشتی چل رہی ہے وہاں حکومت کی ہر چال اس کے گلے کی ہڈی بن رہی ہے . حکومت نے جہانگیر ترین کے احتساب کو اس لیے کرنے کی اجازت دی کہ لوگ کہیں‌گے کہ خان نے ایسا احتساب کیا ، ایسا احتساب کیا کہ اپنے قریبی ساتھ کو بھی معاف نہیں کیا.

یوں ان کی بلے بلے ہوجائے گی. کیا پتہ تھا کہ یہاں تو لینے کے دینے پڑ جائیں گے اور آگے سے ترین کی ریڈی میڈ چال سے ان کو منہ کی کھانی پڑ جائیں‌گے .

مبشر لقمنان کا کہنا تھا کہ جے کے ٹی گروپ کی وزیراعظم سے ملاقات کے بعد انہوں‌نے بیرسٹر علی ظفر کو تحقیق کرنے کا کہا کہ پتہ کریں کہ واقعی جہانگیر ترین کو سیاسی انتقام کا نشانہ بنایاجارہا ہے ؟ . اس رپورٹ میں‌ ایسا کیا ہے جو حکومت کے ناک میں‌دم کرسکتا ہے اور وزیر اعظم کے احتساب کے بیانیے کا جنازہ نکال سکتا ہے .

یہ رپورٹ باقاعدہ نہیں دی گئی لیکن اس کے خاص نکات وزیر اعظم کو سنا دیے گئے ہیں . اس رپورٹ کے مطابق جہانگیر ترین پر عائد الزامات کے واضح ثبوت نہیں ہیں . جبکہ ان پر اور ان کے بیٹے پر ایف آئی آر کاٹ کر انہیں ٹارگٹ کیا جارہا ہے ،

مبشر لقمان کا کہنا تھا کہ بیرسٹر علی ظفر ، شہزاد اکبر اور وزیر اعظم یہ سب موجود تھے اس میں‌ بیرسٹر علی ظفر کے سوالات کے شہزاد اکبر جواب دیتے رہے . جس میں‌ ان کا کہنا تھا کہ جہانگیر ترین پر ایف آئی آر شوگر کمیشن کی سفارشات پر کاٹی گئیں‌. اور یہ ان تمام ناموں پر کاٹی گئی جبکہ شہزاد اکبر اور اٹارنی جنرل اس معاملے پر ایک پیچ پر نظر آئے .

ان کا کہنا تھا کہ اب صورت حال یہ ہے کہ جہانگیر ترین اس رپورٹ کو منظر عام پر لانا چاہتے ہیں جبکہ حکومت اس کو چھپانا چاہتی ہے . اگر یہ رپورٹ منظر عام پر آجاتی ہے تو اس سے ترین کے کیس پر شاید اثر نہ پڑے لیکن اس سے عوامی رائے میں فرق ضرور پڑے گا. جبکہ حکومت کے لیے یہ زہر قاتل ثابت ہوگی .

اپوزیشن یہ کہے گی یہ لوگ اپنے مخالفین اور اپوزیشن کے لوگوں کو سیاسی انتقام کا نشانہ بنا رہے ہیں‌اور اپوزیشن کے ساتھ یہ ہونا ہی تھا . عمران خان کے اینٹی کرپشن منترے کا جنازہ نکل جائے گا. اور حکومت کا احتساب کا نعرہ ایک مذاق بن جائے گا.

ایف آئی اے کا کہنا تھا کہ اگر ان کو ترین سمیت تمام لوگوں کو گرفتار کرنے کی اجازت دی جائے تو یہ معاملہ دو ہفتے میں حل ہو جائے گا. ایک طرف تو عمران خان ترین کو گرفتار نہ کرنے کا تاثر دے رہے ہیں تو دوسری طرف طاقتور حلقے بھی ان کو گرفتار کرنے کا گرین سگنل نہیں‌دے رہے . ان کے مطابق اس سے کاروباری حلقوں پر منفی اثر پڑے گا. جو کہ پہلے ہی ڈرے ہوئے ہیں اور ملک میں‌معیشت کا برا حال ہے .

مبشر لقمان کا کہنا تھا کہ اب اس حوالے سے شوگر کمیشن کیس پر ہونے والی پیش رفت کا اندازہ لگا سکتےہیں . اب فائلیں‌دبائی جائیں گی .کہانیاں میڈیا کی زینت بنیں‌گی ، دوسری طرف ہم نظر دوڑائیں تو پارٹی کے اندر بھی دھینگا مشتی جاری ہے . اس بات کا اندازہ لگانا مشکل نہیں ہے کہ وہ لوگ جو نہ صرف دوسری پارٹیوں پر تیر چلا رہے ہیں بلکہ اپنی پارٹی پر بھی چھریاں چلا رہے ہیں‌.

مبشر لقمان کا کہنا تھا کہ مریم نواز جو پہلے چپ تھیں‌اب وہ میدان میں‌ آگئی ہیں‌ اور اپوزیشن پی پی پی کے ساتھ بیان بازی کر کے اپنے سینئراور شہباز شریف کو سبوتاز کر رہی ہیں . مولانا کا خیال ہے کہ کھیل وہ کھیلا جائے جس میں وہ اہم کھلاڑی ہوں‌ ورنہ نہ وہ کھیل ہو اور نہ وہ ہوں‌ گے .

اسلام آباد:اقوام متحدہ کی جنرل اسمبلی کے صدرولکان بوزگیرکی وزیراعظم عمران خان سے اہم ملاقات:زیربحث آئے اہم معاملات،اطلاعات کے مطابق آج شام وزیر اعظم عمران خان سے اقوام متحدہ کی جنرل اسمبلی کے صدر جناب ولکان بوزکیر نے آج اہم ملاقات کی۔

ذرائع کے مطابق اس اہم ملاقات میں COVID-19 وبائی امراض کے تناظر میں علاقائی اور بین الاقوامی امن و سلامتی ، پائیدار ترقی اور معاشی بحالی کی کوششوں سے متعلق مختلف امور پر تبادلہ خیال کیا گیا۔

وزیراعظم سے ملاقات کے دوران اقوام متحدہ کے ایجنڈے جیسے فلسطین ، جموں و کشمیر تنازعہ ، افغان امن عمل اور جرم ، بدعنوانی اور رشوت ستانی سے غیر قانونی مالی بہاؤ جیسے اہم اشیا پر تبادلہ خیال کیا گیا۔

وزیر اعظم نے فلسطین کے بارے میں جنرل اسمبلی کا خصوصی اجلاس بلانے میں جنرل اسمبلی کے صدر ولکان بوزگیر کے کردار کی تعریف کرتے ہوئے اس بات پر زور دیا کہ جنگ بندی کے اعلان کے بعد امن عمل کی بحالی اور اقوام متحدہ کی متعلقہ قراردادوں کے مطابق ایک منصفانہ اور پائیدار حل کو یقینی بنانے کے لئے اقدامات کئے جانے چاہئیں۔ ن۔

وزیر اعظم نے کثیرالجہتی کے لئے پاکستان کی مضبوط وابستگی پر زور دیا کہ اقوام متحدہ نے مرکزی کردار ادا کیا ہے۔ انہوں نے اقوام متحدہ کے زیراہتمام اقوام متحدہ کے زیراہتمام ماحولیاتی تبدیلیوں اور ماحولیاتی ہراس کو دور کرنے کے لئے بین الاقوامی تعاون کی ضرورت پر روشنی ڈالی ، ساتھ ہی ساتھ ترقی پذیر ممالک کی معاشی بحالی کی کوششوں اور پائیدار ترقیاتی اہداف کے حصول کے لئے 2030 کی تاریخ تک مدد کی غرض سے قرضوں کے حوالے سے ریلیف دینے پر بھی زوردیا

اقوام متحدہ کی جنرل اسمبلی کے صدر بوزکیر نے وزیر اعظم کو اقوام متحدہ کی جنرل اسمبلی کے اپنے ایوان صدر کے دوران اہم بین الاقوامی سیاسی اور سماجی و معاشی امور کو حل کرنے کے لئے کیے گئے مختلف اقدامات کے بارے میں آگاہ کیا۔

یاد رہےکہ اقوام متحدہ کی جنرل اسمبلی کے صدر ولکان بوزکیر 26 سے 28 مئی 2021 ء کو وزیر خارجہ مخدوم شاہ محمود قریشی کی دعوت پر پاکستان کے سرکاری دورے پر ہیں۔

یہاں اس بات کا ذکرکرنا بھی بہت ضروری ہے کہ ولکان بوزگیر اقوام متحدہ کی جنرل اسمبلی کی صدارت کرنے والے پہلے ترک شہری۔ سابق سفارتکار اور ایک سینئر سیاستدان ہیں۔ اس سے قبل انہوں نے اگست 2020 میں پاکستان کا دورہ کیا تھا اور اس موقع پر وزیر اعظم سے بھی ملاقات کی تھی۔

اسلام آباد /گلگت بلتستان:کپتان کا گلگت بلتستان :سیاحت کے میدان میں انقلاب آگیا :نارتھ ایئر کو سول ایوی ایشن سے لائسنس مل گیا ا،طلاعات کے مطابق کرونا کی وباء کے باعث پاکستان سمیت دنیا بھر میں سیاحت کا شعبہ بری طرح متاثر ہوا ہے۔ سول ایوی ایشن اتھارٹی (سی اے اے) نے سیاحت کے فروغ کے لیے حالیہ لانچ ہونے والی ایئر لائن ’نارتھ ایئر‘ کو لائسنس دے دیا ہے۔

وزیراعظم عمران خان نے اقتدار سنبھاتے ہی ملک میں سیاحت کے شعبے کو فروخت دینے کی بات کی تھی۔ انتظامیہ کے حالیہ اقدامات سے یہ ظاہر ہوتا ہے کہ وزیر اعظم اس حوالے سے نہایت سنجیدہ ہیں۔

سول ایوی ایشن اتھارٹی نے نارتھ ایئر کو ٹورازم پروموشن اور ریجنل انٹی گریشن (ٹی پی آر آئی) کا لائسنس دے دیا ہے۔ مستقبل قریب میں نارتھ ایئر کی گلگت، اسکردو، گوادر اور چترال کے لیے پروازیں چلیں گی۔

Launch of new privately-owned Pakistani airline named "North Air" planned with initial destinations including Islamabad, Gilgit, Skardu, Chitral and Gwadar.

Details: https://t.co/46JfD6AE6P pic.twitter.com/R7vO1hRToL

— Pakistan Aviation News 🇵🇰 (@avpak3) May 20, 2021

گلگت سے باغی ٹی وی کے نمائندہ عبدالستاربلتی کے مطابق ابتداء میں ایئر لائن کی چاروں پروازیں اسلام آباد سے اڑان بھریں گی۔ان کا کہنا تھا کہ اس فیصلے سے گلگت بلتستان کے لوگوں‌ کوبہت زیادہ خوشی ہوئی ہے اوراس وجہ سے سیاحت میں اضافہ ہوگا اوراس علاقے کے غریب لوگوں کو بھی روزگار کے مواقع حاصل ہوسکتے ہیں

عبدالستاربلتی کے مطابق وزیراعظم عمران خان کے ان فیصلوں کی بدولت علاقے میں کاروباری سرگرمیوں میں بھی تیزی آئی ہے اورلوگوں نے اس حکومت سے اپنی امیدیں بھی وابستہ کرلی ہیں‌

عبدالستاربلتی کہتے ہیں‌ کہ اگلے مرحلے میں لاہور اورکراچی سے بھی براہ راست نارتھ ایئرلائنز اپنی پروازوں کواڑانے کا منصوبہ رکھتی ہے

باغی ٹی وی کے رپورٹرعبدالستاربلتی کا کہنا ہے کہ پہلی پرواز اسلام آباد سے گلگت ، دوسری پروازاسلام آباد سے اسکردو ، تیسری پرواز اسلام آباد سے چترال اورچوتھی پرواز اسلام آباد سے گوادر کے لیے جایا کرے گی

عبدالستاربلتی کے مطابق نارتھ ایئرہنزہ وادی کے ایک معروف بزنس مین نظیم الامین کا منصوبہ ہے اوروہ علاقے کی عوام کے لیے بہترین سفری سہولیات بہم پہنچانے کی خواہش رکھتے ہیں

ادھر اس حوالے سے یہ بھی معلوم ہوا ہے کہ اسلام آباد انٹرنیشنل ایئرپورٹ پر حالیہ لانچ ہونے والی اس ایئرلائن کا ہیڈ آفس قائم کردیا گیا ہے۔ ابتداء میں نارتھ ایئر کی چاروں پروازیں اسلام آباد سے اڑان بھریں گی۔